Il suspiet
nol è un argoment juridic suficient par condizionâ l’esercizi dal
dirit di associazion. E je cheste la motivazion principâl che e sta
daûr de sentence dal tribunâl costituzionâl spagnûl che e
ricognòs a Sortu, partît de çampe indipendentiste basche, il dirit
di davuelzi la sô ativitât politiche in maniere legâl. Sortu al
jere nassût cun chê di cjapâ sù il testemoni di Batasuna, partît
metût fûr leç cu la acuse di jessi part de organizazion armade
basche ETA. La politiche di ilegalizazion metude in at dal guvier e
de magjistrature spagnole cuintri di ducj i sogjets de çampe
indipendentiste basche e veve colpît ancje Sortu e i veve impedît
di regjistrâsi tant che partît politic legâl e di presentâsi aes
elezions. La sentence dal tribunâl costituzionâl e ribalte però il
judizi dal tribunâl suprem, organisim che al à cjapât sù la
ereditât dai tribunâi speciâi di ete franchiste, e i da a Sortu la
pussibilitât di davuelzi ae lûs dal soreli la sô ativitât
politiche. La decision e à cjatât il bon acet de grande maiorance
dai partîts politics dal Paîs Basc, ma no je stade cjapade par nuie
ben dal guvier di Madrid che al è intes mans de diestre spagnoliste
dal PP. Cun di fat, sei il ministri pe justizie, sei chel pal
interni, a àn dite a clâr di no condividi la decision dal tribunâl
costituzionâl.
Plui o mancul intes stessis zornadis de sentence su
Sortu, une altre vicende judiziarie si à sierade in maniere positive
pai rapresentants dal indipendentisim basc. Cun di fat, la Audiencia
Nacional e à fat colâ lis acusis di partecipazion o colaborazion
cun ETA par undis personis ativis in doi partîts de ezkerra
abertzale nassûts dopo de
ilegalizazion di Batasuna e po metûts ancje lôr fûr leç, ven a dî
D3M (Demokrazia Hiru Milioi) e a Askatasuna. Ancje chi la sentence no
lasse spazi par dubis: “meti sù un partît politic o comitâts di
eletôrs, partecipâ ai procès eletorâi come candidâts, organizâ
conferencis stampe e davuelzi ativitâts di cheste fate no son
compuartaments che a puedin dimostrâ la partecipazion o la
colaborazion cuntune organizazion teroriste”. E pûr propit par
chestis ativitâts politichis undis ativiscj di D3M e di Askatasuna a
son stâts impresonâts e a àn vût di patî une lungje vicende
processuâl che dome cumò si siere cu la lôr assoluzion plene.
Chestis dôs decisions de magjistrature spagnole a mostrin un segnâl
in cuintritindince rispiet a ce che al jere sucedût fin cumò e a àn
puartât cetancj di lôr a domandâ che si meti fin al stât di
ecezion doprât cuintri de çampe indipendentiste basche e a ducj i
procès e lis sentencis cuintri di ativiscj colpevui dome di ativitât
politiche.
Font:
Naiz:, 18-20/06/12; El Pais, 20/06/12
Nessun commento:
Posta un commento