19/05/17

Macedonie: violencis etnichis intal Parlament

La crisi istituzionâl che za di mês e met sotsore la Macedonie e à vût un pic dramatic ai 27 di Avrîl cuant che uns dusinte militants leâts ae diestre nazionaliste (VMRO DPMNE) che tai ultins agns e à guviernât la republiche ex jugoslave a son jentrâts tal Parlament e a àn assaltât deputâts e gjornaliscj. Il belanç finâl al è stât di un centenâr di ferîts e tra di lôr ancje il leader dal partît sociâl democratic (SDSM), Zoran Zaev, e chel di un dai trê partîts de minorance albanese, Zijadin Sela. Il fat al è capitât juste dopo che, propit cui vôts dai sociâi democratics e dai trê partîts albanês, al jere stât elet come president de Cjamare dai deputâts, Talat Xhaferi, prin rapresentant de comunitât albanese a ocupâ cheste incarghe.
Cundut che i cuatri partîts a àn la maiorance in Parlament e a àn za cjatât un acuardi di guvier, il president de Republiche Gjorge Ivanov si refude di dâi a Zaev la incarghe par formâ il gnûf esecutîf acusantlu di meti in pericul la integritât de Macedonie cu lis concessions fatis ai partîts albanês. A front di chest dinei, i partîts de coalizion a àn decidût di procedi par vie parlamentâr a partî propite de elezion dal gnûf president de Cjamare. Ancje se a peraulis Ivanov e il leader de diestre, Nikola Gruevski, a àn condanât lis violencis, ducj i doi a àn butât la colpe sui aversaris politics acusâts di sfuarçâ la leç. Dopo des violencis, il ministri provisori dal interni, Agim Nuhiu, e il garant pai dirits, Ixhet Memeti, a àn marcât lis responsabilitâts di une part de polizie che prime e varès fat jentrâ i militants di diestre in Parlament e po e varès spietât plui di une ore prime di intervignî par fermâ lis agressions.
Font: Balkan Insight, 28/04/17

Nessun commento: