Montenegro: guvier gnûf cence ministris des minorancis

Il gnûf guvier di coalizion nassût in Montenegro dopo des elezions dai 30 di Avost al sarà il prin, di agnorums incà, cence ministris espression des minorancis che a vivin intal paîs. Il prin ministri incjariât di formâ il guvier, Zdravko Krivokapič, al à fat savê che il gnûf esecutîf al sarà formât di dodis ministris “tecnics”. A sostignî il guvier e je une aleance formade dai trê principâi grups di oposizion che a àn rivât a meti in minorance il Partît Democratic dai Socialiscj (DPS) che di passe vincj agns al jere ae vuide dal paîs balcanic. Ancjemò ai 18 di Otubar la dirigjence dal Partît Bosgnac, che al à trê deputâts inte Assemblee montenegrine, al veve fat savê di no cjatâsi in cunvigne cu la posizion di une part des fuarcis de gnove maiorance, judicadis masse filoserbis. Cumò ancje i doi partîts di riferiment de minorance albanese, che a àn doi rapresentants in Parlament, a àn sierât la puarte a ogni partecipazion ae coalizion dal guvier. Ta chest câs, a no lâi jù, e sarès stade propit la composizion dal guvier là che si spietavin la presince di rapresentants des minorancis. Al jere dal 1998 incà che tal guvier dal Montenegro si veve almancul un ministri nomenât tra i membris dai moviments politics des minorancis. Daûr dal ultin censiment, dome il 45% de popolazion dal stât balcanic si ricognòs come montenegrin intant che un 29% si declare di nazionalitât serbe, passe il 8% bosgnache e un 5% albanese.

Font: Balkan Insight, 17/11/20

Macedonie: acuardi par un prin ministri albanês

Ai 18 di Mai si à cjatât l’acuardi che al conferme il sociâl democratic Zoran Zaev tant che prin ministri de Macedonie dal Nord. A sostignî il gnûf esecutîf a saran ancjemò une volte il Partît Sociâl Democratic (SDSM), che tes elezions anticipadis dai 15 di Lui al à otignût 46 deputâts, e la Union Democratiche pe Integrazion (DUI), che cui siei 15 elets e reste il partît plui votât de minorance albanese (che e rapresente un cuart de popolazion totâl de republiche balcaniche). A sostignî chest pat di guvier al è ancje il Partît Democratic dai Albanês. La maiorance e varà cussì a disposizion 62 dai 120 membris dal gnûf Parlament. Par otignî la poie de Union, Zaev al à vût di acetâ che a fâ di prin ministri tai ultins cent dîs prime de fin de legjislature al sedi un membri de comunitât albanese.

Font: Balkan Insight, 18/08/20

Montenegro: a van indenant lis tensions tra minorancis

E reste alte la tension in Montenegro tra lis diviersis minorancis e tra chestis e il stât centrâl. Daûr dal ultin censiment, dome il 45% de popolazion si ricognòs come montenegrin intant che si à un 29% che si declare di nazionalitât serbe e un 5% albanese. I contrascj tra lis comunitâts che a vivin ta cheste regjon no mancjin duncje di tocjâ ancje chest paîs balcanic. Dopo des critichis jevadis cuintri de decision des autoritâts statâls di sanzionâ i organizadôrs di doi events par vie di un ûs judicât strumentâl des bandieris albanesis e serbis, cumò a alçâ la temperadure e je stade la scree te aree di Tuzi – teritori a maiorance albanese tacât de capitâl Podgorica – di un monument a Dede Gjon Luli, nazionalist e combatent albanês vivût a cjaval tra i secui XIX e XX. Rapresentants dal Front Democratic, moviment di oposizion vicin ae comunitât serbe, a àn let chest episodi come une provocazion dal moment che – a disin – Dede Gjon Luli al rivendicave pe Albanie, ancje cu lis armis, la fasse meridionâl dal Montenegro là che e vîf la minorance albanese. I membris de oposizion a acusin il guvier centrâl di lassâ man libare ae comunitât albanese par vie che e poie l’esecutîf in cjarie.

Font: Balkan Insight, 26/08/19

Montenegro: a Tuzi sucès de aleance albanese

L’an passât, ae fin di une lungje bataie, la aree di Tuzi e je tornade a deventâ un comun autonom dopo che tal 1957 e jere stade cjapade dentri intal comun di Podgorica, la capitâl dal Montenegro. A sburtâ pal resuriment dal comun e jere stade massime la minorance albanese che ta cheste aree e je maioritarie. E propit une aleance di listis albanesis e à vinçût lis primis elezions aministrativis dal gnûf comun che si son tignudis ai 3 di Març. La aleance albanese e à elet 16 dai 32 conseîrs comunâi intant che il Partît Democratic dai Socialiscj e i siei aleâts – cje a son maioritaris in Montenegro – si son fermâts a 15 elets. La aleance eletorâl albanese e varès di rivâ a guviernâ il comun di Tuzi in gracie de poie dal conseîr elet inte liste di oposizion Montenegro Democratic. La cuistion e jere cussì sintude che une vore di membris di de comunitât albanese che a lavorin ator pe Europe e fintremai tai Stâts Unîts a son tornâts di pueste par votâ pe coalizion di listis albanesis.

Font: Balkan Insight, 04/03/19

Macedonie: poie dai partîts albanês al cambi di non

Ai 11 di Zenâr il Parlament macedon al à fats bogns, cu la maiorance di doi tierçs previodude pai mudaments di nature costituzionâl, i proviodiments che a cambiin il non dal stât in Republiche de Macedonie dal Nord. Il non gnûf, contestât cun fuarce de diestre nazionaliste, al varès di permeti di superâ il scuintri istituzionâl in at di agns cu la Grecie che al à impedît fin cumò al paîs balcanic di inviâ il percors pe jentrade te Union Europeane. Par rivâ ae maiorance cualificade che e coventave par aprovâ il cambi di non a son stâts fondamentâi i vôts dai trê partîts che a rapresentin la comunitât albanese, ven a dî la Union Democratiche pe Integrazion, che e fâs part de maiorance, il moviment BESA e la Aleance pai Albanês che a son invezit ae oposizion. Par otignî la poie di chescj ultins doi partîts, il guvier al à prometût che al incressarà i dirits ricognossûts ae comunitât albanese se dal câs ancje cun mendis ae Costituzion.

Font: Balkan Insight, 11/01/19

Macedonie: braç di fier sul albanês inte costituzion

Doi dai partîts de minorance albanese de Macedonie, ven a dî il moviment BESA e la Aleance pai Albanês a àn fat savê che no laran indenant a poiâ il procès di riforme costituzionâl par meti in vore l’acuardi cjatât cu la Grecie sul non de Republiche ex jugoslave se no si acetarà di meti dentri te Costituzion ancje il ricognossiment de uficialitât de lenghe albanese in dut il teritori statâl. La Aleance pai Albanês e volarès che si mendàs ancje la jentrade de cjarte costituzionâl par zontâ i albanês ai macedons tant che popolazion costitutive dal paîs. I doi partîts a contin dome cuatri dai 120 deputâts dal Parlament de Macedonie ma a son decisîfs par rivâ ae maiorance di doi tierçs che e covente par aprovâ lis modifichis costituzionâls. Dopo di un prin vôt parlamentâr sul cambiament dal non a coventin ancjemò altris dôs votazions par puartâ insom il procès e, cence di chescj cuatri deputâts, si riscje di no vê avonde vôts. La Union Democratiche pe Integrazion, il partît plui votât de comunitât albanese, al à dite invezit che nol intint di meti in pericul il procès di cambiament dal non dopo che a àn coventât 17 agns par cjatâ un acuardi in proposit cu la Grecie.

Font: Balkan Insight, 25/10/18

Serbie: a Bujanovac si riscje la segregazion scolastiche

Bujanovac e je une des localitâts de Serbie cuntune maiorance di lenghe albanese. Cun di fat, dai 47 mil abitants si stime che il 60% al sedi albanês, il 30% serp e plui o mancul il 10% rom. Il sisteme cumò in vore al previôt doi modei scolastics diferents, un cul serp come lenghe veicolâr e chel altri cul albanês. Cussì, dai doi istitûts primaris, un al è di lenghe albanese e un serbe. La plui part dai fruts rom e frecuente chest secont istitût. Cumò però si riscje une altre crevadure. La maiorance dai gjenitôrs serps, di fat, e à domandât che i lôr fîs a frecuentin classis separadis rispiet ai fruts rom. Se in gjenerâl il rapuart tra serps e rom al è di 3 a 1, te scuele primarie chest ecuilibri si ribalte cun 740 fruts rom e 360 serps. Fin cumò duncje in dutis lis classis si veve une maiorance di fruts rom: situazion che lis fameis serbis no vuelin plui acetâ. Di chi la domande di une separazion marcade tra lis dôs comunitâts. Ta cheste maniere però – a disin lis associazions pai dirits umans – si mande sù pai stecs il lavôr fat cun fature ta chescj agns par judâ la integrazion e si riscje di alçâ ancjemò di plui la tension za alte par vie dai rapuarts tirâts cu la comunitât albanese.

Font: Balkan Insight, 19/07/18

Macedonie: si infuartìs la presince albanese tal guvier

Il rimpast di guvier decidût dal prin ministri macedon, Zoran Zaev, al puartarà a di une presince plui fuarte de rapresentance albanese. Fin cumò l’esecutîf nassût de aleance tra il Partît Sociâl Democratic e la Union Democratiche pe Integrazion, un dai partîts di riferiment de minorance albanese, al gjoldeve de poie di 61 dai 120 deputâts dal Parlament. Par infuartî cheste maiorance e par dâi uficialitât a di une colaborazion che za e jere in vore, intal guvier a jentraran cumò ancje i rapresentants di altris doi partîts de comunitât albanese, ven a dî une part dal moviment BESA e il Partît Democratic dai Albanês, che a puartaran in dote altris cinc deputâts.

Font: Balkan Insight, 15/05/18

Macedonie: leç sul albanês, gnûf no dal president

Il president de Macedonie, Gjorge Ivanov, al à decidût pe seconde volte di no firmâ la gnove leç su lis lenghis che il Parlament de Republiche balcaniche al à tornât a fâ buine ai 14 di Març dopo che Ivanov si veve refudât di firmâle une prime volte. Il proviodiment, che al è ae fonde dal acuardi di guvier tra il partît sociâl democratic e i moviments principâi de comunitât albanese, si propon di slargjâ la uficialitât dal albanês ancje tai comuns là che i membris di cheste comunitât a son mancul dal 20% de popolazion. Pal president macedon la leç no je juste e e va cuintri de Costituzion. La diestre nazionaliste, cumò ae oposizion, e à cirût di impedî che la leç e fos fate buine presentant uns 35 mil emendaments in aule e cun manifestazions di proteste fûr dal palaç dal Parlament. Dopo de seconde boçadure de bande dal president al è pussibil che par superâ il scuintri istituzionâl in at e vedi di intervignî cuntune sentence la cort costituzionâl.

Font: RFE/RL, 15/03/18

Macedonie: il president nol firme la leç su lis lenghis

Il president de Macedonie, Gjorge Ivanov, al à decidût di no firmâ la gnove leç su lis lenghis fate buine dal Parlament de Republiche balcaniche ai 11 di Zenâr. Il proviodiment al à chê di incressi il status dal albanês e di slargjâ la sô uficialitât ancje tai comuns là che la comunitât albanese no rive al 20% de popolazion totâl. Ivanov al à motivât la sô decision cul dî che la leç no sarès costituzionâl. Par superâ chest pidiment al covente che il Parlament al torni a votâ la normative. A chel pont par impedî che e vegni metude in vore e coventarès une sentence de cort costituzionâl.

Font: Balkan Insight, 17/01/18

Macedonie: fate buine la gnove leç pal albanês

Ai 11 di Zenâr il Parlament de Macedonie, cul vôt a pro di 69 dai 120 deputâts, al à fate buine la gnove leç su lis lenghis previodude tal acuardi di guvier tra i Sociâi Democratics e i partîts de comunitât albanese che ju sostegnin. I albanês a rapresentin un cuart dai passe 2 milions di abitants de Macedonie. Fin cumò la lenghe albanese e jere couficiâl in ducj i comuns là che cheste comunitât e rapresentave almancul il 20% de popolazion. Cu la gnove leç si va a incressi il status de lenghe ancje là che i albanês no rivin a cheste percentuâl e si facilite il so ûs cu lis istituzions.

Font: Balkan Insight, 11/01/18

Macedonie: rinviade la gnove leç linguistiche

In Macedonie si slungje il percors par fâ buine la gnove leç su lis lenghis previodude intal acuardi di guvier tra i Sociâi Democratics e i partîts de comunitât albanese che lu sostegnin. Dopo dal vie libare dât dal Parlament in prime leture, cumò il test al veve di jessi votât une seconde volte ma i emendaments presentâts de oposizion de diestre nazionaliste (VMRO DPMNE) a varessin sprolungjât i lavôrs parlamentârs e ritardât il vôt de riforme dal sisteme judiziari. Une prospetive che no i plaseve masse ae Comission Europeane che, par bocje dal so delegât Johannes Hahn in visite a Skopje ai 20 di Novembar, e à fat capî che la normative su lis lenghis no je une des prioritâts de UE. Il percors de leç al è stât duncje rinviât a dopo de aprovazion des normis sul sisteme judiziari. I albanês a rapresentin un cuart de popolazion de Macedonie: in dì di vuê la lenghe albanese e je duncje couficiâl in ducj i comuns là che cheste comunitât e rapresente almancul il 20% de popolazion. La gnove leç e larès a incressi il status de lenghe ancje là che i albanês no rivin a cheste percentuâl.

Font: Balkan Insight, 24/11/17

Macedonie:sucès di SDSM e DUI tes aministrativis

Il secont turni des elezions aministrativis in Macedonie che si à tignût ai 29 di Otubar al à confermât la tindince za viodude dôs setemanis prime intant dal prin turni e al à premiât i doi partîts di guvier. Intes areis a maiorance macedone la vitorie e je lade fûr di dubi ai sociâi democratics (SDSM) dal prin ministri Zoran Zaev che dopo des 39 aministrazions concuistadis intal prin turni a àn vinçût 18 dai 35 comuns ancjemò di assegnâ, intant che la diestre (VMRO DPMNE) dal ex premier Nikola Gruevski e à otignût tra prin e secont turni a pene 5 comuns. Inte part dal paîs a maiorance albanese a fâ di paron e je stade la Union Democratiche pe Integrazion (DUI), cumò aleade dai sociâi democratics al guvier, che e à vinçût 11 ents locâi a partî de citât di Tetovo. Chei altris doi partîts di riferiment de comunitât albanese – BESA e la Aleance pai Albanês – a àn invezit di contentâsi di une aministrazion parom.

Font: Balkan Insight, 30/10/17

Macedonie: pressions sul guvier pe leç sul albanês

Tal câs che il gnûf esecutîf de Macedonie – formât dal Partît Sociâl Democratic, de Union Democratiche pe Integrazion e de Aleance pai Albanês – nol fasi buine une leç che e slargje l’ûs uficiâl de lenghe albanese dentri di Setembar, il Moviment pes Riformis (DPA), un dai components de Aleance pai Albanês, al è pront a gjavâsi de coalizion di guvier. La manovre e met a risi la tignude dal esecutîf dal moment che cun doi deputâts in mancul al pierdarès la maiorance che cumò al à intal Parlament. Il prin ministri vicjari, Bujar Osmani al à rispuindût che dutis lis fuarcis che a formin la scuadre di guvier a son daûr a lavorâ su la leç e che si stime che in trê mês e podarà jessi fate buine. La normative cumò in vore e previôt pal albanês il status di lenghe couficiâl in ducj i comuns là che i albanês a rapresentin almancul il 20% de popolazion. La gnove leç e varès di slargjâ lis misuris di tutele ancje là che la presince de minorance e je plui basse.

Font: Balkan Insight, 13/07/17

Macedonie: albanês 8 dai 17 ministris dal gnûf guvier

Dopo mês di crisi istituzionâl, ai 31 di Mai il Parlament de Macedonie al à votât la fiducie al gnûf esecutîf vuidât dal leader dal Partît Sociâl Democratic (SDSM), Zoran Zaev. Il guvier al gjolt de poie di 62 dai 120 parlamentârs, o sei i 49 dal Partît Sociâl Democratic, i 10 de Union Democratiche pe Integrazion e i 3 de Aleance pai Albanês. Cun di fat, dai trê partîts che a rapresentin la comunitât albanese in Parlament, dome chescj doi a àn aderît ae aleance di guvier, intant che il tierç – Besa – al à fat savê che al garantirà la sô poie dome su proviodiments specifics. Dai 17 ministris che a formin l’esecutîf, 8 a son espression dai doi partîts albanês de coalizion di guvier. Inte storie de Macedonie, la comunitât albanese, che e forme un cuart de popolazion totâl dal stât, no à mai vût cussì tancj rapresentants intal esecutîf.

Font: Balkan Insight, 31/05/17

Macedonie: superâts i pidiments pe nassite dal gnûf guvier

Lis pressions internazionâls e la pôre che dopo des violencis in Parlament dai 27 di Avrîl la situazion e podès deventâ inmò plui critiche, a àn puartât il president de Macedonie, Gjorge Ivanov, a dâi la incarghe di formâ il gnûf guvier dal paîs al leader dal partît sociâl democratic (SDSM), Zoran Zaev. Par plui di doi mês Ivanov si veve refudât di fâlu cu la acuse che lis promessis fatis di Zaev ae comunitât albanese che e rapresente un cuart de popolazion dal stât a metevin a risi la integritât de Macedonie. Il rapresentant sociâl democratic al veve otignût la poie dai trê partîts principâi de minorance albanese su la fonde di une serie di concessions sul plan linguistic e economic, ma al veve sigurât che nissune di chestis misuris e varès metût a risi la unitât e la sovranitât statâl. Zaev al varès cumò di presentâ la sô scuadre di guvier dentri de fin dal mês. Des trê formazions politichis albanesis che i permetin di vê une maiorance di 67 sui 120 deputâts dal Parlament, dôs – la Union Democratiche pe Integrazion e la Aleance pai Albanês – a àn za dade la disponibilitât a jentrâ intal gnûf esecutîf, intant che la tierce – Besa – e à condizionât la sô partecipazion direte ae esclusion dal guvier di personis cjapadis dentri in scandui leâts ae coruzion.

Font: Balkan Insight, 17-18/05/17

Macedonie: violencis etnichis intal Parlament

La crisi istituzionâl che za di mês e met sotsore la Macedonie e à vût un pic dramatic ai 27 di Avrîl cuant che uns dusinte militants leâts ae diestre nazionaliste (VMRO DPMNE) che tai ultins agns e à guviernât la republiche ex jugoslave a son jentrâts tal Parlament e a àn assaltât deputâts e gjornaliscj. Il belanç finâl al è stât di un centenâr di ferîts e tra di lôr ancje il leader dal partît sociâl democratic (SDSM), Zoran Zaev, e chel di un dai trê partîts de minorance albanese, Zijadin Sela. Il fat al è capitât juste dopo che, propit cui vôts dai sociâi democratics e dai trê partîts albanês, al jere stât elet come president de Cjamare dai deputâts, Talat Xhaferi, prin rapresentant de comunitât albanese a ocupâ cheste incarghe.

Macedonie: crisi istituzionâl, partîts albanês cu la oposizion

E je plene crisi istituzionâl in Macedonie là che il president Gjorge Ivanov si refude di dâi la incarghe di formâ il gnûf guvier al leader de oposizion, il sociâl democratic Zoran Zaev, cundut che al gjolt de maiorance in Parlament in gracie de poie dai trê partîts de minorance albanese (Union Democratiche pe Integrazion, Besa e Aleance pai Albanês). Ivanov al dopre propit l’acuardi cui partîts di riferiment de comunitât albanese par refudâi la incarghe, dal moment che la disponibilitât di Zaev a acetâ i ponts di fonde dal lôr program – tant che la estension de couficialitât de lenghe albanese a dute la Macedonie – e ven considerade une menace ae unitât statâl. Denant dal refût di dâi la incarghe, Zaev al à acusât il president di tentâ un colp di stât. Ancje la Union Europeane, la OSCE e la NATO a àn domandât a Ivanov di rispietâ i principis democratics e di tornâ sui siei pas. A front di cheste crisi, diviers juriscj a sostegnin che il Parlament al à il podê di nomenâ un guvier cence abadâ al veto imponût dal president.

Font: Balkan Insight, 04 e 07/03/17

Macedonie: pat di guvier tra i partîts albanês

I partîts de minorance albanese a son decisîfs par formâ il gnûf guvier de Macedonie dal moment che par vê la maiorance in Parlament a coventin 61 deputâts, ma lis dôs formazions principâls – la diestre nazionaliste vuidade di Nikola Gruevski (VMRO DPMNE) e i Sociâi Democratics (SDSM) – a ‘nd àn dome 51 i prins e 49 i seconts. Ai 7 di Zenâr trê dai cuatri partîts albanês rapresentâts intal Parlament de Macedonie – la Union Democratiche pe Integrazion (DUI), il moviment BESA, e il Partît Democratic dai Albanês – a àn sotscrit un pat che ju impegne a pretindi il rispiet di siet misuris tant che fonde par ogni acuardi di guvier. Prin di dut si domande che l’albanês al sedi ricognossût tant che lenghe couficiâl in dute la Macedonie, azions paritariis di svilup economic e sociâl in dutis lis regjons che a componin il stât e la creazion di un ministeri pal rispiet dai dirits des comunitâts e pe avualiance tra lis regjons. Si domande po une risoluzion dal Parlament che al ricognossi i crimins cuintri de comunitât albanese jenfri 1912 e 1956, e une comission investigative indipendente par viodi che no si vedi un ûs politic dai procès plui grues là che a son cjapâts dentri membris de minorance. Si domande po che la comunitât albanese e sedi rapresentade intai grups di lavôr che a tratin dai rapuarts internazionâi e che si dedi un sburt ai procès di adesion ae UE e ae NATO.

Font: Balkan Insight, 08/01/17

Macedonie: albanês decisîfs pal gnûf guvier

Dopo des elezions politichis dai 11 di Dicembar in Macedonie, la formazion dal gnûf guvier e je tes mans dai partîts de minorance albanese. La diestre nazionaliste vuidade di Nikola Gruevski (VMRO DPMNE) e reste ancjemò il partît di maiorance relative cun 51 elets, intant che i Sociâi Democratics (SDSM) a ‘nd àn 49. Par controlâ il Parlament a coventin però almancul 61 deputâts e duncje a deventin decisîfs i parlamentârs dai diviers partîts espression de minorance albanese: la Union Democratiche pe Integrazion (DUI) che e à pierdût une vore di consens, ma e à rivât a otignî 10 elets; BESA cun 5 deputâts; la Aleance pai Albanês cun 3; e il Partît Democratic dai Albanês cun 2. Tai ultins vot agns la Macedonie e je stade guviernade de diestre nazionaliste cu la poie de DUI, ma nol è par nuie scontât che cheste aleance e torni a proponisi. Cun di fat, buine part de comunitât albanese e calcole Gruevski di responsabil dai atacs cuintri de minorance, par chest la Union e à pierdût cetancj vôts e se e ves di continuâ a poiâ un guvier vuidât di Gruevski e riscje di pierdint inmò di plui. Par formâ un guvier, invezit, ai Sociâi Democratics no ur baste une aleance dome cu la Union o cui trê partîts albanês plui piçui. Dificil però che un dai trê al sedi disponibil a stâ intal stes guvier cu la Union, acusade di vê permetût a Gruevski di meti sot atac la comunitât albanese. Se dentri dai 16 di Fevrâr no si rivarà a saltâ fûr di chest pantan, al coventarà meti sù un guvier tecnic che al compagni la Macedonie a gnovis elezions.

Font: Balkan Insight, 14-15/12/16