L’esecutîf des Asturiis al à fat bon il decret che al met sù la Rêt de Normalizazion Linguistiche che si propon di infuartî il coordenament tra la aministrazion de Comunitât autonome e i ents locâi par promovi l’ûs public e istituzionâl des lenghis propriis. La Rêt e coventarà par coordenâ progjets, ativitâts e intervents dai diviers servizis linguistics ma ancje par disvilupânt di gnûfs. In dì di vuê metât dai comuns asturians al è indotât di unitâts aministrativis che a lavorin su la normalizazion linguistiche. La adesion ae Rêt e je di nature volontarie e, plui indenant, e podarès slargjâsi ancje a sogjets privâts cence fins di vuadagn. Il decret al previôt ancje la creazion di une comission tecniche par disvilupâ studis, plans e propuestis in materie di politiche linguistiche e si propon di miorâ la dotazion economiche e organiche dai servizis linguistics teritoriâi.
06/05/22
Paîs Catalans: tornade dopo 9 agns la Correllengua a Maiorche
In gracie dal impegn dal grup Joves de Mallorca per la Llengua, dopo nûf agns, e je tornade a partî ancje tes isulis Baleârs la Correllengua, o sei la corse par promovi l’ûs sociâl de lenghe catalane ispirade ae Korrika basche. La manifestazion e je partide ai 22 di Avrîl di Palma par sierâsi trê dîs dopo cuntune grande fieste popolâr a Manacor, dopo cuasi dusinte chilometris di corse a scjavaç di 26 comuns di Maiorche. I iscrits a son stâts plui di 3 mil, une cifre ancjemò lontane dai timps di aur ma che e fâs sperâ ben pal avignî. La iniziative e veve vût di fermâsi par vie dal dinei di ogni forme di finanziament e dai pidiments metûts in vore de diestre spagnoliste, in chei agns al guvier des Baleârs. La gnove edizion e à invezit cjatât la poie dal guvier in cjarie e di diviersis aministrazions locâls.
Paîs Catalans: Elna e ricognòs il dirit al ûs dal catalan in consei
Elna / Elne e je la prime aministrazion locâl de Catalogne dal Nord sot aministrazion francese a previodi il dirit a intervignî par catalan in Consei comunâl. Dut câs i intervents in lenghe proprie a varan po di jessi voltâts par francês. Un pâr di mês indaûr, i conseîrs di oposizion a vevin bandonât i lavôrs dal Consei cuant che un membri de zonte al jere intervignût par catalan segnalant il fat al prefet dai dipartiment che al veve mandât al Comun une comunicazion là che si declarave che in Consei no si podeve intervignî par catalan. L’esecutîf locâl al veve alore domandât un parê legâl che al veve smentît cheste tesi obleant il prefet a zirucâ. Il sindic (Nicolas Garcia dal PCF) al à cussì proponût di mendâ il regolament dal Consei par esplicitâ chest dirit. La iniziative e je stade votade a maiorance cu la sole oposizion di cinc conseîrs de diestre nazionaliste francese.
Galizie: azion par favorî i prodots culturâi par galego pai fruts
Ai 22 di Avrîl il Parlament de Galizie al à fate buine ae unanimitât une propueste no di leç là che si domande al esecutîf di sburtâ la creazion di prodots culturâi par galego pai minôrs e di imbastî campagnis par stiçâ i fruts e i fantats a disfrutâ de culture galiziane. L’intindiment al è chel di contribuî ae normalizazion de lenghe, di judâ la industrie culturâl locâl e di recuperâ il disvantaç cuantitatîf des produzions culturâls par galizian indreçadis ai plui zovins.
Cornualie: plan di azion par tutelâ la comunitât corniche
Il grup di lavôr su la minorance nazionâl corniche, che al ten adun rapresentants dai diviers partîts, moviments e organizazions che a operin in Cornualie, al à definît un plan che al fisse lis liniis di azion pai prossims agns. Il prin pont al è chel di rivâ a di un acuardi cul guvier di Londre par otignî une devoluzion di competencis e risorsis che a permetin di difindi lis carateristichis specifichis de identitât corniche e che al dedi plui pês a cheste piçule nazion celtiche cjapade dentri tal Ream Unît. La seconde linie di azion e ponte al disvilup de lenghe, de culture e dal patrimoni de Cornualie ancje par mieç di un curriculum educatîf specific di meti in vore dentri des scuelis cornichis. Si vûl po che lis dibisugnis de comunitât nazionâl corniche a vegnin tignudis in cont e rispietadis intal procès decisionâl public, a partî dal guvier britanic e fin ae dimension locâl.
Paîs Basc: servizis par basc in Navare, azion di Behatokia
L’Osservatori dai dirits linguistics Behatokia e à presentât 1.200 istancis di citadins de Navare che a denunciin di no podê ricevi servizis publics in lenghe basche. La azion si propon ancje di sburtâ il guvier locâl a tornâ sui siei pas par chel che al rivuarde il decret sul ricognossiment dai merits che nol ten cont de cognossince dal basc par acedi ai puescj publics.
Corsiche: gnovis condanis pes “gnots blu”
Chê cuintri de speculazion edilizie e dai tentatîfs di cimentificâ lis cuestis de isule e jere une des bataiis plui sintudis dal Front di Liberazion Nazionâl Cors dut câs, ancje dopo che il moviment al à metût fin ae sô lote armade, al è cui che al à continuât a lâ ta chê stesse direzion. Lis gnots cuant che i militants cors a fasevin saltâ par aiar lis vilis e lis secondis cjasis in costruzion ad ôr des splazis a jerin stadis batiadis “gnots blu”. Une di chestis gnots si le è vude ancje tal Març dal 2019 e, cundut che il Front nol è plui atîf di agns, si le à tratade come un at teroristic. Par chei fats, ai 20 di Avrîl, il tribunâl suprem di Parîs al à condanât a sîs agns di preson doi oms calcolâts i responsabii di vê sdrumât cul esplosîf diviersis secondis cjasis. Altris cuatri personis, tignudis par compliçs dai doi, a son stadis condanadis a penis di cinc agns a doi mês di preson. Lis condanis a rivin intun moment là che in Corsiche e je ancjemò alte la tension pal sassinament in preson dal militant indipendentist Yvan Colonna.
29/04/22
Paîs Basc: esams par euskara, gnove azion di Seaska
I responsabii di Seaska, la federazion des scuelis imersivis baschis dal Paîs Basc dal Nord sot aministrazion francese (Ipar Euskal Herria), si son cjatâts cul dirigjent dal distret scolastic di Bordeaux par domandâi di ricognossi il dirit dai arlêfs che a studiin par euskara di davuelzi la prove finâl des secondariis di prin grât e l’esam di acès ae universitât par basc. La domande e je stade boçade e cumò la organizazion e je daûr a studiâ la pussibilitât di puartâ la cuistion al esam dai tribunâi. L’an passât, di fat, il ministri pe educazion francese al veve firmât un decret che al ricognosseve chest dirit. Un dirit che però al reste inmò letare muarte.
Corsiche: Ferrandi e Alessandri di gnûf su la isule
Ai 11 di Avrîl Pierre Alessandri e Alain Ferrandi, acusâts cun Yvan Colonna di vê partecipât intal 1998 al atentât mortâl cuintri dal prefet francês Claude Erignac, a son tornâts in Corsiche. Dopo de agression che i à costât la vite al lôr compagn e des protestis sclopadis su la isule, il guvier di Parîs al veve decidût di gjavâur dal regjim di DPS (détenu particulièrement signalé), o sei chel di massime sigurece, e si veve impegnât a trasferîju in curt in Corsiche. I doi si cjatin cumò te preson di Borgu. Alessandri e Ferrandi a vevin madressût di plui di dîs agns il dirit a saltâ fûr dal regjim di DPS e a jessi trasferîts intune preson corse, ma al à coventât il sassinament di Colonna par che si ur ricognossessin i dirits garantîts de leç. La gnove e à cjatât il bon acet di ducj i rapresentants des istituzions e dal mont nazionalitari cors. Cumò però – a disin – si à di garantîur ancje chei altris beneficis previodûts de leç, a partî dal regjim di semilibertât. Su la cuistion e je intervignude in maniere dure ancje la Leghe pai Dirits dal Om (LDH) ricuardant cemût che lis istituzions francesis a ledin ancjemò dilunc a dineâur i dirits previodûts de leç a altris presonîrs politics cors e bascs che, in cualchi câs, a àn za scontât plui di 30 agns in preson.
Paîs Basc: sodisfazion pe edizion 2022 de Korrika
Pe direzion de organizazion AEK (Coordenament pe alfabetizazion e pe baschizazion), la edizion de Korrika che si à sierade ai 10 di Avrîl e je stade “epiche”. La corse inmaneade ogni doi agns par cjapâ sù fonts par promovi la lenghe basche e par slargjâ il so ûs inte societât e à vût une partecipazion moltitudinarie e une cuvierzidure mediatiche cence precedents. Il responsabil de iniziative, Asier Amondo, al à spiegât che ce che al è sucedût dilunc dai 2.180 chilometris di strade corûts chest an al à fûr di dubi centrât un dai obietîfs de Korrika dal moment che «si à infuartît la cussience, la volontât popolâr a pro dal euskara». «Cundut che al è ancjemò adore par vê un belanç precîs – a àn zontât i organizadôrs – diviersis variabilis a mostrin che ancje l’obietîf economic de Korrika al è stât otignût».
Galizie: agjenzie tributarie obleade a garantî l’ûs dal galego
La organizazion galiziane A Mesa pola Normalización Lingüistica e à batiât di “storiche” la sentence dade fûr ai 4 di Avrîl dal tribunâl superiôr di justizie de Galizie che e à anulât ducj i ats de agjenzie tributarie emetûts par castilian dopo che un citadin galizian al veve manifestât in maniere esplicite la volontât che i contats cun lui a fossin mantignûts inte sô lenghe proprie. La sentence, otignude ancje in gracie dal lavôr dai servizis juridics di A Mesa, e dîs a clâr che la agjenzie tributarie no pues sghindâ la sielte linguistiche manifestade dal contribuent e e conferme il dirit de popolazion galiziane a sielzi ce lenghe doprâ. Fintremai che la agjenzie no produsarà i ats par galizian, i proviodiments che a rivuardin il citadin che le à puartade in tribunâl no àn nissun valôr. «Cul esercizi dai dirits – al à comentât cun sodisfazion il contribuent galizian che al à tignût bot pai cuatri agns di durade de cause – si pues infuartî il status di normalitât pe nestre lenghe».
Bretagne: breton e galò inte Assemblee regjonâl
A partî de riunion che si à tignude ai 7 di Avrîl i membris de Assemblee regjonâl de Bretagne a àn podût intervignî par breton e par galò (la varietât romanze fevelade te part orientâl de Bretagne) cu la garanzie di une traduzion simultanie par francês sei pai coleghis in aule che par cui che al seguìs la direte des riunions sul sît e su lis rêts sociâls de Assemblee. La pussibilitât di esprimisi in lenghe proprie e jere za permetude ma cui che lu faseve al jere obleât a fâ lui stes la traduzion par francês subite dopo e cence doprâ plui timp di chel previodût par ogni intervent, smiezant cussì il spazi reâl a disposizion. La gnove e je stade duncje cjapade cun sodisfazion dai conseîrs che a fevelin par breton e par galò che, in dì di vuê, a son une disine sui 83 membris de Assemblee.
Guernsey: prin pas par promovi la lenghe proprie
La comission pe lenghe de isule di Guernsey / Guernési e à nomenât il so prin president. Si trate di Richard Collas e la sô incarghe e je chê di vuidâ l’organisim clamât a sostignî, disvilupâ e promovi la lenghe proprie de isule, o sei une verietât francese similâr a chê che si fevele in Normandie. Doprade par secui dopo de concuiste normande, cheste lenghe e je lade simpri plui al mancul a partî dal secul XIX e, in dì di vuê, si stime che al sedi in stât di doprâle cun buine competence dome il 2% dai residents di chest teritori dipendent de corone britaniche.
Ocitanie: nuie citadinance francese par vie di un “ò”
Inte Belgjiche, là che a son a stâ, no àn vût nissun fastidi a regjistrâle in anagrafe cul non che a vevin sielzût par jê, o sei Lilòia. Si trate di un non ocitan, che i siei gjenitôrs a àn sielzût tant che omaç ae tiere dal pari. La marie, di fat, e je une citadine belgjiche ma il pari al è un citadin francês di divignince ocitane bearnese. Cuant che il pari si à presentât al consolât di France par segnalâ la nassite de fie e inviâ il ricognossiment, dongje di chê belgjiche, ancje de citadinance francese si à cjatât denant dal refût de anagrafe di regjistrâ il non cu la sô grafie corete, o sei cul acent grâf sul “o”. La reson e je une circolâr dal ministeri de justizie di Parîs dal 2014 che e permet di doprâ te onomastiche dome lis letaris che a fasin part dal alfabet francês. Il pari al à duncje decidût di no regjistrâ la fie cuntun non diviers di chel che a àn sielzût par jê. Par intant duncje la frute no varà la citadinance francese. Pal pari nol è il câs che e vedi la citadinance di un stât che no le ricognòs par chel che e je e che nol rispiete la sô identitât.
Sápmi: comunitât dividude su la vuere in Ucraine
La Tiere dai Sami (Sápmi) e je dividude tra cuatri stâts: Norvegje, Svezie, Finlande e Federazion Russe. La agression inviade di cheste ultime ae Ucraine, in plui di alçâ la tension ancje ta cheste part de Europe, e à jevât divisions dentri de stesse comunitât sami. Subite dopo sclopât il conflit, l’ativist Andrei Danilov – che al rapresentave la popolazion sami de Federazion Russe dentri de comission culture dal Consei Sami – al à manifestât la sô contrarietât ae vuere cuntune azion fûr de ambassade russe di Oslo e al à inviât il percors par domandâ asîl politic ae Norvegje, une iniziative poiade dai rapresentants dai Sami norvegjês. Danilov al à declarât che, di là dai confins, i Sami a son un popul sôl e duncje, ancje se nol podarà tornâ a cjase, al larà dilunc a batisi pai dirits de sô int intune altre part de sô patrie. La sô posizion e je condividude ancje di diviers rapresentants di altris popolazions nativis cjapadis dentri te Federazion Russe che ta chescj agns a àn vût di bandonâ la lôr tiere par vie de repression dal guvier. Divierse invezit la posizion dal president dai Consei des minorancis nativis de provincie di Murmansk e dal rapresentant de associazion dai Sami de penisule di Kola che a àn aderît aes iniziativis par sostignî la politiche dal Cremlin. Raipon – la associazion dai popui natîfs dal Nord de Federazion Russe – e à condanât cun fuarce lis declarazions dai esiliâts declarant che no rapresentin plui i lôr popui.
Paîs Basc: cuasi 2 milions par promovi il basc intal Nord
Ai 4 di Avrîl il guvier de Comunitât Autonome Basche e l’Ufici public de lenghe basche (Euskararen Erakunde Publikoa) che al opere tal Paîs Basc setentrionâl sot aministrazion francese (Ipar Euskal Herria) a àn rignuvît l’acuardi par promovi in maniere unitarie l’euskara. Pal 2022 la intese e previôt un impegn finanziari di un milion e 930 mil euros, 400 mil di chescj metûts de Comunitât Autonome Basche. I fonts a laran pe plui part a finanziâ lis organizazions dal teritori che si ur ricognòs une funzion primarie tal promovi la lenghe basche. Tra lis ativitâts che si larà a colaborâ dilunc vie dal an si à il perfezionament de certificazion linguistiche pal nivel B2 e il disvilup des versions euskara – francês e francês – euskara dal tradutôr neuronâl Itzuli.
Svezie: une leç gnove e da plui pês ae volontât dai Sami
Par agns a dilunc la Svezie e je stade riclamade sei dal Consei de Europe che de ONU al rispiet dai pats internazionâi che a garantissin i dirits des popolazions nativis su la tiere e su lis aghis e ae lôr partecipazion intai procès decisionâi che a integnin il teritori. Cumò, cul mês di Març, e je jentrade in vore une leç su lis consultazions che e oblee il guvier centrâl e lis istituzions statâls a sintî i rapresentants des comunitâts sami prime di cjapâ decisions che a puedin vê un impat diret su la lenghe, su la culture, sul status e su lis ativitâts economichis di cheste popolazion. Si trate duncje di un pas indenant impuartant che però – a disin lis organizazions impegnadis pal rispiet dai dirits – al à di jessi infuartît. Cun di fat, la gnove leç no sclarìs ce pês che la posizion cjapade dai rapresentants sami e varà su la decision finâl. Dut câs si dîs che plui une decision e je negative pai dirits dai Sami, plui i interès di cheste comunitât a varan di pesâ rispiet a chei altris interès in zûc.
Finlande: in calâ lis personis che a fevelin lis lenghis propriis
I ultins dâts demografics su la Finlande a mostrin une incressite gjenerâl de popolazion dal 0,3%, o sei di plui o mancul 11 mil personis. Chest aument al è però determinât massime dal cressi des personis che a rivin di inaltrò che, l’an passât, a son stadis 25 mil, il numar plui alt di cuant che la Finlande e je indipendente. Di chê altre bande, si à une diminuzion dai residents che a fevelin lis trê lenghis uficiâls dal paîs, o sei finlandês, svedês e sami. In realtât, ancje sul plan linguistic, la situazion e je un tic mancul liniâr. Baste pensâ che la percentuâl plui alte di popolazion di divignince foreste – il 17% – si le à tes isulis Åland, un teritori che al gjolt di un nivel di autonomie une vore alt e là che la plui part de popolazion e parten ae minorance svedese de Finlande. Achì, il 40% dai residents di divignince foreste al rive in realtât de Svezie e di consecuence il câl di pês de lenghe proprie al è mancul fuart di chel che al somearès se si cjalàs dome i dâts rûts de imigrazion.
09/04/22
Paîs Basc: in vore la edizion 22 de Korrika
E je daûr a davuelzisi la edizion numar vincjedoi de Korrika, la corse inmaneade ogni doi agns de organizazion AEK (Coordenament pe alfabetizazion e pe baschizazion) par cjapâ sù fonts par promovi e insegnâ la lenghe basche e par slargjâ il so ûs inte societât. La manifestazion e je tacade ai 31 di Març di Amurrio e si sierarà ai 10 di Avrîl a Donostia, dopo di un percors di 2.180 chilometris a scjavaç dal Paîs Basc. Il sproc de edizion di chest an al è “HitzEkin”, un neologjisim che al vûl riclamâ ae dibisugne di jessi proatîfs, o sei di impegnâsi in maniere fative pe lenghe (hitz al vûl dî peraule, ekin impegnâsi o metisi in vore).
Galizie: cuasi 500 lis denunciis rivadis ae Liña do Galego
Ai 29 di Març la organizazion galiziane A Mesa pola Normalización Lingüistica e à presentât il rapuart su lis segnalazions racueltis vie pal 2021 cu la Liña do Galego, il servizi creât par cjapâ sù lis denunciis pe violazion dai dirits linguistics. Lis comunicazions rivadis l’an passât vie pueste eletroniche, par telefon o cu la aplicazion di pueste a son stadis 601. Di chestis 488 a jerin denunciis. La plui part si riferissin al compuartament des aministrazions publichis, là che i citadins a son plui cussients dai lôr dirits e duncje a son mancul disponibii a acetâ che a sedin violâts. No mancjin però lis segnalazions che a rivuardin lis grandis aziendis privadis (de Ikea a Google, di Endesa a Naturgy) che dispès no ufrissin servizis par galizian e in diviers câs a doprin i toponims locâi in forme castilianizade. A Mesa e à ricuardât ancje cemût che, in gracie di chestis segnalazions, si vedi rivât a dreçâ diviersis situazions. La Liña do Galego e mostre duncje di jessi un imprest simpri plui util e che al ven tignût di riferiment par monitorâ la tutele dai dirits ancje di istituzions internazionâls tant che il Consei de Europe.