Finlande: gnûf intervent de ONU a pro dai Sami

Il Comitât de ONU pe eliminazion des discriminazions raziâls al à dât reson al Parlament sami cuintri de decision dal tribunâl suprem finlandês che e autorizave la iscrizion intai regjistris eletorâi pal organisim rapresentatîf dai sami ancje di personis che no vevin lis carateristichis fissadis dal Parlament stes. Une posizion similâr e jere stade cjapade za tal 2019 ancje dal Comitât de ONU pai dirits umans che al veve ancje riclamât lis istituzions finlandesis al rispiet de declarazion dai dirits dai popui natîfs che e previôt che chestis comunitâts a “determinin in maniere libare il lôr status politic e a sedin libaris di puartâ indenant il lôr disvilup culturâl, sociâl e economic”. I rapresentants des istituzions sami si augurin che cu la poie di chestis cjoltis di posizion il guvier finlandês al dreci la sô politiche sul autoguvier dai sami.

Font: The Barents Observer, 28/07/22

Finlande: blocât in Russie il canâl informatîf plurilengâl YLE

Roskomnadzor, la agjenzie russe che e controle i servizis radiotelevisîfs e di stampe, e à blocât a partî dai 2 di Jugn la pussibilitât pai citadins rus di acedi ai servizis informatîfs in rêt ufierts de emitente finlandese YLE. Si trate dal cuint mieç di comunicazion de aree scandinave censurât intai ultins agns des autoritâts di Mosche. Il prin al jere stât il gjornâl in linie The Barents Observer, bandît ancjemò tal Fevrâr dal 2019. Ducj i canâi informatîfs blocâts a àn une element in comun, ven a dî il fat di vê spazis informatîfs ancje par rus. YLE, in plui che par finlandês e par rus, e ufrìs servizis ancje par inglês e par sami. La emitente e je simpri stade atente ancje ai dirits des minorancis ufrint informazions no dome pes comunitâts di lenghe finlandese che a vivin intai stâts dongje, ma ancje pe minorance russofone interne e pes comunitâts sami che a vivin in Finlande, Svezie, Norvegje e Federazion Russe.

Font: The Barents Observer, 03/06/22

Finlande: in calâ lis personis che a fevelin lis lenghis propriis

I ultins dâts demografics su la Finlande a mostrin une incressite gjenerâl de popolazion dal 0,3%, o sei di plui o mancul 11 mil personis. Chest aument al è però determinât massime dal cressi des personis che a rivin di inaltrò che, l’an passât, a son stadis 25 mil, il numar plui alt di cuant che la Finlande e je indipendente. Di chê altre bande, si à une diminuzion dai residents che a fevelin lis trê lenghis uficiâls dal paîs, o sei finlandês, svedês e sami. In realtât, ancje sul plan linguistic, la situazion e je un tic mancul liniâr. Baste pensâ che la percentuâl plui alte di popolazion di divignince foreste – il 17% – si le à tes isulis Åland, un teritori che al gjolt di un nivel di autonomie une vore alt e là che la plui part de popolazion e parten ae minorance svedese de Finlande. Achì, il 40% dai residents di divignince foreste al rive in realtât de Svezie e di consecuence il câl di pês de lenghe proprie al è mancul fuart di chel che al somearès se si cjalàs dome i dâts rûts de imigrazion.

Font: YLE, 31/03/22

Sápmi: comunitâts in azion cuintri dai gnûfs progjets eolics

Tai ultins agns al è cressût l’interès pes risorsis naturâls de Tiere dai Sami (Sápmi). Tra lis ultimis iniziativis si segnale il progjet di dôs compagniis energjetichis (la finlandese ST1 e la Grenselandet AS) che a volaressin fâ sù dai parcs eolics inte aree sami dal stât norvegjês. Une delegazion dal Consei sami e dal Parlament sami de Norvegje si son cjatâts cui dirigjents des dôs aziendis par motivâ la oposizion de popolazion locâl al lôr progjet e par lamentâ il compuartament dai lôr rapresentants sul teritori che, in plui di tentâ di stiçâ contrascj dentri des comunitâts locâls, a àn fintremai menaçât di espropriâ lis tieris dai contraris. La presince di un rêt di implants eolics te tiere dai sami, no dome no ur puartarès nissun vantaç, ma e metarès a risi l’ambient, la culture e la economie tradizionâl de popolazion locâl, a partî dal arlevament des renis. Intant dal incuintri i delegâts sami a àn metût su la taule ancje une sentence resinte de cort supreme de Norvegje che e anule lis concessions par doi parcs eolics inte Tiere dai Sami propite par vie che a violin i dirits ricognossûts ai popui natîfs des convenzions internazionâls.

Font: The Barents Observer, 01/12/21

Sápmi: gnove menace minerarie pe aree di Inari

Une imprese svedese e à presentât une rie di domandis par risiervâ il dirit di ispezion minerarie suntune aree di passe 3 mil chilometris cuadrâts che e interesse i comuns di Aanaar / Inari e di Soadegilli / Sodankylä, te part finlandese de Tiere dai Sami (Sápmi). Se acetadis, chestis risiervis ur daressin ae compagnie svedese la prioritât intal vierzi minieris inta chest teritori. La gnove e à fat saltâ sù il Parlament Sami che lis calcole une menace pe salût dal ambient e des comunitâts locâls ma ancje pai ûs e pe economie tradizionâl sami, in primis pal arlevament des renis. Par bocje dal vicepresident de istituzion, Leo Aikio, il Parlament si à ancje lamentât pal fat di no jessi nancje stât informât de iniziative ma di vêlu savût de stampe. Sul pît di vuere ancje la cooperative dai arlevadôrs di renis che e opere tes tieris in cuistion, preocupade pal avignî di cheste ativitât a front di cheste gnove menace. La aministrazion comunâl di Aanaar / Inari e calcole la normative di tutele dal ambient suficiente a blocâ ogni menace. Dut câs, par cumò, i grups politics rapresentâts intal consei comunâl no àn cjapât posizion. L’esam des domandis al è previodût par chest Autun.

Font: The Barents Observer, 25/08/21

Sápmi: lenghe, gjenar e gákti al centri dal Pride di chest an

Dai 5 ai 8 di Avost si à davuelt a Ohcejohka / Utsjoki, dongje dal confin jenfri Norvegje e Finlande, il Sápmi Pride. Nassude tal 2014, la manifestazion e cîr di pontâ la atenzion su lis rivendicazions e lis bataiis di cui che al patìs une dople minorizazion, o sei chê nazionâl e chê di gjenar. In plui de marcje tipiche di chest apontament, la iniziative e proponeve ancje diviers laboratoris e moments di discussion. Tra i temis discutûts chest an si à ancje cemût rindi il lessic des varietâts sami plui atent al gjenar e cemût adatâ il codiç di ûs dal gákti, o sei il costum tradizionâl dai sami, a cui che no si identifiche cu lis normis tradizionâls di division di gjenar.

Font: The Barents Observer, 11/08/21

Sápmi: impat penç sui sami dal bloc de pescje dal salmon

Il flum Deatnu / Teno / Tana al scjavace la tiere dai Sami (Sápmi) e par 256 dai siei 361 chilometris al fâs di confin jenfri Finlande e Norvegje. Si trate de aree cu la plui alte biodiversitât di salmons e par chest e je mete di cetancj pescjadôrs che a rapresentin une des risorsis principâls pe economie dal teritori. Di diviers agns incà però la popolazion di chest pes e je daûr a calâ e cussì il guvier norvegjês al à decidût di imponi un bloc totâl de pescje dal salmon di Mai a Dicembar dilunc dal flum, dai siei afluents e de aree di mâr dulintor de sô bocje, convincint ancje la Finlande a fâ compagn. Si trate di un colp dûr ae economie locâl che, par vie de crisi sanitarie, e veve za pierdût buine part de stagjon de pescje dal 2020 e dal cumierç transfrontalîr. Chel istès la popolazion locâl e à cjapât avonde ben la decision lamentantsi però pe sielte dai timps, o sei par vie che la decision e je stade cjolte cuant che lis struturis turistichis locâls a jerin za dutis prenotadis. Ce che invezit al è stât cjapât une vore mâl al è il fat che, pe prime volte, il bloc de pescje al è totâl, ven a dî che no si permet nancje aes comunitâts sami che a vivin ad ôr dal flum di pescjâ daûr dai sistemis tradizionâi. Si trate di une decision imponude dal alt cence nancje consultâ i orghins di autoguvier dal teritori e che – e no je la prime volte – no ten in nissun cont la culture e lis tradizions de popolazion indigjene che a son invezit tuteladis par leç.

Font: The Barents Observer, 09/06/21

Norvegje: non dal stât ancje tes lenghis minorizadis

Il Parlament norvegjês al à fate buine une leç che e ricognòs e i da uficialitât ai nons dal stât intes lenghis minorizadis feveladis intal paîs. Par infuartî il significât de decision la stesse propueste di leç presentade dal guvier e jere scrite par norvegjês, par sami (te sô varietât setentrionâl che e je la plui fevelade) e par kven. Cheste ultime e je une varietât finlandese fevelade tune aree setentrionâl de Norvegje de comunitât kven e che e je stade ricognossude come lenghe minoritarie tal 2005. Cui che al rivarà de Svezie, de Finlande o de Federazion Russe tune des areis de Norvegje là che a vivin comunitâts minorizadis si cjatarà i cartei cul non dal stât in dutis lis lenghis ricognossudis (a seconde de aree duncje, dongje di Norge, si podarà lei Vuoda, Nöörje, Norga o Norja): un at simbolic che però al vûl dâi uficialitât e dignitât compagne a chestis lenghis.

Font: The Barents Observer, 06/05/21

 

Sapmi: seconde edizion pe setemane de lenghe sami

Ai 25 di Otubar si à sierade la seconde edizion de setemane de lenghe sami. La iniziative e à tocjât cuasi dut il Sapmi, o sei lis tieris sami di Finlande, Norvegje e Svezie. La prime edizion si veve tignude tal 2019 inte suaze dal an internazionâl des lenghis nativis. La setemane e je une iniziative disvilupade in maniere coletive che si propon di stiçâ istituzions publichis e privadis, ativitâts economichis, organizazions e altris realtâts sociâls a doprâ la lenghe sami (o miôr, lis diviersis lenghis sami) e a studiâ azions par rindi la lenghe plui fuarte e visibile te vite di ogni dì. Viodude la situazion particolâr di chest an, la plui part des ativitâts programadis si à davuelte su la Rêt.

Font: The Barents Observer, 21/10/20

Finlande: petizion pe difese des areis tradizionâls sami

Ativiscj sami a àn consegnât ae ministre finlandese pal ambient e pe clime, Krista Mikkonen, lis passe 37 mil firmis racueltis in mancul di trê mês par domandâ al guvier de republiche nordiche di no autorizâ estrazions inta chel cuar di tiere che si cjate strent jenfri Svezie e Norvegje. Si trate di une part dal teritori storic dai sami che, par secui e secui a dilunc, lu àn doprât pal arlevament. Lis migrazions des renis e i passons che a doprin a cambiin an par an daûr dal andament climatic e, duncje, l’arlevament tradizionâl di chescj animâi nol è compatibil cu lis ativitâts estrativis. La rame finlandese de compagnie minerarie neerlandese Akkerman e à za fat esplorazions e mapaduris aeromagnetichis che a segnalin la presince ta cheste aree di ram, cobalt e nichel e, tal Avrîl di chest an, e à otignût de agjenzie statâl competente une prime opzion pal disfrutament minerari. Pal moment i responsabii de multinazionâl a disin che a coventin ancjemò esplorazions e al è masse adore par capî se il model di disfrutament minerari che si doprarà al sarà compatibil o no cul sisteme di arlevament tradizionâl dai sami.

