Aragon: prime propueste di leç linguistiche

Il Partît Socialist (PSOE), che al è ae vuide dal guvier aragonês, al à presentât intal Parlament locâl un disen di leç di politiche linguistiche. Intal test si ricognossin l’aragonês e il catalan tant che lenghis propriis e storichis de comunitât, ma cence dâur il status di couficialitât cul castilian. La propueste e previôt la pussibilitât pai citadins che a vivin tes valadis pirenaichis là che si fevele par aragonês e par chei che a son a stâ te Franja de Ponent dulà che si dopre il catalan di indreçâsi inte lôr lenghe proprie ae aministrazion (cence oblic, però, di rispueste inte stesse lenghe). Cun di plui, si da il vie libare al ûs dal bilinguisim sei pai toponims che pes publicazions uficiâls dadis fûr intai teritoris là che lis dôs lenghis a vegnin dopradis. Il test al previôt ancje che il Consei superiôr des lenghis dal Aragon al deventi l’orghin di riferiment pe politiche linguistiche. L’esam de propueste al varès di tacâ cun Setembar e si previodin discussions une vore vivarosis. Cun di fat, il Partît Aragonês (PAR), aleât di guvier dai socialiscj, nol ricognòs tant che catalanis lis varietâts feveladis inte Franja. Il PP, invezit, al è contrari a ogni ipotesi di tutele linguistiche. La Chunta Aragonesista (ChA) e la çampe radicâl a domandin une leç che e previodi misuris di tutele e di promozion linguistiche plui fuartis, a partî dal ricognossiment di couficialitât pal aragonês e pal catalan.

Font: Vilaweb, 03/07/09; Món Divers, 03/07/09

Paîs Basc: il tribunâl di Strasburc al poie la ilegalizazion di Batasuna

Il Tribunâl european pai dirits umans i à dât tuart ai ricors presentâts di Batasuna e di chês altris formazions de çampe indipendentiste basche cuintri dai proviodiments decidûts intal stât spagnûl par metilis fûr leç. In pratiche, la session strente dal Tribunâl, e à calcolât plui impuartante la “difese de sigurece publiche” che no il dirit ae libertât di espression e di associazion. Une decision, cheste, che e ribalte ce che il Tribunâl al veve decidût par proviodiments similârs decidûts dai guviers turcs cuintri des formazions politichis curdis. Pai rapresentants de çampe indipendentiste basche si trate di une sconfite pesante, ancje se cumò a varan di decidi se puartâ la cuestion denant de session slargjade dal Tribunâl che, par solit, e mostre posizions plui garantistis di chê strente. La gnove e je stade cjapade in maniere negative ancje di altris formazions politichis baschis, tant che Aralar, Eusko Alkartasuna, Alkarbide e Ezker Batua, e no dome, come tal câs di ERC, che le calcolin di pas indaûr inte difese des libertâts civîls. La decision dal Tribunâl e je stade saludade cun entusiasim dai partîts spagnoliscj, a tacâ di socialiscj (PSOE) e popolârs (PP).

Font: Gara, 01-02/07/09; Deia, 01/07/09

Stât spagnûl: lis aministrazions statâls no son avonde plurilengâls

Lis capacitâts bilengâls dai funzionaris dal stât spagnûl a son disot dai nivei domandâts dal Consei de Europe. A dîlu al è un rapuart dal Ufici pes lenghis uficiâls inte aministrazion gjenerâl dal stât. La situazion miôr si le cjate in Galizie e intal Principât di Catalogne là che passe il 90% dai funzionaris statâi a cognossin la lenghe proprie de comunitât. Tal Paîs Valenzian e tes isulis Baleârs i funzionaris che a paronin la lenghe dal puest a son jenfri il 50 e il 90%, a seconde dai setôrs. La situazion piês si le cjate intal Paîs Basc là che, in cierts comparts, no si rive nancje al 20%. I setôrs là che la presince di personâl statâl bilengâl e je plui alte a son chei de sigurece sociâl e de agjenzie tributarie, invezit la situazion piês si le à framieç des fuarcis di polizie. Intal rapuart a mancjin i dâts sui funzionaris dal setôr judiziari, des puestis e des feroviis (ducj di competence statâl) che a varessin di jessi comunicâts in Dicembar.

Font: directe.cat, 01/07/09

Scozie: la maiorance dai scozês e vûl il referendum su la indipendence

Un sondaç fat di resint de sezion scozese de BBC al mostre a clâr che la maiorance dai citadins e vûl jessi sintude in mert al implant politic istituzionâl che la Scozie e varà di vê tai prossims agns. Cun di fat, il 58% dai intervistâts si à declarât a pro di un referendum su la indipendence, intant che a pene il 37% al è cuintri. A sburtâ su la consultazion popolâr al è massime il Partît Nazionâl Scozês (SNP), che in dì di vuê al è al guvier e che al volarès davuelzi il referendum chest an che al ven. I partîts unioniscj, o sei Laburiscj, Liberâi Democratics e Conservadôrs, che a àn la maiorance relative dai vôts, si declarin contraris a cheste ipotesi, cun dut che ancje tra di lôr al è cui che al mostre un ciert interès pe consultazion. Se la maiorance dai scozês e domande il referendum, dut câs, e je ancje vere che chei che si declarin a pro de indipendence a son ancjemò in minorance. Cun di fat, il sondaç de BBC al mostre che se a podessin votâ cumò, il 54% dai citadins scozês al disarès di no ae indipendence e il 38% al sarès, invezit, pal sì. Lis percentuâls, dut câs, a mudin ancje daûr de maniere che si fasin lis domandis: se ai citadins si ur domande se a vuelin che il guvier scozês al trati cun chel britanic par rivâ ae indipendence de Scozie, il numar di chei a pro al cres al 42% e chel dai contraris si sbasse al 50%.

Font: BBC, 30/06/09; Nationalia, 01/07/09

Paîs Catalans: in place par domandâ un at di sovranitât

Ai 27 di Jugn diviers miârs di citadins catalans a àn jemplât place Sant Jaume, denant dal Parlament de Catalogne, in rispueste ae clamade dal coordenament “Acte de Sobirania”. I organizadôrs a domandin un at di roture cu la vie statutarie che e impedìs la sovranitât plene de Catalogne e a domandin di inviâ un percors che al puarti ae indipendence. Ae manifestazion a àn partecipât 8 deputâts di ERC e 2 di CiU. I prins a àn ducj sotscrit il document che ju impegne su la strade de sovranitât nazionâl, i rapresentants di CiU a àn sielzût di no firmâ par evitâ di impiâ “falsis sperancis” che, a àn spiegât, “no podaran concretizâsi in curt”.

Font: Vilaweb, 28/06/09; Món Divers, 28/06/09

Irlande: ancje i grups lealiscj a tachin a disarmâsi

I rapresentants di doi dai grups paramilitârs lealiscj atîfs inte Irlande dal Nord – la Ulster Volunteer Force (UVF) e il Red Hand Commando – a àn comunicât che dutis lis lôr armis a son stadis metudis fûr di ûs in maniere definitive e totâl. I doi grups a àn ancje zontât che la conclusion dal percors di disarmament e je stade controlade de Comission internazionâl vuidade dal gjenerâl John De Chastelain. Un dai ponts dal procès di pâs, di fat, al previôt che ducj i grups lealiscj e republicans a disarmin. Sul front republican, chest pas al jere stât completât dal IRA ancjemò tal 2005. Al apel, invezit, a mancjavin ancjemò ducj i grups lealiscj. I partîts politics nordirlandês a àn duncje mostrât sodisfazion par cheste gnove rivade de UVF e dal Red Hand Commando, ancje se si spiete che e rivi la conferme ancje de Comission De Chastelain. Il guvier britanic al à fissât il mês di Avost tant che date ultime par disarmâsi, ma e mancje ancjemò la Ulster Defence Association (UDA), la plui grande organizazion paramilitâr lealiste. I rapresentants de UDA, par cumò, a àn dome fat savê di vê tacât ancje lôr a disarmâsi.

Font: BBC, 27/06/09; AP/RN, 02/07/09

Ocitanie: al è muart Robert Lafont

Ai 23 di Jugn al è muart a Firenze Robert Lafont, scritôr, storic, sociolinguist e poete ocitan, professôr de Universitât di Montpelhièr / Montpellier. Nassût a Nîmes tal 1923, Lafont al è stât un dai fondadôrs dal Istitût di Studis Ocitans (IEO) e par agns al è stât in prime linie intes bataiis pai dirits linguistics e nazionâi dai ocitans, ma ancje di chês altris nazionalitâts minorizadis.

Font: popoliminacciati.org, 27/06/09

Irlande: sierât il setemanâl gaelic Foinse

Cul mês di Lui, il setemanâl in lenghe gaeliche Foinse nol è plui in edicule. Cun di fat, la direzion de societât che e veve otignût i dirits pal gjornâl (Móinéar Teo.) e à decidût di sierâlu e di mandâ a cjase i dodis lavoradôrs che lu metevin adun. Daûr di cheste decision a son resons di nature economiche. Pe direzion de societât editore, di fat, il setemanâl al veve pierdût une buine fete di jentradis publicitariis e za di timp al veve pierditis par 6 mil euros al mês. Foras na Gaeilge, la istituzion che si ocupe de politiche linguistiche pal gaelic e che e je proprietarie de testade, e veve cirût di cjatâ un acuardi cul editôr e e veve proponût un contrat che al previodeve un stanziament di 355 mil euros al an fin al 2013, cuntun aument di passe il 16% rispiet al finanziament di cumò. La direzion de societât che e produseve il setemanâl e à refudât la ufierte e e à decidût di sierâ il gjornâl intant che lis tratativis a jerin inmò in pîts. Foras na Gaeilge al à pandût il so marum par chest compuartament e al à fat savê di jessi daûr a stazâ altris ufiertis par tornâ a inviâ il gjornâl. La cuestion e je stade ancje al centri di un incuintri tra diviers partîts irlandês (Fine Gael, Sinn Féin, Labour Party) preocupâts pe sparizion dal unic setemanâl dut par gaelic.

Font: Gaelport, 26-29-30/06/09 e 02/07/09

Galizie e Paîs Catalans: i ultins dâts sul ûs des lenghis propriis

Il Centri di investigazions sociologjichis de Galizie al à publicât che al è pôc un studi su la situazion linguistiche e identitarie dal paîs. Il 50,3 dai citadins al calcole il galizian di marilenghe, il 24,2% al declare di sintîsi ad in plen bilengâl galizian – castilian, e il 24,9% al ten di lenghe mari il castilian. Sul front identitari, la plui part dai intervistâts (7 su 10) si sint sei galiziane che spagnole, il 20% si sint plui galizian che no spagnûl, il 3,8% si declare dome galizian e il 3% dome spagnûl. Di un pont di viste politic, il 62% des personis sintudis e à declarât di judicâ positîf il nivel di autonomie cumò in vore.

Cualchi zornade plui tart a son stâts comunicâts ancje i risultâts de inchieste dal 2008 sui ûs linguistics de popolazion fate dal Istitût di statistiche de Catalogne (Idescat). Achì, il 57,9% de popolazion al dîs che la sô lenghe di ogni dì e je il castilian e il 47,6% che e je il catalan (uns 12% de int, di fat, lis calcole dutis e dôs di ordenariis). Di segnalâ ancje che par cuasi il 2% dai residents la lenghe di ogni dì e je chê arabe e pal 0,5% e je il romanì (lenghe dai rom). Rispiet a cinc agns indaûr l’ûs abituâl dal catalan al à fat dai pas indaûr (-4%) e chel dal castilian al è cressût (+6%). Lis percentuâls a cambiin un pôc se si fâs riferiment ae prime lenghe dai residents: pal 58,8% e je il castilian, pal 35,4% il catalan, pal 2,6% l’arap, pal 0,9% il romanì, e pal 0,6% il galizian. L’aranês (varietât ocitane ricognossude in Catalogne) al è la lenghe mari di 3.200 personis, ma e ven doprade ogni dì dome di uns 2 mil di lôr.

Font: Eurolang, 25/06/09; Avui, 30/06/09; Món Divers, 30/06/09

Kurdistan: pal Consei de Europe la Turchie e à di inviâ un dialic

Il segretari gjenerâl dal Consei de Europe, Terry Davis, al à invidât lis autoritâts turchis a cirî une soluzion dialogade ae cuestion curde. La declarazion e rive tun moment di tension une vore fuarte a front de repression in vore intal Kurdistan turc e de indisponibilitât dal prin ministri Recep Erdogan a cjatâsi cui rapresentants dal Partît de Societât Democratiche (DTP), l’unic leât ae comunitât curde a vê une rapresentance significative intal Parlament di Ankara. Par cumò, al à dite Davis, nol è il câs di inviâ des tratativis diretis cul PKK (partît curdi che al è stât metût dentri te liste des organizazions teroristis), cundut de tregue unilaterâl proclamade za di timp, ma il guvier turc al pues tacâ a fevelâ almancul cun chei altris sogjets politics che a rapresentin la popolazion curde.

Font: Nationalia, 23/06/09

Irlande: rom obleâts a scjampâ di Belfast

Un centenâr di membris de comunitât rom di Belfast a àn decidût di bandonâ la Irlande dal Nord par trasferîsi in Romanie. Chest par vie dai atacs e des violencis di stamp razist che di setemanis a van indenant cuintri di lôr e di cui che i da acet. Za di timp a vegnin denunciâts atacs cuintri di imigrâts che a rivin de Europe dal Est, ma chê vivude dai rom e je la situazion plui penze. Lis condanis plui duris par chescj atacs a son rivadis dai rapresentants politics de comunitât nazionaliste irlandese (Sinn Féin) e di chei religjôs de glesie presbiteriane. Sot acuse ancje il compuartament de polizie: prin par vie de lentece tal intervignî sul lûc dai atacs e po parcè che, dopo setemanis di violencis, a son a pene trê lis personis fermadis cu la acuse di vê partecipât a atacs di stamp razist.

Font: Galiza Hoxe, 23/06/09; Balkan Insight, 24/06/09; AP/RN, 25/06/09

Groenlande: si invie l’autoguvier de isule

Ai 21 di Jugn, daspò di 300 agns di dominazion danese e 30 agns di autonomie, la Groenlande e à celebrât in maniere uficiâl la jentrade in vore dal gnûf regjim di autoguvier che al previôt il trasferiment al Parlament locâl (Naalakkersuisut) de grande part des competencis che ancjemò a jerin ancjemò tes mans de Danimarcje, a tacâ de gjestion des risorsis naturâls de isule (tant che il petroli, gas, aur e diamants). Cul gnûf statût, otignût cuntun referendum popolâr ai 25 di Novembar dal an passât, la popolazion groenlandese e pues esercitâ il dirit ae autodeterminazion e il kalaallisut, la varietât inuit maioritarie in Groenlande, e devente la uniche lenghe uficiâl. Par altri, cu lis elezions di Jugn, il guvier de isule al è passât tes mans dal Inuit Ataqatigiit, il partît de çampe indipendentiste groenlandese. Ae cerimonie uficiâl pal autoguvier a àn partecipât ancje la regjine di Danimarcje Margarite II e il prin ministri danês Lars Løkke Rasmussen che al à declarât che, in dì di vuê, no si à ancjemò fevelât di indipendence, ma che la decision di cumò indenant i spiete dome ai groenlandês. Tra i presints, ancje une delegazion dal Parlament sami de Norvegje che e à manifestât la sperance che ancje i sami a puedin lâ daûr des olmis dai inuit de Groenlande.

Font: Galdu, 22/06/09; Galiza Hoxe, 22/06/09; Món Divers, 22/06/09; Nationalia, 22/06/09; Eurolang, 24/06/09

Paîs Catalans: par cumò la CUP no si presentarà pal Parlament

La Candidatura d’Unitat Popular (CUP) no corarà pes elezions parlamentârs catalanis dal 2010, ma si centrarà su lis aministrativis dal 2011. La decision, une vore sufierte, e je stade cjapade a Girona intant de assemblee nazionâl cun 161 vôts a pro e 148 cuintri. Daûr di cheste decision e je la volontât di vê plui timp par organizâ il moviment e par inlidrisâsi di plui intal teritori. Dut câs, il puartevôs de CUP, Josep Antoni Vilata, al à spiegât che chest nol vûl dî disinteressâsi des elezions parlamentârs, cun di fat si è daûr a lavorâ par che in avignî si rivi a di une candidature cun chei altris sogjets de çampe indipendentiste radicâl tant che Endavant, Maulets e Cajei.

Font: El Punt, 22/06/09; Món Divers, 22/06/09

Paîs Catalans: iniziative di leç popolâr su la autodeterminazion boçade dal Parlament

Il Parlament catalan, ducj dacuardi, al à decidût di no ameti la iniziative di leç popolâr pe convocazion di un referendum su la autodeterminazion ai 12 di Setembar dal 2010. La iniziative e jere stade sburtade de organizazion Deumil.cat che, denant de boçadure, e à criticât massime il compuartament dai rapresentants dai partîts tant che ERC e CiU che tai lôr statûts si impegnin pal dirit di autodeterminazion dal popul catalan. La decision di no ameti la iniziative di leç popolâr e je stade justificade cul fat che, daûr dal Statût di autonomie e de Costituzion spagnole, la Generalitat no à lis competencis par frontâ chest argoment. A front di cheste decision, Deumil.cat e à invidât i citadins a partecipâ in maniere massive ae manifestazion inmaneade pai 27 di Jugn a Barcelone dal grup (Grup Acte de Sobirania) che al domande ai parlamentârs di sotscrivi un at di sovranitât che al permeti di inviâ un percors pe autodeterminazion de Catalogne.

Font: Vilaweb, 17/06/09; Món Divers, 17/06/09

Corsiche: il guvier al ritire il PADDUC

Ai 15 di Jugn il guvier regjonâl cors al à decidût di ritirâ de discussion inte Assemblee teritoriâl il PADDUC, ven a dî il Plan plurienâl di svilup de Corsiche che al varès di fissâ lis liniis pal svilup de isule pai prossims cincuante agns. I nazionaliscj cors, in prime linie tal fâi cuintri al progjet, a àn fevelât di vitorie impuartante, ma si son dâts dongje daurman cun chei altris oposidôrs (ecologjiscj, comuniscj, socialdemocratics e altris grups locâi) par studiâ lis misuris par che il PADDUC butât fûr pe puarte nol torni a jentrâ pal barcon. Cun di fat, il ritîr dal progjet al diven de pôre dal guvier locâl di une sconfite palese dal document in aule, ma chest nol vûl dî che si cjatisi denant di une rinuncie definitive. Il PADDUC al deventarà, duncje, un dai argoments centrâi inte campagne eletorâl pes aministrativis dal 2010. Intant, denant de sconfite politiche leade al ritîr dal Plan, Corsica Libera, la aleance des fuarcis indipendentistis corsis, e à domandât al president regjonâl Ange Santini di dimetisi.

Font: Radio Alta Frequenza, 17/06/09

Irlande: in linie il prin sît bilengâl di informazions economichis

Al è in linie Inside Ireland il prin sît internet bilengâl inglês – irlandês di gnovis sul mont economic e dai afârs. La iniziative editoriâl e je stade presentade in maniere uficiâl ai 16 di Jugn a Dublin, alì dai uficis dal Foras na Gaeilge, l’organisim di riferiment pe lenghe irlandese che al à dât la sô colaborazion pal progjet. Il sît al fronte massime argoments che a àn a ce viodi cu la economie, cu la finance e cul mont dal lavôr, ma al ufrìs ancje spazis dedicâts ae musiche, al sport, ae salût, ae alimentazion e ae mode. O publichìn tocs par gaelic dal moment che la lenghe e je daûr a jessi simpri plui doprade dai professioniscj e des aziendis, al à spiegât il diretôr de riviste informatiche Colm Ó Broin. I argoments frontâts a cjapin dentri sei il teritori de Republiche irlandese, sei lis sîs conteis dal Nord, a dimostrazion dal svilup di un spazi economic che aromai al cjape dentri dute la isule. La rispueste dai letôrs e je une vore buine – al à dite Ó Broin – e o sin, duncje, daûr a pensâ di slargjâ sei il sît, sei il numar dai redatôrs.

Font: Gaelport, 16/06/09

Gales: prime edizion dal Celfeden, incuintri di artiscj des minorancis

Plas Tan y Bwlch, intal parc nazionâl di Snowdonia in Gales, al à ospitât dai 14 ai 21 di Jugn la prime edizion dal Celfeden, un apontament pensât par meti adun art e lenghis minoritariis. Dentri de iniziative a àn cjatât spazi laboratoris artistics, musiche, poesie, narative popolâr e altri ancjemò. Dongje dai artiscj galês, a cheste prime edizion dal Celfeden a àn partecipât ancje artiscj che a rivavin di altris comunitâts minorizadis tant che Catalogne, Scozie e Friûl.

