Paîs Catalans: metût sù un consei linguistic pe scuele

Il guvier catalan al à decidût di meti in pîts un organisim gnûf che al viodarà di infuartî il rûl dal catalan tant che lenghe veicolâr inte scuele. Il Consell Lingüístic Assessor – chest il so non – al varà di decidi i criteris par inzornâ i contignûts dai progjets linguistics e lis strategjiis che a coventin par sburtâ la lenghe proprie tai centris educatîfs de Catalogne, sei dentri che fûr des aulis. Il consei al è integrât dentri dal dipartiment pe educazion dal guvier catalan ma al à autonomie decisionâl. A formâlu a son sedis esperts dai setôrs academic, educatîf, linguistic, dal dirit e de divulgazion. Si trate di une des rispuestis dal guvier catalan ai atacs ae imersion linguistiche che a rivin de magjistrature spagnole.

Font: 20 minutos, 01/03/22

Asturiis: si ponte a cressi la presince dal asturian a scuele

Intant di un incuintri cui rapresentants de Academia de la Llingua Asturiana e de Iniciativa pol Asturianu, la rapresentante pe educazion dal guvier des Asturiis e à anticipât che e cressarà la presince de lenghe proprie dentri des scuelis superiôrs de comunitât, là che cumò e je di une ore par setemane. Ta cheste direzion e va ancje la volontât di ricognossi lis certificazions linguistichis B2 e C di asturian come credits intai prossims concors par professôrs des superiôrs. La iniziative e je stade decidude profitant dal adatament dai curricola ae gnove leç su la educazion. Ta cheste suaze si intint di incressi ancje la presince dal asturian tes scuelis infantîls. Al reste invezit viert, a front de indisponibilitât mostrade fin cumò dal guvier di Madrid, il cjapitul dal ricognossiment de classe di insegnament di asturian. Il teme al interesse uns 250 insegnants precaris che no si rive ancjemò a ricognossiur un puest fis.

Font: La Voz de Asturias, 28/02/22

Stât francês: LDH pal rispiet dai presonîrs bascs e cors

Il president de Leghe pai Dirits dal Om (LDH), Malik Salemkour, al à domandât aes istituzions francesis di rispietâ i dirits dai presonîrs bascs e di chei cors. La lote armade e je rivade insom intal 2014 in Corsiche e tal 2017 intal Paîs Basc dopo che i moviments armâts che le vevin animade a àn decidût di lassâ che lis lôr rivendicazions a fossin puartadis indenant dome cun mieçs democratics. In ducj e doi i câs i apei publics des associazions e dai elets di chei teritoris par lâ indenant cul dialic si son cjatâts denant dal dinei dal guvier di Parîs. Il câs plui emblematic e sintût al è chel dai presonîrs là che lis istituzions statâls no acetin di meti in vore nancje chês misuris previodudis de leç par slizerî la lôr cundizion. La LDH e à duncje comunicât la sô adesion aes azions di disubidience civîl metudis in cjamp des organizazions pe pâs e pe riconciliazion.

Font: Mediabask, 26/02/22

Corsiche: prefeture ocupade dai deputâts nazionaliscj

Ai 24 di Fevrâr une cuarantine di deputâts che a partegnin aes diviersis animis dal nazionalisim cors (Femu a Corsica, Core in Fronte, PNC) a àn ocupât in maniere simboliche il palaç de prefeture di Aiacciu / Ajaccio tirant sù la bandiere de isule dongje di chê francese e metint fûr doi strissons cu lis scritis «populu arritu» (popul in pîts) e «avà basta» (cumò vonde). E je la prime volte dopo des aministrativis dal 2021 che rapresentants nazionaliscj di maiorance e di oposizion a imbastissin une iniziative unitarie. A stiçâ cheste reazion a son stâts i atacs rivâts sei de bande dal guvier di Parîs che dal so rapresentant su la isule. Propit il prefet al è stât responsabil de iniziative che e à fat passâ la colme ai elets cors (fintremai chei no nazionaliscj), ven a dî il ricors fat indenant cuintri dal regolament interni de Assemblee de Corsiche là che si calcole di ilegâl sei il tiermin “popul cors”, sei il dirit dai deputâts di doprâ la lenghe proprie intant dai lavôrs de aule. Il marum dai elets si à manifestât in maniere unanime ancje te session plenarie de Assemblee là che, in plui dai colps bas de prefeture, si à pontât il dêt cuintri des istituzions statâls che, tai sîs agns di guvier nazionalist su la isule, a son ladis dilunc a sbeleâ lis rivendicazions che a rivin de Corsiche e che a cjatin la poie de maiorance de popolazion.

Font: Corse Net Infos, 24 e 25/02/22; Alta Frequenza, 24/02/22

Paîs Catalans: partît il confront public sul Pat pe lenghe

Il president dal guvier catalan, Pere Aragonès, al à screât ai 22 di Fevrâr la prime riunion dal Pat Nazionâl pe Lenghe domandât a grande maiorance tal Setembar stât dal Parlament de Catalogne. Ae riunion a àn partecipât altris membris dal esecutîf intune cun delegâts dai partîts politics che a poin la iniziative, sociolinguiscj, rapresentants dal consei sociâl de lenghe catalane e di altris entitâts che a operin pe lenghe proprie. Intant dal incuintri e je stade presentade la informative sul stât de lenghe metude jù di un grup di academics e esperts. Si invie cussì il procès partecipatîf indreçât a istituzions, realtâts associativis e citadins che al larà indenant fint in Lui. Il guvier al inmanearà incuintris sul teritori par presentâ i contignûts dal document e taulis tarondis par sburtâ la riflession su chescj temis e stiçâ a presentâ propuestis. Cun di plui, si invidarà lis realtâts dal teritori a fâ il stes. Dodis i as dulà che si centrarà il dibatiment: aministrazions publichis; educazion e ricercje; coesion sociâl e acet; audiovisîf e mieçs di comunicazion; digjitâl e tecnologjiis pe lenghe; mont socioeconomic e dal lavôr; salût e servizis socioassistenziâi; culture; sport, associazionisim e timp libar; relazions tra tieris di lenghe catalane; dimension statâl, europeane e internazionâl; cualitât de lenghe. Cul prin di Avrîl si vierzarà la pussibilitât di presentâ propuestis e vie pal Autun a saran presentâts i risultâts dal lavôr di racuelte e sintesi dal materiâl tirât sù, disvilupâts tun document finâl.

Font: Generalitat de Catalunya, 23/02/22

Alsazie: passe 150 mil citadins a vuelin une regjon autonome

A son 170 mil i citadins che a àn partecipât ae consultazion popolâr inmaneade de Coletivitât europeane de Alsazie su la propueste di gjavâ fûr chest teritori de regjon aministrative Grand-Est. Cualchi an indaûr, intant de presidence di François Hollande, si veve puartât indenant une riorganizazion dal sisteme teritoriâl dal stât francês che e veve metût sù regjons aministrativis plui grandis che, in diviers câs, a metevin adun teritoris cun storiis e identitâts ancje une vore diferentis. Al jere propit ce che i veve capitât ae Alsazie. Pal 92,4% dai citadins che a àn partecipât al vôt la Alsazie e à di tornâ une regjon par so cont. Par trop che al sedi indicatîf de volontât popolâr, il vôt nol è vincolant pal guvier centrâl che al è l’unic a podê decidi se riviodi la organizazion aministrative in vore o lassâle cussì cemût che e je.

Font: Agence Bretagne Presse, 22/02/22

Paîs Catalans: il guvier des Baleârs al riviôt la leç educative

Il guvier des Baleârs al à riviodût il stampon de leç su la istruzion eliminant il ricognossiment dal castilian tant che lenghe veicolâr che, in plui des oris di castilian al varès puartât a doprâ cheste lenghe ancje par insegnâ altris materiis. Si torne duncje ae prime version dal test che al met il catalan di lenghe prioritarie. I spietarà in ogni câs a ogni istitût scolastic detaiâ il progjet linguistic di meti in vore. La propueste di leç e jere stade mendade dopo che i socialiscj – fuarce maioritarie tes isulis – a vevin cjatât un acuardi cul PP par inserî come lenghe veicolâr ancje il castilian. Lis pressions unitariis di sindacâts, ents e associazions a pro dal catalan a àn puartât il guvier baleâr a tornâ sui siei pas ancje se la motivazion uficiâl e je che, cundut dal acuardi, il PP nol varès dât la sô poie plene al test.

Font: Cadena Ser, 21/02/22

Paîs Basc: acuardi par promovi l’euskara tal cjamp digjitâl

Il guvier de Comunitât Autonome Basche e la fondazion PuntuEUS a àn presentât lis strategjiis di colaborazion pe dade 2022-2023. I doi obietîfs di fonde concuardâts a interessin il setôr socioeconomic e chel de vite cuotidiane des personis. Tal prin câs, lis prioritâts si riferissin ae promozion dal domini .eus framieç des entitâts privadis che a àn rapuarts direts cul guvier basc, des associazions di categorie e dai lôr associâts, dal setôr dal cumierç e dal acet, e des impresis piçulis e mezanis. Chê altre linie di azion, invezit, si propon di promovi l’euskara tant che lenghe principâl dai utents dal mont digjitâl no dome par mieç de adesion al domini .eus ma ancje indreçantju su configurazions par basc dai navigadôrs e dai dispositîfs eletronics.

Font: Euskadi.eus, 21/02/22

Aragon: si slargje il studi dal aragonês te universitât

Ducj i students dal campus di Uesca / Huesca a podaran, za a partî di chest mês di Març, integrâ tal lôr percors di studi specific il cors di lenghe aragonese. Cheste pussibilitât e jere previodude dome par cui che al studiave linguistiche ma cumò la sede distacade de Universitât di Zaragoza e à decidût di permeti a ducj i students, di là de facoltât frecuentade, di meti la introduzion ae lenghe aragonese tal lôr plan di studis. Il cors al ufrìs lis cognossincis di fonde su la lenghe, su la sô evoluzion storiche e su la sô gramatiche, intune cui prins elements di comunicazion scrite e orâl par aragonês.

Font: Heraldo, 20/02/22

UE: lis propuestis di ELEN ae conference sul avignî de Europe

ELEN (European Language Equality Network), la Rêt Europeane pe Avualiance Linguistiche, e à fat indenant vot racomandazions pe conference sul avignî de Europe che si proponin di miorâ la cundizion des lenghis minorizadis dal continent. Lis propuestis, nassudis di un confront tra lis realtâts che a componin la Rêt, a son stadis presentadis ai 17 di Fevrâr intal Parlament european inte suaze di un incuintri cul Intergrup su lis minorancis linguistichis. L’intindiment al è chel di rispuindi al faliment des istituzions europeanis intal garantî i dirits dai citadins europeans che a fevelin lenghis minorizadis, certificât de boçadure de iniziative citadine batiade Minority SafePack. Trê des vot racomandazions a domandin di prontâ dai regolaments comunitaris su lis lenghis menaçadis, sui dirits di cui che al fevele lenghis minorizadis e par sigurâ la avualiance linguistiche digjitâl. Chês altris propuestis a integnin la istituzion di un comissari european pes lenghis, di previodi proceduris di infrazion pai stâts che a discriminin des minorancis linguistichis, di creâ dai canâi di finanziament di pueste pes lenghis minorizadis, di slargjâ l’articul 19 dal tratât di fonde de Union ancje ae discriminazion di nature linguistiche o pe partignince a di une minorance nazionâl, e di imbastî un plan di gjestion de diversitât linguistiche fondât sul Protocol di Donostia.

Font: ELEN, 18/02/22

Bretagne: contrat stât–regjon al esam de Assemblee locâl

Ai 24, 25 e 26 di Fevrâr il Consei de regjon aministrative bretone al è clamât a fâ bon il contrat di plan stât – regjon (CPER) pai agns 2021 - 2027, il belanç pal 2022 e la convenzion su lis lenghis de Bretagne. Si trate, massime tal prin e tal ultin câs, di imprescj di fonde pe planificazion des liniis di azion e des risorsis disponibilis de politiche regjonâl pai prossims agns. Il contrat al à une disponibilitât complessive di passe 970 milions di euros che a valin ancje tant che cofinanziament par atirâ altris risorsis di divignince comunitarie. La aree di invistiment plui impuartante e je chê dal insegnament superiôr, de ricercje e de inovazion che, di bessôl, al passe i 400 milions di euros. Il contrat al è però centrâl ancje par definî obietîfs e risorsis par garantî un slargjament dal insegnament de lenghe bretone. Il test al è stât presentât ae stampe come za definitîf; pai partîts di oposizion chest al disvuede ogni autoritât dal Consei regjonâl. Il grup Breizh a-gleiz – Autonomie, écologie, territoires – che al met adun i elets autonomiscj e nazionalitaris – al lamente la pierdite progressive dal valôr strategjic dal contrat e al segnale che la cifre e ten dentri sei credits riciclâts, sei elements di finanziament ordenaris e duncje, tai fats, i fonts in plui metûts dal stât centrâl a son pôc plui che fruçons.

Font: ABP, 18/02/22

Paîs Catalans: protestis a un an dal impresonament di Hasel

Ai 15 di Fevrâr dal 2021 il musicist catalan Pablo Hasel al vignive impresonât par vie dai contignûts di une serie di cjançons e di tescj che al veve scrit. La sô condane e il so arest a vevin discjadenât protestis dentri e fûr dai Paîs Catalans, pontant la atenzion par un pôc sul teme de libertât di espression intal stât spagnûl. Lis protestis, in plui di un câs, si vevin sieradis cun scuintris cu lis fuarcis di polizie causant diviers ferîts, ancje seris, tra i manifestants e l’arest di almancul une cincuantine di personis: cuatri di lôr a son ancjemò in preson, altris a son in spiete di procès che, cun dute probabilitât, si fasaran dome tal 2023. A distance di un an, cundut dai impegns cjapâts ta chei dîs soredut des fuarcis progressistis, la riforme dal codiç penâl par chel che al rivuarde i cussì clamâts “delits di opinion” no à mot nancje un pas e la domande di indult par Pablo Hasel e je restade dome une promesse. La normative in vore par limitâ la libertât di espression e l’ûs che indi fâs la magjistrature spagnole a son stâts doprâts une vore ta chescj agns massime par cidinâ la oposizion politiche e culturâl de part indipendentiste e antagoniste des nazionalitâts minorizadis che a vivin dentri dal ream di Spagne. Ai 19 di Fevrâr, in ocasion dal inovâl dal impresonament di Pablo Hasel, centenârs di personis a àn dât vite a gnovis manifestazions di proteste in diviersis localitâts catalanis.

Font: VilaWeb, 13 e 14/02/22

Asturiis: la lenghe e vâl il 5% dal prodot interni sporc

Daûr di un studi coordenât de universitât di Uviéu / Oviedo lis ativitâts economichis leadis aes lenghis propriis des Asturiis – l’asturian e la varietât galiziane fevelade te part plui ocidentâl de comunitât – a rapresentin il 5% dal prodot interni sporc asturian e il 7,3% de ocupazion complessive, une dimension similâr a chê dal compart energjetic o de edilizie. Il setôr che al pese di plui al è chel de educazion ma, a contribuî a chest risultât, a son ancje lis ativitâts culturâls, in primis editorie, musiche e produzions audiovisivis. Cundut che la normative in vore no favorìs plui di tant lis lenghis propriis, il lôr pês economic al è plui fuart di chel che al ven fûr di un studi similâr fat pal catalan intal Paîs Valenzian.