Font: The Barents Observer, 02/09/20

Finlande: societât dividude su la utilitât dal svedês

Daûr di une inchieste davuelte par cont de radiotelevision publiche finlandese YLE, pôc mancul de metât dai citadins de Finlande e calcole utile la cognossince dal svedês. Par solit cheste valutazion positive e rive di chei che la lenghe le cognossin miôr e che duncje a son in stât di doprâle in maniere produtive. In ogni câs, cemût che si pues imagjinâ, lis percentuâls plui altis si lis cjate tes regjons sudorientâls là che e vîf une impuartante minorance di lenghe svedese e framieç dai eletôrs dal Partît dal Popul Svedês che si presente come referent par cheste comunitât. Il gnûf guvier de Finlande, formât di une coalizion di centri çampe (Partît Sociâl Democratic, Verts, Aleance di Çampe, Partît dal Popul Svedês e Partît dal Centri), al ponte dut câs a infuartî la cognossince de lenghe ancje fûr des areis là che la minorance e je presinte o che a àn plui contats cu la Svezie. Par chest si pense a tornâ a meti in vore l’oblic di passâ un esam di svedês par cjapâ il diplome des superiôrs, oblic che al jere stât abolît intal 2005.

Font: YLE, 05/08/19

Sápmi: la Walt Disney e prodûs Frozen 2 ancje par sami

Il sequel de megaproduzion disneyane Frozen, che al jessarà tes salis cinematografichis tal Unvier dal 2019, al sarà disponibil bielzà dal principi ancje in lenghe sami (o miôr te sô varietât cognossude come sami setentrionâl). La gnove e je stade comunicade cuntune note unitarie dade fûr dai studis di animazion de Walt Disney, dai Parlaments Sami di Norvegje, Svezie e Finlande, e dal Consei Sami. Par svilupâ la seconde jessude di Frozen i autôrs si son ispirâts a elements cjapâts sù intant di un viaç di studi che al à tocjât Islande, Norvegje e Finlande. In particolâr, no son pôcs i elements leâts ae culture e al ambient dai sami che a son stâts racuelts in gracie de colaborazion cuntun grup di lavôr espression di cheste comunitât. Di chi la decision di produsi daurman une version dal film ancje par sami che e sarà distribuide tes salis cinematografichis in Dicembar, in contemporanie cu lis versions par norvegjês, svedês e finlandês.

Font: The Barents Observer, 24/07/19

UE: e cres la rapresentance de EFA tal Parlament european

A son diviers i candidâts di moviments rapresentatîfs des comunitâts minorizadis che a son stâts elets intal Parlament european in ocasion des votazions che si son tignudis intai diviers stâts membris de UE tra i 23 e i 26 di Mai. La vicende che dal sigûr e à fat plui scjas e je stade la elezion di trê dai rapresentants plui significatîfs dal indipendentisim catalan, o sei Oriol Junqueras, che si cjate di plui di un an in regjim di preson preventive, Carles Puigdemont e Toni Comín, che si cjatin in esili inte Belgjiche. Il prin al è stât elet cuntune liste che e meteve adun la çampe nazionalitarie basche, catalane e galiziane e che e à puartât ancje ae elezion di Diana Riba (simpri di ERC) e di Pernardo Barrena (EH Bildu). Puigdemont e Comín si presentavin invezit cu la liste Lliures per Europa. Intal stât spagnûl a son stâts elets al Parlament european ancje Izaskun Bilbao dal PNV e Ernest Urtasun di ICV.

Finlande: ferovie artiche, il Consei de Laponie al sbelee i Sami

Ai 29 di Avrîl il Consei regjonâl de Laponie, in Finlande, al à decidût di fâ buine une variante al plan regoladôr teritoriâl par cjapâ dentri ancje la prevision dai spazis che a coventin pal passaç di une ferovie che e ledi de citât di Rovaniemi, in Finlande, a chê di Kirkenes, in Norvegje. Di une gnove linie artiche che e pei la rêt feroviarie atuâl cul Mâr di Barents si fevele za di agns ma par cumò no si à ancjemò nissun progjet e i stes esperts dal ministeri pai traspuarts finlandês a stimin che in dì di vuê no sedin risorsis par inviâ une opare di cheste fate. La idee de ferovie artiche e jere stade contestade fin dal principi dal Parlament Sami de Finlande, dal Consei Sami (organizazion no governative che e promôf i dirits e i interès di cheste comunitât) e des associazions dai arlevadôrs di renis dal moment che la linie e larès a taiâ areis di passon e trois migratoris fondamentâi par chescj animâi, dant un colp une vore dûr sei ae economie tradizionâl che ae culture des popolazions locâls. Il Consei regjonâl de Laponie (che, cundut che al aministre une regjon che e fâs part des tieris storichis dai sami, al ufrìs une rapresentance margjinâl a cheste comunitât) nol à tignût in nissun cont lis resons de comunitât native e, prime di cjapâ la sô decision, no si à nancje confrontât cui rapresentants sami. Pai aministradôrs regjonâi, di fat, i sami no gjoldin di nissun dirit di veto su lis sieltis di planificazion dal teritori e no je nissune leç che ju oblei a discuti cun lôr di chestis decisions.

Font: The Barents Observer, 30/04/19

Finlande: pas indenant inte difese dai dirits dai Sami

Cuant che tal 2017 i guviers di Finlande e Norvegje si vevin metûts dacuardi pal disfrutament de pescje dilunc dal sisteme fluviâl dal Deatnu / Teno / Tana che al scjavace la tiere dai Sami (Sápmi), i rapresentants des comunitâts locâls si vevin dâts adun par rivendicâ il dirit di viodi di lui e di gjestîlu in maniere autonome cence dal intervent e dal control dai stâts e a vevin decidût une serie di azions par lâ ta cheste direzion. Un pas indenant inta cheste bataie al rive di une sentence dal tribunâl distretuâl finlandês che al jere clamât a judicâ cinc ativiscj sami che a vevin pescjât intal flum cence tignî cont des gnovis regulis. I cinc a vevin basât la lôr difese sui articui de Costituzion finlandese che a garantissin ai Sami il dirit di mantignî e di svilupâ la lôr culture. Tant che part centrâl de culture sami la pescje tradizionâl – a disevin i cinc – no podeve jessi limitade de gnove normative statâl. Ai 6 di Març il tribunâl al à calcolât che no fossin resons validis par impedî aes comunitâts locâls di pescjâ cui sistemis tradizionâi e ju à duncje assolts des acusis. I ativiscj si spietin che la sentence e vegni impugnade in maniere di puartâ la cuistion denant de cort supreme. Cuntune sentence favorevule a chel nivel si crearès di fat un precedent che al larès a garantî i dirits di dutis lis comunitâts sami.

Font: The Barents Observer, 07/03/19

Finlande: violâts i spazis di autodeterminazion dai sami

Il comitât pai dirits umans de ONU al calcole falade la decision dal tribunâl aministratîf superiôr finlandês che al veve ametût un centenâr di personis intes listis eletorâls pal Parlament sami cuintri dal parê dai orghins eletorâi di cheste istituzion. Cun cheste decision, a spieghin i membris dal comitât, lis istituzions finlandesis a van cuintri dal dirit di autodeterminazion dai sami. Pal organisim de ONU la Finlande e à di meti in at ducj i passaçs che a coventin par evitâ che une situazion di cheste fate e torni a capitâ. Par lâ ta cheste direzion e je bisugne ancje di une revision de leç istitutive dal Parlament sami.

Font: The Barents Observer, 13/02/19

Finlande: Declarazion sui dirits dai popui natîfs, nuie ratifiche

L’esecutîf finlandês al à comunicât in forme uficiâl al Parlament che nol larà indenant cul progjet di leç imbastît ancjemò tal 2014 che si proponeve di ratificâ la Declarazion dai dirits dai popui natîfs de ONU. Pal guvier, propit i agns passâts di cuant che il test al è stât metût jù a rindaressin aromai superâts i siei contignût ma, cu lis elezions gjenerâls in program in Avrîl, nol è plui timp par mendâlu. Al è di almancul trente agns che, par un sant o par chel altri, lis istituzions finlandesis a rimandin la ratifiche dal tratât. Al centri dal contindi a restin i dirits su lis tieris dai Sami.

Font: The Barents Observer, 25/01/19

Finlande/Norvegje: Consei Sami critic cu la ferovie artiche

Il Consei Sami – organizazion no governative che e promôf i dirits e i interès des comunitâts sami – al è intervignût sul progjet di une ferovie artiche che e scjavaci lis regjons plui setentrionâls de Finlande e de Norvegje par peâ il rest de rêt feroviarie cul Mâr di Barents, plui o mancul tra Rovaniemi e Kirkenes. Pal Consei Sami, di là de sielte di percors che si fasarà, cheste linie e taiarà areis di passon e trois migratoris fondamentâi pes renis dant un colp une vore dûr ae economie tradizionâl e ae culture des popolazions locâls. Cun di plui, cul lassâ fûr lis comunitâts sami dal procès di svilup dal progjet, si za à violât i dirits di fonde de popolazion native di chestis tieris. La presidente dal Consei, Åsa Larsson Blind, e crôt ancje che daûr de ferovie a rivaran altris realtâts industriâls che a laran a incressi i problemis pal ambient, pes ativitâts e pe culture sami. Come prin pas, il Consei al domande ai guviers finlandês e norvegjês di inviâ daurman une consultazion di dutis lis realtâts rapresentativis des comunitâts nativis e di coinvolzilis in ducj i passaçs decisionâi leâts al progjet.

Font: The Barents Observer, 24/09/18

Sápmi: a risi l’orghin sorestatâl di politiche linguistiche

Il Sámi Giellagáldu – l’ent fondât intal 2013 par coordenâ i servizis e lis politichis linguistichis pes diviersis varietâts sami feveladis in Finlande, Norvegje e Svezie – al riscje di meti fin aes sôs ativitâts chest an che al ven par vie dal sotfinanziament. Cun di fat il ministeri des financis finlandês al à fat savê che tal 2019 al finanziarà l’ent cun mancul di 200 mil euros cundut che, dome par cuvierzi lis ativitâts davueltis in Finlande, si stime che a coventin almancul 370 mil euros. L’organisim al colabore ancje cul Parlament Sami de Finlande par difindi e par promovi la culture sami tai progjets di cooperazion internazionâl. Chel dal sotfinanziament al è un probleme che al tocje diviersis realtâts espression des comunitâts sami, comprendûts i Parlaments Sami de Norvegje e de Svezie.

Font: YLE, 21/08/18

Norvegje: scuintri istituzionâl tra guvier centrâl e Finnmark

A deventin inmò plui tiradis lis relazions tra la regjon plui setentrionâl de Norvegje e il guvier centrâl di Oslo, dopo che la presidente dal Consei regjonâl dal Finnmark, Ragnhild Vassvik, e à refudât di incuintrâsi cu la ministre pai afârs regjonâi, Monica Mæland. Al centri dal contindi e je la decision dal esecutîf norvegjês di procedi cu la fusion dal Finnmark cu la regjon dal Troms. Il Parlament de Norvegje al à za votât a pro de misure, ma il Consei dal Finnmark al refude di acetâ la decision e al à inmaneât un referendum popolâr là che la plui part de popolazion si à mostrade cuintri de decision dal guvier centrâl. Il Finnmark al è part de Tiere dai Sami (Sápmi), al confine cu la Federazion Russe e cu la Finlande e al à duncje une lungje tradizion di rapuarts internazionâi. Cheste regjon i da acet al Parlament Sami de Norvegje e la plui part des monts e dai boscs di cheste regjon a son gjestîts in maniere unitarie propite dal Consei dal Finnmark e dal Parlament Sami. In plui di sami e di norvegjês, intal so teritori e vîf ancje une impuartante comunitât finlandese (Kven) ricognossude come minorance. Par dutis chestis resons – e à spiegât Ragnhild Vassvik – no si intint di fâ nissun pas indaûr su la autonomie dal Finnmark.

Font: The Barents Observer, 19/08/18