Font: Eurolang, 16/06/09

Scozie: di Londre si propon di incressi la autonomie fiscâl

La Comission su la devoluzion scozese (Comission Calman), metude adun dai partîts contraris ae indipendence de Scozie, e à proponût une revision dal sisteme fiscâl scozês. In pratiche, si fevele di aumentâ la capacitât decisionâl locâl, cu la pussibilitât di decidi sui nivei de tasse su lis renditis, ma ancje di intervignî su altris sistemis di tassazion. Ta cheste maniere il guvier di Holyrood al varès a disposizion sù par jù 9 mil milions di sterlinis in plui. La propueste e à cjatât il bon acet dal prin ministri britanic Gordon Brown, ancje se cumò e varà di jessi studiade plui in detai par tornâ a viodi il sisteme di passaçs finanziaris jenfri il guvier centrâl e chel scozês. Intal document finâl de Comission Calman si fevele ancje dal trasferiment di altris competencis al guvier locâl, tant che il control su lis armis lizeris o ben sul codiç di sigurece stradâl. La propueste e je stade cjapade in maniere avonde frede dal prin ministri scozês Alex Salmond (dal SNP) che al ponte, invezit, ae indipendence de Scozie. Denant dal document de Comission Calman, Salmond al à rilançât il progjet par un referendum là che, dongje des opzions a pro o cuintri de indipendence, si ‘nt cjati ancje une tierce sul aument dal autoguvier de Scozie. A dâi plui fuarce al SNP, dongje dal sucès intes elezions europeanis, a son ancje i sondaçs che lu dan ancjemò in cressite. Di fat, se si votàs vuê, al concuistarès 52 deputâts (5 in plui di chei che al à cumò) e i Verts, siei aleâts te bataie pe indipendence, a ‘nt varessin 7: ven a dî, dome 6 di mancul di chei che a coventin pe maiorance assolude.

Font: Guardian, 15/06/09; Nationalia, 16/06/09

Macedonie: grups albanês a domandin un stât federâl

Un grup di rapresentants politics de comunitât albanese de Macedonie a àn domandât che il stât al vegni organizât su fondis federâls, sul model de Belgjiche o de Svuizare. La plui part dai promotôrs de iniziative e rive dal moviment di estreme diestre Ilirida, de associazion dai students de universitât di Tetovo e de associazion dai veterans de insurezion dal 2001. Propit inta chel an, di fat, framieç de comunitât albanese si veve vude une rivolte armade cuintri des fuarcis dal stât. Il conflit si veve sierât cuntun acuardi che al garantive plui dirits ae popolazion albanese. Dut câs, dal 2001 incà, e je cressude la fuarce dai moviments radicâi albanês ancje par vie de debolece internazionâl dal guvier di Skopje, leade al conflit inviât de Grecie pal ûs dal non Macedonie

Font: BalkanInsight, 11/06/09

Ream Unît: tierç rapuart su la CELRM, situazion dificile pal irlandês

Cun cuasi un an di ritart il guvier britanic al à inviât al Consei de Europe il so tierç rapuart su la aplicazion de Cjarte europeane pes lenghis regjonâls o minoritariis sul so teritori. Il document, dut câs, nol cjape dentri la situazion dal irlandês e de varietât di scots fevelade in Irlande dal Nord, par vie che la aministrazion locâl no à fat rivâ al guvier di Londre nissun dât in proposit. Dal rapuart al ven fûr che la situazion dal galês e je avonde stabile, invezit si àn fats dai pas indenant sei pal gaelic scozês, sei pal cornic. Lis novitâts principâls che a rivin de Scozie si riferissin ae nassite de television par gaelic, ancje se a restin inmò dai problemis pe difusion dal segnâl vie tiere, e de elaborazion dal gnûf plan pe lenghe gaeliche che però nol à ancjemò vût il vie libare di dutis lis aministrazions locâls. In Cornualie si segnale une lente, ma significative incressite de lenghe. Denant de gruesse domande che e rive dai students, il cornic al è stât metût dentri intal curriculum scolastic, ma dispès il so insegnament al dipent des decisions dai diviers dirigjents scolastics.

Pobal, la organizazion di riferiment pe lenghe irlandese, e à denunciât cun fuarce aes autoritâts europeanis il rapuart elaborât dal guvier britanic, par vie de mancjance di riferiments sul gaelic irlandês. La situazion de lenghe e reste suspindude dal 2007 cuant che il guvier di Londre al à decidût di trasferî la competence su la politiche linguistiche ae Assemblee de Irlande dal Nord prime di vê preparât la gnove leç sul gaelic, come che invezit si veve impegnât a fâ. Par Pobal il guvier britanic nol à rispietât i impegns internazionâi sui dirits linguistics, intant che inte Assemblee de Irlande dal Nord la cuestion de lenghe e je un ostaç intes mans dai unioniscj intal lôr braç di fier cuintri dai rapresentants de comunitât nazionaliste irlandese.

Font: Eurolang, 05 e 10/06/09