Irlande: gnove app par scoltâ Raidió Rí-Rá

Ai 15 di Setembar, presint ancje il ministri irlandês pes comunicazions Denis Naughten, e je stade presentade la gnove aplicazion par scoltâ Raidió Rí-Rá, la emitente radiofoniche musicâl indreçade ai zovins che e dopre il gaelic irlandês in ducj i siei spazis fevelâts. Tra i presentadôrs de emitente si àn diviers students che a rivin di diviersis bandis de isule e volontaris che a cubiin la lôr passion pe radio cun chê pe lenghe irlandese. Raidió Rí-Rá fin cumò e jere disponibile dome su Internet (www.rrr.ie), la app e permet duncje di slargjâ il so public in spiete che si rivi a trasmetile – chest al è il prossim obietîf – ancje in modulazion di frecuence.

Font: CnaG, 15/09/17

Bretagne: la “ñ” dal breton e menace la “unitât” de France

Tal Mai di chest an i funzionaris dal ufici di stât civîl dal comun di Kemper / Quimper a vevin dineât a di une cubie la trascrizion dal non par breton “Fañch” par vie che l’ene cul tilde presint tal non nol jere tra lis letaris autorizadis di une circolâr dal ministeri de justizie francês dal 2014. La cuistion si veve comedade però tal zîr di pôcs dîs dopo che la aministrazion comunâl e veve decidût di procedi cu la regjistrazion poiantsi sul articul de Costituzion francese che e ricognòs lis “lenghis regjonâls” tant che part dal patrimoni de France e su chel dal codiç civîl che al garantìs ai gjenitôrs il dirit di sielzi pai lôr fîs il non che a àn miôr. Magari cussì no, su la cuistion al è intervignût il tribunâl di Kemper / Quimper che ai 13 di Setembar al à dade fûr une sentence che e à lassât ducj scaturîts. Pai judiçs chel non breton nol pues jessi acetât par vie che “il principi che al ricognòs ai gjenitôrs il dirit di sielzi il non dai lôr fîs al à di jessi limitât intal moment che si vûl doprâ une ortografie là che a son segns diacritics no ricognossûts de lenghe francese” e “acetâ il contrari al larès a rompi la volontât dal stât di dirit di mantignî la unitât dal paîs”. Inte sentence si declare ancje che l’articul de Costituzion che al aferme che lis “lenghis regjonâls a partegnin al patrimoni de France” nol pues jessi font ni di dirits e nancje di libertâts. I gjenitôrs a àn za fat savê che a àn chê di fâ ricors e a son daûr a viodi se la aministrazion comunâl ur darà la sô poie.

Font: Nouvel Obs, 14/09/17

Gales: al cres l’ûs dal galês intai tribunâi

Daûr de relazion anuâl sul stât de justizie in Gales, al ven fûr che vie pal an judiziari 2015-2016 a son stâts 570 i procès là che si à doprât la lenghe galese, intant che par chest an si stime che si rivarà ai 600 o fintremai 700 câs. A cressi no je stade dome la cussience sul ûs de lenghe proprie te justizie, ma ancje il numar dai judiçs che a àn lis competencis linguistichis par gjestî la procedure ancje par galês. A nivel distretuâl, di fat, i judiçs bogns di davuelzi un procès par galês a van, a seconde de categorie, dal 30 al 50%.

Font: BBC, 13/09/17

Norvegje: Aili Keskitalo presidente dal Parlament sami

Aili Keskitalo e je stade confermade ae presidence dal Parlament Sami de Norvegje dopo che il so partît (NSR – Union dai Sami de Norvegje) al à otignût il 27% dai vôts e 16 deputâts intes elezions che si son tignudis ai 11 di Setembar. Al secont puest, cuntun distac di cuasi dîs ponts, al è rivât il partît laburist che al à vût 9 parlamentârs elets. Chei altris 14 puescj a disposizion inte assemblee a son lâts dividûts tra dîs partîts che, te plui part dai câs, a àn vût di contentâsi di un elet. Il Parlament Sami de Norvegje al è nassût intal 1989 e a votâlu a son i 17 mil citadins norvegjês iscrits al regjistri dai Sami, là che a puedin notâsi chei che, in plui di sintî la partignince a di chest grup nazionâl, a rivin di une famee là che si fevele par sami. Cun cheste elezion Aili Keskitalo e je rivade al so tierç mandât. Par cheste legjislature lis sôs prioritâts a son lis politichis pe lenghe e la colaborazion tra lis diviersis comunitâts sami par di là dai confins di stât.

Font: The Independent Barents Observer, 12/09/17

Asturiis: inviât il plan sperimentâl pal asturian a scuele

Ai 11 di Setembar l’an scolastic intes Asturiis si à vierzût cuntune novitât leade ae partence dal plan sperimentâl pal ûs dal asturian. Il plan al previôt che, dongje des oris di lenghe e leterature asturiane, in sîs scuelis primariis (logadis a Avilés, Carbayín, Grau, Lieres, L’Entregu e Mieres) si sperimenti par une ore par setemane l’insegnament di une altre materie par asturian. Cundut che la iniziative e cjape dentri un numar limitât di fruts, e je stade contestade cun fuarce de diestre spagnoliste (PP) di simpri contrarie a uficializâ l'asturian e il so ûs intes scuelis.

Font: Asturies.com, 12/09/17

Bretagne: confermâts par un an i contrats assistûts des Diwan

Dopo des manifestazions che si son davueltis in diviers centris de Bretagne sul prin tacâ di Setembar par protestâ cuintri de decision dal esecutîf francês di taiâ i contrats assistûts, ven a dî contrats sostignûts in part di risorsis publichis par vie de lôr utilitât sociâl, il delegât dal guvier al à fat savê che si varà une moratorie pai lavoradôrs des Diwan tocjâts dal proviodiment. Lis scuelis a imersion bretonis, di fat, a jerin tra lis plui colpidis di chest tai. Baste pensâ che, su 207 dipendents, 141 a lavorin cun contrats assistûts e di chescj 45 no jerin stâts rignuvîts e altris 39 a riscjavin di saltâ tai prossims sîs mês. Il prefet de Bretagne al à garantît che i 45 lavoradôrs restâts a cjase a varan il contrat rinovât par un altri an. I citadins che si vevin mobilitâts cuintri dai tais a àn fat savê che a restaran distès in vuaite, ancje parcè che cheste vicende e palese a clâr il status precari des scuelis a imersion bretonis. Di là dai contrats assistûts, la vere cuistion e je chê de mancjance di finanziaments continuatîfs pes Diwan e di un tratament che lis meti al pâr des scuelis publichis francesis.

Font: Ouest France, 09/09/17

Paîs Catalans: a bon la leç pal referendum su la indipendence

A man a man che si svicine la date dal vôt, il scuintri tra lis autoritâts catalanis e chês spagnolis pal referendum su la indipendence de Catalogne al va indenant a cressi. Ai 6 di Setembar, dopo oris di ostruzionisim de bande dai partîts unioniscj, il Parlament catalan al à fate buine (cul vôt a pro di JxS e CUP, la astension di CSQP e la jessude de aule di C’s, PSC e PP) la leç sul referendum che e fisse un regjim juridic ecezionâl che i garantìs la prevalence su cualsisei altre leç che e puedi jentrâ in conflit cun jê. La stesse sere, su la fonde di chê leç, il guvier catalan al à firmât i decrets pe convocazion dal vôt referendari il prin di Otubar, pal so davuelziment e pe nomine de zonte eletorâl. La dì dopo il Parlament catalan al à aprovade ancje la leç di transitorietât juridiche che, tal câs di vitorie dal sì tal referendum, e à di sigurâ il passaç ordenât de legalitât spagnole a chê catalane e fâ di Costituzion provisorie pe Republiche catalane in spiete che i citadins a ratifichin chê metude jù de Assemblee costituente.

Paîs Catalans: il cine Estiu 1993 candidât pal Oscar

Dopo dal basc Loreak intal 2015, la academie spagnole dal cine e à sielzût un altri film zirât intune lenghe minorizade tant che candidât de cinematografie dal stât spagnûl pal Oscar. Si fevele di Estiu 1993 (Astât 1993), pelicule zirade di plante e fûr par catalan. Il film al conte la storie dramatiche de sô regjiste, Carla Simón, che dopo vê pierdût di frute i siei gjenitôrs e veve lassât Barcelone par lâ a vivi cu la famee dal barbe intun paîs de campagne catalane. La pelicule e je stade premiade al festival di Berlin tant che miôr opare prime, in plui di otignî diviers ricognossiments in altris festivals internazionâi.

Font: El Pais, 07/09/17

Paîs Basc: ELA e LAB a proponin un procès sovranist unilaterâl

Intune conference stampe che si à tignude ai 4 di Setembar a Bilbo/Bilbao ELA e LAB, lis siglis che a rapresentin la maiorance sindacâl basche, a àn presentât un document svilupât in maniere unitarie là che a proponin di inviâ un procès sovranist unilaterâl e sociâl che al cjapi dentri la Comunitât Autonome Basche e la Navare. Pai doi segretaris Adolfo Muñoz e Garbiñe Aranburu al covente un gnûf status politic cun competencis legjislativis plenis ancje tal cjamp socioeconomic e lavoratîf e, par rivâi, no si pues pontâ suntun rignuviment dai statûts di autonomie là che il stât centrâl al à simpri la ultime peraule. I doi sindacâts a zontin che par sburtâ chest procès si pues partî dome de çampe nazionalitarie dal moment la “diestre basche” rapresentade dal PNV e dal PSE-EE no à nissune intenzion di vierzi un procès sovranist. ELA e LAB a invidin duncje la çampe nazionalitarie basche a imbastî une dialetiche cul moviment sindacâl par svilupâ chest procès.

Font: EiTB, 04/09/17

Cossovo: aleance di guvier cu la poie des minorancis

Lis elezions politichis dai 11 di Jugn a vevin lassât il Cossovo intune situazion di instabilitât e dome ai 4 di Setembar si à rivâts ae firme di un acuardi di guvier. La coalizion vuidade dal Partît Democratic dal Cossovo (PDK), e formade ancje de Aleance pal Avignî dal Cossovo (AAK) e dal moviment NISMA, e à cjatât un acuardi cu la Aleance pal Cossovo Gnûf (AKR) che, par partecipâ al guvier, e à bandonât la aleance eletorâl metude sù cu la Leghe Democratiche dal Cossovo (LDK) e cu la liste Alternativa. Cundut dal salt de cuaie de Aleance pal Cossovo Gnûf, par vê la maiorance in Parlament, la gnove coalizion e à vût bisugne ancje de poie di cualchi deputât des minorancis etnichis che a son duncje decisivis pe tignude dal guvier. Lis minorancis a àn vincj puescj garantîts inte Assemblee cossovane, dîs di chescj pe comunitât serbe. Viodude la tension continuade tra la Srpska Lista, il partît di racuelte dai serps, e lis istituzions dal Cossovo, la coalizion di guvier e à vût di cirî la poie dai partîts espression di chês altris minorancis, là che il plui fuart al è il Partît Democratic Turc dal Cossovo.

Font: Balkan Insight, 04/09/17; RadioFreeEurope - RadioLiberty, 04/09/17

Paîs Basc: si slargje tal Nord la ufierte scolastiche par euskara

Ai 4 di Setembar 40 mil fruts e fantats a son tornâts sui bancs di scuele in Ipar Euskal Herria, la part setentrionâl dal Paîs Basc sot aministrazion francese. Tra di lôr a son simpri di plui chei che a sielzin percors educatîfs bilengâi. Tal an scolastic 2017-2018 a son cuasi 13 mil e, plui in detai, 6.800 intai centris publics bilengâi, 3.700 intes scuelis a imersion de rêt Seaska e 2.300 intai istitûts privâts confessionâi. Tra lis novitâts principâls di chest an si à il gnûf liceu gjestît di Seaska a Baiona / Bayonne là che a studiin uns 300 fantats e là che, pe prime volte, si invie ancje un percors di formazion professionâl in lenghe basche (euskara). Cun chest an e je partide ancje la gnove ikastola – la scuele a imersion par euskara – di Bokale, un istitût picinin ma che al è impuartant par vie che al è il prin fûr de aree là che cumò si fevele par basc.

Font: EiTB, 04/09/17

Paîs Basc: euskara pai adults, campagne unitarie in Navare

Il guvier e 32 aministrazions locâls de Navare si son dâts adun cu la rêt dai euskaltegis par promovi la gnove stagjon 2017-2018 dai centris di insegnament de lenghe basche pai adults. E je la prime che ducj i sogjets publics e privâts cjapâts dentri tal insegnament dal euskara framieç de popolazion adulte a promovin une campagne unitarie. Il teme de campagne al è “Gjolt intal euskaltegi, gozatu euskara” e si fonde su la esperience di nûf personis che a àn imparât la lenghe ta chescj centris e che vuê a puedin doprâ cun sodisfazion l’euskara in diviers cjamps de lôr vite. La campagne e je presinte su internet e su lis rêts di comunicazion sociâl cun informazions sui euskaltegis atîfs, sui jutoris par cui che ju frecuente e cun videos che a contin lis esperiencis dai nûf testimonials. Vie pal mês di Setembar al sarà in vore ancje un numar telefonic di pueste par ufrî dutis lis informazions su chest argoment. La campagne promozionâl e cjape dentri ancje i cuotidians, lis radios e i mieçs dal traspuart public de Navare. Vie pal an 2016-2017 i iscrits ai euskaltegis a jerin stâts 6.559.

Font: Naiz:, 04/09/17

Cravuazie: inmò menacis cuintri de minorance serbe

A van dilunc in Cravuazie i ats di menace cuintri de minorance serbe e dai siei rapresentants. Par protestâ cuintri de ipotesi di tirâ vie une targhe logade a Jasenovac che e ripuarte un sproc ustaša, i membris dal Partît Natîf Cravuat di Diestre (A-HSP) no àn cjatât nuie di miôr di inmaneâ une manifestazion a Zagabrie denant de sede dal setemanâl de minorance serbe Novosti dulà che a son stadis brusadis copiis dal gjornâl. Intant de iniziative si à ancje dite che se la targhe e sarà gjavade a paiâ lis consecuencis a saran il referent de comunitât serbe de Cravuazie, Milorad Pupovač, e il prin ministri cravuat Andrej Plenković. La vicende e à jevât lis protestis dal ministri pai forescj de Serbie, ma par Plenković nol è masse di preocupâsi par vie che lis menacis a rivin di un partît che al à un pês une vore margjinâl.

Font: Balkan Insight, 04/09/17

Bretagne: contrats assistûts taiâts, a risi la ativitât des Diwan

Fintremai il 2016 intal stât francês mieç milion di personis, pe plui part impleadis intal associazionisim e intal setôr educatîf, a lavoravin cun contrats assistûts, ven a dî contrats sostignûts in part di risorsis publichis par vie de lôr utilitât sociâl. Cumò però il guvier francês al à decidût di eliminâju e, a man a man che a rivin in scjadince, no vegnin rignuvîts. Un dai setôrs che al riscje di paiâ il presit plui grant al è chel des scuelis a imersion intes lenghis minorizadis tant che lis Diwan bretonis, lis ikastolas baschis o lis calandretas ocitanis là che trê cuarts dal personâl no insegnant al lavore cun contrats di cheste fate. La situazion piês si le à in Bretagne là che intes cincuante struturis gjestidis de rêt Diwan, su 207 dipendents 141 a àn contrats assistûts. Di chescj, a vuê, 45 contrats no son stâts rignuvîts e altris 39 a laran pierdûts intai prossims sîs mês. Si met cussì a risi la vierzidure stesse des scuelis. Par chest, tra i 2 e i 4 di Setembar, in ocasion de partence dal gnûf an scolastic, ator pe Bretagne si son davueltis diviersis manifestazions cu la partecipazion di centenârs e fintremai di miârs di personis che a domandavin di ritirâ il proviodiment o di cjatâ soluzions alternativis par garantî il lavôr intes Diwan. La stesse domande e je rivade ancje des istituzions e di diviers politics di prin plan de Bretagne, in plui che de Federazion des Regjons e dai Popui Solidaris.

Font: France3, 02/09/17; Ouest France, 02-04/09/17; Federation RPS, 02/09/17

Irlande: 5 partîts dal Nord adun pe leç sul irlandês

Ai 20 di Avost Paula Bradshow (Alliance Party), Steven Agnew (Verts), Gerry Carroll (People before Profit Alliance), Nicola Mallon (Social Democratic and Labour Party) e Gerry Adams (Sinn Féin) si son cjatâts cul president de organizazion pe lenghe Conradh na Gaeilge, Niall Comer, cun chê di mostrâ la poie unitarie e convinte ae aprovazion di une leç pe lenghe irlandese de bande dal Parlament de Irlande dal Nord. I cinc partîts, che a rapresentin 50 dai 90 membris de Assemblee nordirlandese, a vevin za cjapât posizion in merit, ma no lu vevin mai fat cuntun at uficiâl e unitari. Il messaç al à une vore clâr – al à dite Comer – si à une maiorance slargjade e trasversâl a pro di une leç pal irlandês e cui che al va dilunc a fâi cuintri al varès di capî che cumò al è il moment di cambiâ. La domande par une leç e je stade ancje al centri intai ultins mês di une campagne popolâr cun miârs di personis che a àn manifestât in diviers centris de Irlande dal Nord. A pidimentâ la aprovazion de leç a restin i doi partîts di riferiment de comunitât unioniste (Democratic Unionist Party e Ulster Unionist Party).

Font: CnaG, 30/08/17

Irlande: vie il gaelic dai sportei automatics de Bancje di Irlande

La Bancje di Irlande e à decidût di gjavâ la pussibilitât di davuelzi operazions par irlandês inte sô rêt di sportei automatics. Daûr di cheste decision al sarès il fat che il servizi al interessave sì e no l’un par cent des operazions. La bancje centrâl de Republiche di Irlande e jere la uniche tra i istitûts di credit de isule a garantî chest servizi e la gnove e à duncje jevât la reazion critiche de organizazion pe lenghe Conradh na Gaeilge che e à domandât un incuintri urgjent cu la direzion de bancje e e à invidât lis sôs sezions a puartâ la cuistion ancje tes filiâls dal istitût. La organizazion e ricuarde che, se e je vere che in dì di vuê chest servizi nol è doprât di tancj di lôr, e je ancje vere che une part dai clients e à sielzût chest istitût propit pe atenzion mostrade pe lenghe, cence dismenteâ che la decision e va in cuintritindince cu la incressite des impresis privadis che a ufrissin servizis par irlandês e dal numar dai fruts che a studiin la lenghe. Un invît ae bancje a tornâ sui siei pas al è rivât daurman ancje dal Sinn Féin, partît di riferiment dal moviment republican irlandês.

Font: RTE, 29/08/17; CnaG, 31/08/17

Tatarstan: presidi par che si rignuvissi l’acuardi Mosche-Kazan

Ai 30 di Avost, intal inovâl de declarazion di sovranitât dal Tatarstan, la organizazion Centri Public Tatar (TIU) e à inmaneât un presidi te citât di Kazan par domandâ la avualiance intai rapuarts jenfri la Republiche autonome dal Tatarstan e la Federazion Russe. In particolâr si à domandât di rignuvî l’acuardi sotscrit ai 27 di Lui dal 2007 des autoritâts di Mosche e di Kazan su la condivision inte gjestion dal podê. L’acuardi, che al garantìs un nivel plui alt di autoguvier pal Tatarstan, al è scjadût za di cualchi setemane e al somee che lis autoritâts russis no vuelin rignuvîlu. Il Centri Public Tatar al è impegnât za di agns a difindi la identitât, la lenghe e la culture des comunitâts tataris. Il so president, Rafis Kasjapov, al è stât condanât a trê agns di preson intal 2015 par vê criticât lis autoritâts russis pe anession de Crimee, penisule là che e vîf une gruesse comunitât tatare.

Font: RadioFreeEurope - RadioLiberty, 30/08/17

Paîs Basc: in miârs in place par presonîrs e dispatriâts

Ai 25 di Avost miârs di personis a àn sfilât pes stradis di Bilbo / Bilbao par stiçâ i sogjets istituzionâi e politics, i sindacâts e lis realtâts sociâls dal Paîs Basc a dâsi adun par imbastî une strategjie che e meti fin al bloc imponût dai guviers di Madrid e di Parîs e che e permeti ai presonîrs e ai dispatriâts bascs di tornâ a cjase. La organizazion Kalera, che e à inmaneât la manifestazion, e à ricuardât che, cundut de fin de lote armade de bande di ETA e de consegne dai siei arsenâi, no si pues vê nissune normalizazion politiche fintremai che i centenârs di militants bascs che a son inmò in galere o che a àn vût di scjampâ no podaran tornâ in patrie. Par rivâ a chest obietîf, a àn zontât, lis mobilitazions popolârs a àn di cubiâsi cu lis azions istituzionâls e, ta cheste suaze, ducj i partîts dal Paîs Basc a àn di fâ la lôr part.

Font: Naiz:, 25/08/17; EiTB, 25/08/17

Stât francês: universitât estive de federazion R&PS

I partîts che a formin la Federazion des Regjons e dai Popui Solidaris de republiche francese si son dâts adun in Alsazie dai 24 ai 26 di Avost pe 22^e edizion de lôr universitât estive. Come par solit, l’apontament al à permetût di fâ il pont su la situazion des comunitâts minorizadis dal stât francês e su lis strategjiis politichis miôr par fâi cuintri al centralisim statâl. Te edizion di chest an a son stâts marcâts i risultâts positîfs otignûts intes ultimis elezions politichis dai partîts che a formin la federazion e che a àn puartât inte Assemblee francese ancje trê deputâts di Pè a Corsica. Ae universitât estive a àn partecipât delegâts rivâts de Bretagne, de Catalogne dal Nord, de Corsiche, de Ocitanie, dal Paîs Basc setentrionâl e de Savoie, intant che a fâ i onôrs di cjase al è stât il moviment alsazian Unser Land.

Font: Federation-RPS, 25/08/17

Paîs Catalans: scuintri su terorisim e indipendentisim

I atentâts teroristics di Barcelone e di Cambrils a àn atirât su la Catalogne la atenzion dai mieçs di comunicazion di dut il mont. Tancj di lôr, dongje des informazions leadis ai atentâts e ae investigazion che i à vignude daûr, a àn metût in evidence lis capacitâts operativis e il compuartament de polizie (mossos d’esquadra) e des istituzions catalanis che par diviers gjornâi di prin plan – dal nordamerican The Wall Street Journal al todesc Frankfurter Allgemaine Zeitung – a mostrin che il guvier de Catalogne al è za bon di movisi come chel di un stât indipendent. Ancje par chest, varis cuotidians spagnûi e i principâi sindacâts des fuarcis di polizie statâl, a àn inviât une ofensive indreçade a discreditâ in primis propit i mossos. La campagne e à jevât reazions indignadis e no dome in Catalogne. Tra lis reazions si à vude ancje chê de organizazion Òmnium Cultural che e à publicât su lis rêts sociâls un video che – cul non indicatîf di “La vuere sporcje dal stât no si ferme nancje dopo di une tragjedie” – al mostre articui di cronache, editoriâi e vignetis dai media spagnûi che a àn doprât i atentâts par cirî di discreditâ lis istituzions e l’indipendentisim catalan.

Font: VilaWeb, 23-25/08/17