20/07/18

Paîs Catalans: ritirâts i ordins internazionâi di arest pai esiliâts

Il tribunâl superiôr dal Schleswig-Holstein al à decidût di acetâ la domande di estradizion pal ex president dal guvier catalan Carles Puigdemont dome pe acuse di malversazion e no par chê di ribelion. Pai magjistrâts todescs intal câs catalan a mancjin i elements di violence che a coventin par tignî sù une acuse di ribelion; invezit, dal moment che nol è ancjemò clâr se lis spesis par davuelzi il referendum dal prin di Otubar a sedin stadis sostignudis dutis di privâts, e reste in pîts la acuse mote al esecutîf catalan di vê spindût bêçs publics par une votazion che e jere stade proibide des autoritâts statâls.
La decision dal tribunâl todesc, in plui di dâi un altri colp ae credibilitât de ofensive judiziarie metude in at de magjistrature spagnole cuintri dal indipendentisim catalan, i lasseve al titolâr de inchieste – il judiç Pablo Llarena – dome trê opzions. La prime e je chê di acetâ la decision de magjistrature todescje e di processâ Puigdemont dome par malversazion: si varès cussì il paradòs che cui che al jere a cjâf dal procès referendari catalan si cjatarès a frontâ une acuse secondarie e duncje penis plui bassis dai membris dal so guvier. La seconde opzion e je di fâ ricors cuintri de decision todescje alì dal tribunâl di justizie european, cul risi però che une sentence negative e palesi inmò plui a clâr la mancjance di fondis des acusis imbastidis de magjistrature spagnole. La tierce e je chê di rinunciâ ae estradizion di Puigdemont: in cheste maniere si lu lassarès libar ma, cu la menace di arest inmò in pîts, i si impedirès par almancul vincj agns (o sei il timp pe prescrizion dal reât) di tornâ intal stât spagnûl. Ta chest câs, duncje, si condanarès Puigdemont al esili, ma intun mût che al infuartirès il so status di perseguitât politic.
Ai 19 di Lui Llarena al à fat savê di rinunciâ ae estradizion di Puigdemont e al à ritirât i ordins internazionâi di arest no dome cuintri dal ex president catalan, ma ancje di chei altris politics catalans esiliâts in Belgjiche, Scozie e Svuizare (Toni Comín, Meritxell Serret, Lluis Puig, Clara Ponsatí e Marta Rovira). Il judiç spagnûl nol à mancjât di criticâ la decision dal tribunâl todesc che, a so parê, e je jentrade intal mert de vicende cun judizis che si fondin dome suntune part dal materiâl probatori. A chest pont, Puigdemont e chei altris ex membris dal guvier catalan a àn libertât di moviment fûr dal stât spagnûl ma no puedin tornâ in Catalogne par vie che cuintri di lôr al reste ancjemò in pîts il mandât di arest dentri dal teritori statâl.
Font: Naiz:, 19/07/18; VilaWeb, 12/07/18; El País, 13/07/18

Nessun commento: