Romanie: novitâts dal guvier pes minorancis nazionâls

Il prin ministri rumen, Emil Boc, al à fat savê che no si varà une gnove leç su lis minorancis nazionâls, ma che si proviodarà a slargjâ i dirits ricognossûts a chestis comunitâts cuntun regolament. Al è di almancul trê agns, di fat, che il parlament rumen al ten fer un test di leç su chest argoment. Cumò però il guvier rumen al ven fûr di une coalizion jenfri i liberâi democratics e la UDMR, partît di riferiment de comunitât ongjarese de Transilvanie. Cun di plui, pe prime volte, il ministri pe culture al è propit un membri de minorance ongjarese, Kelemen Hunor.

Font: Divers.ro, 15/01/10

Bulgarie: polizie condanade par brutalitât sui Rom

La Cort europeane pai dirits umans e à condanât un trop di poliziots bulgars par vê tratât in maniere disumane e degradante trê rom. I fats a jerin capitâts intal 2001 cuant che i trê a jerin stâts arestâts. I poliziots prime ur vevin trat cuintri par fâju fermâ e po, une volte blocâts, ju vevin pacâts e svilanâts pe lôr partignince etniche. La Cort europeane e à condanât ancje lis autoritâts bulgaris par no vê indagât su chest episodi di brutalitât de bande de polizie. Magari cussì no, in Bulgarie si à podût viodi ancje di resint câs di discriminazion e di ûs disproporzionât de fuarce cuintri dai rom – al dîs Mihail Georgiev, president de fondazion Romani Baht che si bat pai dirits dai rom bulgars – ma o sperìn che cheste sentence e puedi judâ a cambiâ lis robis.

Font: ERRC, 11/01/10

Galizie: ai 21 di Zenâr proteste par difindi il galizian inte scuele

Il coordenament Queremos Galego, che al met adun cetantis organizazions e associazions impegnadis inte promozion de lenghe galiziane, al à inmaneât pai 21 di Zenâr a Sant Jacum di Galizie (Santiago de Compostela) une manifestazion cuintri dal decret sul ûs des lenghis inte istruzion e, par chê stesse zornade, al à invidât il mont de scuele a fâ siopar. Cun di fat, a spieghin i organizadôrs, il progjet puartât indenant dal guvier autonomic al va a colpî cun fuarce l'ûs dal galizian intes scuelis. La proteste cuintri de politiche linguistiche de aministrazion vuidade dal popolâr Alberto Nuñez Feijóo e veve za puartât a dôs grandis manifestazions di place ai 17 di Mai e ai 18 di Otubar e chê dai 21 di Zenâr e riscje di jessi inmò plui grande. La iniziative e cjate ancje la poie dai nazionaliscj dal BNG e dai socialiscj galizians.

Font: Vieiros Galiza Hoxe, 11 e 12/01/10

Paîs Basc: mobilitazion popolâr e protestis pai presonîrs politics

Ai 2 di Zenâr a son stadis plui di 40 mil lis personis che a àn sfilât pes stradis di Bilbo / Bilbao par denunciâ la politiche repressive metude in vore des autoritâts spagnolis cuintri dai presonîrs bascs. La manifestazion e je stade clamade adun di diviersis fuarcis politichis, ven a dî Eusko Alkartasuna, Aralar, Abertzaleen Batasuna, Alternatiba e çampe indipendentiste basche, daspò che il tribunâl speciâl spagnûl (Audiencia Nacional) al veve proibît une manifestazion similâr inmaneade di Etxerat, la organizazion che e met adun fameis e amîs dai presonîrs bascs. Intant de iniziative, une des plui grandis che si àn viodudis intai ultins agns intal Paîs Basc, si à domandât fats concrets par meti fin aes violencis e aes condizions discriminatoriis metudis in at cuintri dai cuasi 750 presonîrs bascs sierâts intes presons spagnolis e francesis. Cuintri dai presonîrs bascs, di fat, dongje di câs di violence, a vegnin metudis in vore in maniere sistematiche misuris di dispersion, isolament, trasferiment no justificât, bloc dai sconts di pene e des comunicazions che a son contrariis ae stesse legjislazion penitenziarie. Cheste politiche repressive, cun di plui, e colpìs in maniere dure ancje i parincj dai presonîrs (viaçs di centenârs di chilometris pes visitis; trasferiments di preson no comunicâts; visitis impedidis in maniere arbitrarie; percuisizions corporâls; e v.i.).