Font: La Voz de Asturias, 13/02/22

Svezie: gnove menace minerarie pe Tiere dai Sami

Doi esperts internazionâi che a operin su mandât dal Consei pai Dirits Umans de ONU a àn denunciât i efiets negatîfs che il progjet par une gnove miniere di fier dongje di Gállok, te part svedese de Tiere dai Sami, al podarès vê sei pal ambient che pes comunitâts nativis che a vivin alì. Daûr dal studi che a àn puartât indenant, la iniziative minerarie e disviluparès un nivel alt di incuinament e di scarts di smaltî, cun dams grues sul ecosisteme locâl e sui percors migratoris des renis cul risultât di meti a risi il sisteme di vite tradizionâl dai sami. La UNESCO e calcole la Tiere dai Sami la plui grande aree dal mont là che une part impuartante de economie e de vite si fonde sui spostaments stagjonâi dal besteam e la leç svedese e ricognòs l’arlevament des renis un dirit des popolazions sami. La gnove miniere – a disin i esperts de ONU – e je duncje une menace a dut chest, tant plui che lis comunitâts locâls no son nancje stadis consultadis in proposit. La Svezie e à in esam une leç che e previodi l’oblic di sintî i rapresentants dai sami prime di cjapâ decisions che a puedin vê consecuencis su di lôr e su la lôr tiere e, ancje se no je ancjemò in vore, i esperts a invidin lis autoritâts statâls a procedi za ta chê direzion prime de decision finâl che e je fissade pal mês di Març. Intal framieç lis comunitâts locâls a van indenant cu lis lôr protestis e a àn cjatât aleâts ancje fûr de lôr tiere, tra chescj la ativiste climatiche Greta Thunberg che cun altris zovins dai Fridays For Future e à partecipât a di une azion di proteste a Gállok invidant il guvier svedês a meti fin ae colonizazion de Tiere dai Sami e al disfrutament de sô int e de sô nature.

Font: The Barents Observer, 11/02/22

Cornualie: in cressi lis personis che a studiin il cornic

Contrari di ce che al è sucedût pe plui part des lenghis minorizadis, la crisi sanitarie dai ultins doi agns al pâr che e vedi zovât al cornic. Cun di fat, in centenârs di lôr, sei in Cornualie che in altris lûcs ator pal mont, a àn disfrutât des gnovis oportunitâts che si son disvilupadis su la rêt par tacâ a imparâ cheste lenghe celtiche che vie pal secul vincjesim e jere stade dade par muarte. Dongje des lezions sul web curadis di insegnants in cjar e vues, a son nassudis ancje des aplicazions di pueste par studiâ il cornic discjariadis di cualchi miâr di personis. Tra di lôr ancje Indylan, lançade dal Consei de Cornualie e finanziade de Union Europeane. Simpri par iniziative de Assemblee locâl al va indenant il progjet educatîf Go Cornish che al è daûr a cjatâ simpri plui bon acet intes scuelis de Cornualie.

Font: BBC, 10/02/22

Gales: iniziativis par favorî l’aprendiment de lenghe proprie

Il guvier galês al à fat savê che cul mês di Setembar di chest an i zovins tra i 18 e i 25 agns a varan la pussibilitât di iscrivisi e partecipâ sore nuie ai cors di lenghe dal Centri nazionâl pal aprendiment dal galês. Si trate di cors di nivel diferent adats par dutis lis necessitâts, di cui che nol à nissune cognossince de lenghe a cui che invezit al à dome bisugne di perfezionâ lis sôs competencis. Par dongje si metarà a disposizion ancje un gnûf imprest digjitâl par miorâ la cognossince de lenghe framieç dai fantats tra i 16 e i 18 agns. Lis dôs iniziativis a son pensadis par incressi lis oportunitâts par imparâ il galês in maniere che simpri plui personis a puedin doprâ la lenghe te lôr vite cuotidiane. Par rispuindi ae dibisugne di plui educadôrs cuntune buine competence dal galês, si à previodût ancje l’acès gratuit di ducj i insegnants ai cors di lenghe.

Font: Nation Cymru, 10/02/22

Polonie: preocupazion pal tai dai spazis di todesc a scuele

Il comitât di esperts dal Consei de Europe che al ten di voli il rispiet de Cjarte europeane pes lenghis regjonâls o minoritariis al à pandût il so malcontent pes decisions des istituzions polachis di ridusi lis risorsis pe educazion intes lenghis minoritariis e pe diminuzion dai spazis di insegnament par todesc, limitât cumò a une ore par setemane. Cun di plui, simpri te suaze des misuris previodudis a pro des lenghis minoritariis, la Polonie si veve impegnade par che il todesc nol fos dome materie di studi ma ancje lenghe di insegnament. Invezit, a segnalin i esperts dal Consei de Europe, chest impegn no si à mai concretizât.

