E cres la pression sul guvier britanic par che al rispieti i siei impegns e al fasi buine une leç pe valorizazion de lenghe gaeliche irlandese. Ancjemò in Jugn il segretari di stât pe Irlande dal Nord, Brandon Lewis, al veve declarât che se lis istituzions nordirlandesis no vessin fate buine dentri dal Astât une normative su la promozion de diversitât culturâl che e cjapàs dentri ancje la leç sul gaelic, i varès pensât il guvier di Londre vie pal mês di Otubar. Il “no” ae leç dal DUP al à blocât sei ogni pussibilitât di fâ bon il proviodiment, sei il funzionament stes dal guvier locâl. Par chest la prime ministre vicjarie de Irlande dal Nord, Michelle O’Neill, espression de aree republicane (Sinn Féin), e à fat savê che si spietin une azion legjislative dal esecutîf britanic tal zîr di pocjis zornadis, viodût che si veve dât la fin di Otubar come tiermin par intervignî. La zornade dopo un grup interpartitic formât di parlamentârs britanics elets in Irlande dal Nord, in Scozie e in Gales (SDLP, Alliance Party, SNP, Plaid Cymru) al à inviât une iniziative unitarie par domandâ al Parlament di Londre di fâ buine daurman une leç par tutelâ e promovi l’irlandês. Cun lôr a jerin ancje i rapresentants de organizazion pe lenghe Conradh na Gaelige che a àn riclamât il guvier di Londre al so dovê ricuardant che, in chest moment, i partîts a pro de leç a rapresentin la maiorance dai deputâts sei tal Parlament britanic che ta chel nordirlandês.
12/11/21
Galizie: prin pas pal progjet Nós di inteligjence artificiâl
Ai 26 di Otubar il guvier de Galizie (Xunta) e la universitât di S. Jacum a àn presentât il prin acuardi pal Proxecto Nós de Intelixencia Artificial a servizi de lenghe galiziane. Il pat al previôt un prin invistiment di 150 mil euros par inviâ la catalogazion des risorsis disponibilis intes areis de analisi vocâl e de analisi testuâl, par nomenâ i grups di lavôr e par fissâ strategjiis e modalitâts par coordenâju e par verificâ la cualitât dal lavôr. Chest prin pas al varès di insuazâsi tun plan plui ambiziôs che, par mieç di fonts europeans, al varès di movi risorsis par passe 15 milions di euros. L’obietîf al è chel di disvilupâ une grande varietât di risorsis linguistichis digjitâls di cualitât par galizian, gratuitis e cun codiç libar a disposizion di impresis, associazions e istituzions. Si fevele di assistents vocâi, sottitulazions automatichis di contignûts audiovisîfs, struments pe diagnostiche mediche, servizis di teleassistence di ultime gjenerazion e v.i.
Paîs Catalans: manifestazion a Perpignan pe gnove Bressola
Ai 23 di Otubar lis stradis di Perpinyà / Perpignan a àn viodût une gruesse manifestazion clamade adun de organizazion Bressola là che uns 2.500 personis a àn domandât ae aministrazion comunâl di tornâ sui siei pas e di permeti di inviâ il prin liceu imersîf par catalan. Il gnûf centri scolastic i darès acet a tresinte arlêfs e i darès continuitât al insegnament par catalan cu la zonte de educazion secondarie. La rêt Bressola e veve za cjatât l’acuardi cui proprietaris dal ex convent di Sante Clare e versât la prime part dal paiament in maniere di podê partî daurman cul progjet (sostignût ancje de regjon Ocitanie, dal consei dipartimentâl dai Pireneus Orientâi e dal guvier catalan) ma, cundut che sul imprin la iniziative e veve vût il vie libare ancje dal comun, al ultin moment util la aministrazion locâl e veve decidût di esercitâ il dirit di rivalse e di cjoli la struture al stes presit concuardât par vendilu ae Bressola. Une decision justificade cu la volontât di difindi il patrimoni storic de citât ma che e smentìs la autorizazion dade sul imprin e che e somee motivade inte realtât di resons politichis, viodude la posizion ultranazionaliste francese de aministrazion comunâl in cjarie. Cjatâ fûr un altri sît adat e tornâ a partî da cjâf cu lis autorizazions al slontanarès, e no di pôc, i timps pe vierzidure dal gnûf istitût. I manifestants a domandin duncje al guvier citadin di ritirâsi dal acuist.
