16/04/21

Stât spagnûl: il CoE al vûl lis lenghis couficiâls te justizie

Il comitât di esperts dal Consei de Europe (CoE) che al viôt dal rispiet de Cjarte europeane des lenghis regjonâls o minoritariis al à domandât aes istituzions spagnolis di mendâ la leç organiche sul podê judiziari in maniere che, se lu domande une des parts in cause, si puedin doprâ tai procediments judiziaris lis lenghis ricognossudis come couficiâls. Il riferiment al è duncje al catalan in Catalogne, Paîs Valenzian e Baleârs, al basc inte Comunitât Autonome Basche e in Navare, e al galizian in Galizie. Vuê come vuê, ancje par vie che si va dilunc a no domandâi a magjistrâts e funzionaris dai tribunâi la cognossince di chestis lenghis, dispès i procediments a son fats dome par castilian o, al plui, cul ûs di interpretis se une des parts e reste ferme tal so dirit a doprâ la lenghe proprie. Il comitât al à ancje invidât il guvier di Madrid a garantî l’ûs des lenghis couficiâls intai uficis statâi che si cjatin intes Comunitâts cun lenghe proprie.

Font: EiTB, 01/04/21

Irlande: cence leç pe lenghe tal Nord pronts aes viis legâls

I acuardis di pâs pe Irlande dal Nord dal 2006 (Saint Andrews Agreement) a impegnavin il guvier britanic e chel nordirlandês par fâ buine une leç organiche pal gaelic irlandês. Intal Zenâr dal 2020 i partîts nordirlandês a vevin aderît a di un pat di legjislature (New Decade, New Approach) che al previodeve di imbastî une normative pal irlandês dentri di sîs mês e un percors temporâl precîs par rivâi dentri di 3 mês. In plui di no rispietâ i impegns e i timps che a jerin stâts concuardâts, a plui di un an di distance al pararès che l’esecutîf nordirlandês nol vedi fat pas indenant concrets par rivâ a di une strategjie pal irlandês. Par chest la organizazion pe lenghe Conradh na Gaeilge e à mandât al esecutîf une comunicazion uficiâl là che si lu informe che e je pronte a inviâ la strade judiziarie par risolvi la cuistion.

Font: CnaG, 31/03/21

Cornualie: pal CoE la politiche linguistiche e va devolude

Su la fonde dai controi fats intal Ream Unît su lis azions metudis in cjamp pe protezion de minorancis nazionâls, il Consei de Europe (CoE) al à invidât il guvier britanic a devolvi al Consei de Cornualie lis competencis su lis politichis linguistichis a pro dal cornic e a assegnâi lis risorsis che a coventin par chest fin. Il guvier di Londre al à ricognossût i cornics come minorance nazionâl intal 2014 cul impegn a garantîur lis misuris previodudis de Convenzion europeane pe protezion des minorancis nazionâls. Intai fats però, l’esecutîf britanic al à fat pôc e, ancje chel, cun discontinuitât. Baste pensâ che, se pe anualitât 2019-2020 al veve assegnât al Consei de Cornualie 150 mil sterlinis par promovi e sostignî la lenghe corniche, par chê 2020-2021 nol à previodût nancje un franc. Il Consei de Europe al à batût sul fat che la continuitât di finanziament e je fondamentâl pes politichis linguistichis e al à judicât che il sogjet che al à di planificâlis al à di jessi in Cornualie e no a Londre.

Font: Cornish Stuff, 31/03/21

Paîs Catalans: contribûts pai podcasts culturâi par catalan

Il guvier catalan (Generalitat de Catalunya) al à decidût di inviâ cul mês di Avrîl une gnove linie contributive. L’obietîf al è chel di judâ il disvilup e la continuitât di progjets di podcasts in lenghe catalane e ocitane aranese dedicâts a tematichis culturâls. Par chest fin a son stâts metûts fûr 120 mil euros che a coventaran sei par comprâ i imprescj tecnologjics che a coventin par creâ chestis produzions, sei par meti adun une stagjon formade di almancul dîs pontadis. Cundut che a son zaromai agns che a esistin, al è stât massime l’an passât che si à viodût un salt indenant inte creazion e te scolte dai podcasts. La gnove linie finanziarie e nas dal fat che si à viodût che no son tancj i podcasts par catalan leâts a temis culturâi e ancjemò di mancul chei par ocitan. Par incressi la disponibilitât di materiâi di cualitât in lenghe proprie di podê scoltâ, in Mai e sarà ativade ancje une linie di contribûts specifiche pai audiolibris.

Font: Generalitat de Catalunya, 31/03/21

Paîs Basc: euskara penalizât cu la “scuse” de pandemie

Il numar di segnalazions par chel che si riferìs ae violazion di dirits linguistics intal Paîs Basc al è cressût dal 66,7% di cuant che e je tacade la pandemie. Il dât al rive de informative anuâl presentade dal osservatori pai dirits linguistics Behatokia che juste ta chescj dîs al à presentât i risultâts des denunciis tiradis sù vie pal 2020. Lis aministrazions publichis, il setôr sanitari e il sisteme educatîf a son stâts chei che, plui di ducj, si son poiâts su la dibisugne di dâ informazions e rispuestis sveltis in timps di crisi sanitarie come justificazion par doprâ dome il castilian. Chest compuartament al à metût in evidence dôs criticitâts che no son stadis inmò superadis: la prime e je che lis autoritâts a van dilunc a calcolâ il castilian come lenghe par gjestî lis cuistions “impuartantis” e la seconde e je che lis personis che a fevelin par basc a vegnin tratadis come citadins di seconde categorie.

Font: Noticias de Navarra, 30/03/21

Paîs Basc: la Korrika si le fasarà tal 2022

La vincjedoiesime edizion de Korrika, la corse inmaneade ogni doi agns par cjapâ sù fonts pe promozion e pal insegnament de lenghe basche e par slargjâ il so ûs inte societât, e varès vût di davuelzisi vie pal mês di Març di chest an ma, par vie de crisi sanitarie, e à vût di jessi spostade al 2022. A comunicâlu al è stât l’ent organizadôr AEK (Coordenament pe Alfabetizazion e pe Baschizazion) che al à fat savê che la manifestazion si davuelzarà dai 31 di Març ai 10 di Avrîl di chest an che al ven. Chel istès, ai 28 di Març, zornade che e varès vût di sierâsi cheste edizion de Korrika, miârs di personis a àn aderît a iniziativis che si son tignudis in otante localitâts diviersis dal Paîs Basc par manifestâ la lôr poie ae corse e aes sôs finalitâts.

Font: EiTB, 28/03/21

Stât francês: si slargje ae Corsiche la rêt Eskolim

La assemblee anuâl di ESKOLIM – la associazion che e met adun lis scuelis imersivis parificadis che a operin intal stât francês – si è tignude ai 27 di Març in Corsiche. Cun di fat, la novitât di chest an e je che la rêt – che za e cjape dentri lis Diwan bretonis, lis Ikastolas baschis, lis Bressolas catalanis, lis Calandretas ocitanis e lis ABCM alsazianis – si slargje ancje a Scola Corsa, la gnove realtât di insegnament a imersion che e varès di partî cul prossim an scolastic a Bastia e a Biguglia. ESKOLIM e je nassude tal 2009 e, in dì di vuê, e rapresente une rêt educative formade di 15 mil students, 600 insegnants e 200 istitûts.

Font: Corse Net Infos, 27/03/21

Corsiche: proteste dai students pe politiche linguicide di Parîs

Ai 25 di Març grups di students a àn manifestât fûr dai istitûts secondaris de Corsiche cuintri di chê che e ven definide la “politiche linguicide” dal guvier francês. A inmaneâ la proteste al è stât il grup U Cullittivu – I Liceani Corsi che al à fat il pont su la situazion de lenghe proprie tal sisteme scolastic de isule. Juste par fâ doi esemplis: la ultime convenzion plurienâl tra stât centrâl e autoritâts locâls al previodeve di rivâ dentri di chest an al 20% di insegnament bilengâl ma, te realtât, si è sì e no al 2%; la riforme des superiôrs volude dal ministri Jean-Michel Blanquer e à invezit penalizât la sielte des lenghis locâls al pont che, i ultins dâts, a fevelin di une opzion pal cors fate a pene dal 0,01% dai students.

Font: France3 Regions, 25/03/21

Scozie: stampon di leç par tornâ a votâ su la indipendence

Il guvier scozês al à dade fûr la propueste di leç par un secont referendum su la indipendence. Il test al rivarà al esam dal Parlament dentri de prime metât de prossime legjislature ma dome se i indipendentiscj dal SNP, che a son cumò al guvier, a tornaran a vê la maiorance tes elezions in program intal mês di Mai. Chê di un altri referendum e je une propueste che e cjate cuintri sei i partîts unioniscj britanics (Laburiscj, Liberâi Democratics e Conservadôr) che l’esecutîf di Londre. Tal 2014 i “no” a di une Scozie indipendente a jerin stâts il 55% ma, in dì di vuê, a son doi argoments in plui a pro de indipendence, ven a dî la Brexit cui siei efiets, e ducj i impegns cjapâts dal front unionist par convinci i scozês a restâ tal Ream Unît che no son stâts mantignûts.

Font: BBC, 22/03/21

Gales: dal censiment gjenerâl une menace pe lenghe

La organizazion pe lenghe Cymdeithas yr Iaith e à domandât a ducj chei che a fevelin par galês, ancje chei che a stimin di no vê une paronance buine de lenghe, di rispuindi in maniere positive aes domandis su la lôr competence linguistiche che si cjatin intal censiment gjenerâl britanic dal 2021. Tal câs dal inglês, si à dome une domande su la capacitât di comunicâ ta cheste lenghe, ma tal câs dal galês lis domandis a son cuatri e si riferissin ae capacitât di fevelâ, di scrivi, di lei e di capî. Pe Cymdeithas cheste diference e je strumentâl e e ponte a fâ jeve su la malsigurece che i galês a àn intal fevelâ e soredut intal scrivi ben la lôr lenghe proprie. Di chi l’invît a rispuindi di vê competence linguistiche in ducj i cuatri cjamps, par evitâ che i risultâts a puedin po jessi strumentalizâts par menaçâ i dirits linguistics dai galês.

Font: Nation Cymru, 16/03/21

26/03/21

Gales: sucès comerciâl par un videozûc par galês

Il videozûc par galês “Maid of Sker” al à passât il milion di downloads e al è deventât aromai un sucès comerciâl a nivel internazionâl. Nassût e disvilupât de societât Wales Interactive vie pal 2020, al è ispirât al folclôr galês, al è ambientât sul finî dal secul XIX e al cjape sù il non di une balade popolâr. Il zûc al è stât premiât intant de ultime edizion dai TIGA (o sei i Oscars dai videozûcs) e al è considerât de critiche un dai miôr zûcs di sorevivence di gjenar horror. In fase di disvilup, la sô cualitât, la sô origjinalitât e il so leam cul patrimoni culturâl e linguistic locâl i àn garantît ancje un finanziament comunitari. Cumò, dopo dai sucès di critiche, al è rivât ancje chel comerciâl.

Font: Nation Cymru, 19/03/21

Scozie: gnovis risorsis par sburtâ l’ûs comunitari dal gaelic

Il Bord na Gàidhlig, la agjenzie pe lenghe gaeliche scozese, al à decidût di assegnâ 212 mil sterlinis a trê realtâts che a operin intes Ebridis e ta chês altris isulis ocidentâls par assumi dai operadôrs che a lavorin dentri des comunitâts locâls cun chê di incressi, massime framieç dai zovins, lis ocasions par doprâ la lenghe proprie e par sburtâ il so ûs dentri des fameis intun moment là che la crisi sanitarie e limite lis ocasions di socializazion e lis ativitâts intes scuelis a imersion. Altris 154 mil sterlinis a laran intes isulis e tes areis plui ocidentâls des Highlands là che il gaelic al è ancjemò doprât come lenghe di comunitât par infuartî i plans linguistics par sburtâ l’aprendiment, la promozion e l’ûs de lenghe proprie.

Font: Bòrd na Gàidhlig, 18/03/21

Europe: apel de EFA cuintri de ilegalizazion dal HDP

Dopo agns di repression che a àn puartât centenârs di siei rapresentants a jessi arestâts e impresonâts, cumò la procure di stât turche e à imbastît une cause par meti fûr leç il Partît Democratic dal Popul (HDP), moviment che al racuei une part significative dai vôts de comunitât curde e dai progressiscj turcs. La acuse e je simpri la stesse doprade par impresonâ i siei dirigjents e i siei militants, o sei chê di jessi leâts al Partît dai Lavoradôrs dal Kurdistan (PKK) di agns in armis cuintri de opression de popolazion curde. Denant di cheste situazion la Aleance Libare Europeane (EFA) – organizazion politiche internazionâl che e met adun cetancj partîts nazionalitaris dal continent – e à indreçât un apel aes autoritâts de UE par che a doprin ducj i lôr podês e la lôr influence par sigurâ la difese dai dirits politics e associatîfs in Turchie, stât a dilunc candidât a jentrâ te Union e membri dal Consei de Europe. Ancje il grup di amicizie curde dal Parlament european al è intervignût par condanâ il tentatîf di ilegalizâ il HDP e par invidâ lis istituzions comunitariis a dâsi une mote. Cheste azion – a disin – no je dome antidemocratiche e ilegâl ma e rapresente il pas finâl in direzion di une ditature.

Font: EFA, 18/03/21

Irlande: sentence a pro dal gaelic te cort di justizie europeane

Il tribunâl di justizie european (ECJ) al à dât reson a di un citadin irlandês che al pretindeve il rispiet de normative che e previôt che lis etichetis e i sfueis informatîfs dai prodots veterinaris vendûts inte Republiche di Irlande a sedin intes dôs lenghis uficiâls, duncje no dome par inglês ma ancje par gaelic. Il procediment judiziari si veve inviât ancjemò tal 2016 denant de cort supreme irlandese. Un gnûf regolament comunitari che al jentrarà in vore cul Zenâr di chest an che al ven al podarès cambiâ la situazion lassant che al sedi il guvier statâl a decidi se doprâ une lenghe o chê altre. Par intant però, ancje in gracie di cheste sentence, al reste l’oblic dal bilinguisim e lis organizazions pe lenghe irlandese a sburtin su lis istituzions di Dublin par che a mantegnin dutis e dôs lis lenghis ancje dopo che al jentrarà in vore il gnûf regolament european.

Font: RTE, 18/03/21

Stât francês: poie plene des Regjons ae propueste di leç “Molac”

I presidents des Regjons aministrativis di Alvernie – Rhône – Alps, Borgogne – Francje Contee, Bretagne, Centri – Val de Loire, Corsiche, Gnove Aquitanie, Grant Est, Hauts de France, Île de France, Normandie, Ocitanie, Paîs de Loire e Sud a àn sotscrit un document unitari dulà che a invidin i grups parlamentârs de Assemblee francese a sostignî cun decision e in maniere trasversâl la propueste di leç su lis cussì clamadis “lenghis regjonâls” fate indenant dal deputât breton Paul Molac. Dopo di une prime aprovazion intal Fevrâr dal 2020, il test al tornarà denant de Assemblee in seconde leture ai 8 di Avrîl. La version che la aule e varà di votâ e je jessude infuartide dal Senât là che a son stadis recuperadis diviersis parts dal test origjinari che a jerin stadis boçadis e, in particolâr, la part de propueste di leç dedicade ae istruzion. I tredis presidents a ricuardin che lis “lenghis regjonâls” a son ricognossudis de Costituzion francese come part dal patrimoni de Republiche, a son une ricjece coletive e a contribuissin ae identitât e ae vitalitât dai teritoris. La propueste di leç Molac – a disin – e va te direzion juste e par chest a domandin ai deputâts di fâle buine te forme jessude dal Senât.

Font: Régions de France, 16/03/21

Bretagne: la Redadeg si corarà chest an in Mai

Rinviade l’an passât par vie de crisi sanitarie, la Redadeg la corse bienâl pe lenghe bretone – si davuelzarà dai 21 ai 29 di Mai di chest an. I organizadôrs a àn stimât che nol fos pussibil di anulâle o di rinviâle un altri viaç. La racuelte di fonts che le compagne e je di fat fondamentâl par diviersis ativitâts. La corse e scjavaçarà la Bretagne par 2.020 chilometris di Karaez / Carhaix a Gwengamp / Guingamp. I chilometris a son comprâts di associazions, impresis o citadins che cussì a contribuissin a tirâ sù fonts che a van po a finanziâ la rêt scolastiche Diwan o altris progjets pe lenghe bretone. Tal 2018, cuant che si veve davuelte la edizion precedente, a jerin stâts racuelts 167 mil euros. Par resons di sigurece il testemoni (bazh test), che al è un dai simbui de manifestazion, nol sarà passât di man in man intant de corse ma le compagnarà, ben in evidence, sul camion di servizi de organizazion.

Font: France Bleu, 15/03/21

Bretagne: in 5 mil in place a Kemper pes lenghis propriis

A jerin uns 5 mil lis personis che, cundut des limitazions in at par vie de pandemie, si son dadis adun in place ai 13 di Març a Kemper / Quimper, in Bretagne, par manifestâ cuintri dal bloc de gnove convenzion tra stât e regjon su lis cussì clamadis lenghis regjonâls che al pidimente lis ativitâts a pro dal breton inte scuele, tai mieçs di comunicazion, intes aministrazions publichis e te culture. La mancjade firme dal acuardi de bande dal guvier di Parîs e colpìs ancje lis iniziativis a pro dal galò, la varietât neolatine fevelade te part orientâl de Bretagne. Daûr dal strisson «Unîts pe lenghe bretone» (Unanet evit ar brezhoneg) si son cjatâts rapresentants de regjon (a partî dal president Loïg Chesnais-Girard), dai dipartiments, dai comuns e cetancj citadins. La iniziative e je stade clamade adun des trê rêts pal insegnament dal breton (Diwan, Div Yezh e Divaskell) e di diviersis associazions impegnadis pe lenghe proprie.

Font: Ouest France, 13/03/21

Paîs Catalans: Escola Valenciana e vûl plui dal 50% di catalan

Intun document dât fûr ai 11 di Març, Escola Valenciana e à invidât il guvier de Comunitât Autonome a garantî che tai istitûts secondaris dal Paîs Valenzian lis oris di insegnament a sedin almancul al 50% par catalan. Cun di fat, intal an scolastic 2021 – 2022 si tacarà a meti in vore ancje tes secondariis la leç sul plurilinguisim che e previôt un minim dal 25% di oris di insegnament par castilian, dal 25% par catalan e dal 15% par inglês. Par rivâ ai obietîfs che si propon la leç, ven a dî garantî che ae fin dal lôr percors scolastic i students a vedin lis stessis competencis par castilian e par catalan, la organizazion e calcole che il catalan al vedi di jessi doprât almancul par metât des oris di insegnament. E je fuarte in particolâr la pôre che cul passaç des primariis aes secondariis tancj students si cjatin denant di une riduzion des oris in lenghe proprie. Une vore plui dure la posizion di altris realtâts tant che Plataforma per la Llengua, Decidim, Bloc d’Estudiants Agermanats, SEPC e A Contra Corrent che a domandin di riformâ in maniere radicâl la leç par evitâ la discriminazion dai istitûts là che l’insegnament dal catalan al è maioritari e par garantî une vere normalizazion linguistiche.

Font: Levante EMV, 12/03/21

Cornualie: invît a declarâsi cornics tal prossim censiment

Il Consei de Cornualie al à invidât i citadins a declarâsi di nazionalitât corniche tal censiment gjenerâl che si fasarà tal Ream Unît inta chest 2021. Inte part dal formulari dedicade ae partignince identitarie no si à une vôs specifiche pe nazionalitât corniche ma si pues indicâle inte vôs “altri”. No si trate dome di contâsi – al à spiegât il president dal Consei, Julian German – ma ancje di pesâ po su la planificazion dai servizis e dai finanziaments pe Cornualie. L’istitût statâl di statistiche (ONS) al à fat savê che pe prime volte al metarà adun ancje un rapuart specific dedicât aes carateristichis sociâls de comunitât che si ricognòs come corniche. Tal censiment dal 2001 si vevin identificâts come cornics in 37 mil, ta chel dal 2011 a jerin za plui di 80 mil e si stime che, cul cressi de cussience identitarie, chest an la cifre e puedi cressi ancjemò. Il censiment al à ancje une vôs su lis lenghis là che si pues indicâ il cornic come lenghe proprie.

Font: BBC, 12/03/21

Spagne: fate buine une part de PNL pe avualiance linguistiche

Il Parlament spagnûl al à fate buine, ma dome in forme parziâl, une propueste no di leç (PNL) pe avualiance linguistiche presentade de coalizion de çampe indipendentiste basche EH Bildu cu la poie di altris partîts nazionalitaris bascs, catalans e galizians (JxCat, CUP, ERC, PDCAT, Compromís, PNV e BNG) e de çampe spagnole (Podemos e Más País). La iniziative e cjapave spont dal manifest «Libertât, avualiance, democrazie» fat indenant intal Fevrâr dal an passât des organizazions principâls impegnadis pai dirits linguistics (Ómnium Cultural, Plataforma per la Llengua, Acció Cultural del País Valenciá, Obra Cultural Balear, CIEMEN, Kontseilua, A Mesa pola Normalización Lingüística, Iniciativa pel Asturianu e Nogará) che si son cjatadis cui parlamentârs favorevui al test ae vilie dal vôt. A jessi aprovâts a son stâts dome i contignûts de propueste che a àn vût ancje la poie dal PSOE. A passâ, par esempli, al è stât l’impegn a favorî la riforme dai Statûts di autonomie par rivâ a ricognossi la uficialitât des lenghis propriis in ducj i teritoris là che a son feveladis, come il basc in ciertis parts de Navare o il galizian intes Asturiis e in Castilie León, o di chês che ancjemò no àn chest status, tant che asturian e aragonês. Il Parlament spagnûl al à dite di sì ancje al ûs di chestis lenghis tes aministrazions locâls che fin cumò, par diviersis resons, no garantivin chest dirit. Boçade invezit la domande che i funzionaris statâi in servizi tai teritoris cun lenghe proprie a vedin di cognossi chestis lenghis. Nuie ce fâ nancje par meti fin ae imposizion dal castilian inte normative statâl e garantî la plene avualiance linguistiche.

Font: EiTB, 09-11/03/21; Consello da Cultura Galega, 12/03/21