Paîs Catalans: miârs di catalans a Bruxelles pe autodeterminazion

Ai 7 di Març miârs di catalans a àn sfilât pes stradis di Bruxelles par domandâ il dirit di podê decidi in plene libertât dal lôr avignî. Ae manifestazion a àn partecipât tra lis 3 mil (stime de polizie belgjiche) e lis 10 mil personis (stime dai organizadôrs) che a àn sfilât daûr di un strisson cu la scrite “O volìn un stât catalan”. A meti in pîts la iniziative al è stât il coordenament “Deu mil a Brussel·les” che al à cjapât spont di un intervent publicât sul so blog dal professôr universitari Enric Canela che al invidave a internazionalizâ la cuestion dal dirit ae autodeterminazion dal popul catalan. Il prossim pas che i organizadôrs de manifestazion a àn tal cjâf al è une iniziative legjislative popolâr par che il Parlament catalan al voti une leç che e permeti di imbastî ai 12 di Setembar dal 2010 un referendum su la autodeterminazion.

Font: Avui, 07/03/09; Gara, 07/03/09; El Punt, 08/03/09

Scozie: pal Parlament il referendum su la autodeterminazion al pues spietâ

Un dai ponts principâi dal program eletorâl che al à permetût al SNP di vinci lis elezions pal Parlament scozês al jere chel di imbastî un referendum su la autodeterminazion intal 2010. Dut câs, par fâlu, e covente une leç di pueste che e à di jessi votade dal Parlament, là che il Partît Nazionâl Scozês al gjolt dome di une maiorance relative. La strade, duncje, e je di rive sù, come che al mostre il vôt che si à vût ai 5 di Març intal Parlament là che Liberâi Democratics, Laburiscj e Conservadôrs a àn votât adun cuintri de ipotesi di referendum. Nol è il vôt decisîf, che si varà dome cuant che si presentarà il disen di leç sul referendum, ma al è un segnâl clâr dât al SNP e ai Verts siei aleâts (47 vôts) dal front unionist (72 vôts). L’an passât i Laburiscj, in plene crisi di consens, si vevin declarâts pussibiliscj sul progjet dal referendum, ma cumò a mostrin di vê cambiât idee. La uniche pussibilitât par rivâ al referendum, duncje, e jere chê di cjatâ la poie dai Liberâi Democratics che, invezit, a vuelin pontâ su la cjarte dal trasferiment massîf di competencis di Londre a Edimburc. Cun di fat, il partît vuidât di Tavish Scott al vûl che il Parlament scozês al puedi decidi su materiis tant che tassis, sisteme eletorâl, energjie, traspuarts, puarts, armis e altri ancjemò. Pai Liberâi Democratics si trate di imprescj plui impuartants par combati la crisi economiche che e je daûr a colpî ancje la Scozie, plui che no un referendum su la indipendence. Par cumò, dut câs, la dirigjence dal SNP si mostre inmò otimiste sul referendum. No je la prime volte – a disin – che i partîts unioniscj si dan adun par une bataie che no cjate po la poie de int. I nazionaliscj scozês a àn ancje sfidât i aversaris a lassâ vôt libar ai lôr membris: no ‘nd è pôcs tra di lôr – a disin dal SNP – che se a podessin a votaressin a pro dal referendum.

Font: The Scotsman, 06/03/09; Món Divers, 06/03/09

Galizie: pôre pe politiche linguistiche dal PP

In Galizie, daspò dal sucès eletorâl dal PP, e cres la preocupazion pal avignî de politiche linguistiche che si veve inviade intai ultins agns. A Mesa pola Normalización Lingüística, la organizazion di riferiment inte bataie pai dirits linguistics, e à za fat savê che e fasarà di dut par impedî che si fasin dai pas indaûr inta chest cjamp. “Nol è cul atacâ la nestre culture e la nestre lenghe che si pues bati la crisi economiche” al à dite il president di A Mesa, Carlos Callón, in riferiment aes declarazions dal gnûf president dal guvier galizian, Alberto Núñez Feijoo, in mert al progjet di cambiâ la leç su la politiche linguistiche. La organizazion e à za domandât di vê un incuintri cui rapresentants de gnove aministrazion, ma e à sclarît daurman che no restarà a cjalâ denant di une involuzion de politiche linguistiche. Lis declarazions dai rapresentants dal PP si indrecin massime su la istruzion. Feijoo, di fat, al à dite che al metarà fin aes cussì clamadis galescolas, lis scuelis pe infanzie par galizian inviadis intal 2007. Il dut in non di une difese dal “bilinguisim” che, invezit, pai ativiscj de lenghe al vûl dî lassâ che il galizian al ven scliçât de presince massive dal castilian. A front des declarazions dal gnûf president, ancje il sindacât dai lavoradôrs de scuele STEG al fevele di avignî “malsigûr e preocupant” pe lenghe galiziane.

Font: Galiza Hoxe, 06/03/09; El Punt, 06/03/09

Gales: mobilitazion pe devoluzion des competencis su la lenghe

Dutis lis competencis legjislativis su la lenghe galese a àn di jessi trasferidis dal Parlament di Londre ae Assemblee Nazionâl dal Gales. Pe Cymdeithas yr Iaith Gymraeg – di agns in prime linie inte bataie pai dirits linguistics dai galês – chest al è l’unic sisteme par rivâ a di une riforme vere dal setôr che e garantissi pardabon di podê doprâ la lenghe proprie dal Gales in ducj i ambits de vite sociâl. Il passaç di competencis di Londre a Caerdydd / Cardiff al è cumò al esam di une Comission di pueste metude sù de Assemblee Nazionâl galese, ma in dì di vuê si fevele dome di un trasferiment di podês parziâl. Par rivâ a di un passaç totâl des competencis su la lenghe, la Cymdeithas e à cussì invidât ducj i citadins a domandâ ai membris de Comission, vie pueste eletroniche, di lavorâ par chest risultât. Lis direzions di pueste eletroniche dai membris de Comission e il test dal messaç si ju cjate za pronts sul sît internet de associazion.

Font: Cymdeithas yr Iaith Gymraeg, 05/03/09

Sardegne: campagne di iRS cuintri dal nucleâr

La politiche energjetiche dal guvier talian e torne a cimiâ al nucleâr e un dai sîts che a podaressin ospitâ une centrâl di chest gjenar e il materiâl radioatîf e je la Sardegne. Denant di cheste prospetive, al è za cualchidun che al à tacât a mobilitâsi. Si trate dal moviment indipendentist iRS (indipendentzia Repubrica de Sardigna) che al à inviât la campagne “Lìbera e Lìmpia”, ven a dî libare e nete. Di une bande si sburte par une leç che a proibissi il passaç e il dipuesit di materiâi radioatîfs, di chê altre bande si propon di investî suntune politiche indreçade aes energjiis rinovabilis che e puedi puartâ la Sardegne ae plene autonomie energjetiche. Lis liniis di fonde di cheste campagne, intune cul materiâl par poiâle, si pues cjatâlis alì de direzion internet www.indipendentzia.net/energia/ .

Font: iRS, 03/03/09

Paîs Basc: cu la çampe abertzale fûr leç, nazionaliscj cence maiorance

Lis elezions dal prin di Març a mudin no pôc il cuadri politic inte Comunitât Autonome Basche. Cun di fat, se il PNV al reste il partît plui votât, lis formazions di aree nazionaliste o che a àn guviernât la Comunitât intai ultins agns si ricjatin a vê mancul deputâts di chei dai partîts spagnoliscj. La situazion e podarès mudâ cul vôt vie pueste, dal moment che la assegnazion di cierts deputâts e dipent di pôcs vôts, ma la tindince e je clare. Il PNV al oten 30 elets, un in plui des elezions stadis. I siei aleâts di guvier, invezit, a patissin une sconfite significative: Eusko Alkartasuna e cole di 7 deputâts a 2; Ezker Batua (la rame basche di IU) e passe di 3 elets a 1. A cressi, invezit, a son massime i socialiscj che a otegnin 24 deputâts (6 in plui dal 2005), che a podaressin deventâ 25 a dam di EA cul scrutini dai vôts che a rivaran vie pueste. Il PP si è fermât, invezit, a 13 elets. La formazion di diestre UPyD (Unión, Progreso y Democracia) e à otignût un deputât. Une aleance tra chestis trê fuarcis spagnolistis e varès, duncje, i numars par guviernâ la Comunitât Autonome Basche. Il partît indipendentist Aralar, al passe di 1 a 4 elets: un dai risultâts de proibizion des listis de çampe indipendentiste basche. Un altri dai risultâts di cheste mancjance al podarès ancje jessi l’aument dal astensionisim, che al è cressût dal 2% rispiet al 2005. Dut câs, cundut di cualchi incident e ancje di cualchi arest, une buine fete di eletôrs de çampe indipendentiste e je lade distès a meti intes urnis lis schedis di D3M, une des listis metudis fûr leç de azion unitarie dal guvier e de magjistrature spagnole.

