18/04/14

Ucraine: rapuart su la situazion des minorancis nazionâls

I ultins acjadiments che a àn scjassât la Ucraine a àn sburtât il Comitât consultîf dal Consei de Europe che al viôt de metude in vore de Convenzion cuadri pe protezion des minorancis nazionâls a visitâ chest paîs e a cjatâsi cui rapresentants di tredis comunitâts di minorance, ven a dî afghans, armens, azeris, bulgars, ebreus, gagaus, gjeorgjians, karaims, kazachis, lezghins, moldâfs, ongjarês, polacs, rom, rumens, rus, tatars, tazics e uzbecs. Di chest viaç, che al è durât dai 21 ai 26 di Març, al è jessût un rapuart publicât ai 3 di Avrîl.
La instabilitât e i conflits politics, che a àn dât plui pês ai estremiscj, no àn puartât par cumò a consecuencis diretis sui dirits linguistics di chestis comunitâts, ma a àn jevât une clime di malsigurece pal avignî. Un esempli al diven de decision dal Parlament ucrain di abolî la gnove leç su lis lenghis che e garantìs un status plui alt par rus, ongjarês e rumen; decision blocade dome in gracie dal veto metût dal president de Republiche. Ancje sot dal guvier gnûf a restin in pîts ducj i problemis za segnalâts intant dal esecutîf stât, tant che la scjarse tutele des minorancis plui piçulis, il nivel insuficient di insegnament intes lenghis minoritariis e lis strategjiis faladis pe integrazion dai rom. Il Comitât al segnale po la dibisugne di nivei plui fuarts di coinvolziment des minorancis intai procès decisionâi politics e economics. A son dôs però lis situazions plui griviis segnaladis intal rapuart, ven a dî chê dai tatars de Crimee e chê dai rus des regjons orientâls de Ucraine. I prins a son preocupâts pal lôr avignî intune Crimee anetude ae Russie dopo che in cetancj di lôr a àn pandût a clâr di jessi cuintri di cheste soluzion. Framieç dai rus, invezit, lis posizions a son critichis intai confronts des gnovis autoritâts di Kiev, ma si va di cui che al è preocupât pes discriminazions economichis e linguistichis a cui che al fevele di “gjenocidi nazionâl”. Par finî, la pôre di ritorsions e je stade pandude dai rapresentants des comunitâts armene e kazache dopo che i lôr stâts di riferiment a àn mostrât di poiâ la Russie e no la Ucraine.
Font: Council of Europe, 03/04/14

Nessun commento: