Friûl: doi autonomiscj furlans tal gnûf Consei regjonâl

Lis elezions che si son tignudis ai 29 di Avrîl inte Regjon Autonome Friûl – Vignesie Julie a àn puartât a ribaltâ i ecuilibris politics in vore te legjislature stade cu la coalizion di centri diestre che e à vût la poie de maiorance dai eletôrs e chê di centri çampe – al guvier tai cinc agns precedents – che si ricjate come prime fuarce di oposizion. I citadins a àn assegnât la incarghe di vuidâ il gnûf esecutîf regjonâl a Massimiliano Fedriga, cul so partît – la Lega – che al à vût 17 dai 28 elets otignûts dal centri diestre. La coalizion di centri çampe, dongje de elezion dal so candidât president Sergio Bolzonello, e à cjapât 13 dai puescj disponibii in Consei. Il Movimento 5 Stelle, che al coreve in alternative aes dôs coalizions principâls, al à vût cuatri conseîrs elets, un in mancul de legjislature stade. Par tancj aspiets però, la vere novitât di cheste votazion, e je stade la elezion inte Assemblee regjonâl di doi rapresentants dal Pat pe Autonomie: e je la prime volte di un biel pôcs di agns incà che une fuarce autonomiste furlane e torne a vê une rapresentance in Regjon. Il Pat – che nol à podût presentâsi inte circoscrizion di Triest – al à cjapât il 4,1% des preferencis a nivel regjonâl ma, te circoscrizion di Udin (là che la cussience furlane e je plui alte) al à vût il 7,12% dai vôts. Cheste fuarce politiche, che e à refudât ogni acuardi eletorâl cui partîts talians, e à vût la maiorance assolude intal comun di Tramonç Disot (Friûl ocidentâl), e je lade in dople cifre in diviers comuns e te capitâl furlane, Udin, e à cjapât il 9,94% dai consens. In Consei regjonâl si à vût ancje un elet de Slovenska Skupnost, partît rapresentatîf de minorance slovene, che si presentave però dentri de coalizion di centri çampe.

Font: Regione.fvg.it, 30/05/18

Europe: passe 1,2 milions di firmis par “Minority Safepack”

Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane, e je stade un sucès. Cun di fat, par che la Comission Europeane e cjapi in man une iniziative citadine e covente la poie di almancul un milion di personis ator pe Union e ai 3 di Avrîl, date che e finive la racuelte des firmis, chês cjapadis sù a son stadis passe un milion e 215 mil. I stâts là che il quorum di firmis che si vevisi proponûts di cjapâ sù par Minority Safepack al è stât superât a son undis: Ongjarie (là che lis firmis racueltis a son stadis plui di mieç milion!), Romanie, Slovachie, Bulgarie, Cravuazie, Slovenie, Lituanie, Letonie, Danimarcje, Spagne e Italie. Ta chest ultin stât l’obietîf al jere stât fissât a 55 mil firmis e a ‘nd è stadis tiradis sù plui di 60 mil, pe plui part in Sud Tirôl, Val di Aoste e Friûl. I stâts a àn cumò trê mês par convalidâ lis firmis e la Comission Europeane a ‘nd à altris trê par presentâsi denant dal Parlament par riferî su la iniziative. Dopo dal agrât a ducj i citadins e aes organizazions che a àn poiât la iniziative, il president de FUEN, Loránt Vincze, al à celebrât la nassite di chel che al à clamât un vêr moviment european pai dirits des comunitâts minorizadis.

Font: FUEN, 04-05/04/18

Stât talian: comunitâts minorizadis, i risultâts des politichis

Lis elezions politichis che si son tignudis ai 4 di Març no àn dât risultâts masse bogns pes realtâts politichis rapresentativis des nazionalitâts cence stât e des minorancis linguistichis e nazionâls che a vivin dentri dai confins dal stât talian.

Stât talian: furlans, sarts, sudtirolês e valdostans tes politichis

Intes elezions politichis in program ai 4 di Març intal stât talian a son diviers i moviments di stamp autonomist, regjonalist o indipendentist che si son presentâts ancje se, in diviers câs, in aleance cun partîts di nivel statâl. Par chel che al rivuarde lis realtâts politichis rapresentativis des nazionalitâts cence stât e des minorancis linguistichis e nazionâls, a corin di bessôi «AutodetermiNatzione» in Sardegne (che al met adun buine part des diviersis animis dal nazionalitarisim sart), il «Patto per l'Autonomia» in Friûl - Vignesie Julie (che al nas de union di grups politics e associatîfs di aree autonomiste furlane), e «Pour Tous Per Tutti Pe Tcheut» in Val di Aoste (dulà che al gjolt de poie dai moviments autonomiscj Alpe, Stella Alpina e Pour Notre Vallée). Si presentin invezit intune cui partîts talians il «Partidu Sardu - Partito Sardo d'Azione» in Sardegne (cu la LN), «Union Valdôtaine», «Union Valdôtaine Progressiste» e «Edelweiss Popolare Autonomista Valdostano» in Val di Aoste (ducj cul PD). Situazion a miezis pe aleance «Südtiroler VollksPartei - Partito Autonomista Trentino Tirolese» che in Trentin - Sud Tirôl si presente intun pâr di circoscrizions di bessole e pal rest dentri de coalizion di centri çampe vuidade dal PD.

Europe: in Slesie la 15e assemblee gjenerâl de EFA

Tra i 30 di Març e il prin di Avrîl si è davuelt a Katowice, in Slesie, la diesime cuinte assemblee gjenerâl de Aleance Libare Europeane (EFA) che e met adun cuasi uns cincuante tra lis plui impuartantis organizazions politichis autonomistis o indipendentistis de Europe e che e conte ancje cinc europarlamentârs. Intant de assemblee si à fate buine une risoluzion che e domande aes istituzions polachis di ricognossi i slesians tant che minorance, di cjapâ misuris concretis pal decentrament dai podês e, in particolâr, pe autonomie de Slesie. Intant dai lavôrs si à frontât temis tant che la jessude dal Ream Unît de UE, la crisi dai dispatriâts, la sovranitât energjetiche e il svilup sostignibil par meti jù lis fondis di chel che al sarà il manifest politic de Aleance pes elezions europeanis dal 2019. La assemblee gjenerâl e à ancje fatis buinis lis domandis di adesion di altris trê moviments politics: Oljka (autonomiscj de Istrie slovene), Inseme (nazionaliscj cors) e Patrie Furlane (autonomiscj furlans).

Font: EFA, 31/03/17

Friûl: al torne Suns Europe, fûr il bant

Ancje chest an al torne Suns Europe, il festival des arts performativis in lenghe minoritarie, in program dai 29 di Novembar ai 3 di Dicembar in Friûl. La iniziative, che e ponte a stiçâ e a mostrâ la creativitât intes lenghis minorizadis de Europe, e cjape dentri leterature, cine ma soredut musiche. Propit par chel che si riferìs ae sezion musicâl, dongje de finâl che si tignarà a Udin ai 3 di Dicembar, e je in program ancje une semifinâl pe regjon alpine mediteranie centrâl de Europe che si davuelzarà ai 19 di Novembar in Ladinie (a Moena). Cui che al vûl partecipâ al cjate il bant e i modui par aderî sul sît internet www.sunseurope.com . La manifestazion, coordenade de cooperative Informazione Friulana – Radio Onde Furlane e sostignude de Agjenzie Regjonâl pe Lenghe Furlane, e gjolt dal patrocini dal Consei de Europe e de Rêt pe promozion de diversitât linguistiche (NPLD).

Font: Suns Europe, 14/09/16

Friûl: propuestis referendariis par une autonomie dople

Ai 30 di Mai une delegazion dal comitât referendari “Tutti per il Friuli – Tutti per Trieste” al à consegnât alì dal ufici di presidence dal Consei regjonâl dal Friûl – Vignesie Julie i tescj di dôs propuestis di consultazion popolâr compagnâts di cuasi 2 mil firmis (la leç a ‘nt domande 500). Dai doi referendums un al è abrogatîf e si propon di scancelâ la gnove leç di riforme dal sisteme des autonomiis locâls che e gjave lis cuatri Provinciis di prime par dividi il teritori regjonâl in 18 Unions di comuns. Chel altri invezit al è propositîf e al ponte a riformâ la Regjon in dôs Provinciis autonomis sul model dal Trentin – Sud Tirôl. L’intindiment al è chel di meti sù dôs aministrazions che a rispuindin miôr ae composizion storiche, sociâl e linguistiche dal teritori, cul Friûl e la sô identitât specifiche di une bande e cu la citât di Triest e la aree dal Cjars a maiorance slovene di chê altre. I tocje cumò al ufici di presidence dal Consei regjonâl decidi su la amissibilitât des dôs consultazions e, tal câs di un parê positîf, al coventarà tirâ sù altris 15 mil firmis par permeti di lâ al vôt inte Vierte di chest an che al ven.

Font: Tutti per il Friuli, 30/05/16

Sardegne: coordenament su “minorancis” cun Trentin e Friûl

Intant dal apontament dal festival european Suns dedicât aes arts performativis in lenghe minorizade che si è tignût a Casteddu / Cagliari, si à vût un incuintri tra la assessore regjonâl pe lenghe e pe culture sarde Claudia Firino e i siei coleghis Gianni Torrenti dal Friûl – Vignesie Julie e Giuseppe Detomas dal Trentin – Sud Tirôl. Ta cheste riunion si à decidût di meti sù un coordenament tra lis regjons dal stât talian là che si àn “minorancis linguistichis” che al tegni di voli lis politichis linguistichis in vore e che al meti in cjamp imprescj e azions in comun pe promozion des lenghis propriis. Il coordenament al varès di partî in ocasion de prossime riunion de comission culture de conference taliane stât – regjons. Intant dal incuintri in Sardegne i trê assessôrs a àn invidât il Parlament talian a sierâ in curt il percors di ratifiche de Cjarte europeane des lenghis regjonâls o minoritariis che si strissine di agns cence mai rivâ insom.

Font: RAS, 30/11/15

Friûl: imprescj linguistics pal furlan te aministrazion publiche

La aministrazion de Regjon Autonome Friûl – Vignesie Julie e à decidût di meti in cjamp une azion di politiche linguistiche par facilitâ l’ûs de lenghe furlane intai ents publics de aree furlanofone. Cu la colaborazion de societât informatiche regjonâl Insiel, la aministrazion regjonâl e à cjolt a nauli par un an de cooperative Serling un servizi di traduzion automatiche di alt nivel che al permet di voltâ dal talian al furlan documents aministratîfs e altris tescj par judâ i dipendents de regjon, dai comuns, des aziendis sanitariis e di altris struturis publichis a doprâ la lenghe furlane. In plui dal tradutôr, i dipendents publics a varan acès a un coretôr ortografic furlan e al grant dizionari bilengâl talian furlan che al ufrìs passe 60 mil lemis furlans.

Font: RAFVG ARC, 16/11/15

Friûl: fûr il bant par Suns Europe

Cun chest an la manifestazion Suns si slargje e si infuartìs ancjemò di plui. Cun di fat, dongje de musiche, il festival al cjaparà dentri ancje il cine e la leterature intes lenghis minorizadis de Europe. Il cûr de manifestazion, in program a Udin / Udine dai 25 di Novembar ai 11 di Dicembar, al reste però il concors musicâl dedicât aes cjançons in lenghe minorizade che si slargje a cjapâ dentri dut il continent. La dimension alpine – mediteranie che il concors al veve fin al an passât e ven dut câs confermade cu la manifestazion Suns Sardigna, in program ai 28 di Novembar a Casteddu / Cagliari, che e devente une sorte di semifinâl di Suns Europe. Ducj i detais su la iniziative e il bant par partecipâ si ju cjate sul sît www.sunscontest.com .

Font: Eurolang, 07/09/15

Stât talian: dome la SVP e oten un eurodeputât

Intal stât talian l’unic candidât di une formazion politiche rapresentative di une comunitât minorizade che elet intal Parlament di Strasburc al rive dal Sud Tirôl. Al è Herbert Dorfmann de Südtiroler Volkspartei (SVP). La liste, colegade al Partît Democratic talian (PD), e gjoldeve ancje de poie dal Partît Autonomist Trentin Tirolês (PATT) e de Slovenska Skupnost (SSk). In provincie di Bolzan la SVP e à cjapât il 48% des preferencis, ma e merete segnalade ancje la percentuâl alte otignude intai trê comuns ladins [storics] de provincie di Belum. La liste sudtirolese Die Freiheitlichen e jere invezit colegade cu la Leghe Nord, ma no à rivât a otignî avonde vôts inte sô circoscrizion par otignî un eurodeputât. In Val di Aoste al PD a jerin colegadis dôs listis autonomistis – Autonomie Liberté Partecipation Écologie e Union Valdôtaine Progressiste – che no àn rivât però a fâ elei il lôr candidât. Par chês altris comunitâts minorizadis dal stât talian la leç no previôt garanziis par favorî la elezion di candidâts espression di chestis realtâts discoragjant duncje fintremai la presentazion di listis nazionalitariis o autonomistis. Propit cheste situazion e à puartât diviers sogjets, massime in Sardegne e in Friûl, a presentâ ricors cuintri dal sisteme eletorâl in vore e che no àn ancjemò vût une rispueste definitive.

Font: elections2014.eu

Friûl: il Consei regjonâl dal Friûl – VJ al jentrarà intal NPLD

I furlans a fasìn il prin pas par jentrâ inte rêt europeane plui impuartante par chel che al rivuarde lis politichis pes lenghis minorizadis. Cun di fat, l’Ufici di presidence dal Consei regjonâl al à decidût di aderî ae NPLD, o sei la Rêt par promovi la diversitât linguistiche. Si fevele di une istituzion europeane impegnade tal cjamp de politiche e de planificazion linguistiche là che a son dentri guviers statâi e regjonâi, ONG, universitâts e associazions impegnadis inte promozion des lenghis minorizadis. La Rêt e je impegnade intal mostrâ la diversitât linguistiche tant che une oportunitât, tant che imprest centrâl pal svilup personâl, sociâl e economic di dute la Europe, in plui che jessi un jutori pal dialic interculturâl. La istituzion e lavore dongje de Comission europeane par saborâ chestis finalitâts e e jude il scambi di buinis pratichis intal cjamp des politichis linguistichis tra aministradôrs, professioniscj e esperts. In dì di vuê inte Rêt a son dentri tant che membris a plen dirit il guvier de Republiche di Irlande, i guviers dal Gales, de Catalogne, de Comunitât Autonome Basche, de Navare e de Galizie, la Coletivitât Teritoriâl Corse, la Provincie de Frisie, l’Ufici public de lenghe bretone e il Folktinget, che al rapresente la comunitât svedese de Finlande. Plui lungje la liste des realtâts associadis, là che o cjatìn, tra i altris, ancje il Parlament sami de Finlande, lis universitâts di Stocolm e Cardiff, l’istitût Mercator, l’Istitût di Studis Ocitans e la Academie Frisone.

Font: Radio Onde Furlane, 20/03/14

Friûl e Italie: i gjestôrs di servizis publics a àn di doprâ il sloven

Ai 29 di Novembar la presidente de Regjon Friûl – Vignesie Julie e à sotscrit il decret che al fisse i ents gjestôrs e concessionaris di servizis publics che, su la fonde de leç statâl pai slovens, a son clamâts a doprâ la lenghe slovene tes tabelis e te toponomastiche che a metin fûr intes areis là che e vîf la minorance. La liste e je stade proponude dal Comitât istituzionâl paritetic pai problemis de minorance slovene. Tal specific si trate di societâts che a operin intal cjamp de viabilitât e dai traspuarts tant che Anas, Autovie Venete, Autostrade per l'Italia, FVG Strade, Trieste Trasporti, SAF di Udin, APT di Gurize, RFI-Rete ferroviaria italiana, Trenitalia, Aeropuart dal Friûl - VJ, in plui di Poste Italiane e RAI. Il decret al previôt une metude in vore graduâl de misure, ma e invide a inviâ daurman chest percors.

Font: ARC - RAFVJ, 30/11/13

Friûl: dai 20 ai 23 di Novembar la Mostre dal Cine

E tacarà ai 20 di Novembar a Udin la tierce edizion de Mostre dal Cine, festival dal cine european intes lenghis “minoritariis”, inmaneade dal Centro Espressioni Cinematografiche cu la poie di ARLeF, Provincie e Comun di Udin. Il festival si propon di fâ cognossi la produzion cinematografiche des nazions cence stât de Europe. Te edizion di chest an a saran presentâts 19 films che a rivin di Sardegne, Catalogne, Galizie, Paîs Basc e Friûl. Si trate di luncs e curtmetraçs, documentaris, films di finzion e fintremai cartons animâts. La Mostre e publicarà un catalic trilengâl (furlan, talian, inglês) che al ten dentri dutis lis informazions che a rivuardin films e autôrs e che si cjatin su la rêt alì de direzion www.mostredalcine.org . Intant de Mostre al sarà presentât ancje il numar 12 de riviste anuâl di cine Segnâi di lûs che al à dentri articui e intervistis leadis al festival e ai siei films. Tra i films in program o cjatìn i bascs Barrura Begiratzeko Leihoak e Urte berri on, amona!, il catalan Fénix 11.23, i sarts Su Re e Treulababbu e il galizian Vilamor.

Font: CEC, 11/11/13

Friûl: in linie la prime part dal archivi storic dal MF

Un prime part dal archivi storic dal Moviment Friûl, il sogjet politic nazionalitari furlan plui impuartant dal dopo vuere, e je stade metude in rêt sul sît dal MF, alì de direzion www.archivi.movimentofriuli.it . Si trate di documents ordenâts daûr dal argoment che a àn un interès no dome par cui che si ocupe di nazionalitarisim e di storie politiche, ma ancje par cui che al vûl jentrâ plui a fonts inte evoluzion sociâl e politiche dal Friûl dai agns ’60 dal secul stât incà. La scree dal sît si le à vude in ocasion dal inovâl pai 41 agns de muart di Fausto Schiavi, president dal MF dal 1967 al 1972. La digjitalizazion dal archivi dal moviment e va indenant e intal zîr di un pâr di agns il materiâl al varès di jessi dut disponibil in rêt.

Font: Moviment Friûl, 23/01/13

Friûl: sielzûts i finaliscj dal festival internazionâl Suns

Si tignarà ai 2 di Novembar a Udin la finâl de edizion 2012 di Suns, il concors par cjançons in lenghe minoritarie che al cjape dentri il stât talian, Austrie, Svuizare, Slovenie e la part meridionâl dal stât francês. De manifestazion di Udin a saltaran fûr doi dai finaliscj che a parteciparan al Liet International, festival musicâl dedicât a dutis lis lenghis minorizadis de Europe, in program il prin di Dicembar intes Asturiis. Tra i 42 grups o musiciscj in concors, la jurie di Suns e à sielzût nûf finaliscj: Billy Fumey (francoprovençâl), Cha da Fö (rumanç), Claudia Crabuzza e Claudio Gabriel Sanna (catalan dal Alguer), Jean Ruaz (ladin), Jonokognòs (furlan), Mig 29 Over Disneyland (furlan), Randagiu Sardu (sart), Ruben Dimitri (cravuat dal Burgenland), e Somi de granadas (ocitan).

Font: Radio Onde Furlane, 15/09/12

Stât talian: lenghis minorizadis e autonomiis speciâls sot atac

Une sentence de Cort di cassazion taliane, clamade a intervignî suntune vicende processuâl là che no jerin stadis dopradis lis trascrizions di intercetazions ambientâls in lenghe sarde, e à calcolât il sart di dialet. Pai judiçs de cassazion, di fat, la lenghe proprie de Sardegne no à i stes dirits di chês ricognossudis cun acuardis internazionâi tant che il francês de Val di Aoste, il todesc e il ladin de provincie di Bolzan e il sloven de provincie di Triest. Un tant però, no dome nol ten cont de leç statâl 482/99 che e ricognòs in maniere compagne chestis e altris lenghis, ma nancje de convenzion cuadri pe protezion des minorancis nazionâls che il stât talian si è impegnât a rispietâ e che e met il sart sul stes plan di chês altris lenghis minorizadis ricognossudis.

Sardegne: discriminatori il test di ratifiche de Cjarte europeane pes lenghis

L’assessôr regjonâl pe istruzion de Sardegne, Sergio Milia, al à scrit a ducj i parlamentârs elets inte isule par domandâ che a intervegnin par modificâ il test di ratifiche de Cjarte europeane des lenghis regjonâls o minoritariis che al à di jessi esaminât de Cjamare dai deputâts. Cun di fat, il test cussì cemût che al è al ven judicât discriminatori tai confronts di ciertis lenghis minorizadis feveladis dentri dal stât talian. Par esempli, cundut che il sart e il furlan a sedin lis lenghis minoritariis plui feveladis, – al spieghe il rapresentant de Regjon Sardegne – intal test de ratifiche a son une vore penalizadis a front des lenghis bielzà tuteladis di tratâts internazionâi tant che il todesc dal Sud Tirôl o il francês de Val di Aoste. A mobilitâsi par che la aministrazion regjonâl e fasès sintî la sô vôs su chest teme al jere stât massime il Comitadu pro sa limba sarda.

Font: Italian Network, 14/06/12

Italie: taiâts i fonts statâi pes minorancis

Il Dipartiment talian pai afârs regjonâi al à dât fûr une circolâr su la assegnazion dai fonts dal 2012 pe leç statâl che e garantìs formis di tutele pes lenghis di dodis des comunitâts minorizadis che a vivin intal stât talian (albanês, catalans, cravuats, francês, francoprovençâi, furlans, grêcs, ladins, ocitans, sarts, slovens, todescs). Lis risorsis metudis a disposizion a son in dut 1.768.792 euros, la cifre plui basse mai metude di un guvier talian di cuant che la leç e je stade fate buine intal 1999.

Friûl: Mostre dal Cine riferiment pes nazions cence stât de Europe

Regjiscj e produtôrs presints ae prime edizion de Mostre dal Cine, che si è tignude a Udin dai 25 ai 28 di Novembar, a àn pandût il lôr entusiasim pe iniziative e le àn calcolade tant che une ocasion impuartante pal cine des nazions europeanis cence stât, massime par inviâ une relazion continuative tra autôrs, realtâts produtivis e distributivis di chestis comunitâts di maniere di fâ sintî di plui il lôr pês a nivel european. I ospits a àn domandât che la Mostre dal Cine di Udin e deventi un pont di riferiment fis pes cinematografiis europeanis che a doprin lis lenghis des nazions cence stât. I regjiscj e i produtôrs che a vignivin de Galizie, dal Paîs Basc, de Catalogne, de Ocitanie, dal Gales e de Bretagne, si son cjatâts cui organizadôrs dal festival ancje par discuti su lis problematichis leadis ae produzion, al jutori economic e ae difusion dai lôr films: plui indenant i ponts di fonde di cheste discussion a saran metûts adun intun document. Tra lis altris, si domande une atenzion e une poie plui grande pal cine intes lenghis minorizadis de bande dai diviers stâts e de Union Europeane. In ocasion dal festival al è ancje vignût fûr il numar 8 de riviste di cine par furlan “Segnâi di lûs” publicât dal CEC.

Font: CEC, 01/02/09