Paîs Basc: sprolungjât il pat su lis politichis linguistichis
I rapresentants des politichis linguistichis dai guviers de Comunitât Autonome Basche, de Navare e dal ufici public pal euskara dal Paîs Basc sot aministrazion francese (Ipar Euskal Herria) a àn sotscrit il protocol di colaborazion 2021 – 2025 par lâ indenant a lavorâ in maniere coordenade a pro de lenghe basche. Il pat al rapresente il sprolungjament di chel za firmât intal Lui dal 2017. Un dai ponts centrâi dal acuardi al è chel de colaborazion intal disvilup dal insegnament par euskara e, ta cheste suaze, si vûl favorî ancje i interscambis di students. Un altri element al è chel de formazion pai adults e dal coordenament dai curricula e des certificazions linguistichis. Altris ponts frontâts dal protocol si riferissin aes azions in comun par promovi la lenghe basche tal mont imprenditoriâl, intes ativitâts pai fruts e intal digjitâl, ma ancje tal cjamp des investigazions sociolinguistichis e de progjetazion europeane.
Aragon: l’aragonês si zonte aes lenghis di lavôr de CTP
La Comunitât di Lavôr dai Pireneus (CTP) e introdusarà in maniere progressive l’aragonês inte suaze di chest organisim internazionâl di cooperazion transfrontaliere che al met adun lis regjons e lis comunitâts autonomis dal Aragon, de Catalogne, de Ocitanie, de Gnove Aquitanie, de Navare, de Comunitât Autonome Basche e il Principât di Andorra. La decision e je stade cjapade dal comitât esecutîf de Comunitât di Lavôr su domande dal guvier dal Aragon. L’aragonês si zontarà cussì aes lenghis di funzionament za ricognossudis di chest organisim. Ancje il sît internet de Comunitât di Lavôr – che in dì di vuê al è disponibil par basc, catalan, castilian, francês, inglês e ocitan – al sarà voltât inte lenghe proprie dal Aragon.
Letonie: gjavade la licence a di une television par rus
L’organisim che al controle e al regole il sisteme radiotelevisîf leton al à decidût di revocâ la licence de emitente televisive in lenghe russe PBK che e fâs part di un grup che al ufrìs diviers canâi in lenghe russe tes republichis baltichis là che la popolazion russofone e rapresente la minorance plui gruesse. La licence, assegnade intal Fevrâr dal 2015 e par dîs agns a dilunc, e je stade revocade a partî dai 26 di Otubar. Cundut des tensions che a esistin tra il guvier centrâl e la minorance russe, la decision no sarès leade a resons politichis ma a violazions intal codiç di compuartament des emitentis leadis al numar no suficient di programs autoprodots, al mancjât rispiet de cuantitât di produzions europeanis di trasmeti, e ae maniere “pôc serie” che e je stade tratade la emergjence sanitarie in at.
Paîs Catalans: sfuarç comun pe leç statâl sul audiovisîf
I responsabii dai servizis di politiche linguistiche de Catalogne, dal Paîs Valenzian e des Baleârs a àn concuardât une azion unitarie par domandâ che la gnove leç statâl sul audiovisîf che e je daûr a jessi metude adun e previodi misuris specifichis a garanzie dal catalan. Cun di plui si à cjatât un acuardi par misuris in comun in setôrs tant che: la promozion de lenghe tra i zovins, in particolâr operant sul cjamp des tecnologjiis e des rêts sociâls; l’insegnament dal catalan a nivel european; la ecuivalence des certificazions linguistichis; la racuelte e la condivision di dâts sociolinguistics.
