Paîs Catalans: si inviin i procès cuintri dal indipendentisim

Ai 12 di Fevrâr, denant dal tribunâl suprem spagnûl, si à inviât il procès cuintri dai dirigjents indipendentiscj catalans. Sot acuse pai reâts di ribelion e di malversazion a son Oriol Junqueras, Joaquim Forn, Jordi Turull, Raül Romeva, Dolors Bassa e Josep Rull, ducj membris dal guvier catalan in cjarie tal moment dal referendum su la indipendence. Sot procès par ribelion a son invezit Carme Forcadell, che e jere presidente dal Parlament catalan, Jordi Sànchez, in chê volte president de ANC, e Jordi Cuixart, president dal Òmnium Cultural. Altris membris dal esecutîf catalan – Meritxell Borràs, Carles Mundó e Santi Vila – a son clamâts a rispuindi par disubidience e malversazion. A di un pôcs dai membris de presidence dal Parlament catalan – Lluís Coromina, Lluís Guinó, Anna Simó, Ramona Barrufet e Joan Josep Nuet – e ae ex deputade de CUP Mireia Boya ur ven invezit contestât “dome” il reât di disubidience. Il prin di Fevrâr, intant che i acusâts a vignivin trasferîts des presons catalanis a chês di Madrid, i judiçs a vevin confermât la date di partence dal procès e la liste dai testemonis ametûts. Ta chê stesse zornade i magjistrâts a vevin ancje fat savê che no saressin stâts ametûts in aule osservadôrs internazionâi cemût che a vevin domandât diviersis organizazions pai dirits umans. Pai dirigjents indipendentiscj che si cjatin cumò in esili in Belgjiche, in Svuizare o in Scozie si à decidût di procedi cuntun procès separât rinviât a cuant che, se mai, si rivarà a otignî la lôr estradizion.

Scozie: servizis gnûfs par svicinâ il gaelic ai zovins

La agjenzie Young Scot e à decidût di ufrî gnûfs servizis in lenghe gaeliche scozese pai zovins. In particolâr a saran metûts a disposizion ancje ta cheste lenghe i materiâi e i servizis di consulence in vore par temis tant che la sigurece su Internet, lis problematichis leadis ae pubertât o la gjestion economiche. L’intindiment al è chel di ufrî spazis simpri plui larcs là che lis fantatis e i fantats che a fevelin par gaelic a puedin doprâ la lôr lenghe proprie. Young Scot e à ancje sotscrit un acuardi cu la cjadene Acair par garantî sconts dal 10% su ducj i libris e i materiâi educatîfs par gaelic, par scots o bilengâi ai passe 600 mil possessôrs de cjarte dai servizis pai zovins.

Font: Lancashire Telegraph, 08/02/19

Corsiche: Parlemu Corsu in difese dal insegnament dal cors

Ai 5 di Fevrâr un grup di students dal coletîf Parlemu Corsu al à inmaneât un presidi denant dal retorât di Aiacciu / Ajaccio par domandâ che lis istituzions francesis a rispietin i impegns previodûts dal plan “Lingua 2020” fat bon de Assemblee corse e che cumò a son menaçâts de riforme previodude a nivel statâl pai istitûts secondaris. In particolâr si domande che lis trê oris di insegnament de lenghe corse a sedin slargjadis a dutis lis scuelis superiôrs de isule e a sedin calcoladis intal trop des oris obligatoriis previodudis de riforme. Il coletîf al bat po par che si siguri la continuitât de filiere bilengâl dilunc vie di dut il percors di studis, de scuele de infanzie fintremai la universitât. Parlemu Corsu al conteste però ancje i elets de Assemblee corse judicâts pôc atents e pôc combatîfs su chescj temis.

Font: Alta Frequenza, 07/02/19; Corse Matin, 07/02/19

Galizie: rapuart di A Mesa su la violazion dai dirits linguistics

Ai 5 di Fevrâr la organizazion galiziane A Mesa pola Normalización Lingüistica, intune cul Observatorio de Dereitos Lingüísticos, e à presentât il rapuart su lis segnalazions racueltis vie pal 2018 de Liña do Galego, il servizi creât par cjapâ sù lis denunciis su la violazion dai dirits linguistics. L’an passât a son stadis 303 lis segnalazions rivadis e 29 lis consultazions domandadis. Il 46% di chestis denunciis si riferìs al compuartament des aministrazions publichis, un dât alt che al dipent ancje dal fat che i citadins a son plui cussients dai dirits che a gjoldin intal setôr aministratîf. Plui in gjenerâl, il 30% des segnalazions al diven de esclusion de lenghe o di discriminazions intal ûs dal galizian, il 22% dal ûs no coret dai toponims, il 18% dal refût di dâ rispuestis orâls o scritis par galizian. In ocasion de presentazion dal rapuart si à ancje riferît sui câs denunciâts intai agns stâts e che, propit in gracie de visibilitât dade aes segnalazions dai citadins, a son stâts comedâts daûr di ce che e previôt la normative.

Font: A Mesa, 05/02/19

Gales: pas indaûr dal guvier sul inglês curicolâr za a 3 agns

La gnove che l’inglês al sarès deventâ materie obligatorie dai trê agns indenant ancje tes scuelis de infanzie in lenghe galese e à fat saltâ sù il sindacât dai insegnants galês (UCAC), lis fameis e lis organizazions pe lenghe. La reazion e je stade cussì dure e largje che il guvier dal Gales – che al veve fat indenant la propueste tal so progjet di riforme dal curriculum pes scuelis – al à vût di fâ un pas indaûr e spiegâ che il test rindût public nol spielave i siei intindiments. L’esecutîf al à fat savê che tes scuelis de infanzie a imersion si larà dilunc a doprâ dome il galês e che l’inglês, compagn di ce che al sucêt cumò, al jentrarà in maniere graduâl intai istitûts cul galês veicolâr dome a partî dai siet agns. Pe segretarie gjenerâl dal sindacât dai insegnants, Rebecca Williams, la rispueste unanime dai gjenitôrs e à palesât il valôr dal model cumò in vore ma e ancje ricuardât la impuartance di tignî controlât ce che si môf sul plan politic e aministratîf. Il pas indaûr dal guvier al è stât cjapât cun sodisfazion dal partît nazionalitari Plaid Cymru che però al à ancje marcât la preocupazion pe scjarse competence e pai niçulaments mostrâts dal esecutîf sul plan des politichis linguistichis.

Font: BBC, 04/02/19

Irlande: gnove edizion di #TrasnaNadTonnta

Tra i 4 e i 8 di Fevrâr si à tignude la gnove edizion de iniziative Trasna na dTonnta inviade de fondazion de Ireland Canada University cun chê di stiçâ l’ûs de lenghe irlandese tes gnovis tecnologjiis. Di là dai stâts là che a son a stâ, par mieç di messaçs su Twitter, si ponte a creâ une comunitât virtuâl e globâl des personis in stât di doprâ la lenghe irlandese. Miârs di vuits (tweets) mandâts di disinis di paîs diferents cul hashtag #TrasnaNadTonnta a permetin di imbastî leams tra personis distantis che però a condividin la stesse passion pal irlandês. Chest an la gnove edizion e je stade screade dal stes ministri pe lenghe irlandese, Seán Kyne.

Font: Merrion Street, 04/02/19

Ocitanie: mobilitazion par difindi l’ocitan te educazion

Il CRÈO (centri regjonâl dai insegnants di ocitan), intune cu la federazion des calandretas (lis scuelis ocitanis a imersion) e cun chê dai insegnants di lenghe e culture ocitane (FÈLCO), al à clamât adun une manifestazion pai 17 di Fevrâr a Tolosa / Toulouse par protestâ cuintri de eliminazion dal ocitan dal insegnament intes scuelis secondariis de Ocitanie “francese”. Cul pretest de riforme dal sisteme di istruzion superiôr in cantîr a Parîs, la direzion scolastiche dal distret di Tolosa e à taiât i fonts pal ocitan lassant cussì uns 15 mil students cence l’insegnament de lenghe proprie e colpint la ativitât di une cincuantine di professôrs. Cuintri de riforme e des azions che le compagnin si à mobilitât ancje l’Institut d’Estudis Occitans (IEO) cuntune proteste indreçade aes autoritâts statâls.

