Ingussezie: e cres la violence intal paîs
E va dilunc a cressi simpri di plui la tension inte republiche russe de Ingussezie. Cun di fat, daspò dal sassinament dal gjornalist Magomed Yevloyev par man des fuarcis di polizie al servizi dal guvier filorùs, ai 30 di Setembar il ministri dal interni ingùs Musa Medov al è scjampât par un pêl a di un atentât cuintri di lui. Lis autoritâts russis a son cumò daûr a investigâ par capî cui che al sedi daûr di cheste azion, ma lis primis ipotesis a fevelin di un svindic pe muart di Yevloyev o di un atac de vuerilie ingusse. Dome intal mês di Avost a son cuasi un centenâr i muarts intai scuintris jenfri militârs rus e grups armâts ingùs: une cifre che e je in cressi rispiet ai mês prime. Intant diviersis organizazions pai dirits umans a van dilunc a denunciâ lis disparizions e lis torturis metudis in vore des fuarcis di polizie o dal esercit rus cuintri de popolazion ingusse. Il stes ex president ingùs, Ruslan Àuixev, al dîs che aromai si cjatisi denant di une vuere civîl, ancje se inmò di basse intensitât.
Font: Nationalia, 01/10/08; Món Divers, 01/10/08
Nessun commento:
Posta un commento