Kurdistan: il Parlament de Catalogne al ricognòs il Rojava
Il Parlament de Catalogne al à fate buine une propueste sul impegn des istituzions e des organizazions catalanis inte ricostruzion dal Kurdistan là che si ricognòs la esistence de Aministrazion autonome dal Nord Est de Sirie, ven a dî lis areis dal Rojava (Kurdistan ocidentâl) che si autoguviernin cul sisteme dal confederalisim democratic. La risoluzion e je stade poiade di ERC, Junts, CUP e En Comú Podem, intant che il PP si à astignût e Ciudadanos e Vox a àn votât cuintri. Si trate de prime volte che un Parlament al ricognòs cuntun at uficiâl la esistence de Aministrazion dal Rojava come sogjet istituzionâl indipendent. Par disi graciis al Parlament catalan par chest ricognossiment, la diaspore curde ator pal mont e à inviât une campagne une vore partecipade su lis rêts sociâls cul sproc #GràciesCatalunya.
UE: presentade une propueste di leç pes nazions cence stât
Un grup di europarlamentârs che a rapresentin moviments politics indipendentiscj a àn presentât une iniziative par che la UE e imbastissi une leç par judâ a risolvi i conflits nazionâi in at dentri dai diviers stâts che le componin. Il cussì clamât Mecanisim Democratic European di Clarece al vûl jessi un imprest istituzionâl par garantî la libare espression dai citadins sul status politic des lôr comunitâts dentri di une suaze legâl e infuartî la dimension democratiche de Union. Dongje dal dirit des comunitâts cence stât di podê decidi cul vôt il lôr avignî, si proponin percors di conciliazion par favorî i negoziâts tra lis parts. La iniziative e cjape di model la legjislazion canadese che e à permetût di votâ dôs voltis su la indipendence dal Quebec. La propueste e sarà fate indenant inte suaze de conference sul avignî de Europe che e fâs di fonde par studiâ lis prossimis riformis e i gnûfs tratâts comunitaris. Pai proponents, la rispueste des istituzions europeanis aes cuistions indipendentistis e à di jessi dade cu la ufierte di plui e no di mancul democrazie, e cul impegn a sburtâ il dialic cuant che i stâts centrâi si refudin di frontâ sul plan politic chestis tematichis.
Asturiis: 10% di programs par asturian te RTPA
Intant di une audizion denant de Assemblee asturiane, Francisco González Orejas, il diretôr gjenerâl de RTPA – la Radio Television dal Principât des Asturiis –, al à fat il pont su la presince de lenghe proprie te radiotelevision publiche di cheste Comunitât. Al à ricognossût che a son ancjemò tantis robis di podê fâ par miorâ, ma al à ancje ricuardât che, tai prins sîs mês di chest an, lis oris di emission par asturian a son stadis 349, come a dî il 10% di dute la programazion. Par González Orejas si trate di une cuantitât ancjemò limitade ma, chel istès, impuartante e al à domandât che al sedi il guvier o il Parlament locâl a meti jù un document di suaze cui obietîfs di rivâi, in maniere di judâ dirigjents e lavoradôrs de radiotelevision publiche a capî ce percentuâls di programazion in lenghe proprie che si vûl vê e su cualis areis tematichis.
Paîs Catalans: a Perpignan a tornin i cartei par catalan
Il Comun di Perpignan al à tornât a meti fûr i cartei cul non par catalan de citât (Perpinyà) su lis stradis principâls che a menin te capitâl de Catalogne dal Nord sot aministrazion francese. A denunciâ la lôr disparizion a jerin stâts i moviments Sí al País Català e Unitat Catalane segnalant cemût che la gnove aministrazion comunâl vuidade de diestre ultranazionaliste francese (Rassemblement National) e fos daûr a fâi cuintri a dut ce che al riclamave la identitât catalane de citât. Sul imprin la disparizion dai cartei e jere stade justificade dal guvier citadin cuntun at di vandalisim, spiegant po che si tratave dome di une operazion di manutenzion. La impression di tancj di lôr però e je che, cence des protestis che l’at al veve jevât, i cartei no saressin tornâts intal lôr puest.