Daûr dal cuotidian Gara, i vôts par cheste formazion, a saressin stâts plui o mancul 100 mil, ven a dî cuasi il 9% dai votants. Se chescj vôts, invezit di lâ a finî tra chei anulâts, a fossin stâts calcolâts pe assegnazion dai puescj in Parlament, il cuadri politic al sarès ben diviers. In pratiche, tignint cont ancje di chescj vôts, tal prossim Parlament de Comunitât Autonome Basche si varessin vûts 28 deputâts dal PNV, 23 socialiscj, 11 popolârs, 4 par Aralar, 1 par EA e 1 par UPyD. EB e sarès restade cence rapresentance, e D3M e varès vût 7 elets, deventant cussì decisive pe formazion dal prossim guvier. Cun chescj dâts sot man, al è clâr a cui che al vedi zovât proibî la sô partecipazion aes elezions.

Font: Gara, 01/03/09; El Pais, 01/03/09

Galizie: il PP al torne al guvier de Comunitât

In Galizie, invezit, lis elezions dal prin di Març a àn tornât a dâi la maiorance ae diestre spagnoliste dal PP. Ancje se cualchi numar al podarès ancjemò cambiâ cul scrutini dai vôts vie pueste che al rivarà insom ca di cualchi dì, il risultât gjenerâl al è clâr: daspò di une legjislature al guvier, la coalizion formade di socialiscj (PSG – PSOE) e nazionaliscj galizians (BNG) e à di tornâ ae oposizion. I popolârs, di fat, a àn otignût passe il 47% dai vôts che i consegne la maiorance assolude di puescj intal Parlament galizian, ven a dî 39. I socialiscj, invezit, si son fermâts pôc disot dal 30% des preferencis e a 24 deputâts (1 elet e passe il 3% di vôts in mancul dal 2005). Il Bloc Nazionalist Galizian al à cjapât sù par jù il 16,6% dai vôts e 12 deputâts (1 elet e il 2% di vôts in mancul des elezions stadis). Sot dal 1,5% i risultâts di chês altris listis in corse. La partecipazion al vôt e je stade la plui alte inte storie resinte de Galizie, passant il 70% di votants. Il cuadri politic nol mude masse nancje a nivel provinciâl là che il PP al vinç in maniere clare a Lugo e Ourense, e al vuadagne vôts e deputâts a Pontevedra e A Coruña, là che cumò al pues contâ sul stes numar di elets di socialiscj e nazionaliscj adun.

Font: Galiza Hoxe, 01/03/09; El Pais, 01/03/09

Bretagne: un altri pas su la strade de unitât aministrative

Ai 5 di Març l’ex prin ministri francês Édouard Balladur al presentarà al president de republiche Nicolas Sarkozy il so rapuart su la riforme teritoriâl dal stât francês. Dut câs, za cumò a zirin lis primis indiscrezions sui siei contignûts. Cun di fat, l’implant aministratîf francês al varès di semplificâsi cul passaç des regjons di 22 a 15. Tra lis novitâts plui impuartantis che a saressin intal rapuart e je ancje la riunificazion bretone cul passaç dal dipartiment de Loire Atlantiche ae Regjon de Bretagne. Ta cheste maniere il teritori storic breton al tornarès dut adun sot di une aministrazion uniche. Union sot di une regjon unitarie ancje pe Normandie. I doi dipartiments de Alsazie si daran adun, ma il gnûf sogjet aministratîf al vignarà zontât ae Lorene par formâ une gnove regjon. A fondisi a varessin di jessi ancje Borgogne e Francje Contee. Il progjet, duncje, di une bande al ven incuintri a mobilitazions di lungje date come chê pe Bretagne unide, ma di chê altre bande al podarès jevâ malcontents. Par chest l’intindiment al è chel di viodi l’acet de int pes diviersis propuestis par mieç di un referendum popolâr.

Font: Agence Bretagne Presse, 25/02/09

Ocitanie: in Avrîl manifestazion pe lenghe tal Bearn

Une manifestazion a pro di une vere politiche linguistiche pal ocitan intal Bearn si davuelzarà ai 4 di Avrîl a Pau, la capitâl de regjon. La iniziative e je stade imbastide dal coletîf La Crida, ma e gjolt bielzà de poie di diviersis entitâts ocitanis ativis ta chel teritori. Plui scuelis cun insegnament par ocitan, plui presince de lenghe inte aministrazion publiche e tai mieçs di comunicazion a son tra lis domandis che a compagnaran la manifestazion.

Font: Món Divers, 24/02/09

Polonie: ratificade la Cjarte europeane pes lenghis

La Polonie e je il vincjecuatresim stât membri dal Consei de Europe a ratificâ la Cjarte europeane pes lenghis regjonâls o minoritariis. Cun chest pas, il stât polac si impegne a garantî i dirits linguistics di fonde di 15 comunitâts minoritariis che a vivin dentri dai siei confins, ancje se a vegnin dividudis in grups diviers. In particolâr, si ricognòs tant che lenghis di minorancis nazionâls: armen, belarùs, cec, ebraic, lituan, rus, slovac, todesc, ucrain e yiddish. A karaim, tatar, romanès e ruten, invezit, ur ven ricognossût il status di lenghis di minorancis etnichis. In fin, il cassubi al ven considerât lenghe regjonâl. La ratifiche e tacarà a vê efiets legâi cul prin di Jugn di chest an. A son diviers i stâts dal Consei de Europe che no àn ancjemò ratificât la Cjarte, tra chescj Italie, France, Grecie e Turchie.

Font: Eurolang, 24/02/09; Nationalia, 25/02/09; Council of Europe, 02/2009

Grecie: gnovis critichis de Europe pal dinei des minorancis

Gnovis critichis ae Grecie a rivin dal ultin rapuart dal comissari pai dirits umans dal Consei de Europe, Thomas Hammarberg. Intal document, di fat, si denuncie la politiche di limitazion dai dirits metude in vore des autoritâts politichis e judiziariis greghis cuintri des minorancis linguistichis e nazionâls. La acuse si riferìs in particolâr al dinei di ricognossi lis associazions che a fasin riferiment aes comunitâts minorizadis e fintremai a meti fûr leç chês leadis ae comunitât turche de Tracie, la uniche a vê un ricognossiment uficiâl, ma dome dal pont di viste religjôs.

Font: Món Divers, 24/02/09

Galizie: mission a Bruxelles par difindi il galizian

Une delegazion galiziane vuidade dal president di A Mesa pola Normalización Lingüistica, Carlos Callón, e de puartevôs dal BNG a Bruxelles, Ana Miranda, e à incuintrât ta chescj dîs diviers parlamentârs europeans par spiegâ la situazion dificile dal galizian, ma ancje par denunciâ il risi di un emendament passât che al è pôc suntun test a pro dal plurilinguisim, là che si dîs che nissun scuelâr al pues fâ di mancul dal insegnament de lenghe uficiâl dal stât, ma cence che une indicazion similâr e vegni dade ancje pes lenghis minorizadis. Se e ves di passâ une linie dal gjenar si judarès il svilup di un razisim linguistic là che e esistin lenghis di prime e di seconde categorie.

Font: Galiza Hoxe, 21/02/09

UNESCO: mape interative su lis lenghis in pericul

La UNESCO e à publicât sul so sît internet la version interative dal atlant des lenghis menaçadis dal mont. La iniziative, metude in vore in ocasion de zornade internazionâl de marilenghe (che e cole ai 21 di Fevrâr), e propon la situazion des 2.500 lenghis o varietâts linguistichis in pericul. Par ogni lenghe si ufrissin diviersis indicazions, tant che la sô difusion teritoriâl, il numar des personis che le fevelin, ma la atenzion e je pontade massime sul nivel di menace che si cjate a patî. A son cinc i nivei che la UNESCO e propon par descrivi il stât di chestis lenghis, ven a dî: malsigure; in pericul; in pericul seri; in pericul une vore seri; estinte. Intal stât talian la plui part des lenghis minorizadis, e tra chestis ancje il furlan, e ven judicade in pericul. L’atlant al judiche, invezit, in pericul seri il grecanic, la isule linguistiche ocitane di La Gàrdia (Guardia Piemontese) in Calabrie, e ciertis varietâts todescjis.

Font: Nationalia, 20/02/09; Unesco, 02/2009

Romanie: partîts ongjarês adun pe elezions europeanis

La Aleance Democratiche dai Ongjarês in Romanie (RMDSz) e il Consei Nazionâl Székely (SZNT) si presentaran aes elezions pal Parlament european cuntune liste unitarie. A comunicâ l’acuardi a son stâts i rapresentants principâi dai doi partîts Marko Bela e László Tőkés. I doi partîts adun a varessin di rivâ a mandâ intal Parlament de Europe almancul un pâr di elets. Lis dôs formazions principâls de minorance magjare si son ancje cjatadis in cunvigne sul progjet di meti sù un Consei di coordenament dai ongjarês de Transilvanie.

Font: Divers.ro, 16/02/09

Sardegne: la Regjon e passe al centri diestre

La aministrazion regjonâl sarde e à cambiât colôr. Cun di fat, lis elezions che si son davueltis ai 15 e ai 16 di Fevrâr a àn dât la vitorie, cul 51,88% des preferencis, al candidât dal centri diestre Ugo Cappellacci, che al vuidarà la Regjon Sardegne tai prossims agns. La sô coalizion e à vût un risultât inmò plui grues, ven a dî il 56,07% dai vôts. Plui in detai: il PdL al à vût il 30,2% des preferencis, la UDC il 9,04%, i Riformatori Sardi il 6,79%, il PSd’Az il 4,29%, Sardegna Insieme – UDS – Nuovo PSI il 3,48%, e il Movimento per le autonomie il 2,25%. Il president dimissionari, Renato Soru, invezit, nol è lât plui innà dal 42,94%. La coalizion di centri çampe che lu poiave si è fermade al 39,07%, che a son lâts dividûts cussì: al PD il 24,77%, ae IdV il 5,04%, al PRC il 3,16%, ai Rossomori il 2,54%, al PdCI l’1,91%, ae Sinistra Autonomista l’1,64%. Al tierç puest, ancje se lontan dai prins doi candidâts, al è rivât il candidât indipendentist Gavino Sale che al à cjapât il 3,06% dai vôts; il so partît – iRS – al à vût, invezit, il 2,06% des preferencis. In ogni câs, si trate di un pas indenant pal partît indipendentist sart che al pues contâ suntune base eletorâl di cuasi 30 mil vôts. Chel altri candidât indipendentist, Gianfranco Sollai, si è fermât al 0,55%. A poiâlu e jere la coalizion Unidade Indipendentista che e à cjapât il 0,45% dai vôts. Un tic miôr al à fat il candidât dal Partît Socialist, Peppino Balia, che al à vût l’1,55% des preferencis; il so partît, invezit, al è stât votât dal 2,33% dal eletôrs.

Font: Regione Autonoma della Sardegna, 16-17/02/09 (ultins dâts inzornâts ai 26/02/09)

Paîs Basc: anuladis lis candidaturis de çampe indipendentiste

Pe prime volte la ezkerra abertzale (la çampe indipendentiste basche) si cjate cence la pussibilitât di partecipâ cun sôs listis aes elezions pal Parlament de Comunitât Autonome Basche. Cun di fat, ai 13 di Fevrâr, il Tribunâl costituzionâl spagnûl al à confermât la sentence dal Tribunâl suprem che e impedìs a D3M (Demokrazia Hiru Milioi, o sei Democrazie Trê Milions) e a Askatasuna di partecipâ aes elezions autonomichis. Lis autoritâts judiziariis a àn cussì fatis buinis lis motivazions presentadis dal guvier spagnûl e de avocature di stât par blocâ lis dôs listis. Pal guvier di Madrid, di fat, i doi partîts de çampe indipendentiste basche a son calcolâts di erêts di Batasuna e di chês altris listis politichis za metudis fûr leç par vie che a rapresentaressin sul plan politic la linie di azion di ETA. Cul so intervent, duncje, la magjistrature spagnole e impedìs a disinis di miârs di citadins bascs di podê votâ par listis che a rapresentin la lôr aree politiche, falsant cussì in maniere pesante il cuadri eletorâl inte Comunitât Autonome Basche. Tal câs di Askatasuna – partît che al jere nassût ancjemò tal 1998, duncje prime de “Ley de Partidos” – i judiçs a àn fat plui fature a motivâ la lôr decision. La ipotesi fate indenant e je che ETA e varès metût sù chest partît agns indaûr cun chê di doprâlu plui indenant intal timp se a ‘nt fos stade dibisugne. Dut câs, i “fats” doprâts par poiâ cheste ipotesi a son plui che clopadiçs: par esempli, si à atribuît a chest partît materiâi de organizazion pai dirits dai presonîrs bascs Askatasuna, za metude fûr leç, dome parcè che a àn il stes non. Par protestâ cuintri di cheste situazion D3M e à invidât i siei eletôrs a meti distès tes urnis eletorâls lis schedis di chest partît ancje se il vôt al sarà anulât.

A fermâ la decision dal guvier e de magjistrature spagnole no àn coventât nancje lis peraulis di Martin Scheinin, il relatôr speciâl de Comission pai dirits umans de ONU su la promozion e la protezion dai dirits umans e su lis libertâts di fonde inte lote cuintri dal terorisim. Scheinin al denuncie la ambiguitât dal ûs dal tiermin “organizazion teroriste” intal stât spagnûl, par vie che al ven doprât ancje cuintri di partîts, mieçs di informazion e realtâts associativis che lis lôr ativitâts no si puedin calcolâ di terorisim. Pe ONU, proibî a di un partît di partecipâ aes elezions al varès di jessi alc di pardabon ecezionâl e, invezit, al è deventât alc di normâl tal câs des listis de çampe indipendentiste basche. Cun di plui, par evitâ abûs, Scheinin al invide lis autoritâts spagnolis a trasferî ai tribunâi ordenaris i câs che cumò a son gjestîts ducj di un tribunâl speciâl. Intai câs in cuestion, il rapresentant de ONU al denuncie ancje l’ûs sistematic de preson preventive, dal regjim di incomunicazion dai arestâts e il pericul di maltratament e di torture dai presonîrs.

Font: Gara, 07-14/02/09; EiTB, 08-09/02/09; Galiza Hoxe, 06/02/09

Bretagne: gnove iniziative pe riunificazion

E à vût un scjas mediatic no di pôc la iniziative inmaneade ai 10 di Fevrâr a Parîs par domandâ la riunificazion di dut il teritori storic de Bretagne tune regjon aministrative uniche. Cun di fat, te ocasion, si à presentât un apel firmât di un centenâr di personalitâts di prin plan che a rivin di ducj i setôrs, dai mieçs di comunicazion ae economie, de culture ae gastronomie, e che a poin la riunificazion bretone. Il document al è indreçât prin di dut a Édouard Balladur, architet de riforme teritoriâl francese. A inmaneâ la iniziative a son stadis lis associazions Bretagne Prospective, Conseil Culturel de Bretagne, Bretagne Réunie, Institut de Locarn, e Produit en Bretagne. L’obietîf al è chel di zontâ ae Regjon aministrative bretone ancje il dipartiment de Loire Atlantiche.

Font: ABP, 10/02/09

Romanie: provis di svicinament tra i partîts ongjarês

Il svicinâsi des elezions pal Parlament european al somee sburtâ lis dôs animis de comunitât ongjarese de Romanie a dâsi dongje. Cun di fat, il referent principâl dal Consei Nazionâl Székely (SZNT), l’eurodeputât László Tőkés, al à fat savê che si cjatarà cun Marko Bela, il president de Aleance Democratiche dai Ongjarês in Romanie (RMDSz), par cirî di imbastî une colaborazion tra i doi grups principâi de minorance magjare. Tőkés al à ancje anticipât che al ponte a tignî adun ancje chei grups che lu vevin za poiât intant des ultimis elezions europeanis.

Font: Divers.ro, 09/02/09

Corsiche: nassût il gjornâl gratuit "A Piazzetta"

Al à non “A Piazzetta” il prin gjornâl gratuit in lenghe corse. La presentazion uficiâl de gnove riviste, curade de associazion “Lingua Scritta”, si le à vude ai 10 di Fevrâr. Il gjornâl, dât fûr su la isule in 10 mil copiis, al puarte su cjarte la esperience dal sît internet cul stes non che al è in vore di passe un an.

Font: Radio Alta Frequenza, 09/02/09

UE: il Parlament al sburte ducj i membris di ricognossi il Cossovo

Il Parlament european, cuntun vôt a maiorance, al à racomandât ai cinc stâts de Union Europeane che no lu àn ancjemò fat, di ricognossi la indipendence dal Cossovo. La racomandazion, duncje, e je indreçade a Cipri, Grecie, Romanie, Slovachie e Spagne. La Assemblee, di fat, e volarès che ducj i membris de UE a vessin su la cuestion une posizion unitarie. Intal document si bat ancje su la dibisugne di fâ sù intal Cossovo un stât pardabon multietnic, là che ancje lis minorancis – a tacâ di chê serbe e di chê rom – a puedin dâ il lôr contribût aes istituzions dal paîs. Une prime rispueste e je rivade dal guvier spagnûl che al à dite che par cumò nol intint di cambiâ la sô posizion sul argoment.

Font: Món Divers, 06/02/09