Propit ta chestis zornadis, il coletîf dai presonîrs bascs – che in plui di membris di ETA, al met adun zovins acusâts di kale borroka, membris de çampe indipendentiste basche e ancje militants impegnâts intal cjamp informatîf e culturâl – al à dât fûr un comunicât che al denuncie la situazion patide in preson e al anticipe une gnove stagjon di mobilitazion e di protestis. Plui in detai, il coletîf (EPPK) al domande il rispiet dal status di presonîr politic pai militants bascs impresonâts, la fin de dispersion e dal regjim di isolament, la liberazion di chei che a àn za scontât la lôr condane e dai malâts in condizions critichis. La prime forme di proteste metude in at dai presonîrs bascs e je tacade ai 11 di Zenâr cu la decision di restâ sierâts inte lôr celis. Tra lis formis di lote anticipadis, dut câs, si à ancje il siopar de fam.

Font: Gara, 03,04 e 12/01/10

Sud Tirôl: azion par otignî la citadinance dople

Une delegazion de Südtiroler Volkspartei (SVP) si à cjatade tes zornadis stadis cul president de comission parlamentâr austriache pal Sud Tirôl, Hermann Gahr, e i à presentât la domande par inviâ il ricognossiment de citadinance dople, taliane e austriache, pai citadins che a son a stâ in provincie di Bolzan. La cuestion e jere za saltade fûr intai mês stâts, ma dome cumò si 'nd à tacât a fevelâ in maniere uficiâl. A front dai dubis che la propueste e à jevât intal guvier austriac, il parlamentâr de SVP Siegfried Brugger al à fat savê che al inviarà une racuelte di firmis par mostrâ trop che la citadinance dople e rispuindi ae volontât de popolazion sudtirolese. Segnâi di gradiment pe propueste a son rivâts ancje di altris formazions politichis dal Sud Tirôl.

Font: Austrian Times, 07/01/10; Món Divers, 12/01/10

Irlande: la UDA e conferme il disarmament

La Ulster Defence Association (UDA), la plui grande organizazion paramilitâr lealiste, e à comunicât di vê puartât insom il so percors par disarmâsi. Lis azions par meti fûr ûs l'arsenâl de organizazion a son stadis confermadis dal gjenerâl John De Chastelain che al vuide la Comission internazionâl che e viôt dal disarmament dai grups armâts inte Irlande dal Nord. I 9 di Fevrâr a son la ultime zornade par disarmâsi: passade chê date dutis lis armis recuperadis a podaran jessi dopradis tant che provis intai procès e lis organizazions che lis àn dopradis a saran tratadis tant che grups criminâi. Si stime che, tra il 1971 e il 2001, la UDA (ancje cul non di cuvierzidure di Ulster Freedom Fighters) e sedi responsabile di passe 400 sassinaments. Cundut achel, il guvier britanic al à permetût a cheste organizazion di restâ legâl fin al 1992. Inchiestis uficiâls a confermin che diviers dai atentâts firmâts de UDA/UFF a son stâts fats cul jutori o cu la complicitât dal esercit britanic e de polizie nordirlandese (RUC). I organisims che a controlin la ativitât des organizazions paramilitârs in Irlande dal Nord a segnalin che, almancul fin al Novembar stât, membris de UDA a jerin ancjemò impegnâts in ativitâts di stamp criminâl. La organizazion che e met adun i parincj des vitimis de violence lealiste e à declarât di no jessi interessade al disarmament de UDA/UFF, ma di volê la veretât sui responsabii dai servizis segrets britanics, dal esercit e de polizie nordirlandese che a àn armât, infilitrât e ordenât i omicidis di militants republicans e di citadins de Irlande dal Nord. Intal mês di Jugn dal an passât si vevin disarmâts altris doi dai grups paramilitârs lealiscj, ven a dî la Ulster Volunteer Force (UVF) e il Red Hand Commando. Sul front republican, invezit, chest pas al jere stât completât dal IRA ancjemò tal 2005.

Font: BBC, 06/01/10; AP/RN, 07/01/10

Turchie - Bulgarie: tension diplomatiche sui risarciments pes espulsions

Il guvier bulgar al à menaçât la Turchie di blocâ il so percors par jentrâ inte Union Europeane se no proviodarà a paiâ i risarciments pe espulsion sfuarçade des minorancis bulgaris metude in at dal imperi turc intal 1913. La cifre domandade dal guvier di Sofia e je di 14 miliarts di euros. La cuestion e je stade jevade dal ministri pai bulgars intal forest, Bozidar Dimitrov, ma e sarà ricjapade ancje dal prin ministri de Bulgarie che in curt al varès di lâ in visite in Turchie. Pal moment la uniche rispueste e je stade chê dal ministri turc pal forest, Ahmet Davutoglu, che al à invidât a lassâ di bande lis declarazions che a puedin menaçâ la amicizie che e je tra i doi paîs.

Font: Balkan Insight, 05/01/10

Gales: plui risorsis pes associazions pe lenghe galese

A son passe 2 milions e 300 mil sterlinis i fonts che il guvier galês al à decidût di dâ intal 2010 a trê organizazions judicadis strategjichis par promovi l'ûs de lenghe galese, ven a dî: Mudiad Ysgolion Meithrin, Urdd Gobaith Cymru e il National Eisteddfod. A comunicâlu al è stât il ministri pal patrimoni culturâl dal Gales, Alun Ffred Jones, che al à declarât che i fonts a permetaran aes trê organizazions di lâ dilunc a garantî a fruts, zovins e adults di davuelzi diviersis ativitâts par mieç dal galês. I fonts a àn vût un aument rispiet al an passât e a saran dâts fûr dal Ufici pe Lenghe Galese.

Font: Welsh Language Board, 04/01/10

Kurdistan: cul DTP fûr leç, si ative il BTP

Il DTP, che intes ultimis elezions al veve otignût doi milions e mieç di vôts, al veve 21 rapresentants intal Parlament turc e, intant des elezions aministrativis dai 29 di Març, al veve vinçût in cuasi un centenâr di comuns de aree curde. Daspò de decision de cort costituzionâl turche di meti fûr leç il Partît de Societât Democratiche (DTP, Demokratik Toplum Partisi), moviment di riferiment de comunitât curde, la repression e je lade indenant intai ultins dîs di Dicembar cul arest di disinis di sindics de aree curde, ma ancje di altris personis impegnadis inte difese dai dirits de comunitât curde, tant che il vicepresident de Associazion pai dirits umans IHD Muharrem Erbey. Inte plui part dai câs lis acusis si riferissin ai rapuarts che i aministradôrs a varessin vût cul PKK, il Partît dai Lavoradôrs dal Kurdistan, che di agns al vuide la vuerilie in Kurdistan. Tal câs di Erbey si fevele di ativitâts ilegâls come, juste par dâ un esempli di ce che al è proibît in Turchie, la partecipazion a conferencis su la cuestion curde e al festival dal cine dal Kurdistan. Dut câs, propit in prevision di une ilegalizazion dal DTP, al jere stât regjistrât un altri sogjet politic che al podès cjapâ sù la incarghe di rapresentâ la comunitât curde sul front politic. Daspò de decision de Cort costituzionâl turche, duncje, si à ativât chest moviment che al à non Partît de Pâs e de Democrazie (BTP, Bariş ve Demokrasi Partisi). Al BTP a àn cussì aderît ancje 19 dai 21 deputâts dal DTP, intant che a chei altris doi la Cort costituzionâl ur à improibît di davuelzi cualsisei ativitât politiche e aministrative. A chescj parlamentârs al varès di dâsi dongje ancje il deputât socialist indipendent Ufuk Uras di maniere di permetiur di formâ un grup parlamentâr autonom (che al previôt un minim di 2o membris).

Font: Món Divers, 23/12/09; UIKI, 24/12/09

Albanie: fonts pe minorance serbe dal Cossovo

Daspò di un incuintri cuntun pôcs di rapresentants de comunitât serbe dal Cossovo, il prin ministri albanês Sali Berisha al à fat savê che al metarà a disposizion de citadine di Gracanica, a maiorance serbe, un contribût di 400 mil euros. La decision e je rivade, in particolâr, daspò dal incuintri cun Slobodan Petrovic, rapresentant dal Partît Liberâl Serp (SLS), che intes ultimis elezions aministrativis al à vût la maiorance relative a Gracanica, ma che al gjolt di scjarse simpatie framieç di chês altris formazions politichis serbis. Il prin ministri albanês al à ancje comunicât di vê invidât il president serp Boris Tadic par une visite uficiâl in Albanie di maniere di miorâ i rapuarts tra i doi paîs che a jerin deventâts dificii propit daspò che Berisha al veve fevelât di unificazion nazionâl di ducj i albanês de aree balcaniche, a tacâ di chei dal Cossovo.

Font: Balkan Insight, 24/12/09

Bosgne: la costituzion e discrimine lis minorancis

La Costituzion de Bosgne Erzegovine e discrimine lis minorancis che a vivin intal paîs e no i garantìs i stes dirits politics di chei altris citadins. A dîlu e je une sentence dal Tribunâl european pai dirits dal om che al à dât reson ae denuncie fate indenant di doi citadins bosgnacs, un di religjon ebraiche e chel altri di nazionalitât rom. La sentence dal Tribunâl di Strasburc e ricognòs che la Costituzion, nassude su la fonde dai acuardis di Dayton dal 1995, e veve l'obietîf principâl di garantî la stabilitât dopo agns di vuere civîl, ma al lamente che il guvier bosgnac, contrari di ce che si veve impegnât a fâ, nol à proviodût a comedâle cu lis normis cuintri de discrimazion fissadis de Union Europeane. La Costituzion, in dì di vuê, e ricognòs cierts dirits politics e rapresentatîfs dome a bosgnacs musulmans, cravuats e serps, ma no ai membris di comunitâts presintis di secui su chel teritori tant che rom e ebreus.

Font: Món Divers, 23/12/09

Cornualie: nuie nazionalitât corniche tal prossim censiment

Tra lis nazionalitâts che i citadins a cjataran sul modul dal prossim censiment gjenerâl dal Ream Unît, che si davuelzarà ai 27 di Març dal 2011, no sarà chê corniche. Cun di fat, cun 261 vôts a 49, il Parlament di Londre al à boçât la propueste di meti dentri intai modui ancje une casele cun cheste nazionalitât. La domande e jere stade fate indenant dal parlamentâr liberâl democratic Dan Rogerson (elet inte circoscrizion de Cornualie setentrionâl) su la fonde di une iniziative partide su Facebook e poiade di plui di 3 mil personis. Sul modul si cjataran dome cinc pussibilitâts, ven a dî: inglês, scozês, galês, irlandês dal Nord e britanic. Intal compilâ i dâts dal censiment, intal moment di rispuindi ae domande su la nazionalitât, si podarà segnâ la casele “altri” e scrivi dongje “cornic”, ma cheste pussibilitât – a spieghin i promotôrs de iniziative – e je plui intrigose e al è probabil che e sarà metude in vore dome dai citadins in prime linie inte difese de identitât corniche.

Font: BBC, 01/12/09

Aragon: fate buine la prime leç su lis lenghis propriis

Ai 17 di Dicembar, cui vôts a pro dai socialiscj e de Chunta Aragonesista, la Assemblee regjonâl aragonese e à fate buine la leç su lis lenghis propriis dal Aragon. Pe prime volte, duncje, a vegnin ricognossudis tant che lenghis propriis il catalan, intal teritori de cussì clamade Franja de Ponent, e l’aragonês, inte aree pirenaiche. Il test al previôt che chestis dôs lenghis a puedin jessi insegnadis intes scuelis, ma dome se e je la domande de bande dai gjenitôrs. Cun di plui a son previodûts dai dirits minims intal ûs des dôs lenghis intai rapuarts cu la aministrazion publiche. La Chunta Aragonesista e à decidût di votâ la leç, ancje se le calcole pôc ambiziose, par garantî almancul un pont di partence inte direzion di un plen ricognossiment dai dirits linguistics intal Aragon. I popolârs e il Partit Aragonès a àn votât cuintri de leç par vie che a disin che la lenghe fevelade inte Franja de Ponent no sarès catalan. Izquierda Unida, invezit, e à votât cuintri de leç par vie che no si ricognòs la uficialitât des dôs lenghis.

Font: Món Divers, 18/12/09

Sahara ocidentâl: la vitorie di Aminatu Haidar sul Maroc

Daspò di 32 dîs di siopar de fam, la ativiste saharawi pai dirits umans Aminatu Haidar e à podût tornâ a cjase sô, inte citât di El-Aaiún, cence condizions. Ai 13 di Novembar, intant che e tornave dai Stâts Unîts, la femine e jere stade blocade des autoritâts marochinis intal aeropuart de capitâl saharawi e, daspò che i jere stât secuestrât il passepuart, e jere stade imbarcjade a fuarce suntun avion par Lanzarote, intes isulis Canariis. Achì, lis autoritâts spagnolis, prime le vevin obleade a passâ la frontiere e po i vevin impedît di tornâ a imbarcjâsi parcè che no veve il passepuart. Dut câs, Aminatu Haidar no si à fate spaurî e par podê tornâ a cjase sô e à inviât un siopar de fam denunciant il compuartament des autoritâts marochinis e di chês spagnolis. Pes autoritâts marochinis la decision di fâle tornâ a cjase e je stade cjapade dome par resons umanitariis, ma pe comunitât saharawi e je stade une vitorie impuartante. Il câs di Aminatu Haidar e à tornât a puartâ la cuestion saharawi ae atenzion internazionâl, creant no pôcs problemis al Maroc che di passe trente agns al ocupe in maniere ilegâl il Sahara Ocidentâl e che al va dilunc a reprimi cun violence la resistence saharawi. I ultins episodis di violence si àn vûts propit cuant che Aminatu Haidar e je rivade a El-Aaiún: cun di fat, la polizie e à reprimût cun fuarce lis manifestazions di fieste dai saharawi che a jerin lâts in strade par saludâ la militante tornade a cjase.

Font: Ambassade RASD Rome - ANSPS, 18/12/09; Gara, 18/12/09

Galizie: in linie il dizionari galizian su lis gnovis tecnologjiis

Dopo di doi agns di lavôr al è stât presentât il prin dizionari enciclopedic galizian su lis gnovis tecnologjiis (Digatic). La opare e diven dal lavôr unitari de Associazion dai inzegnîrs des telecomunicazions de Galizie cul guvier galizian. La publicazion e met adun plui di cuatri mil tiermins e e à domandât un investiment di sù par jù 180 mil euros. Dongje de publicazion su cjarte, il lavôr al è ancje disponibil in rêt (ta cheste direzion) . Pal Osservatori su la lenghe galiziane cuasi la metât dai zovins tra i 15 e i 24 agns e declare di doprâ imprescj tecnologjics par galizian.

Font: Vieiros Galiza Hoxe, 15/12/09

Irlande: un archivi sonôr dal gaelic in linie

Al è a disposizion su la rêt (ta cheste direzion) il lavôr di regjistrazion fat dal linguist William Doegen intes areis gaelichis de Irlande a cjaval tra il 1928 e il 1931. Il studiôs todesc al veve regjistrât contis popolârs, preieris, cjançons, detulis e piçulis frasis che a rapresentin une testemoneance vive dai dialets gaelics fevelâts ator pe Irlande. Si trate di documents audio impuartants par vie che a permetin di scoltâ varietâts che cumò a son raris o fintremai sparidis. Lis regjistrazions, che a son presentadis cun ducj i dâts su lis intervistis, a vevin interessât 137 irlandês marilenghe di 17 conteis diferentis. Il materiâl al rapresente une risorse impuartante sei par cui che al studie la lenghe, sei par cui che al è interessât ae Irlande e ae sô culture.

Font: Gaelport, 15/12/09

Vojvodine: vie libare definitîf al Statût gnûf

Ai 14 di Dicembar la assemblee de Vojvodine e à fat bon il so gnûf Statût di autonomie, daspò che, dôs setemanis prime, il test al veve vût il vie libare dal Parlament serp. Par che il Statût al jentri in vore, duncje, e mancje dome la publicazion su la gazete uficiâl. La gnove cjarte statutarie e ricognòs plui competencis aes istituzions de Vojvodine, ancje se mancul di chês che a domandavin i partîts regjonaliscj e i rapresentants de comunitât ongjarese, che e rapresente la minorance principâl de regjon.

Font: Món Divers, 15/12/09

Paîs Catalans: referendum su la indipendence, al vinç il sì, ma al vote il 30%

A son stâts plui o mancul 200 mil i citadins che a àn partecipât al referendum su la indipendence che si è davuelt ai 13 di Dicembar in 166 comuns de Catalogne. I sì pe indipendence a àn sfiliât il 95% dai vôts, ma la partecipazion medie al referendum e je stade tor dal 30%. Dome in trê comuns la partecipazion e je stade sot dal 20%, il risultât plui bas si lu à vût a Rosas dulà che al è lât a votâ dome il 10,44% dai citadins. In cualchi comun, invezit, la partecipazion e à passât il 90%. Intal comun plui popolôs – chel di Sant Cugat del Vallès – al è lât a votâ il 25,48% di chei che a ‘nt vevin dirit. No son stâts pôcs i comuns là che il numar dai votants al è stât plui alt di chel che si à vût in votazions uficiâls tant che chês europeanis o chê dal 2006 pal Statût. Il coordenament che al à organizât il referendum si à declarât sodisfat pe rispueste dai citadins dal moment che si à di tignî cont che la votazion no veve valôr uficiâl, che e veve cjatât pôc spazi su la stampe e che la part logjistiche e jere dute su lis spalis di volontaris. La adesion e je stade plui alte – al à spiegât un dai referents dal coordenament, Uriel Bertran – ta chei comuns là che si à podût lavorâ in condizions similârs a chês che si àn in ocasion di votazions istituzionâls. I responsabii dal coordenament a àn declarât che a laran indenant cu la organizazion dal referendum in altris comuns e che, par mieç di une leç di iniziative popolâr, a domandaran che il referendum su la indipendence si puedi davuelzi in maniere uficiâl in dute la Catalogne ai 25 di Avrîl dal 2010. La iniziative referendarie, di là des declarazions, no à vût masse poie dai partîts nazionaliscj catalans, e je stade ignorade dai socialiscj e contrastade cun fuarce dai popolârs. In mert ae propueste di un referendum uficiâl in dute la Catalogne, ancje i dirigjents di CiU e ERC si son declarâts contraris, almancul par cumò.

Font: VilaWeb, 13-14/12/09; Gara, 14/12/09; El País, 14/12/09

France: il guvier al refude di fâ une leç pes lenghis

Il ministri francês pe imigrazion, pe integrazion e pe identitât, Éric Besson, al à declarât che il guvier di Parîs nol intint presentâ une leç su lis lenghis regjonâls. A vegnin cussì smentidis lis promessis fatis indenant de ex ministre pe culture, Christine Albanel, e dal stes president Nicolás Sarkozy. Besson, tal rispuindi a di une interogazion fate indenant di une deputade socialiste ocitane, al à dite che la suaze legjislative in vore cumò no permet di imbastî une vere leç su lis lenghis regjonâls, massime par vie che e larès cuintri dal principi di “indivisibilitât de Republiche”. Par altri, la rispueste e rive un pâr di setemanis dopo che un trop di parlamentârs dal partît di guvier (UMP) al à fat savê di jessi pront a preparâ une leç su lis lenghis minoritariis.

Font: Vieiros Galiza Hoxe, 13/12/09; Món Divers, 11/12/09

Paîs Basc: tacât il procès cuintri di Egunkaria

Cuasi siet agns dopo di sierade di Egunkaria, la Audiencia Nacional spagnole e à inviât il procès cuintri di cinc dirigjents dal prin cuotidian in lenghe basche. Par ducj e cinc e je la acuse di partecipazion a “organizazion teroriste” e la domande di 14 agns di preson. In pratiche, la acuse e je che la organizazion armade basche ETA e partecipàs al finanziament dal gjornâl e e decidès la sô linie editoriâl. La mancjance di cualsisei prove par poiâ cheste tesi e veve puartât fintremai la publiche acuse a domandâ di archiviâ il procediment. Chel istès, i magjistrâts de Audiencia Nacional a àn decidût lâ indenant. La vicende si veve inviade ancjemò intal 2001 di une inchieste coordenade dal judiç Juan del Olmo e, intal 2003, e veve puartât a sierâ il cuotidian e à arestâ une disine di personis leadis al gjornâl. Diviers di lôr a vevin denunciât torturis dopo dal arest. La vicende e il pês sociâl e culturâl dai arestâts a vevin puartât a grandis manifestazions di proteste ancje fûr dal Paîs Basc.

Font: Gara, 13/12/09