18/09/15

Føroyar: sucès eletorâl de çampe unioniste e sovraniste

Lis elezions dal prin di Setembar a àn cambiât i ecuilibris politichis intes isulis Føroyar e a àn dât plui fuarce ai partîts di çampe – sei sul front unionist, sei su chel sovranist – che te legjislature stade si cjatavin ae oposizion.
Il Partît de Union (Sambandsflokkurin), espression principâl dal centri diestre unionist che al vuidave la coalizion di guvier, al à pierdût cuasi il 6% dai vôts e doi parlamentârs e si ricjate cumò cul 18,8% dai consens e 6 elets. Il partît plui votât al è stât invezit chel socialdemocratic (Javnaðarflokkurin), simpri di aree unioniste, che al à otignût il 25,1% dai vôts – il 7,3% in plui de volte stade – e al è passât di 6 a 8 parlamentârs. Al secont puest, cul 20,8% dai consens e 7 elets (+2,5% e +1 rispiet aes ultimis elezions), si è plaçât invezit il moviment Republiche (Tjóðveldi) che al rapresente la çampe indipendentiste. I indipendentiscj di centri diestre dal Partît dal Popul (Hin Føroyski Fólkaflokkurin) a àn pierdût il 3,6% dai vôts e 2 parlamentârs, ma cul 18,9% dai consens e 8 elets a son la tierce fuarce des isulis. Chei altris trê partîts in corse a àn otignût doi parlamentârs ognidun: i indipendentiscj liberâi di Progrès (Framsókn) a àn cjapât il 7% dai vôts, i autonomiscj dal Partît di Centri (Miðflokkurin) il 5,5% e chei dal Partît dal Autoguvier (Sjálvstýrisflokkurin) il 4%. La campagne eletorâl si è centrade massime sui temis economics (industrie de pescje e nivel de tassazion in primis), ma e reste vierte ancje la cuistion dai rapuarts cu la Danimarcje. A chest proposit, se si va daûr des percentuâls di vôt dai diviers partîts, il 47% dai faroês al è pe indipendence, il 44% al difint la union e il 9% al domande plui autoguvier.
Font: Nora Region Trends, 03/09/15

Nessun commento: