13/04/17

Paîs Basc: ETA e à consegnât dutis lis sôs armis

Chê dai 8 di Avrîl e je une date che e jentre a plen dirit inte storie dal Paîs Basc. Cun di fat, ta chê zornade la comission internazionâl di verifiche e à consegnât aes autoritâts di polizie francese lis informazions sui arsenâi che la organizazion armade basche ETA e veve ancjemò ator par Ipar Euskal Herria, il Paîs Basc francês. Si trate di armis di fûc, munizionaments e esplosîfs platâts in vot sîts che a son stâts vuardeâts di cuasi dusinte volontaris di Bakegileak, i artesans de pâs, in spiete che a rivassin i agjents inviâts dal ministeri de difese par metilis in sigurece. Intant dal davuelzisi di cheste operazion, miârs di personis si son dadis adun a Baiona / Bayonne par compagnâ la azion dai artesans de pâs, rapresentants de societât civîl basche che si son metûts in zûc par sigurâ il procès di disarmament decidût in maniere unilaterâl di ETA.
La vilie de iniziative, la organizazion basche e veve dât fûr un comunicât là che e visave di vê completât il procès di consegne des armis ae societât civîl par che lis metès po a disposizion des autoritâts francesis. Par ETA il contribût rivât de societât al è stât fondamentâl par puartâ insom il so disarmament a front dai pidiments metûts in at dai stâts spagnûl e francês che si vevin fint in chel refudâts di ricevi l’arsenâl de organizazion. La ativitât de comission internazionâl di verifiche, che e à certificât la conclusion dal disarmament, e à vût ancje la poie dai guviers de Comunitât Autonome Basche, de Navare e de Comunitât Provinciâl Basche francese, intant che la operazion dai artesans de pâs e je stade sostignude de grande maiorance dal mont politic (PNV, EH Bildu, PSE, Elkarrekin Podemos, Ezker Anitza, Geroa Bai, Izquierda-Ezkerra) e sindacâl (ELA, LAB, CCOO, UGT) dal Paîs Basc. Pal ministri dal interni francês, Matthias Fekl, la decision unilaterâl di ETA di consegnâ il so arsenâl e je stade un “grant pas”, intant che chel spagnûl, Juan Ignacio Zoido, al à dite che la posizion dal guvier di Madrid no cambiarà di un et. I artesans de pâs a àn ricuardât che “il disarmament al jude la pâs ma nol è la pâs”, dal moment che a restin inmò di frontâ trê ponts centrâi, o sei la risoluzion dal probleme dai presonîrs che a centenârs si cjatin ancjemò tes presons spagnolis e francesis, il ricognossiment e la memorie di dutis lis vitimis dal conflit e no dome di chês causadis di ETA, e la difese de vie democratiche par risolvi la cuistion basche.
Font: Naiz:, 07-08/04/17; BBC, 07-08/04/17; Le Monde, 07-08/04/17; El Pais, 07-08/04/17

Nessun commento: