Intes
elezions politichis che si son tignudis ai 11 di Setembar in
Cravuazie, la Union Democratiche Cravuate (HDZ) e je stade la fuarce
politiche plui votade e la sô coalizion e à otignût plui dal 36%
des preferencis e 61 elets. Cun dute probabilitât duncje al sarà il
so president, Andrej Plenković, a cjapâ in man la incarghe di prin
ministri.
La Union no à però numars suficients par guviernâ di
bessole. A dâi une man, se lis sôs cundizions a saran acetadis
daurman, e podarès jessi la liste Most
(il puint) cui siei 13 parlamentârs. Chel istès, ancje cuntune
aleance tra lis dôs formazions di centri diestre, a coventin ancjemò
dai deputâts par rivâ ae maiorance assolude. No rivaran dal sigûr
de coalizion vuidade dal partît sociâl democratic (SDP) che si
candidave a vuidâ la Cravuazie, ma che si è fermade tor dal 34% dai
vôts e a 54 parlamentârs, e nancje de coalizion antisisteme e
populiste Uniche Opzion che cui siei 8 elets e je la cuarte fuarce
dal Parlament cravuat. No varessin di poiâ chest guvier nancje i 3
parlamentârs autonomiscj elets intes filis de Assemblee Democratiche
Istriane (IDS – DDI), i 2 elets cu la coalizion vuidade di Milan
Bandić o l’unic rapresentant de Aleance Democratiche Cravuate de
Slavonie e de Baranja (HDSSB). La leç eletorâl cravuate e previôt
però ancje vot puescj pai rapresentants des minorancis: un parom par
ongjarês, rom, talians, albanês e cecoslovacs, e trê pai serps.
Propit di chi e je partide la disponibilitât a poiâ un guvier
vuidât di Plenković, viodût come un moderât rispiet a altris
coleghis di partît, pûr che al garantissi plui atenzion pes
problematichis des comunitâts minorizadis e massime di chê serbe
che tai ultins timps e je stade al centri di atacs une vore fuarts de
bande dai nazionaliscj cravuats, ma ancje di rapresentants des
istituzions.
Font:
Balkan Insight,
12-16/09/16
Nessun commento:
Posta un commento