08/05/18

Paîs Basc: acuardi par sburtâ l’euskara in Ipar EH

Ai 25 di Avrîl il guvier de Comunitât Autonome Basche, tal stât spagnûl, e l’Ufici public de lenghe basche (Euskararen Erakunde Publikoa) che al opere in Ipar Euskal Herria, o sei il Paîs Basc setentrionâl sot aministrazion francese, a àn ratificât l’acuardi par promovi in maniere unitarie l’euskara. Tra lis liniis di azions che lis dôs istituzions si son impegnadis a svilupâ in maniere coordenade si à il plen ricognossiment dai sistemis in vore pe certificazion linguistiche e la publicazion des relazions finâls su la seste inchieste sociolinguistiche sul basc. Cun di plui, pal 2018, si previôt un impegn finanziari di un milion e 930 mil euros che a laran pe plui part a organizazions dal Paîs Basc setentrionâl che a lavorin a pro de lenghe basche te educazion, tai mieçs di comunicazion e te culture.
Font: EiTB, 25/04/18

Nessun commento: