Russie: difese des minorancis russofonis cence de fuarce

La Federazion Russe, par bocje dal so ministri pai forescj Sergei Lavrov, e torne a denunciâ lis politichis discriminatoriis metudis in at cuintri des minorancis di lenghe russe, in particolâr intes republichis baltichis e in Ucraine. Pes autoritâts russis si cjatisi denant di violazions palesis des convenzions internazionâls su la tutele des minorancis linguistichis e nazionâls e, tal câs ucrain, fintremai di ats che a van cuintri de stesse Costituzion dal paîs. Lavrov al à dut câs sigurât che la difese des minorancis russis o russofonis e ven puartade indenant dome sul plan diplomatic, massime dentri dal Consei de Europe, de OSCE e de ONU, e cence l’ûs de fuarce. Un riferiment, chest ultin, che tancj a metin in discussion soredut cun riferiment al scuintri in at in Ucraine. Il ministri pai forescj rus al à ancje lamentât la muse dople di diviers stâts europeans che a domandin ae Russie di rispietâ i dirits des minorancis ma, tal stes timp, no si sintin in dovê di fâ chel stes.

Font: TASS, 06/09/21

Corsiche: il FLNC pront a ricjapâ sù lis armis

Al va dilunc a montâ in Corsiche il marum pe mancjance di disponibilitât dal esecutîf francês di confrontâsi cu lis istituzions corsis e di vignî incuintri aes domandis fatis indenant dal nazionalisim cors che zaromai di agns al guvierne la isule. Se vie pal mês di Avost chest sintiment al jere stât manifestât a clâr dal partît che al vuide il guvier locâl (Femu a Corsica), ai 2 di Setembar si à rindût public un video che al mostre uns cincuante oms armâts e cu la muse taponade che, in non dal Front di Liberazion Nazionâl Cors (FLNC), a declarin di jessi pronts a tornâ ae lote armade. Il comunicât let intant dal video al è firmât des dôs ramis principâls dal moviment o sei la Union dai Combatents (FLNC-UC) e il Front 22 di Otubar: il prin al veve metût fin ae lote armade tal 2014 intant che il secont al veve dismetût lis armis doi agns plui tart. Intal test si dîs che se il stât francês al larà dilunc a ignorâ lis rivendicazions dai cors, il front al tornarà a cjapâ sù, e cun plui determinazion di prime, lis armis. Intal document, dut câs, si mostre ancje un ciert fastidi pe division dal mont nazionalitari cors intant des ultimis elezions e pe ande “autonomiste” (judicade masse rinunciatarie) mostrade dai vincidôrs.

Font: Corse Net Infos, 02/09/21

Scozie: font par sburtâ il gaelic intes tieris comunitariis

Il Community Land Scotland, cu la poie dal Bòrd na Gàidhlig (la agjenzie publiche pal gaelic scozês), al à ativât un font gnûf (Gaelic Community Fund) che si propon di stiçâ sul plan finanziari iniziativis inovativis indreçadis a incressi l’ûs dal gaelic intes comunitâts locâls des isulis ocidentâls e des Highlands scozesis là che la lenghe e je inmò fevelade. I finanziaments a laran in particolâr aes ativitâts davueltis intes areis gjestidis in maniere comunitarie. Vuê come vuê si stime che in Scozie lis tieris comunitariis si slargjin su passe 225 mil etars cuntune popolazion di diviers miârs di abitants.

Font: Press and Journal, 23/08/21