Joibe
ai 20 di Otubar il guvier scozês al à presentât il stampon de leç
par imbastî un secont referendum su la indipendence. Il test al
previôt une consultazion sul model di chê che si veve tignude intal
2014, duncje cence soiâr minim di partecipazion pe validitât dal
referendum e cu la pussibilitât di votâ sei pai fantats di 16 e di
17 agns, sei pai citadins de UE che a àn la residence in Scozie.
Fintremai i 11 di Zenâr dal 2017 i citadins a varan la pussibilitât
di dî la lôr sul stampon, prime di tacâ l’iter parlamentâr là
che si à za une maiorance formade di SNP e Verts pronte a votâlu.
Il guvier vuidât di Nicola Sturgeon al domandarà cumò al esecutîf
britanic di garantî il davuelzisi regolâr dal vôt par mieç di un
specific trasferiment di podês che al permeti aes istituzions
scozesis di inmaneâ la consultazion. Di Londre però e rive a clâr
la intenzion di evitâ un secont referendum su la indipendence prin
di dut poiantsi propit sui risultâts dal vôt di doi agns indaûr.
Lis cundizions e lis garanziis ufiertis des istituzions britanichis
par spostâ la belance sul “no” ae indipendence – e conteste
però la prime ministre scozese – no esistin plui, a partî de
decision di gjavâsi fûr de Union Europeane, decision che in Scozie
e je stade boçade de grande maiorance dai citadins. Il guvier scozês
si è declarât disponibil a di un confront viert e paritari cun chel
britanic par viodi di garantî che la Scozie e resti tal marcjât
unic e e mantegni ciertis relazions cu lis istituzions comunitariis
ancje tal câs che il rest dal Ream Unît si gjavi fûr dal dut. Se
chest nol sarà pussibil e i interès scozês no saran garantîts ad
in plen, alore – e à dite Nicola Sturgeon – la indipendence e
reste une des opzions e la Scozie si fasarà cjatâ pronte.
Font:
The Guardian,
20/10/16
Nessun commento:
Posta un commento