19/02/08

Pontade 06 08 (19/02/08) - 13

Cossovo: proclamade la indipendence

Contrari di tantis gnovis che si riferissin a nazionalitâts minorizadis europeanis, chê de proclamazion unilaterâl de indipendence dal Cossovo e cjate une vore di spazi su buine part dai mieçs di comunicazion. La decision e je stade cjapade intant de riunion straordenarie dal Parlament di Pristina che si è tignude domenie ai 17 di Fevrâr. La plui part dai stâts membris de Union Europeane e à decidût di cjapâ at de decision cossovare, come che a àn fat ancje i Stâts Unîts che za di timp si vevin declarâts a pro de indipendence dal Cossovo de Serbie. Il guvier serp, invezit, al calcole di ilegâl la decision cjapade a Pristina. Stesse posizion e rive ancje de Federazion Russe, che e à domandât ae ONU di declarâ nule la proclamazion. Tra i stâts che a àn dite di jessi cuintri de indipendence a son ancje la Spagne e la Grecie. Al reste cumò di viodi cualis che a podaran jessi dutis lis consecuencis de decision dal Parlament cossovâr. Une prime problematiche e je chê des minorancis che a vivin ta chê regjon balcaniche, a tacâ di chê serbe che e rapresente ancjemò sù par jù il 7-8% de popolazion, cundut che tancj di lôr a fossin za scjampâts intant dai bombardaments de Nato dal 1999 o par vie dai atentâts e dai atacs de vuerilie cossovare. Une part dai serps che a son restâts, massime te zone di Mitrovica, e ponte suntune separazion dal Cossovo par tornâ a dâsi dongje cu la Serbie, ma par tancj di lôr cheste soluzion e je impussibile di rivâi. Cundut des sigurazions rivadis des autoritâts cossovaris che i dirits des minorancis a saran rispietâts, plui di cualchidun tra i serps, ma ancje tra i rom, al pense di bandonâ il paîs. Di là de situazion interne, il câs dal Cossovo al rapresente un precedent no di pôc pe Europe e dal Paîs Basc ae Cecenie plui di cualchidun si domande parcè che ce che al vâl pai cossovârs nol pues valê ancje par chei altris popui tibiâts dal continent. E subite daspò de proclamazion de indipendence ancje lis regjons de Abkhazie e de Ossezie a àn domandât di jessi ricognossûts indipendents de Gjeorgje.
Font: plusôr agjenziis di stampe, 16-17-18/02/08


1 commento:

Unknown ha detto...

Chei che no an voe di ricognossi le indipendence dal Kossovo a son chei che an pôre ch'al sucedi da lôr (Russie, Spagne, ecc)
Chei che le an ricognossude subite invesit a son i merecans...Strani che par sfoti i rùs a sêtin simpri pronts e pai palestinês e fasin dome comediis.