Il teme dai
presonîrs politics al à un pês une vore impuartant inte suaze dal
conflit in at intal Paîs Basc. Ancje par chest e jere une vore di
spiete pe conference clamade dongje a Gernika par presentâ lis
conclusions dai dibatiment interni che tai ultins mês al à impegnât
il Coletîf dai Presonîrs Politics Bascs (EPPK). Il document finâl
al è stât comunicât cuntune regjistrazion audio dal moment che i
siei autôrs a son sierâts intes presons spagnolis e francesis. Il
Coletîf al concuarde cu la decision di ETA di meti fin ae lote
armade e al poie la strategjie di unitât e di superament dal conflit
inviade de çampe indipendentiste basche dilunc de strade segnade dal
acuardi di Gernika e de declarazion di Aiete.
Intal document si
ricognòs il dolôr patît e chel provocât e si invide ducj a resonâ
su lis lidrîs di chest conflit che tancj dams al à causât. I
presonîrs si mostrin disponibii a fâ altris pas par superâ la
situazion che cumò ju viôt in galere, ma no son disponibii a acetâ
la logjiche dal pentitisim che cualchidun al pretint di lôr. Pai
moviments de aree nazionalitarie basche si trate di un pas impuartant
che cumò però al à di cjatâ une rispueste de bande dai guviers
spagnûl e francês, a tacâ de eliminazion des misuris di ecezion
metudis in vore cuintri dai presonîrs bascs. Pal ministeri dal
interni spagnûl però, la declarazion dal Coletîf e dimostre dome
che i presonîrs a va dilunc a jessi sot dal “jôf” di ETA e al à
visât che no si varà nissune misure coletive di superament de
condizion dai presonîrs, tant mancul une amnistie. Judizis negatîfs
su la declarazion a son rivâts ancje dai socialiscj e dai
nazionaliscj moderâts dal PNV.
Font:
Gara/Naiz:, 02 - 04/06/12
Nessun commento:
Posta un commento