Font: CoE, 09/02/22

Paîs Catalans: i catalans a difindin la imersion linguistiche

Il Centre d’Estudis d’Opinió al à davuelt une inchieste sui ûs linguistics in Catalogne par capî cuale che e je la posizion de int a front de sentence dal tribunâl superiôr di justizie che e à imponût un 25% di insegnament par castilian e che e met in discussion il sisteme a imersion linguistiche in vore di agns in Catalogne. Il risultât al è che il 76% de popolazion e je a pro dal sisteme a imersion, une posizion che però e devente cuasi assolude framieç di chei che a fevelin par catalan (cul 95% di rispuestis a favôr) e che invezit e divît a metât (50% a pro e 50% cuintri) chei che a àn il castilian di prime lenghe. La inchieste e analize ancje il rapuart jenfri simpatiis politichis e model linguistic cul risultât che la maiorance dai simpatizants dai partîts catalans e di chei progressiscj e sosten la imersion linguistiche, intant che i contraris si centris framieç dai partîts de diestre spagnoliste (92% di contraris tra i eletôrs di Vox, 77% tra chei di C’s e 71% tra chei dal PP). Cui che al fevele par catalan, tal 78% dai câs al segnale che la cundizion de lenghe e je lade in piês intai ultins agns e tal 68% che si trate di une lenghe menaçade (intant che tra chei che a fevelin par castilian dome un su cinc al pense che il catalan al sedi une lenghe menaçade). I cjamps là che la lenghe e je sintude plui margjinalizade a son chei de justizie, des aministrazions statâls e des plateformis digjitâls.

Font: Publico, 09/02/22

Paîs Basc: apel a rispuindi ai atacs judiziaris cuintri dal basc

Ai 5 di Fevrâr centenârs di personis a àn partecipât ae manifestazion clamade adun a Laudio / Llodio di Euskalgintzaren Kontseilua – coordenament che al ten adun lis organizazions plui impuartantis impegnadis pe lenghe basche – par denunciâ la esistence di une strategjie judiziarie cuintri dal euskara. Il pont di partence al è leât a di une sentence che e oblee la aministrazion comunâl di chê citadine alavese a cjapâ a vore une funzionarie che no à lis competencis linguistichis, e tal specific il nivel di cognossince dal basc, domandadis pe sô posizion. Tra lis altris, la sentence e justificave la funzionarie pal fat che la lenghe basche e sarès une vore dificile di imparâ. Magari cussì no – al à spiegât il segretari gjenerâl di Kontseilua, Paul Bilbao – no je la prime volte che i judiçs a cjapin decisions no daûr di criteris juridics, ma su la fonde di prejudizis o di competencis che no àn, sedino di nature linguistiche, pedagogjiche (come tal câs de imersion linguistiche catalane) o altri. Massime tai ultins agns tancj magjistrâts a àn cirût di doprâ lis lôr sentencis par cambiâ la normative linguistiche in vore e par limitâ ancjemò di plui i dirits linguistics dai citadins. Di chi un apel a organizazions pe lenghe, agjents sindacâi, politics e sociâi, istituzions e citadins par dâsi adun e fâi cuintri a cheste strategjie judiziarie di atac ae lenghe e a cui che le dopre.

Font: EiTB, 05/02/22

Paîs Basc: in vore par miorâ la version di Itzuli basc-francês

L’ufici public de lenghe basche (OPLB), che al opere tal Paîs Basc setentrionâl sot aministrazion francese, e il guvier de Comunitât Autonome Basche a àn sotscrit une convenzion che e permet di miorâ il tradutôr automatic neuronâl Itzuli. Si trate di un imprest fondât su la inteligjence artificiâl che al incrès la cualitât des sôs traduzions su la fonde dal ûs e dal nivel dal corpus linguistic che al à a disposizion. La version disvilupade in rapuart cul castilian e funzione za une vore ben, ancje in graciis dal corpus di tescj disponibii come fonde dal lavôr. Dome vie pal mês di Zenâr i son stadis domandadis 2 milions e 300 mil traduzions dal castilian al basc e un milion e mieç dal basc al castilian. Te stesse dade, la version dal basc al francês si è fermade sot des 19 mil traduzions. La convenzion e previôt che l’ufici public de lenghe basche al tiri dongje e al passi ai coleghis dal Paîs Basc meridionâl 5 mil tescj in version bilengâl che a saran po controlâts sul plan dai contignûts, de cualitât e dal gjenar e, in fin, metûts dentri dal machinari par che al puedi deventâ simpri plui precîs.

Font: Mediabask, 28/01/22