05/02/18

Corsiche: scuintri dûr tra Parîs e la Coletivitât Teritoriâl

Se l’incuintri dai 5 di Zenâr cu la delegade dal ministeri pal interni Jacqueline Gourault al veve viert une prospetive di dialic jenfri il guvier nazionalitari de Coletivitât Teritoriâl uniche de Corsiche e lis autoritâts francesis, i incuintris che si son tignûts a Parîs tra lunis ai 22 e miercus ai 24 di Zenâr no àn mostrât nissun spazi di tratative tra lis parts.
Daûr di ce che a àn riferît i rapresentants principâi di Pè a Corsica, Gilles Simeoni e Jean-Guy Talamoni, intant dal incuintri di lunis il prin ministri francês, Edouard Philippe, al à dite che i trê ponts principâi dal program de coalizion nazionalitarie – o sei couficialitât de lenghe corse, amnistie pai presonîrs politics e statût di resident – no son su la taule di discussion. Cundut che lis trê rivendicazions a jevin dal sigûr problemis istituzionâi e costituzionâi, une rispueste di cheste fate e siere daurman ogni spazi di dialic. Philippe al varès fintremai dineât di cognossi il significât de peraule “autonomie” e che chei cors a sedin “presonîrs politics”. No je lade masse miôr intai incuintris vûts cui presidents dal Senât e de Assemblee francese. La ande mostrade dai politics francês e à discjadenât la fote dal president dal esecutîf cors che al à fat savê che ai 3 di Fevrâr, ae vilie de visite su la isule dal president francês Emmanuel Macron, si davuelzarà une grande manifestazion popolâr par poiâ lis rivendicazions dal moviment nazionalitari cors.
Font: Alta Frequenza, 24/01/18; Corsica Oggi, 22-24/01/18

Nessun commento: