Bretagne: inviadis 11 gnovis filieris scolastichis bilengâls

Cu la partence dal gnûf an scolastic si àn inviadis 11 gnovis filieris di insegnament bilengâl intes scuelis de Bretagne. A son centradis intal distret scolastic di Roazhon / Rennes par vie che lis propuestis di vierzidure fatis indenant inta chel di Naoned / Nantes no àn cjatât il bon acet dal ministeri francês pe educazion. Al è il setim an di file che, cul inviâsi dal an scolastic, a partissin almancul une disine di percors bilengâi gnûfs. Nûf des vierziduris a interessin la rêt publiche, dôs lis scuelis confessionâls convenzionadis. No ‘nd è nissune invezit tra lis scuelis imersivis Diwan.

Font: Ofis Publik ar Brezhoneg, 01/09/22

Stât francês: al cres il numar dai deputâts nazionalitaris

I risultâts dal secont turni des elezions legjislativis francesis che si à tignût ai 19 di Jugn al à permetût di incressi la presince di deputâts espression di moviments politics nazionalitariis. Inte Assemblee francese a son stâts confermâts ducj e cuatri i parlamentârs in scjadince che si presentavin sot de aleance Régions et Peuples Solidaires (R&PS) o sei Jean-Félix Acquaviva e Michel Castellani di Femu a Corsica, Paul-André Colombani dal Partitu di a Nazione Corsa, e ancje Paul Molac che te legjislature stade al jere stât elet intes filis dal partît dal president francês Macron ma che cheste volte al à sielzût di presentâsi come candidât autonomist breton. Al è po di zontâ che, par un pêl, i nazionaliscj cors no àn otignût cuatri circoscrizions su cuatri: te cuarte, di fat, la candidature nazionaliste e à pierdût juste par 800 vôts. Plui in gjenerâl, framieç des filis che Parîs e etichete come “regjonaliscj”, i elets a son stâts in dut dîs. Chei altris sîs a rivin di fat dai teritoris che il stât francês al à in altris continents, un inte Guiane, doi in Martiniche e trê te cussì clamade Polinesie francese, là che trê elets su trê a partegnin al moviment indipendentist.  

Font: RPS, 20/06/22

Stât francês: 93 candidâts de rêt R&PS intes legjislativis

Ai 12 e ai 19 di Jugn la Republiche francese e je interessade des elezions legjislativis che a decidaran la composizion dal Parlament. In corse a son ancje disinis di candidât espression dai moviments politics rapresentatîfs des comunitâts minorizadis cjapadis dentri dai confins statâi. La plui part si le cjate tes filis de rêt Régions et Peuples Solidaires (R&PS) che ta chestis elezions e presente 93 candidâts che a rivin di Alsazie e Lorene, Bretagne, Corsiche, Francje Contee, Ocitanie, Paîs Basc setentrionâl e Paîs Catalans. Rispiet aes legjislativis stadis la coalizion nazionalitarie e à rivât a proponi un 8% in plui di candidâts. I contignûts de lôr propueste si ju cjate tal “Manifest par une Republiche Federâl”. Inte Assemblee in scjadince a jerin cuatri i parlamentârs espression di cheste aleance, trê cors (Jean-Félix Acquaviva, Michel Castellani e Paul-André Colombani) e un breton (Paul Molac).

Font: R&PS, 31/05/22

Stât francês: pas indenant pe formazion dai insegnants

L’istitût superiôr des lenghis de Republiche francese (ISLRF) e la rêt dai istitûts superiôrs dal insegnament e de educazion (INSPE) a àn sotscrit une convenzion cuadri pe formazion dai insegnants des scuelis a imersion là che si doprin lenghis minorizadis. L’acuardi al rivuarde lis lenghis di sîs comunitâts minorizadis cjapadis dentri tal stât francês o sei il basc (rêt des scuelis imersivis Seaska), il breton (Diwan), il catalan (Bressola), il cors (Scola Corsa), l’ocitan (Calandreta) e il todesc de Alsazie (ABCM-Zweisprachigkeit). La convenzion e rapresente un pas indenant impuartant pe formazion dal personâl che al dopre chestis lenghis intes scuelis a imersion.

Font: Jornalet, 23/05/22

Bretagne: breton e galò inte Assemblee regjonâl

A partî de riunion che si à tignude ai 7 di Avrîl i membris de Assemblee regjonâl de Bretagne a àn podût intervignî par breton e par galò (la varietât romanze fevelade te part orientâl de Bretagne) cu la garanzie di une traduzion simultanie par francês sei pai coleghis in aule che par cui che al seguìs la direte des riunions sul sît e su lis rêts sociâls de Assemblee. La pussibilitât di esprimisi in lenghe proprie e jere za permetude ma cui che lu faseve al jere obleât a fâ lui stes la traduzion par francês subite dopo e cence doprâ plui timp di chel previodût par ogni intervent, smiezant cussì il spazi reâl a disposizion. La gnove e je stade duncje cjapade cun sodisfazion dai conseîrs che a fevelin par breton e par galò che, in dì di vuê, a son une disine sui 83 membris de Assemblee.

Font: 20minutes, 07/04/22

Bretagne: contrat stât–regjon al esam de Assemblee locâl

Ai 24, 25 e 26 di Fevrâr il Consei de regjon aministrative bretone al è clamât a fâ bon il contrat di plan stât – regjon (CPER) pai agns 2021 - 2027, il belanç pal 2022 e la convenzion su lis lenghis de Bretagne. Si trate, massime tal prin e tal ultin câs, di imprescj di fonde pe planificazion des liniis di azion e des risorsis disponibilis de politiche regjonâl pai prossims agns. Il contrat al à une disponibilitât complessive di passe 970 milions di euros che a valin ancje tant che cofinanziament par atirâ altris risorsis di divignince comunitarie. La aree di invistiment plui impuartante e je chê dal insegnament superiôr, de ricercje e de inovazion che, di bessôl, al passe i 400 milions di euros. Il contrat al è però centrâl ancje par definî obietîfs e risorsis par garantî un slargjament dal insegnament de lenghe bretone. Il test al è stât presentât ae stampe come za definitîf; pai partîts di oposizion chest al disvuede ogni autoritât dal Consei regjonâl. Il grup Breizh a-gleiz – Autonomie, écologie, territoires – che al met adun i elets autonomiscj e nazionalitaris – al lamente la pierdite progressive dal valôr strategjic dal contrat e al segnale che la cifre e ten dentri sei credits riciclâts, sei elements di finanziament ordenaris e duncje, tai fats, i fonts in plui metûts dal stât centrâl a son pôc plui che fruçons.

Font: ABP, 18/02/22

Stât francês: Pays Unis, aleance regjonaliste-nazionaliste

Sabide ai 15 di Zenâr e je stade presentade al public la gnove plateforme politiche Pays Unis, che si propon di rapresentâ tes prossimis elezions legjislativis francesis dal Jugn dal 2022 la posizion di un trop di moviments di stamp nazionalist o regjonalist. A cheste coalizion a àn aderît par cumò il Parti Breton / Strollad Breizh, il Partît Nazionalist Basc (EAJ-PNB), il Parti Lorrain, Prouvencio Nacioun e Bastir Occitanie. O ricuardìn che, dongje di cheste gnove plateforme, e esist za di agns la Federazion des Regjons e dai Popui Solidaris (RPS) che e ten adun une buine part dai moviments nazionalitaris e autonomiscj che a operin intal stât francês.

Font: Agence Bretagne Presse, 16/01/22

Stât francês: il ministeri al autorize la imersion linguistiche

Ai 16 di Dicembar il ministeri francês pe educazion al à publicât une circolâr là che si declare che l’insegnament des lenghis minorizadis nol va cuintri de sentence de cort costituzionâl che, cul boçâ l’articul de cussì clamade leç Molac (leç organiche su la valorizazion e la promozion des lenghis minorizadis) che al permeteve il model a imersion dentri dal sisteme scolastic public, e meteve a risi la continuazion di chest model di insegnament. Il test al fisse obietîfs, cundizions e limits dal model a imersion. Il ministeri si impegne a sostignî la promozion e la difese des lenghis minorizadis inte scuele pûr che, ae fin dal percors educatîf, i students a dimostrin il stes nivel di cognossince de lenghe francese e di chê minorizade. Il timp dedicât a ogni lenghe al podarà cambiâ daûr des necessitâts o dal progjet educatîf di ogni istitût. Ta cheste suaze, il model imersîf al devente duncje une strategjie pussibile parcè che al permet chest risultât e si adate a chest implant organizatîf. Une altre cundizion fissade e je che il model a imersion al sedi opzionâl e che i gjenitôrs a dedin un consens informât pe iscrizion dai lôr fîs ai istitûts che lu ufrissin. La circolâr e autorize ancje a tignî une part dai esams finâi inte lenghe minorizade, ancje se no specifiche par cualis materiis. La gnove e je stade cjapade cun sodisfazion des organizazions impegnadis pes lenghis minorizadis che ta chescj mês a jerin stadis protagonistis di cetantis mobilitazions cuintri dal atac puartât al insegnament imersîf ancje se a stimin che, in ogni câs, la uniche strade par meti in sigurece chest risultât e sedi chê di une riforme costituzionâl.

Font: VilaWeb, 16/12/21; EiTB, 16/12/21

Bretagne: si domande un plan urgjent pe lenghe proprie

Lis trê rêts pal insegnament de lenghe bretone – Diwan, Div Yezh e Divaskell –, la organizazion Kelennomp! e il coordenament des associazions culturâls Kevre Breizh a àn dât fûr un comunicât unitari là che a domandin un plan urgjent pe lenghe proprie. In dì di vuê la spese pe lenghe e rapresente il 0,5% dal belanç anuâl de regjon aministrative Bretagne. Dut câs – a disin lis organizazions firmatariis – par tutelâ e rilançâ il breton al covente un invistiment che al sedi almancul il dopli di chel atuâl. Pal 2022 a domandin duncje une integrazion finanziarie di no mancul di 4 milions di euros. Ancje il stât però al à di fâ la sô part e, par chest, si domande che te gnove convenzion stât – regjon si definissin in maniere clare obietîfs e risorsis par garantî un slargjament dal insegnament de lenghe bretone. Par mantignî il numar atuâl di personis buinis di fevelâ par breton – a zontin – si à di rivâ almancul a 50 mil students che a frecuentin la filiere scolastiche bilengâl.

Font: Kelennomp!, 16/12/21

Stât francês: Castex al promet di difindi il model imersîf

Ai 15 di Setembar il prin ministri francês Jean Castex, intune cul ministri pe educazion Jean-Michel Blanquer e cui deputâts Yannick Kerlogot e Christophe Euzet (autôrs di un rapuart sul insegnament des lenghis minorizadis), si à cjatât in videoconference cui rapresentants dai diviers uficis publics pes lenghis minorizadis e des rêts scolastichis di insegnament imersîf. L’incuintri al veve propit chê di fâ il pont su chest sisteme di insegnament dopo che la cort costituzionâl francese lu à declarât contrari ae Costituzion republicane. Pal prin ministri l’insegnament imersîf al è necessari pes lenghis minorizadis e si à impegnât a dâ fûr in curt une circolâr là che si fissin i elements par garantî la sô continuazion. Al à ancje fat savê che si metarà sù un organisim di conciertazion interministeriâl permanent su lis lenghis minorizadis dipendent in maniere direte dal so ufici par frontâ cun regolaritât chest teme. I impegns di Castex a àn cuietât un tic la clime ma, prime di declarâsi sodisfats, i rapresentants des rêts scolastichis a imersion a spietin di viodi i contignûts de circolâr. No sin disponibii – a disin – a fâ nissun pas indaûr rispiet al sisteme di insegnament doprât inta chescj agns.

Font: France3 Bretagne, 15/09/21; Le Telegramme, 15/09/21; VilaWeb, 16/09/21

Bretagne: viert il secont liceu de rêt a imersion Diwan

Cui 2 di Setembar al à scomençât la sô ativitât il liceu Diwan di Gwened / Vannes. Si trate dal prin istitût secondari di secont grât a imersion dal Morbihan e il secont de Bretagne, dopo di chel di Karaez / Carhaix. La scuele, screade dopo vot mês di lavôrs finanziâts de aministrazion regjonâl, i da acet a 200 students, 27 liceâi e 173 students des secondariis di prin grât (collège). La vierzidure e permet di rispuindi, almancul in part, ae incressite de domande di istruzion in lenghe bretone che si à vude tai ultins agns.

Font: Le Telegramme, 01/09/21

Stât francês: rûl atîf di RPS tes elezions dal 2022

La aleance Régions et Peuples Solidaires, che e met adun i principâi moviments autonomiscj e nazionalitaris dal stât francês, e à fat savê che e parteciparà in maniere ative aes elezions presidenziâls e legjislativis dal 2022. Cundut che la plateforme programatiche e sarà definide chest Autun, a son za stadis anticipadis un pocjis des liniis di azions principâls. Par esempli si puartarà al centri des presidenziâls il teme de revision costituzionâl par mendâ chês parts che a inibissin il rispiet de diversitât linguistiche. Cun di plui si vûl riviodi i confins des regjons aministrativis che, cussì cemût che a son in dì di vuê, no garantissin la integritât teritoriâl di Alsazie, Bretagne, Catalogne Nord, Ocitanie, Paîs Basc setentrionâl e Savoie. Un altri pont su la taule al è chel dal dialic politic jenfri guvier centrâl e istituzions corsis par assegnâ ae isule un vêr statût di autonomie.

Font: Fédération RPS, 01/09/21