Ocitanie: acuardi par recuperâ la toponomastiche origjinâl

Cu la poie de regjon aministrative de Ocitanie, il Congrès permanent de lenghe ocitane e l’Istitût francês di informazion gjeografiche (IGN) a àn sotscrit une convenzion che si propon di analizâ e di comedâ il patrimoni toponomastic de Ocitanie che si cjate tai archivis informatics e tes cjartinis dal istitût. I nons di lûc ocitan, di fat, a son stâts trascrits in forme falade e dispès a son stâts fintremai strassomeâts. I specialiscj de lenghe ocitane a àn za davuelt studis impuartants su la toponomastiche locâl e cumò a puedin confrontâsi cui esperts dal Istitût francês di informazion gjeografiche par judâju a integrâ i lôr archivis e, là che al sarà pussibil, comedâ i erôrs fats.

Font: La Dépêche, 27/12/19

Corsiche: il FLNC 22-O al torne a fâsi sintî

Dopo doi agns che al veve decidût di meti fin aes sôs azions armadis, il Front di Liberazion Nazionâl Cors (FLNC), canâl “22 di Otubar”, al à rivendicât un atentât cuintri di diviersis vilis fatis sù intal Sud de isule di Pierre Ferracci, imprenditôr considerât une vore vicin al president francês Emmanuel Macron. Il moviment clandestin al à spiegât di volê la soluzion pacifiche dai problemis de isule ma di no vê firmât un assegn in blanc al stât francês. La azion dimostrative e va a colpî un simbul de speculazion edilizie che e je daûr a trasformâ la Corsiche tune isule di secondis cjasis par siôrs che a rivin dal continent intant che i zovins cors no cjatin cjasis o apartaments ae puartade des lôr sachetis. Lis vilis colpidis dal atentât si cjatin intun sît naturâl e a son al centri di une bataie judiziarie puartade indenant de associazion ambientaliste U Levante che però, dopo di jessi rivade in cassazion, e varà cumò di tornâ a partî tune cort di apel francese. La azion armade e palese il marum di une part dai cors che za di agns si cjate denant a di un disinterès totâl dal guvier di Parîs intai confronts des domandis de maiorance nazionalitarie che e je al guvier de isule.

Font: Le Monde, 23/12/19

Aragon: passe un milion di visitis par “Lenguas de Aragón”

A doi agns de sô ativazion, il sît Internet “Lenguas de Aragón” al à passât il milion di visitis. La medie di utents che lu vierzin ogni dì e je tor dai tresinte ma e je cressude in maniere progressive cul cressi dal sît stes. Il portâl dedicât ae lenghe aragonese e al catalan dal Aragon al ufrìs gnovis di atualitât, informazions su lis ativitâts e i progjets de direzion gjenerâl di politiche linguistiche dal guvier dal Aragon, imprescj didatics che a puedin jessi discjariâts o doprâts in rêt, un archivi sonôr cun cuasi 2 mil regjistrazions e un dizionari che al volte 17 mil vocabui dal castilian al aragonês. L’interès pes lenghis propriis dal Aragon al è daûr a cressi ancje fûr di cheste comunitât autonome cemût che al mostre il numar di utents dal sît che a vivin fûr dal stât spagnûl.

Font: Diario del Alto Aragon, 21/12/19

Paîs Catalans: il TJUE al da reson a Junqueras

La sentence dade fûr ai 19 di Dicembar dal Tribunâl di Justizie de Union Europeane (TJUE) e declare che Oriol Junqueras – il leader di ERC condanât a 13 agns di preson e di inabilitazion a ogni incarghe publiche pai reâts di sedizion e di malversazion – al varès vût di gjoldi de imunitât che i divignive dal jessi stât elet eurodeputât bielzà de date de proclamazion dai risultâts eletorâi. Chest al vûl dî che no dome dutis lis manovris metudis in at des autoritâts spagnolis par impedii di jessi increditât come parlamentâr european no jerin legjitimis ma, soredut, che cuant che al è stât condanât no si à tignût in nissun cont de sô imunitât. Di fat, cundut che il ricors al jere za al esam de cort di justizie europeane, il tribunâl suprem spagnûl al à decidût di procedi cence spietâ la sô rispueste. A chest pont, duncje, Junqueras al varès di jessi liberât o si varès di domandâi al Parlament european il dirit a procedi ma al pararès che lis autoritâts spagnolis a vuelin restâ su lis lôr posizions cul risi di lâ a di un scuintri diret cun chês europeanis. Su la fonde de sentence che e rivuarde Junqueras, Carles Puigdemont e Toni Cumín a àn invezit podût procedi cul percors di increditament come eurodeputâts e a son in spiete che il judiç Pablo Llarena al ritiri il mandât di arest european cuintri di lôr.

Font: Vilaweb, 20-26/12/19; Naiz:, 20/12/19

Paîs Catalans: sît e social rinovâts pai 30 agns dal CPNL

Te suaze des iniziativis programadis pai siei trente agns di ativitât, il Consorzi pe Normalizazion Linguistiche (CPNL, Consorci per la Normalització Lingüística) de Catalogne al à decidût di infuartî e rinfrescjâ la sô presince digjitâl. Dal moment che in dì di vuê il so obietîf principâl al è chel di judâ lis personis che a son rivadis di pôc in Catalogne a imparâ la lenghe proprie, cumò il sît dal consorzi al met plui in evidence i cors di catalan par adults, il catalic dai servizis, il volontariât pe lenghe e lis diviersis campagnis par promovi l’ûs dal catalan. Ancje il motôr di ricercje pai cors al è stât rinovât e infuartît par facilitâ ancjemò di plui la ricercje daûr des dibisugnis specifichis di ognidun. Il sît gnûf al ufrìs ancje sezions autonomis pai 22 centris di normalizazion linguistiche che al à sul teritori. In curt, invezit, diviersis parts dal portâl a varessin di jessi disponibilis ancje par castilian, inglês, francês, arap e cinês. A jessi rinfrescjâts a son ancje i social media dal consorzi tant che la pagjine Facebook (passe 55 mil iscrits), Twitter (34 mil), Instagram (9 mil) e il canâl Youtube.

Font: Generalitat de Catalunya, 20/12/19

Paîs Basc: plan par sburtâ il basc tal cjamp socioeconomic

Ai 20 di Dicembar l’esecutîf de Comunitât Autonome Basche al à presentât il plan di promozion dal euskara tal cjamp socioeconomic pai agns 2020-2023. Il document si propon cuatri obietîfs di fonde: incressi la cognossince dal basc intal mont dal lavôr, sburtâ l’ûs de lenghe framieç dai lavoradôrs, miorâ il rispiet dai dirits linguistics dai consumadôrs e stiçâ l’ûs dal euskara dentri des aziendis e tai rapuarts tra chestis e i clients. Il plan al previôt ancje risultâts misurabii tant che incressi dal 20% il numar dai students che a frecuentin i istitûts professionâi bilengâi o a imersion, aumentâ dal 20% il numar dai dirigjents des aziendis cuntune buine cognossince de lenghe basche e v.i. Par lâ ta cheste direzion si previôt di lavorâ par miorâ lis competencis linguistichis dal personâl a contat cul public, judâ sul plan economic lis aziendis che a invistissin su la formazion linguistiche, e imbastî campagnis par sburtâ la domande di servizis par basc.

Font: EiTB, 20/12/19

Paîs Basc: il tradutôr neuronâl Itzuli disponibil ancje su app

Il guvier de Comunitât Autonome Basche al à metude fûr la aplicazion che e permet di vê a disposizion ancje sui dispositîfs mobii Itzuli, il tradutôr automatic neuronâl dal basc al castilian e dal castilian al basc. I telefonins a àn aromai passât i ordenadôrs tant che imprest par acedi a Internet e duncje al coventave ufrî chest servizi ancje par mieç di une app. La aplicazion e permet ancje di fâ traduzions a partî de vôs. Itzuli, che al è stât lançât juste pôcs mês indaûr, al fâs za plui di 50 mil traduzions in dì. Lis traduzions dal castilian al euskara a rapresentin i doi tierçs de sô ativitât, ancje se la cualitât e je plui alte tes traduzions dal basc al castilian.

Font: EiTB, 20/12/19

Scozie: i progrès dal gaelic tal rapuart dal Bòrd na Gàidhlig

Il Bòrd na Gàidhlig – la agjenzie publiche scozese pal gaelic – al à publicât il rapuart anuâl su lis sôs ativitâts a pro de lenghe. Dilunc vie dal ultin an a son cressûts i fruts e i fantacins che a studiin o che a doprin il gaelic te lôr vite di ogni dì. A cressi a son stâts ancje i adults che a àn partecipât a cors par imparâ o par infuartî lis lôr competencis linguistichis. La agjenzie e à po lavorât cun 70 sogjets publics e 54 di chescj a àn za fat bon un plan linguistic par sburtâ la presince e l’ûs dal gaelic. Su chest front a van ricuardâts, par esempli, l’ent public VisitScotland che al à svilupât ancje une strategjie turistiche di pueste pal gaelic e la polizie scozese. Tal ultin an finanziari, il Bòrd al à vût a disposizion un totâl di 5 milions e 200 mil sterlinis: 2 milions e mieç a son stâts doprâts par finanziâ i diviers bants par promovi la lenghe, 1,4 a son lâts pes spesis struturâls e 1,1 pal font par svilupâ o infuartî i plans linguistics pal gaelic.

Font: Bord na Gàidhlig, 19/12/19

Corsiche: la leç Blanquer une disgracie pe lenghe corse

L’Associu di l’insignanti di/in lingua è cultura corsa (AILCC), cu la poie dal sindacât STC Educazione, al è intervignût ai 18 di Dicembar par denunciâ i pericui de leç di riforme de educazion imbastide dal ministri Jean-Michel Blanquer. La misure, a disin i professôrs cors, e je daûr a puartâ ae disparizion di disinis di puescj pal insegnament de lenghe tai istitûts superiôrs e, di chê strade, ancje de materie stesse. Za cumò i puescj taiâts a van dal 20 al 40% e i insegnants abilitâts a son doprâts no plui dal 15-20% des lôr pussibilitâts. Cun di plui, par chel che al rivuarde lis materiis opzionâls, lis novitâts sui credits ricognossûts ai students a rindin plui atrativis lenghis muartis tant che il grêc e il latin che no il cors. La associazion dai professôrs e invide ducj – a partî di rapresentants politics, aministradôrs locâi, sindacâts e gjenitôrs dai students – a mobilitâsi par fâi cuintri a di cheste leç che e menace la sorevivence stesse des lenghis propriis intes scuelis superiôrs dal stât francês.

Font: Corse Matin, 19/12/19

Irlande: oposizions critichis su la gnove leç su lis lenghis

Lis oposizions si mostrin critichis su la riforme de leç su lis lenghis uficiâls imbastide dal esecutîf de Republiche di Irlande par infuartî il pês dal gaelic irlandês inte aministrazion publiche. Il proviodiment al previôt nivei minims di presince de lenghe nazionâl in ducj i ents e i dipartiments publics, il plen ricognossiment dai nons propris e des direzions di cjase ancje cuant che a son scrits inte lôr forme gaeliche e che almancul un cuint dal personâl che al sarà cjapât sù a vore tes aministrazions e tai servizis publics al vedi une competence buine tal ûs dal irlandês. Pal Fianna Fáil si trate di un progjet che al rive cuntune vore di ritart e che al promet azions che nol rivarà a meti in vore. Pal Sinn Féin il proviodiment al va de bande juste ma al covente fissâ une scjadince par che si rispieti la cuote dal 20% di personâl che al fevele par gaelic e previodi des multis par cui che no le rispiete.

Font: Irish Times, 18/12/19

Gales: tai dal guvier ai fonts pe lenghe galese

La organizazion Cymdeithas yr Iaith e altris realtâts associativis impegnadis pai dirits linguistics a àn criticât cun fuarce il stampon de manovre finanziarie metût jù dal guvier dal Gales. Cundut che lis risorsis totâls a son passadis di 19 a 20,2 miliarts di sterlinis, i fonts pe lenghe galese a son calâts dal 1,6% (o sei di sù par jù 400 mil sterlinis). Ancjemò piês e je la situazion de educazion in lenghe galese là che il tai al è stât fintremai dal 15% (plui o mancul 1,65 milions di sterlinis). Cuntun belanç complessîf che al cres no si à nissune justificazion par chescj tais, a disin i militants pe lenghe, fale pal fat che par chest guvier, di là des cjacaris, il galês nol è une prioritât.

Font: Nation Cymru, 17/12/19

Ream Unît: politichis, stradis contrariis par Scozie e Ingletiere

Tes elezions politichis anticipadis che si son tignudis intal Ream Unît ai 12 di Dicembar i Conservadôrs vuidâts di Boris Johnson a àn otignût la maiorance assolude intal Parlament di Londre cun 365 deputâts su 650 e cun 66 elets in plui di chei che a vevin. Chest risultât, calcolât dal prin ministri britanic tant che un mandât esplicit par puartâ insom daurman e aes sôs cundizions il procès di jessude dal Ream Unît de UE, al palese però une divergjence totâl tra la volontât dai eletôrs inglês e di chei scozês.

Bretagne: l’ufici public de lenghe bretone al finìs 20 agns

L’inovâl pai vincj agns dal ufici public de lenghe bretone al à ufiert la ocasion par resonâ su la situazion di cheste lenghe. Par Lena Louarn, presidente dal ufici, ancje se il numar di cui che le fevele al va dilunc a sbassâsi a son lis cundizions par blocâ tai prossims agns la emoragjie e par tacâ a invertî cheste tindince a partî dal 2030. Su la cuistion des risorsis metudis pe politiche linguistiche, il president de Regjon aministrative Bretagne, Loïg Chesnais-Girard, al à dite che a front di un belanç gjenerâl che si sbasse, la Regjon e à cressût di 100 mil euros i fonts pal breton sei pal 2020 che pal 2021. Al à po stiçât ancje chei altris ents locâi a fâ la lôr part intal finanziâ l’ufici: a front dal milion metût de Regjon – al à dite – a son dipartiments che a rivin cif e çaf a 4 mil euros. Intant, propit par sensibilizâ lis aministrazions locâls sul teme de lenghe, pal mês di Jugn di chest an che al ven e je stade clamade adun une conference teritoriâl tra Regjon, dipartiments, comuns e unions comunâls.

Font: Le Telegramme, 12/12/19

Irlande: riforme par infuartî il gaelic te aministrazion publiche

L’esecutîf de Republiche di Irlande al à fate buine une riforme de leç su lis lenghis uficiâls che e ponte a infuartî il pês dal gaelic irlandês inte aministrazion publiche. Il proviodiment al previôt un plan gjenerâl che al cjati fûr i ponts debui che si àn tes politichis linguistichis fatis fin cumò e che al ledi a previodi nivei minims di presince e di tutele de lenghe nazionâl in ducj i ents, lis agjenziis e i dipartiments publics. Il test al prove a rispuindi ancje a problemis specifics come chei de incapacitât de bande di cierts servizis publics di ricognossi nons propris e direzions di cjase cuant che a son scrits inte lôr forme gaeliche. Un dai passaçs plui ambiziôs de gnove normative però al è chel di previodi che almancul un cuint dal personâl che al sarà cjapât sù a vore tes aministrazions e tai servizis publics al varà di vê une competence buine tal ûs dal irlandês. Il proviodiment nol dîs però dentri di cuant che si varà di rivâi a chest obietîf ancje parcè che, par cumò, nol pâr che a sedin avonde personis in stât di rispuindi a di chest profîl.

Font: Irish Times, 10/12/19

Paîs Basc: protocol pai dirits linguistics intal Nord

Kontseilua, il consei dai organisims sociâi de lenghe basche, e Euskal Konfederazioa a àn presentât i obietîfs che si ponte a otignî cul meti in vore il protocol par garantî i dirits linguistic intal Paîs Basc dal Nord sot aministrazion francese (Ipar Euskal Herria). Il document, che al jere stât svilupât intal 2016 intal Paîs Basc dal Sud sot aministrazion spagnole (Hego Euskal Herria), al è stât adatât pe situazion specifiche de part setentrionâl dal paîs e si riferìs in particolâr al ûs de lenghe tes aministrazions publichis e tai rapuarts tra chestis e i citadins. Il protocol al sarà presentât ai candidâts des prossimis elezions comunâls in maniere di impegnâju a metilu in vore tal câs che a sedin elets.

Font: Mediabask, 10/12/19

Asturiis: in cressi i fonts par promovi l’asturian

Il guvier des Asturiis al à decidût di incressi lis risorsis metudis a disposizion cu la manovre di belanç par promovi l’asturian. Intal 2020 la vôs pe promozion de lenghe proprie e sarà di plui o mancul 1 milion e 900 mil euros, o sei 201 mil in plui dai fonts assegnâts intal 2019. Si trate in ogni câs di une cifre cetant plui basse di chê che e coventarès par meti in vore un procès vêr di normalizazion linguistiche. I fonts pal asturian a rapresentin a pene il 0,04% dal belanç de Comunitât autonome.

Font: El Comercio, 07/12/19

Galizie: campagne par stiçâ la Xunta a invistî sul galizian in tv

La organizazion A Mesa pola Normalización Lingüística, intune cu lis associazions dai atôrs, dai dopleadôrs e dai tradutôrs galizians, a àn inviât une campagne par sburtâ il guvier de Comunitât autonome de Galizie (Xunta) a impegnâsi par facilitâ la difusion di contignûts par galizian intes plateformis audiovisivis digjitâls. Par esempli, si ricuarde che al è za dal 2015 che i guviers de Comunitât Autonome Basche e de Catalogne a àn sotscrit acuardis cu la plateforme Movistar+ par meti a disposizion cines e seriis televisivis dopleadis o sottituladis par basc e par catalan. La iniziative e va indenant in gracie di un finanziament anuâl che si môf sui 62 mil euros par lenghe. La plateforme audiovisive digjitâl e à za mostrât interès par cjapâ dentri ancje il galizian, ma par fâlu al covente che ancje la Xunta e fasi la sô part.

Font: Galicia Confidencial, 05/12/19

Paîs Catalans: dirits linguistics violâts tal Paîs Valenzian

Une disine di realtâts dal mont educatîf, sindacâl e culturâl dal Paîs Valenzian a àn metût adun une informative su lis violazions dai dirits linguistics sucedudis vie pal 2019 e le àn consegnade al guvier de Comunitât Valenziane. Il document si propon di dâi visibilitât aes discriminazions che dispès, cundut des tutelis previodudis de leç, i citadins si cjatin a patî tal moment che a fevelin par catalan. La informative e cjape dentri diviers episodis di discriminazion sucedûts in particolâr intai rapuarts tra citadins e operadôrs sanitaris, funzionaris de aministrazion publiche o agjents di polizie. Tra chescj, il câs che al à fat plui scjas al è chel di un abitant di Elx che si è ricjatât à jessi identificât, menât in comissariât e denunciât par vê rispuindût par catalan a doi agjents di polizie.

Font: Valencia Extra, 04/12/19

Paîs Catalans: clopadiç l’insegnament dal catalan tes Baleârs

Il consei scolastic des Baleârs al à fate buine une risoluzion là che al invide il guvier des isulis a meti in vore cinc misuris urgjentis par fâi cuintri ai problemis che si cjate a vivi l’insegnament dal catalan a scuele. Cun di fat, daûr dai dâts dal istitût di valutazion de cualitât intal sisteme educatîf, al ven fûr che sù par jù il 45% dai fruts che a finissin il cicli des primariis al mostre une competence basse intal ûs orâl dal catalan. Il consei scolastic de isulis al domande duncje al esecutîf di tignî monitorade la situazion cun continuitât, di controlâ che la normative sul insegnament dal catalan e vegni rispietade di dutis lis scuelis, di infuartî i percors par formâ i insegnants di catalan e di imbastî cors di formazion specifics pai professôrs che a àn di insegnâ il catalan a fruts che no lu cognossin.

Font: 20 minutos, 03/12/19

Paîs Basc: istituzions de CAB unidis par sburtâ l’euskara

In ocasion de zornade internazionâl de lenghe basche, che e cole ai 3 di Dicembar, i esecutîfs de Comunitât Autonome Basche, des provinciis di Araba, Bizkaia e Gipuzkoa, e dai comuns di Bilbo / Bilbao, Donostia / San Sebastián e Gasteiz / Vitoria a àn concuardât une declarazion istituzionâl unitarie là che si bat su la dibisugne di atualizâ e di rinovâ l’impegn pal euskara “su la fonde de imagjinazion”. In chest sens si presee la incressite de colaborazion tra realtâts sociâls e istituzions a pro de lenghe basche cemût che si à viodût ancje cul progjet Euskaraldia. Pes istituzions firmatariis a son però ancjemò tancj i setôrs là che si à di lavorâ di plui par sburtâ l’euskara, a partî di chei de economie, dal lavôr e dal consum.

Font: EiTB, 03/12/19

Galizie: cun Zenâr si invie un cuotidian dut par galizian

Ai 30 di Novembar si à vude la presentazion uficiâl dal numar zero di Nós Diario, il cuotidian in galizian che al tacarà a saltâ fûr, sei su cjarte che in forme digjitâl, cui 2 di Zenâr dal 2020. Il gjornâl al sarà compagnât, ogni sabide, ancje di une publicazion setemanâl – Sermos Galiza – che e jere za presinte su internet. I numars zero des dôs rivistis a son za disponibii in rêt.

Font: Consello da Cultura, 03/12/19

Stât francês: manifestazion a Parîs pes lenghis minorizadis

Sù par jù un miâr di personis a àn manifestât ai 30 di Novembar a Parîs par domandâ al stât francês di imbastî e meti in vore politichis linguistichis seriis a pro des lenghis minorizadis e, in particolâr, par chel che al rivuarde la scuele. La iniziative e jere nassude, di fat, come rispueste al tai di risorsis e di personâl pal insegnament des lenghis minorizadis che al diven de gnove leç su la educazion puartade indenant dal ministri Jean-Michel Blanquer. I efiets de gnove leç za si ju viôt inte diminuzion dal numar dai students che a puedin studiâ lis lôr lenghis propriis intai percors bilengâi de scuele publiche. La manifestazion e je stade metude adun dai coletîfs impegnâts pal insegnament des lenghis minorizadis intal stât francês che si son dâts dongje tun coordenament batiât Pour que vivent nos langues. Ae iniziative a àn partecipât delegazions rivadis de Ocitanie, de Bretagne, de Corsiche, de Alsazie, des Flandris, dal Paîs Basc e de Catalogne dal Nord.

Font: Jornalet, 01/12/19

Scozie: simpri plui struments informatics par imparâ il gaelic

In ocasion de fieste par Sant Andree, patron de Scozie, e je stade lançade une aplicazion gratuite che e permet di imparâ il gaelic scozês. A imbastî la iniziative e je stade Duolingo, societât informatiche che e ufrìs za une novantine di cors in trente lenghis diferentis (e tra chestis ancje il galês e il gaelic irlandês) e che e à plui di tresinte milions di utents ator pal mont. Daûr dal ultin censiment in Scozie a son plui o mancul 57 mil lis personis che a fevelin par gaelic, ma la lenghe e je daûr a jevâ cetant interès. Cun di fat, la version beta dal cors e jere stade testade di uns 7 mil personis e chês che si vevin za iscritis al cors prime dal so lanç a jerin plui di 20 mil.

La agjenzie pe lenghe Bord na Gàidhlig e à invezit decidût di invistî uns 150 mil sterlinis par incressi e miorâ il progjet Giglets Gàidhlig che al ufrìs percors di aprendiment multimediâl in linie par students di gaelic. Si trate di un sisteme za doprât dal 90% dai istitûts scolastics a imersion cun 600 insegnants e 4.500 students iscrits. Il program al permet di slizerî il lavôr dai insegnants e ju jude ancje te valutazion dai progrès fats dai students.

Font: BBC, 28/11/19; The Pie News, 29/11/19; Bord na Gàidhlig, 09/12719

Paîs Catalans: 30 agns dal CNL

Il Consorzi pe Normalizazion Linguistiche (Consorci per a la Normalització Lingüística) de Catalogne al à celebrât i siei prins trente agns di ativitât. Metût sù tal 1989 dal guvier de Catalogne (Generalitat), de provincie di Girona e di 19 comuns, in dì di vuê al è formât, in plui che dal esecutîf catalan, ancje di 135 aministrazions publichis e al à 744 dipendents. Il so obietîf principâl al è chel di judâ i adults a imparâ la lenghe catalane e a sburtâ il so ûs. Inta chescj trente agns al à inmaneât plui di 83 mil cors là che a àn studiât passe un milion e 900 mil personis. Cun di plui, inte suaze dal program di volontariât pe lenghe, al à formât uns 137 mil cubiis linguistichis. Cumò il Consorzi al è il sogjet principâl par chel che al rivuarde l’acet linguistic dai imigrâts che a rapresentin il 72% dai students dai siei cors. L’an passât al à svilupât uns 3.700 cors cun plui di 80 mil iscrits.

Font: Generalitat de Catalunya, 14/11/19

Galizie: militants indipendentiscj galizians sot procès

Intal stât spagnûl la repression no cjape dentri dome rapresentants dal indipendentisim catalan ma ancje di chel galizian, cundut dal so pês une vore limitât e de mancjance di azions di resistence e di disubidience civîl slargjadis. La publiche acuse e à di fat domandât une condane complessive a 102 agns di preson par dodis militants galizians che a partegnin ae rêt antirepressive e di jutori ai presonîrs politics Ceivar e al moviment indipendentist Causa Galiza. Chest ultin al è stât metût fûr leç intal 2016 cu la acuse di “apologjie dal terorisim”. I militants, che a riscjin dai cuatri ai dodis agns di preson ognidun, a son stâts arestâts ancjemò tal Otubar dal 2015 e il lôr câs al rive cumò a judizi denant de Audiencia Nacional, la cort che e à cjapât il puest dal tribunâl speciâl di ete franchiste.

Font: Jornalet, 14/11/19

Paîs Catalans: dirits linguistics te justizie, azion politiche

La comission su la justizie dal Parlament de Catalogne e à fate buine une risoluzion che e piture la situazion grivie de lenghe catalane te aministrazion judiziarie – là che si cjate margjinalizade in maniere sistematiche – e che e propon une rie di azions par mudâ chest cuadri. Il test di base al è stât svilupât cul jutori de organizazion Plataforma per la Llengua e al è stât fat indenant dal grup parlamentâr di Catalunya en Comú Podem. Il document al à cjatât une poie maioritarie che e à passât i doi tierçs dai deputâts. Cun di fat a poiâlu a son stâts ancje ERC, Junts per Catalunya, CUP e il PSC. La diestre spagnoliste (C’s e PP) e à invezit votât cuintri. La risoluzion e propon ancje di sburtâ par che il Parlament spagnûl al mudi la leç organiche sul podê judiziari in maniere di previodi che i magjistrâts e i funzionaris de justizie in servizi intes Comunitâts cun lenghe proprie a vedin di cognossi cheste lenghe.

Font: PFLL, 13/11/19

Gales: la Assemblee nazionâl no varà il non dome par galês

E je lade strucje la propueste di dâi ae Assemblee nazionâl dal Gales un non dome par galês. La iniziative, sburtade dal deputât dal partît nazionalitari Plaid Cymru Rhun ap Iorwerth, e je stade boçade cun 39 vôts a 16. La propueste e jere stade poiade ancje dai grups impegnâts pe lenghe galese e di diviers personaçs innomenâts dal mont de culture e dal sport. L’organisim al larà duncje indenant a mantignî la forme bilengâl dal non, o sei Welsh Assembly – Senedd Cymru.

Font: BBC, 13/11/19

Galizie: sucès di une serie tv par galizian ancje tal forest

«O sabor das Margaridas» no je stade dome la prime serie televisive zirade par galizian lade in onde su Netflix, ma e je stade ancje une des dîs no par inglês plui viodudis intal Ream Unît. La gnove e à cjapât di sorprese ancje i siei curadôrs che, fûr de Galizie, a crodevin di cjatâ un bon acet massime te Americhe dal Sud, là che si àn diviersis comunitâts di divignince galiziane. Il sucès de serie dentri dal stât spagnûl e in altris paîs e à sburtât la produzion a zirâ daurman ancje une seconde stagjon. Netflix al rapresente un marcjât impuartant e in cressi par dâi une “seconde vite” aes produzions plui interessantis des televisions autonomichis. Al è il câs, par esempli, di diviersis seriis svilupadis de television catalane TV3 (a partî di «Si no t’hagués conegut») e di chê basche ETB.

Font: Fuera de series, 12/11/19

Estonie: scuintri istituzionâl su la lenghe di doprâ tai nîts

La aministrazion comunâl di Tallinn e à cjapât posizion cuintri de gnove leç che e ponte a vualivâ il model linguistic inte educazion ancje tal asîi nît e tes scuelis de infanzie. Cun di fat, la normative e larès a eliminâ la pluralitât dal sisteme in vore te capitâl de Estonie dulà che a son in vore diviersis struturis che a doprin il rus come lenghe veicolâr. L’eston al è insegnât pardut a partî dai trê agns, ma in cualchi câs si lu dopre dome par ciertis ativitâts scolastichis. Chê russe e je la minorance plui gruesse dal paîs baltic e a son cetantis lis fameis là che il rus al reste la lenghe plui doprade. La aministrazion comunâl e segnale che za in dì di vuê, cence bisugne di intervents impositîfs, ducj a àn acès al insegnament dal eston, di là de lenghe che e ven fevelade in cjase.

Font: News ERR, 12/11/19

Gales: si prepare la cuinte edizion dal Dydd Miwsig Cymru

Si davuelzarà ai 7 di Fevrâr dal 2020 la cuinte edizion de Zornade de musiche galese (Dydd Miwsig Cymru). La iniziative, che e cres an dopo an, si propon di svicinâ ancje chei che no cognossin il galês ae musiche produsude ta cheste lenghe. Il consei des arts dal Gales al à ancje metût fûr un bant di pueste (Noson Allan) par judâ lis associazions e i grups locâi che ta chê zornade a metaran sù dai events che a varan di protagoniste la musiche galese. Chest bant, di cuant che al è stât inviât, al à za permetût di finanziâ passe dodis mil apontaments. Tes prossimis setemanis si tacarà a cognossi lis primis iniziativis imbastidis pe edizion de Zornade dal 2020.

Font: News from Wales, 12/11/19

Paîs Basc: pas indaûr di passe 20 agns pal euskara a Iruñea

La aministrazion comunâl di Iruñea / Pamplona, cumò tes mans des diestris regjonalistis e spagnolistis (Navarra Suma), e à decidût di ritirâ la ordenance su la lenghe basche fate buine de aministrazion stade par tornâ a chê dal 1997. Chest al vûl dî, juste par fâ cualchi esempli, che i citadins a laran dilunc a vê il dirit di indreçâsi in forme scrite o orâl ae aministrazion locâl ancje par euskara e a ricevi une rispueste te stesse lenghe ma, par fâlu, a varan di spietâ che al sedi disponibil un funzionari in stât di doprâ il basc. Cun di fat, par chel che al rivuarde il personâl, si tignarà cont des competencis linguistichis dome par cualchi profîl e si gjavarà la cognossince dal euskara come titul di merit pes assunzions. Il bilinguisim al sarà mantignût dome par cualchi ativitât istituzionâl e la presince dal basc intai materiâi di promozion comunâi e passarà dal 100 al 25%.

Font: EiTB, 11/11/19

Ocitanie: percors di 600 km pe seconde edizion di Passem

Al è stât presentât il percors de seconde edizion di Passem, la corse che si propon di sensibilizâ i citadins e di tirâ sù fonts pe promozion de lenghe e de culture ocitane, che si davuelzarà te Vierte di chest an che al ven. In dut si fevele di 600 chilometris cun partence ai 30 di Avrîl di Pau par rivâ ai 3 di Mai a Anglet. Ae prime edizion, che e previodeve un percors di 460 chilometris, a vevin partecipât diviers miârs di personis. La iniziative si ispire ae Korrika, la corse bienâl pe lenghe basche, che chest an e je rivade ae sô vincjeunesime edizion.

Font: Sud Ouest, 11/11/19

Federazion Russe: sierât grup pai dirits dai popui natîfs

Il tribunâl centrâl di Mosche al à decidût pe dissoluzion dal Centri pal Supuart dai Popui Natîfs dal Nord, une organizazion che dal 2001 si bat pai dirits des popolazions nativis des tieris setentrionâls e orientâls de Federazion Russe. Tal 2015 lis autoritâts russis a vevin metût il Centri te liste nere des organizazions calcoladis al servizi di potencis forestis: cundizion superade l’an passât dopo che il Centri al veve rinunciât a dutis lis donazions che i rivavin dal forest. Chest volte invezit, cu la decision dal tribunâl, il procès di dissoluzion nol è reversibil. La sentence e ven considerade part di une azion plui grande che e ponte a eliminâ o a cidinâ dutis lis realtâts che a contestin intune cualchi maniere i interès dal guvier centrâl. Ta chescj agns, il Centri al veve rapresentât un pidiment par dutis chês compagniis economichis che a vuelin disfrutâ sul plan minerari e energjetic lis tieris des popolazions nativis. La decision e je stade condanade cun fuarce dai rapresentants des comunitâts sami di Svezie, Norvegje e Finlande – che a son une vore leadis aes popolazions nativis dal Nord de Federazion Russe – ma ancje dal puartevôs pai afârs internazionâi de Union Europeane.

Font: The Barents Observer, 09-12/11/19

Irlande: segnaletiche par gaelic sot atac intal Nord

La aministrazion provinciâl dal Ulster di Mieç, in Irlande dal Nord, e à domandât aes fuarcis di polizie di intervignî cuintri di chei che a vandalizin la segnaletiche stradâl bilengâl. Cun di fat, ta chest teritori, a son stâts un centenâr in doi agns i atacs metûts in at cuintri dai cartei e des tabelis stradâls là che e je presinte ancje la lenghe gaeliche irlandese. Cui che al sedi daûr di chescj atacs al è avonde clâr ma, fin cumò, no si à fat nuie di significatîf par fermâju. I rapresentants politics unioniscj, cundut che a àn criticât i vandalisims, a àn minimizât il fat cul dî che meti cartei ancje par irlandês in areis là che a vivin comunitâts unionistis si pues considerâle une provocazion.

Font: Irish News, 07/11/19

Paîs Catalans: “Som 10 milions, som una llengua”

La organizazion Plataforma per la Llengua e à inviât la campagne “Som 10 milions, som una llengua” che si propon di fâi cuintri ai tentatîfs di fruçonament de unitât linguistiche catalane dispès metûts in at des stessis istituzions publichis. Il catalan al è fevelât di plui o mancul dîs milions di personis in cinc comunitâts autonomis diviersis dentri dal stât spagnûl (principât di Catalogne, isulis Baleârs, Paîs Valenzian e cualchi aree dal Aragon e di Murcia), ma ancje in Andorra, intal dipartiment francês dai Pireneus orientâi (Catalogne dal Nord) e te citât sarde dal Alguer / Alghero.

Irlande: lançade la gnove plateforme multimediâl PEIG

Ai 2 di Novembar la organizazion pe lenghe irlandese Conradh na Gaeilge e à lançât in maniere uficiâl la gnove version de plateforme multimediâl PEIG. Il sît al ufrìs gnovis e informazions su ativitâts, events e oportunitâts leâts al gaelic irlandês. La iniziative e je pensade sei pes personis che a fevelin cheste lenghe, sei par chês che a son daûr a imparâle o che a varessin gust di fâlu. La gnove version dal sît e je stade miorade ancje sul plan de funzionalitât in maniere di jessi in linie cui nivei di cualitât ufierts dai prodots informatics miôr.

Font: CnaG, 30/10/19

Bretagne: a Rennes la assemblee gjenerâl dal ELEN

Si è tignude ai 26 di Otubar a Roazhon / Rennes, in Bretagne, la assemblee anuâl dal ELEN (European Language Equality Network), la Rêt Europeane pe Avualiance Linguistiche, che e met adun cetantis organizazions impegnadis pai dirits linguistics. Intant dai lavôrs de assemblee a son stadis fatis buinis ae unanimitât cuatri risoluzions: la prime par domandâ ae Spagne di liberâ i presonîrs politics catalans, di condanâ lis violencis des fuarcis di polizie e di inviâ un dialic che al puarti a di une soluzion politiche dal conflit; la seconde par invidâ il guvier de Navare a fâ ricors cuintri di une sentence che e discrimine l’ûs de lenghe basche te aministrazion publiche; la tierce par riclamâ l’esecutîf de Galizie a garantî i percors educatîfs par galizian; e la ultime par sostignî la campagne a pro de educazion intes lenghis minorizadis dentri dal stât francês. Dilunc vie de assemblee si à metût sù un grup di lavôr che al meti adun lis realtâts che a operin intal cjamp dai media tes lenghis minorizadis europeanis. La riunion e à viodût ancje la adesion di gnûfs sogjets e la partecipazion straordenarie dal relatôr pes minorancis de ONU, Fernand de Varennes.

Font: ELEN, 30/10/19

Cornualie: a rivaran in curt di Londre i fonts pal cornic

I fonts prometûts in Lui dal guvier britanic par promovi la lenghe e la culture corniche a rivaran in curt. A sigurâlu al è stât il ministri pes autonomiis locâls cuntune comunicazion uficiâl al Consei de Cornualie là che al conferme che di Londre al rivarà un finanziament di 200 mil sterlinis: 150 mil par promovi la cognossince e l’ûs de lenghe proprie e 50 mil par azions di promozion culturâl. Lis risorsis a saran assegnadis ae Assemblee locâl e a varessin di rapresentâ dome il prin pas di une colaborazion continuative tra il guvier locâl e chel di Londre par dâi sostance ai impegns cjapâts cul inseriment de comunitât corniche tra chês tuteladis par mieç de Convenzion cuadri pe protezion des minorancis nazionâls. Inte letare si fevele però dai cornics tant che di une minorance storiche de Ingletiere, definizion che e à fat rabiâ cetancj di lôr – in primis il partît nazionalitari Mebyon Kernow – che di agnorums a domandin che ae Cornualie i si ricognossi il statût di nazion che za al vâl par Gales e Scozie.

Font: Cornish Stuff, 30/10/19

Scozie: gnûf percors di formazion par insegnants di/par gaelic

A son passe 4.300 i fruts scozês che a frecuentin scuelis primariis o secondariis a imersion par gaelic (GME, Gaelic Medium Education) – un numar che in vot agns al è cressût dal 64% – intant che cualchi altri miâr al studie il gaelic come materie specifiche o dome par cualchi ore par setemane. In Scozie lis scuelis gaelichis a imersion a son sîs, trê a Glaschu / Glasgow e trê tes Highlands e tes isulis là che la lenghe e je ancjemò doprade te vite di ogni dì. Par frontâ la incressite continuative de domande, une setime scuele e je cumò in costruzion e altris cuatri a varessin di nassi dentri dal 2024. Dut câs, daûr di ce che al dîs il diretôr dal consei gjenerâl scozês pal insegnament Kenneth Muir, il probleme principâl al è chel de scjarsetât di professôrs in stât di insegnâ par gaelic. Une prime rispueste par frontâ chest probleme e diven dal gnûf cors inviât de universitât di Glaschu / Glasgow e finanziât cun cuasi mieç milion di sterlinis dal Scottish Funding Council. Si trate di un cors intensîf di gaelic pensât par formâ professioniscj dal setôr che al previôt dîs mês di formazion in universitât e trê setemanis di residence tal centri educatîf gaelic de isule di Uibhist a' Deas / South Uist.

Font: The Scotsman, 29-30/10/19

Paîs Basc: il TSJN al difint i puescj publics bilengâi

Il tribunâl superiôr di justizie de Navare (TSJN) al à boçât la domande fate indenant di un sindacât dai funzionaris de aministrazion publiche (AFAPNA) di anulâ i bants fats dal guvier de Comunitât autonome intal 2017 par cjapâ sù a vore personâl cun cognossince de lenghe basche e, duncje, di revocâ i puescj assegnâts cun chei concors. Plui in detai si fevele di cinc puescj inte polizie autonomiche, cinc intai vigjii dal fûc, plui cualchi altri intes direzions regjonâls pe educazion e pe aministrazion. Il tribunâl al à judicât che – ce pe situazion sociolinguistiche de aree là che a vevin di jessi assegnâts, ce pe percentuâl che a rapresentavin dentri dal organic complessîf – no esistin provis che la assegnazion di personâl bilengâl e sedi injustificade o disproporzionade cemût che al pretindeve il sindacât che al veve contestât i bants. Il ricors presentât di cheste organizazion si insuaze intune campagne di atac cuintri de normalizazion de lenghe basche in Navare puartade indenant di diviersis realtâts politichis e associativis leadis ae diestre spagnoliste e regjonaliste.

Font: EiTB, 29/10/19

Aragon: rispueste di Charramos Aragonés ai atacs ae lenghe

La plateforme Charramos Aragonés e à presentât ricors aministratîf cuintri de decision de aministrazion comunâl di Uesca/Huesca di tirâ vie i cartei che a devin il benvignût in citât par castilian e par aragonês. Intal câs che il comun al resti fer su la sô posizion, a àn fat savê che a cjaparan la vie judiziarie. A lôr parê no si pues tornâ indaûr sul vôt comunâl dal 2016 che al ricognosseve la citât come part de aree di ûs tradizionâl dal aragonês. Cun di fat, ridusi o eliminâ dirits linguistics ricognossûts al larès cuintri de suaze legâl fissade cu la ratifiche de Cjarte europeane des lenghis regjonâls o minoritariis. Tant plui che, ancje se l’aragonês al è fevelât di une part minoritarie de popolazion citadine – cemût che si à dite par justificâ il ritîr dai cartei bilengâi –, une sentence dal tribunâl costituzionâl spagnûl e spieghe che la protezion garantide de leç a di une lenghe minorizade e vâl di là dal numar des personis che le fevelin.

Font: El Diario, 28/10/19

Paîs Basc: in miârs in place pai zovins di Altsasu

Ai 26 di Otubar passe 50 mil personis a àn partecipât denant dal palaç di justizie di Iruñea / Pamplona a di une gnove manifestazion di solidarietât cui vot zovins di Altsasu / Alsasua condanâts dai judiçs de Audiencia Nacional a penis fin a 13 agns di preson par une barufe di bar cun doi agjents de Guardia Civil in libare jessude. La vicende e jere stade strassomeade e piturade di une rilevance politiche che e veve puartât la acuse a tratâle come un câs di terorisim. Dopo di un procès plui che discutibil, la Audiencia Nacional e veve fat colâ la acuse di terorisim ma e veve condanât i zovins di Altsasu / Alsasua al massim de pene par chês altris acusis (agression a public uficiâl, lesions, disordins publics e menacis ingravadis dal odi cuintri des fuarcis di polizie) condanant doi di lôr a 13 agns di preson, doi a 12 agns, trê a 9 agns e la uniche fantate sot acuse a 2 agns.

Stât spagnûl: partîts catalans, bascs e galizians adun pai dirits

Dirit ae autodeterminazion dai popui che a vivin dentri dal ream di Spagne, nature democratiche e no violente de azion politiche, libertât pai presonîrs politics e pussibilitât pai esiliâts di tornâ cence consecuencis juridichis, rispiet des libertâts civîls e politichis, politichis sociâls e economichis che a permetin aes diviersis comunitâts nazionâls di progredî. A son chescj i ponts de cussì clamade declarazion de Llotja de Mar sotscrite ai 25 di Otubar a Barcelone dai rapresentants dai principâi partîts nazionalitaris dal stât spagnûl cun chê di mostrâsi unîts denant dal guvier di Madrid e di lançâ un messaç sul plan internazionâl. A firmâ il document a son stadis lis trê fuarcis principâls dal indipendentisim catalan – o sei ERC, Junts per Catalunya-PDECat e CUP –, diviers moviments nazionalitaris dai Paîs Catalans tant che Crida Nacional per la República, Demòcrates de Catalunya, Esquerra Valenciana, República Valenciana, Més per Mallorca e Més per Menorca, i bascs di EH Bildu e i galizians dal BNG.

Font: Naiz:, 25/10/19; VilaWeb, 25/10/19

Paîs Catalans: a van dilunc a calâ lis sentencis par catalan

Te suaze de diesime zornade sul ûs dal catalan inte justizie, inmaneade dal consei dai avocats catalans, si à ricuardât che tai ultins dîs agns il numar des sentencis dadis fûr par catalan al è calât cuasi dal un par cent ad an. Cun di fat, si à passâts dal 16,8% di sentencis par catalan dal 2007 al 7,7% dal 2018. Sul plan teritoriâl, la circoscrizion judiziarie là che la lenghe e ten di plui e je chê di Girona (14,4%) intant che ta chê des Tieris dal Ebro il catalan al è aromai ridusût a di un ûs testemoniâl (1,9%). Al è clâr – al à dite il responsabil pe lenghe dal consei dai avocats, Joan Riera – che i imprescj linguistics metûts a disposizion dai operadôrs de justizie ta chescj agns e la colaborazion cui organisims di politiche linguistiche dal guvier catalan no son avonde par fermâ cheste emoragjie e si à duncje di imbastî gnovis strategjiis di azion.

Font: abogacia.es, 25/10/19

Asturiis: lis CCOO a sburtin sul asturian a scuele

La federazion dai lavoradôrs dal insegnament dal sindacât Comisiones Obreras de Asturias (CCOO) e à presentât un rapuart che al fâs il pont su la presince dal asturian (e dal galizian che si fevele inte part plui ocidentâl de Comunitât autonome) inte scuele. Intune realtât là che la presince des lenghis propriis no je curicolâr e là che i insegnants si cjatin intune cundizion di precarietât, tai ultins agns il numar di fruts che a sielzin di studiâ l’asturian al è calât dal 14,5% intes primariis e dal 8% intes secondariis. Par chel che al rivuarde invezit i professôrs, in dì di vuê, a son une disine i câs là che i puescj no son cuvierts. Cun di plui, su 265 insegnants di asturian des primariis a son 230 chei interinâi, o sei l’86,79%; une percentuâl che e va sù al 97,53% se si passe a chei des secondariis. Intal rapuart des CCOO si proponin ancje dîs misuris di podê meti in at par cambiâ cheste situazion tant che la istituzion de specialitât di lenghe asturiane (e galiziane des Asturiis), il slargjament de materie a dutis lis scuelis e a ducj i nivei dal cicli scolastic, la organizazion di cors di formazion linguistiche pai insegnants za in servizi e la incressite dai studis universitaris di asturian.

Font: El Comercio, 24/10/19

Paîs Catalans: mobilitazion continue cuintri des condanis

No si fermin in Catalogne lis protestis e lis mobilitazions cuintri de sentence dal tribunâl suprem spagnûl che e à condanât nûf dai dirigjents dal indipendentisim catalan a penis tra i 9 e i 13 agns di preson. La proteste si à inviade te dì stesse che e je stade dade fûr la sentence, ai 14 di Otubar, cu la ocupazion dal aeropuart di El Prat, fûr di Barcelone, de bande di miârs di personis che a vevin aderît ae azion imbastide dal Tsunami Democratic. La rispueste de polizie statâl e di chê locâl e veve causât passe 130 ferîts.

Paîs Catalans: e cres la discriminazion linguistiche tes leçs

La organizazion Plataforma per la Llengua e à publicât il so rapuart su lis discriminazions linguistichis inte legjislazion spagnole. Il document al cjape in esam lis normis publicadis intal boletin uficiâl dal stât vie pal an passât. Il dât principâl al è che tal 2018 si àn vudis 139 normis che a van a discriminâ cui che al fevele par catalan, ven a dî il 49% in plui dal an prime. Cuasi la metât di chestis normis (46%) a rivin in realtât de Union Europeane che, dal moment che la uniche lenghe ricognossude a nivel statâl e comunitari e je il castilian, e inibìs l’ûs dal catalan e di chês altris lenghis couficiâls in diviers cjamps. Framieç des leçs decidudis a Madrid, la plui part di chês che a imponin l’ûs dal castilian a son chês che a integnin documentazion e modulistiche.

Font: PFPLL, 17/10/19

Bretagne: sì definitîf de justizie francese al “ñ” te onomastiche

La cort di cassazion francese e à confermât la sentence de cort di apel che e permeteve l’ûs inte onomastiche dal “ñ”, segnâl grafic doprât ancje de lenghe bretone. Il percors judiziari si veve inviât dopo che un funzionari de anagrafe dal comun di Kemper / Quimper si veve refudât di trascrivi il non par breton “Fañch” che une cubie e veve sielzût pal fi. Un tant su la fonde di une circolâr dal ministeri de justizie francês che no ricognòs l’ene cul tilde tra lis letaris autorizadis. La sentence de cassazion, che e rapresente il tierç grât di judizi, e siere in maniere definitive la cuistion e i da reson ai gjenitôrs. Tal framieç il frut al à za finît doi agns e mieç.

Font: Ouest France, 17/10/19

Paîs Basc: boçade in Navare la ofensive cuintri de leç sul basc

La propueste di leç fate indenant de coalizion des diestris Navarra Suma (NA+) par scancelâ il decret che al regole l’ûs de lenghe basche intes aministrazions publichis de Navare e je stade boçade cul vôt unitari di Partît Socialist (PSN), Podemos, Izquierda-Ezkerra, Geroa Bai e EH Bildu. Dopo de decision de magjistrature di boçâ un pâr di passaçs dal decret, i trê partîts di çampe a somein dacuardi tal tornâ su la normative ma juste par cualchi mende e a judichin dal dut strumentâi i atacs des diestris. Geroa Bai e EH Bildu invezit a difindin ad in plen il decret e a acusin lis diestris (UPN, PP e Ciudadanos) di tratâ il basc come se al fos une lenghe foreste e no la lenghe native de Navare.

Font: EiTB, 17/10/19

Gales: preocupazion pe mancjance di professôrs di galês

Intant de riunion dal Parlament galês (Senedd) dai 16 di Otubar a son stâts frontâts doi temis che a rivuardin lis politichis linguistichis. Il prin si riferìs al ûs dal galês intai uficis dal guvier là che, de bande dal esecutîf, si à riferît che il plan su la comunicazion interne al sarà presentât cul mês di Novembar. A dâi une scjassade ae aule e je stade però la gnove che vie pal 2019 a son stâts a pene dodis i professôrs che a àn completât il percors di abilitazion par insegnâ il e par galês. Dut câs la ministre pes politichis linguistichis, Eluned Morgan, e à fat savê che a son stadis metudis altris 150 mil sterlinis par sburtâ a sielzi cheste strade professionâl.

Font: Nation Cymru, 16/10/19

Paîs Basc: presentât un tradutôr neuronâl basc-castilian

Ai 16 di Otubar il guvier de Comunitât Autonome Basche al à presentât a Donostia il prin tradutôr automatic neuronâl dal basc al castilian e dal castilian al basc svilupât a partî di une inteligjence artificiâl. Si trate di un imprest che al à domandât agns di lavôr e che no si fonde su procès di analisi e trasferiment di nature gramaticâl ma su rêts neuronâls. Cun chest gnûf sisteme lis traduzions a varessin di vê une cualitât miôr e mantignî une coerence plui alte tra i diviers elements che a formin lis frasis. Chel istès, come ducj i tradutôrs automatics, nol pues sostituî il lavôr dai tradutôrs professioniscj. Prime de fin dal an e varès di saltâ fûr ancje une aplicazion par permeti di doprâ il tradutôr automatic neuronâl su celulârs e tablets.

Font: EiTB, 16/10/19

France: ai 30N manifestazion a Parîs pes lenghis minorizadis

I coletîfs impegnâts pal insegnament des lenghis minorizadis intal stât francês a son daûr a inmaneâ une manifestazion che e varès di davuelzisi ai 30 di Novembar a Parîs, cun dute probabilitât denant dal palaç dal ministeri statâl pe educazion. La iniziative – che e met adun, tra lis altris, organizazions ocitanis, baschis e bretonis – e je stade pensade tant che rispueste al tai di risorsis e di personâl pal insegnament des lenghis minorizadis che al diven de gnove leç su la educazion puartade indenant dal ministri Blanquer.

Font: Jornalet, 14/10/19

Irlande: consultazions a Belfast su la segnaletiche bilengâl

La proteste puartade indenant dai students e dai ativiscj pe lenghe irlandese dopo de decision dal consei comunâl di Béal Feirste / Belfast di no autorizâ la segnaletiche bilengâl in doi centris culturâi di cuartîr inte part Ovest de citât e à obleât i conseîrs a riviodi la lôr posizion. Intune riunion straordenarie dal consei si à concuardât di inviâ une consultazion popolâr par decidi su la cuistion, ma si à ancje decidût di doprâ in forme sperimentâl l’irlandês intun dai doi centris interessâts e di meti sù daurman in ducj i doi tabelis plurilengâls di benvignût.

Font: Irish News, 12/10/19

Irlande: a tornin i fonts pai viaçs di studi tal Gaeltacht

E je rivade a bon fin la campagne puartade indenant intai ultins agns de Union dai Students in Irlande (USI) e de organizazion Conradh na Gaeilge par che il guvier irlandês al torni a finanziâ i contribûts pai students che a incressin lis lôr competencis linguistichis cun periodis di studi e di lavôr intal Gaeltacht, o sei lis areis là che l’irlandês al è ancjemò fevelât in maniere significative. Cun di fat, ai 10 di Otubar, il ministri pe educazion Joe McHugh al à fat savê che la misure e je stade tornade a finanziâ. Un tant, e dîs Conradh na Gaeilge, nol zovarà dome aes competencis linguistichis dai students ma ancje ae economie dal Gaeltacht che plui di altris e à patît par vie de crisi dai ultins agns.

Font: CnaG, 11/10/19

Scozie: in cressi lis scuelis gaelichis di Glasgow

In ocasion de scree de edizion numar 116 dal festival Mod, che al celebre la culture gaeliche de Scozie, il prin ministri vicjari, John Swinney, al à anticipât che il guvier scozês al metarà a disposizion in curt doi milions di sterlinis par inviâ la cuarte scuele primarie gaeliche di Glaschu / Glasgow. A vincj agns di distance de nassite de prime scuele a imersion par gaelic de citât, la domande e va dilunc a cressi. Un tant nol diven dome di un aument di interès par cheste lenghe, ma ancje dai vantaçs leâts al bilinguisim e de cualitât alte che par solit chescj istitûts a ufrissin. Dongje des trê primariis za in vore, a Glaschu / Glasgow si à ancje une scuele secondarie a imersion che si cjate al diesim puest tra dutis chês publichis scozesis par cualitât dal insegnament.

Font: The Scotsman, 11/10/19

Lusazie: la segnaletiche autostradâl e restarà dome par todesc

Il guvier federâl todesc al à fat savê che la segnaletiche dilunc des autostradis che a scjavacin la Lusazie e restarà dome par todesc. La Lusazie, che si cjate a cjaval tra i stâts dal Brandeburc e de Sassonie, e je la tiere dai serbians (o sorps), uniche comunitât minorizade di lenghe slave cjapade dentri tai confins de Gjermanie. Un decret dal ministeri pes infrastruturis dal Brandeburc dal 2014 al previodeve la metude in vore progressive de segnaletiche bilengâl ancje tes autostradis. La competence su cheste part de viabilitât i spiete però aes autoritâts federâls e cussì, a front de domande di sclariments fate indenant in Parlament dai Verts, l’ufici federâl su la stradis al à dite che, gjavadis pocjis ecezions leadis a nons internazionâi, la normative statâl no previôt l’ûs di dôs lenghis par resons motivadis cu la “sigurece dai automobiliscj”. L’implant de segnaletiche bilengâl al va invezit indenant, a man a man che si cambiin i cartei vieris, intal rest de viabilitât che si cjate te aree di lenghe serbiane dal Brandeburc. In particolâr, inte citât di Chóśebuz / Cottbus, il 55% dai cartei cul non des stradis al è za bilengâl.

Font: lr-online.de, 09/10/19

Paîs Catalans: agns e agns di preson pai leaders indipendentiscj

Ai 14 di Otubar il tribunâl suprem spagnûl al à rindude publiche la sentence cuintri dai dodis dirigjents indipendentiscj catalans sot acuse pai reâts di ribelion, sedizion e malversazion che e previôt un totâl di pôc mancul di cent agns di preson. La cort e stime che e sedi provade la esistence de violence intant dai fats a judizi, ma no pues imputâle ai imputâts. Un tant al fâs duncje colâ la ipotesi di reât di ribelion, o sei propit chê doprade par justificâ la sospension dai dirits politics dai imputâts che, tal framieç, a jerin stâts elets intal Parlament catalan e ta chel spagnûl.

Paîs Catalans: i sindacâts no molin sul CAPES di catalan

I professôrs des scuelis secondariis de Catalogne dal Nord sot aministrazion francese a àn domandât al guvier di Parîs che al torni a meti in vore il certificât di idoneitât pal insegnament (CAPES) dal catalan che al è stât suspindût in Setembar. Il bloc des abilitazions al jere stât motivât dal ministeri francês pe educazion par vie che i professôrs in servizi a saressin za avonde par rispuindi aes dibisugnis dal teritori. No le pensin cussì i sindacâts CGT Education, Sud Education, SNES-FSU e APLEC che a ricuardin cemût che a sedin une disine i istitûts secondaris de Catalogne dal Nord là che il catalan nol è disponibil inte filiere bilengâl e nancje in forme opzionâl. A son ancjemò cuindis dîs par tornâ a ativâ i certificâts pal 2020 prime che la sospension e deventi definitive. I sindacâts a domandin duncje al ministeri di tornâ sui siei pas prime che al sedi masse tart.

Font: VilaWeb, 05/10/19

Aragon: cuintri dai atacs ae lenghe al nas Charramos Aragonés

Doi dîs dopo che, su propueste dai partîts de diestre spagnoliste (PP, Ciudadanos, Vox), la zonte comunâl di Uesca/Huesca vuidade dal PSOE e à decidût di tirâ vie i cartei che a devin il benvignût in citât par castilian e par aragonês, diviersis realtâts associativis e singui citadins si son dâts adun te plateforme Charramos Aragonés cun chê di difindi e di promovi cheste lenghe. Il gnûf sogjet, in plui di domandâ che i cartei a tornin là che a jerin, al sburte par che si dedi plui visibilitât al aragonês. Il rispiet de pluralitât linguistiche, in plui di jessi previodût de Cjarte europeane des lenghis, de normative statâl e di chê regjonâl, al jude la convivence dentri de comunitât locâl e al valorize la sô specificitât linguistiche. No si pues acetâ – a disin i rapresentants di Charramos Aragonés – che si dinei la esistence di cheste lenghe e di cui che le fevele; la vere vergogne – a zontin – e je chê di vergognâsi di vê une lenghe proprie divierse dal castilian.

Font: Heraldo de Aragón, 03/10/19

Ocitanie: disponibii gnûfs coretôrs ortografics par ocitan

Lis varietâts ocitanis de Vasconie e de Lenghedoc a àn cumò a disposizion dai coretôrs ortografics par Firefox, Chrome e LibreOffice. I programs a son stâts svilupâts dal Congrès Permanent de Lenghe Ocitane (CPLO) inte suaze di un progjet sostignût de euroregjon che e cjape dentri Gnove Aquitanie, Comunitât Autonome Basche e Navare e de fondazion basche Elhuyar. I coretôrs a permetin di controlâ la coretece ortografiche e di proponi des alternativis in câs di erôr cuant che si scrivin documents di test, e-mails o messaçs su lis rêts sociâls.

Font: Jornalet, 03/10/19

Gales: ancje Aberystwyth e Cardigan a pro de indipendence

Il consei comunâl di Aberystwyth al à votât a maiorance une mozion par poiâ la indipendence dal Gales. La citât universitarie e je cussì deventade la seconde par numar di residents a vê cjapât cheste decision (la prime e je Caerffili / Caerphilly). Dopo di une polse vie pal mês di Avost, cun Setembar si à tornade a inviâ framieç des aministrazions locâls la campagne a pro di un Gales indipendent e in dì di vuê a son sù par jù une trentine i conseis comunâi che a àn za votât a pro de indipendence. Pôc prime di Aberystwyth, une mozion di cheste fate e jere stade aprovade de assemblee comunâl di Blaenafon / Blaenavon (comun a maiorance laburiste) e cul prin di Otubar, ae liste dai comuns a pro de indipendence, si à zontât ancje Aberteifi / Cardigan.

Font: Nation Cymru, 01/10/19