Ream Unît: bandieris des nazions cence stât fûr des Olimpiadis

I zûcs olimpics a son stâts dispès ocasion par puartâ denant de opinion publiche internazionâl problematichis che a van di là dal sport. I organizadôrs a àn simpri cirût di limitâ il plui pussibil ogni azion che e ves un savôr di rivendicazion politiche, a voltis cun consecuencis pesantis ancje pai stes atletis. Tal câs des Olimpiadis di Londre (27 di Lui - 12 di Avost) une prime cuistion e jere za nassude cu la esposizion de bandiere scozese e di chê galese sui stadis di Glaschu / Glasgow e di Caerdydd / Cardiff clamâts a dâi acet a apontaments olimpics: esposizion che e jere stade autorizade dopo des protestis des istituzions locâls e in gracie dal parê positîf dal Comitât Olimpic Internazionâl. Nuie di fâ però pes bandieris di chês altris nazions cence stât che a son stadis proibidis dal comitât organizadôr fintremai tra i tifôs. Al è sucedût aes fameis e ai amîs di atletis bascs e bretons che ur è stât impedît, sot de menace di jessi slontanâts di fuarce dai implants sportîfs, di doprâ lis bandieris des lôr comunitâts (la ikurrina basche e il gwenn-ha-du breton) par tifâ pai lôr cjârs.
Di segnalâ po che, viodût che tes Olimpiadis a puedin partecipâ dome selezions che a rapresentin un stât, lis nazionâls di balon di Scozie e Gales, contrari di ce che al sucêt in altris competizions internazionâls, a àn vût di lassâ il puest a di une uniche selezion britaniche. Che il probleme di fonde però al resti, si lu à viodût benon intant che al sunave l’imni “God Save The Queen” cui zuiadôrs galês e scozês che a son restâts cu la bocje sierade intant che chei inglês a cjantavin.

Font: Naiz:, 02/08/12; VilaWeb, 01/08/12; Agence Bretagne Presse, 28/07/12