Font: Jornalet, 01-04/02/19

Gales: il guvier al rinuncie a eliminâ il comissari pe lenghe

Pas indaûr dal guvier galês su la gnove legjislazion linguistiche che e varès vût di eliminâ la figure dal comissari pe lenghe par sostituîle cuntune comission e di trasferî al esecutîf la gjestion dai nivei di riferiment pe lenghe galese (standards), ven a dî i dirits linguistics minims che aministrazions locâls, ents publics e societâts che a davuelzin ativitâts di interès public a àn di garantî ai citadins. La gnove e à vût il bon acet de organizazion Cymdeithas yr Iaith che e veve contestât cun fuarce la ipotesi di riforme acusantle di rindi plui debulis lis politichis pal galês e la tutele dai dirits linguistics dai citadins.

Font: BBC, 01/02/19

Cornualie: materiâi gnûfs pe lenghe corniche

La societât Golden Tree Productions, in cunvigne cul Consei de Cornualie, e à metût in rêt un portâl – batiât Go Cornish – che al ufrìs risorsis par promovi l’aprendiment dal cornic. Il progjet al cjape dentri ancje une serie di laboratoris interatîfs e di events che si puedin inmaneâ tes scuelis, tai spazis publics e fintremai tai locâi ator pe Cornualie. Su Go Cornish e je ancje disponibile la version in lenghe corniche de aplicazion Magi Ann, metude adun sul imprin par judâ i frutins e lis lôr fameis a imparâ il galês.

Font: The Packet, 31/01/19

Paîs Basc: tal 2020 la seconde edizion di Euskaraldia

Euskaraldia, la iniziative che si propon di sburtâ l’ûs sociâl de lenghe basche, e tornarà a davuelzisi tal Autun dal 2020. La prime edizion de manifestazion si veve davuelte tra i 23 di Novembar e i 3 di Dicembar dal an passât cuntune partecipazion di plui o mancul 220 mil personis. Ancje intant de seconde edizion di Euskaraldia a saran confermadis lis dôs figuris clâf de iniziative, o sei i ahobizi, che tes zornadis de manifestazion si impegnin a fevelâ simpri par basc cun ducj chei che lu capissin, e i belarriprest che, cun distintîfs di pueste, a invidin ducj a fevelâur simpri par euskara. Une novitât de edizion 2020 e sarà chê di un rûl plui atîf de bande dai ents publics, des organizazions e des impresis che a aderissin. I organizadôrs a àn ancje decidût che, di cumò indenant, la manifestazion e tornarà a davuelzisi ogni doi agns.

Font: EiTB, 31/01/19; Noticias de Gipuzkoa, 31/01/19

Finlande: Declarazion sui dirits dai popui natîfs, nuie ratifiche

L’esecutîf finlandês al à comunicât in forme uficiâl al Parlament che nol larà indenant cul progjet di leç imbastît ancjemò tal 2014 che si proponeve di ratificâ la Declarazion dai dirits dai popui natîfs de ONU. Pal guvier, propit i agns passâts di cuant che il test al è stât metût jù a rindaressin aromai superâts i siei contignût ma, cu lis elezions gjenerâls in program in Avrîl, nol è plui timp par mendâlu. Al è di almancul trente agns che, par un sant o par chel altri, lis istituzions finlandesis a rimandin la ratifiche dal tratât. Al centri dal contindi a restin i dirits su lis tieris dai Sami.

Font: The Barents Observer, 25/01/19