La gnove aministrazion comunâl Perpinyà / Perpignan, che e je cumò tes mans de diestre ultranazionaliste francese, e à decidût di fâi cuintri ae nassite di un istitût pal insegnament imersîf dal catalan che al varès vût di cjatâ acet intal antîc convent di Sante Clare. La rêt Bressola, che te Catalogne dal Nord sot aministrazion francese e garantìs l’insegnament par catalan a 1.300 fruts, e veve za cjatât l’acuardi cui proprietaris e versât la prime part dal paiament. La aministrazion comunâl e à però otignût che la vendite e fos anulade motivant il so intervent cu la difese dal patrimoni storic de citât. Il centri scolastic gnûf – che za al gjoldeve de poie de regjon Ocitanie, dal consei dipartimentâl dai Pireneus Orientâi e dal guvier catalan - al varès dât acet a tresinte arlêfs des secondariis. La rêt Bressola e à cumò decidût di puartâ in tribunâl la aministrazion comunâl par chest so intervent e e à clamât dongje une manifestazion di place pai 23 di Otubar.
30/10/21
Cossovo: ancjemò scuintris e violencis a Mitrovica
No si fermin lis violencis e lis tensions inte part setentrionâl dal Cossovo a maiorance serbe. La mediazion europeane e veve permetût di cjatâ un acuardi tra lis parts dopo che il guvier di Pristina al veve introdusût l’oblic pai veicui cun targhe serbe di gjavâle e sostituîle cuntune cossovane cuant che a passavin il confin: une decision che e veve causât scuintris tra i membris de comunitât serbe che a vevin ocupât il passaç di confin di Brnjak / Bernjak e i reparts speciâi de polizie mandâts des autoritâts statâls. Par garantî la tignude de intese sul puest a jerin stâts inviâts ancje reparts des fuarcis di interposizion de NATO. Cuant che la crisi e someave aromai superade, i cuartîrs setentrionâi di Mitrovica – aree là che si centre la plui part de minorance serbe – a son stâts interessâts di une operazion di polizie che e à puartât al arest di vot personis. La iniziative e jere indreçade a colpî la criminalitât organizade ma, te clime di tension che za e jere, e je stade lete come une vere invasion puartant grups di serps a tirâ sù baricadis pes stradis a e confrontâsi cu la polizie a colps di molotovs. Tai scuintris un serp al è stât ferît cuntune arme di fûc. Il president serp, Aleksandar Vučić, intant di un incuintri cui rapresentants de minorance, ju à invidâts a rispuindi in maniere pacjifiche ma al à ancje zontât che a àn il dirit di difindisi cuant che a son atacâts cu la violence e che, se al ves di sucedi, la Serbie ju poiarà. Invîts ae calme a son rivâts sei dai Stâts Unîts che de UE che e à ancje invidât lis autoritâts di Pristina a no meti in at azions unilaterâls.
Paîs Catalans: gjavâts i cartei cul non par catalan di Perpignan
I cartei cul non par catalan de citât di Perpignan a son stâts gjavâts par decision de gnove aministrazion comunâl che e je finide tes mans dal Rassemblement National. A denunciâ cheste situazion a son stâts Sí al País Català e Unitat Catalane, doi dai moviments politics che a difindin la catalanitât de citât e che, in plui di pretindi spiegazions in mert a cheste decision, a domandin che i cartei par catalan a tornin intal lôr puest. Il sindic gnûf, Louis Aliot, al jere za intervignît su la steme de citât sostituint il sproc «Perpinyà, la catalana» cun «la radiant».
Paîs Catalans: inviât l’Osservatori su la cualitât linguistiche
L’Istitût di Studis Catalans (IEC) al à inviât l’Osservatori su la cualitât linguistiche, un progjet che si propon di studiâ e stazâ i ûs publics de lenghe catalane e di meti a disposizion i risultâts di cheste ativitât sei dai studiôs che dai specialiscj che a viodin des politichis linguistichis. Cun di plui, la iniziative e ponte a ufrî un jutori a realtâts associativis e personis che a vuelin miorâ il lôr nivel di comunicazion par catalan. Intant de presentazion de iniziative si à ancje segnalât cemût che l’ûs sociâl de lenghe proprie al sedi daûr a colâ massime tra i zovins ancje parcè che si fâs plui fature a intervignî tai ambients di comunicazion no tradizionâi che a son chei che a doprin di plui. Cun di plui, la crisi sanitarie e à acelerât la trasformazion dal consum audiovisîf, dominât cumò di plateformis digjitâls là che la ufierte par catalan no rive nancje al 1%. Pal Istitût di Studis Catalans al covente duncje intervignî cun modifichis normativis impuartantis o si sarà simpri plui tes mans dal marcjât.
Paîs Basc: pront il stampon pal II plan pal euskara in Navare
Euskarabidea – l’istitût navarês de lenghe basche – al à presentât il stampon dal secont plan strategjic pal euskara che dai 11 di Otubar ai 11 di Novembar al è a disposizion dal public sul portâl istituzionâl dal guvier de Navare par che si puedin presentâ propuestis, critichis o osservazions. Une volte esaminâts i contribûts rivâts si larà a meti jù la version finâl dal plan che al varès di jessi aprovât dal guvier prime de fin dal an. Il document si môf su sîs liniis principâls, o sei ûs sociâl de lenghe, servizis publics, incressite dai fevelants, atrat e consens sociâl, suaze linguistiche e funzion economiche dal euskara. Il plan, che al cuvierzarà la dade dal 2020 al 2027, al previôt 6 obietîfs principâls, 42 obietîfs specifics e 201 progjets. Il test al met une atenzion marcade su la culture digjitâl, ma al ponte massime su la dimension dal ûs e dal consens sociâl su la lenghe e, ta cheste suaze, si incrosarà cul plan Nafarroa Suspertu / Reactivar Navarra 2020 – 2023.
Galizie: mobilitazion pe dignitât de toponomastiche proprie
Mobilitazion ai 16 di Otubar alì dal puint che al mene ae isule di Toxa par difindi l’ûs de toponomastiche par galizian. La iniziative e je stade clamade adun de organizazion A Mesa pola Normalización Lingüística dopo che ai 29 di Setembar une prime manifestazion cul stes teme e jere stade blocade e atacade des fuarcis di polizie spagnole. La proteste e jere nassude in ocasion di un incuintri organizât a Toxa de imprese Hotusa cu la partecipazion di delegâts dal guvier statâl e di chel galizian e là che la aziende e veve doprât il non de localitât par castilian (La Toja). La leç e previôt che la uniche forme legâl e legjitime dai nons di lûc de Galizie e sedi chê par galizian, dut câs nissun rapresentant istituzionâl al à pretindût che la aziende – finanziade dal public cun passe 200 milions di euros – e rispietàs la leç e la toponomastiche locâl. Cun cheste mobilitazion A Mesa e domande duncje il rispiet de legalitât e, tal stes timp, e denuncie la violence de guardia civil cuintri di citadins che a protestavin in difese de leç.
Irlande: leç sul irlandês tes mans dal guvier britanic
Un puartevôs dal guvier britanic al à mostrât il fastidi dal esecutîf pe mancjance di pas indenant inte aprovazion di une normative pe promozion de diversitât linguistiche e culturâl in Irlande dal Nord e, in particolâr, di une leç pe tutele de lenghe gaeliche irlandese. La legjislazion e jere previodude ancjemò dai acuardis di pâs e e jere stade concuardade di un pat tra lis fuarcis politichis nordirlandesis sul prin tacâ dal 2020. Chel istès la dirigjence dal DUP – moviment politic de comunitât unioniste – e va dilunc a boicotâ ogni tentatîf di fâ buine une leç pal irlandês. Il guvier di Londre al à duncje fat savê che al intervignarà in maniere direte cuntune leç statâl che e podarès tacâ il so percors parlamentâr za dentri de fin dal mês. No sarès la prime volte che l’esecutîf britanic al cjape in man la situazion par superâ i blocs des istituzions nordirlandesis, un tant al jere za stât fat par introdusi lis gnocis tra personis dal stes ses e par slizerî i vincui imponûts par podê abortî.
Galizie: iniziative sindacâl su la pierdite de lenghe proprie
Il sindacât STEG al à presentât une denuncie formâl alì dal ufici dal difensôr civic galizian par domandâi di intervignî su la situazion pardabon preocupante de lenghe proprie, massime tal cjamp de istruzion. La azion si poie sui dâts che a saltin fûr di une inchieste sociolinguistiche puartade indenant de Real Academia Galega tai 21 istitûts scolastics de comunitât di Ames. La ricercje e je significative parcè che e scrutine a fonts cheste aree cu la colaborazion di passe cuatri mil tra students, insegnants e gjenitôrs. Cuant che al tache il prin cicli de scuele de infanzie sù par jù il 45% dai fruts al fevele pal plui par galizian, intant che un 12% lu dopre intune cul castilian. Dut câs, al moment dal prin contat cu la scuele, plui dal 11% dai fruts al mole la lenghe proprie. Chest slontanament al va dilunc a cressi a man a man che si passe al cicli scolastic seguitîf cul risultât che, rivâts aes secondariis, a doprâ in maniere normâl il galizian al è dome l’11% dai students intant che un altri 11% al dopre in maniere vualive galizian e castilian. Pal sindacât cheste situazion e diven dai erôrs intal model linguistic scolastic puartât indenant zaromai di agns dal guvier de Galizie (Xunta) e, in particolâr, de cussì clamade leç sul plurilinguisim che, sot di une pretese formâl di tratâ in maniere compagne galizian, castilian e inglês, inte realtât dai fats e penalize propite la lenghe proprie. Il Sindicato de Traballadoras e Traballadores do Ensino de Galiza al domande duncje al difensôr civic di sburtâ il guvier a intervignî in maniere radicâl par cambiâ direzion.
Ocitanie: il guvier aranês al vûl plui competencis su la lenghe
Riunion ai 13 di Otubar tra i rapresentants dal guvier catalan e dal Consei Gjenerâl di Aran, orghin di autoguvier di cheste valade pirenaiche di lenghe ocitane cjapade dentri te Comunitât autonome de Catalogne. La sindiche aranese, Maria Vergés, e à domandât di rindi operative ad in plen la leç sul statût di autonomie de valade cul trasferî lis competencis previodudis de normative. In particolâr, une des urgjencis e je chê di une dotazion finanziarie in materie di lenghe e culture e la pussibilitât di meti in vore lis politichis linguistichis che i coventin al aranês.
Paîs Catalans: poie largje al catalan come element di coesion
Il Parlament de Catalogne al à fate buine a grande maiorance une risoluzion che e veve par titul «Pe lenghe come element di coesion» là che si impegne il guvier a meti in cjamp dodis azions par infuartî la lenghe proprie in ducj i setôrs. Il prin pont, par esempli, al domande al esecutîf di promovi un pat nazionâl pal disvilup des politichis par favorî l’ûs e la cognossince dal catalan e rindilu un imprest di coesion sociâl. La plui part des azions dut câs e je centrade su la difese de lenghe proprie intal cjamp dal audiovisîf, in primis cun intervents legjislatîfs che a atualizin la normative in vore. Si fevele po ancje dal impegn par difindi il ricognossiment dal catalan come lenghe di ûs uficiâl dentri de Union Europeane. La Assemblee e à aprovât ancje une seconde risoluzion che e impegne il guvier a infuartî sul plan finanziari e operatîf la lenghe dai segns catalane.
Gales: 20% dai galês discoragjât dal doprâ il galês
Un galês su cinc al declare di jessi stât discoragjât intune cualchi maniere dal doprâ la lenghe proprie cun altris personis in stât di fevelâle. Il dât si lu cjate tal ultin rapuart publicât dal comissari pe lenghe galese, Aled Roberts, e al ven fûr di une inchieste puartade indenant intal ultin an. Cheste situazion – si lei te informative – e je in cressi dal 5% rispiet al an prime. Roberts al spieghe che la emergjence sanitarie e à contribuît a palesâ la diference tra lis organizazions publichis inte capacitât di impleâ il galês cui citadins, metint in mostre i ponts di crisi che za a jerin. In ogni câs, la ricercje cjapade dentri tal rapuart e mostre ancje che l’82% dai citadins che a doprin la lenghe proprie al è par solit in stât di relazionâsi cu lis organizazion publichis par galês: une pussibilitât che, tal ultin an, e je in calâ pal 20% di lôr, in cressi pal 35% e compagne par chel altri 45%.