16/03/17

Paîs Basc: l’euskara al cres te sanitât, te scuele, su Internet

Intant di une audizion denant dal Parlament, il diretôr gjenerâl dal servizi sanitari de Comunitât Autonome Basche, José María Armentia, al à fat il pont su la metude in vore dal plan di normalizazion dal euskara dentri dal servizi. Tal 2016 cuasi il 34% dai lavoradôrs de sanitât a vevin un nivel di cognossince de lenghe basche adate al lôr puest di vore, a front dal 11,2% di dîs agns prime. La incressite progressive des competencis linguistichis e diven sei de jentrade di personâl gnûf che al à fat i siei studis par euskara, sei dai percors di formazion dai lavoradôrs che l’an passât a àn interessât il 10% dal organic.
La lenghe basche e cres ancje su Internet. Daûr dai dâts de fondazion PuntuEUS, sui 230 mil sîts regjistrâts inte Comunitât Autonome Basche, chei ad in plen par euskara a son 18.317, un tierç di chescj cul domini .eus che al marche il leam cu la lenghe e la identitât basche. Intal ultin an i dominis principâi – o sei .com e .es – a son calâts il prin dal 2% e il secont dal 9%, intant che chei .eus a son cressûts dal 28%. Al merete po zontât che i sîts cun chest ultin domini par solit a son ancje plui siôrs di contignûts cuntune medie di 7.131 documents par sît a front dai 1.782 di medie di chei altris dominis.
Positîfs ancje i dâts che a rivin de Navare su lis preiscrizions al model scolastic D, o sei chel cul basc come lenghe veicolâr, pal an 2017-2018. Par chel che al rivuarde lis scuelis de infanzie, di fat, a sielzi il model D al è stât il 30,7% des fameis, a front dal 29,3% dal an passât.
Font: Deia, 06 e 07/03/17; Noticias de Navarra, 02/03/17

Nessun commento: