Il
tribunâl costituzionâl spagnûl al à decidude la sospension
cautelâr di dôs risoluzions fatis buinis in Otubar dal Parlament
catalan che a metevin lis fondis par celebrâ un referendum su la
indipendence tal 2017. L’orghin judiziari al à ancje difidât la
presidence dal Parlament e l’esecutîf catalan dal meti in vore
cualsisei at che nol tegni cont de sospension.
Propite la presidente
dal Parlament, Carme Forcadell, e à vût di presentâsi ai 16 di
Dicembar denant dal tribunâl superiôr di justizie de Catalogne dopo
che la procure le à denunciade par no vê blocât la discussion e la
votazion sul procès sovranist inte Assemblee catalane cemût che i
jere stât ordenât dal tribunâl costituzionâl spagnûl. In
tribunâl, la presidente e à rivendicât il dirit di un Parlament
elet in maniere democratiche di discuti di cualsisei argoment cence
dal intervent di censure dal podê judiziari, tant plui che si trate
di un intervent stiçât dal esecutîf spagnûl. Carme Forcadell e je
stade compagnade in tribunâl di dut il guvier catalan, dai
rapresentants des entitâts e dai partîts sovraniscj (Junts
pel Sí, CUP, Catalunya
Sí que es Pot) e di miârs di citadins
che a àn ancje inmaneât une manifestazion di poie ae presidente. La
procure e à invezit decidût di archiviâ la inchieste che e cjapave
dentri l’ex ministri spagnûl Jorge Fernández Díaz e l’ex
diretôr dal ufici cuintri des fraudis de Catalogne par vie che no
jerin sigûrs de divignince des regjistrazions telefonichis là che i
doi si metevin dacuardi par fâ indagâ i dirigjents dai partîts
sovraniscj catalans in maniere di fâi pierdi credibilitât ae bataie
pe indipendence. Intant, intal Parlament spagnûl, la mozion
presentade dal deputât Francesc Homs (PDECat) par che si studii la
pussibilitât di celebrâ un referendum concuardât tra Madrid e
Barcelone e à cjatât dome la poie dai moviments sovraniscj bascs e
catalans. In ogni câs, il president dal guvier catalan Carles
Puigdemont al à sigurât che lis decisions de magjistrature e des
istituzions spagnolis no mudaran di un et il program fissât par rivâ
al referendum.
Font:
VilaWeb, 14-16/12/16; Naiz:,
14-16/12/16;
El País, 14-15/12/16; EiTB, 15/12/16
Nessun commento:
Posta un commento