27/03/20

Paîs Basc: proteste pai dirits dai presonîrs bascs in France

Par vie des limitazions leadis ae pandemie di coronavirus, lis trente iniziativis inmaneadis pai 8 di Avrîl dai Artesans pe pâs e di Bake Bidea intal Paîs Basc setentrionâl a àn vût di jessi scanceladis. La mobilitazion e jere stade imbastide par denunciâ lis politichis judiziariis e carcerariis repressivis metudis in at dal stât francês cuintri dai militants di ETA cundut che la organizazion no je plui in ativitât di un biel pieç e che il so disarmament al è rivât insom za trê agns indaûr. Il câs plui evident al è chel di Ion Kepa Parot, Jakes Esnal e Xistor Haranburu che propit ai prins di Avrîl a rivaran a trente agns di preson continuade si ben che, daûr de legjislazion francese, a podaressin jessi za di dîs agns in libertât condizionâl. Dutis lis domandis di acès aes misuris detentivis alternativis e ai sconts di pene che i trê presonîrs a varessin dirits a son stadis blocadis in maniere sistematiche dai publics ministeris. Viodût che lis manifestazions publichis a son saltadis, al è stât il stes coletîf dai militants bascs impresonâts a cjapâ la iniziative e al à invidât i citadins a scrivi tra i 25 di Març e i 8 di Avrîl une letare ae ministre pe justizie Nicole Belloubet e al president francês Emmanuel Macron par che a metin fin a cheste politiche repressive che e puarte dome dam ae gnove clime politiche e sociâl che si à inviade cu la fin de lote armade.
Font: Naiz:, 19/03/20

Scozie: nuie referendum su la indipendence tal 2020

Vie pal 2020 no si tignarà il gnûf referendum su la indipendence de Scozie. La conferme e je rivade dal stes guvier scozês intune comunicazion uficiâl inviade al esecutîf britanic là che si spieghe che chest an ducj i sfuarçs des istituzions scozesis si centraran inte lote cuintri de pandemie di coronavirus. Dutis lis formazions politichis rapresentadis intal Parlament scozês, ancje se cun acents diferents, a àn preseât cheste decision. Al è di dî che il guvier vuidât di Nicole Sturgeon si cjatave za tune posizion delicade, strent tra il dinei dal esecutîf britanic di poiâ un secont referendum e lis critichis dai moviments sociâi a pro de indipendence che lu calcolavin masse malsigûr intal imbastî la gnove consultazion.
Font: Naiz:, 18/03/20

Europe: reazions des comunitâts minorizadis al coronavirus

La pandemie di coronavirus no sparagne nissun lûc e nissune comunitât. Ancje lis nazionalitâts minorizadis europeanis a pain duncje i efiets di cheste situazion a partî de scancelazion di cetancj events in program, sedino di nature politiche, culturâl o linguistiche.

Stât spagnûl: critichis ONU sul rispiet dai dirits des minorancis

Lis istituzions spagnolis a àn vût une reazion rabiose denant dal rapuart presentât inta chestis zornadis dal relatôr speciâl de ONU su lis minorancis, Fernand de Varennes, su la fonde de visite fate vie pal 2019 intal stât spagnûl. Il document al met in evidence in particolâr la diference marcade che si à tra il ricognossiment formâl dal basc, dal catalan e dal galizian tant che lenghis couficiâls e la situazion che si à te realtât, massime tal sisteme judiziari e in part ancje ta chel educatîf. In Catalogne e tes isulis Baleârs si à po une incressite dai pidiments intal ûs de lenghe proprie in diviers servizis publics. De Varennes al segnale l’aument des leçs e dai pronunciaments judiziaris che a infuartissin la posizion dal castilian che, a so parê, a van fintremai cuintri de costituzion spagnole. Al cite in particolâr i atacs cuintri dal sisteme educatîf catalan, judicât invezit un model positîf sul plan internazionâl. No si pues acetâ – al zonte il relatôr de ONU – che e passi la idee che insegnâ tune lenghe minorizade al sedi alc di discriminatori, cuant che invezit al è juste il contrari. Cun riferiment al procès di autodeterminazion de Catalogne, De Varennes al à ricuardât l’aument preocupant ator pal stât spagnûl di atacs verbâi e ancje fisics anticatalans. Lis autoritâts statâls a àn contestât i contignûts dal rapuart dineant fintremai situazions – come chê de discriminazion des lenghis minorizadis inte justizie – che a son sostignudis di cetancj esemplis.
Font: VilaWeb, 16/03/20

Bulgarie: la EFA e domande di rispietâ i dirits dai macedons

La organizazion politiche internazionâl Aleance Libare Europeane (EFA, European Free Alliance) e à riclamât il guvier de Bulgarie par che al ricognossi e al rispieti i dirits de minorance macedone e par che i fasi cuintri a ogni tentatîf di limitâ la libertât di associazion. Cun di fat, i uficis dal ministeri de justizie a àn domandât al tribunâl regjonâl di Blagoevgrad di gjavâ de liste dai ents ricognossûts la Associazion civiche pe protezion dai dirits umans individuâi di fonde, organizazion leade ae minorance macedone che e jere stade regjistrade sul principi di chest an. Si trate dome dal ultin episodi denunciât dal partît Omo Iliden Pirin – moviment rapresentatîf de minorance macedone e membri de Aleance Libare Europeane – che al lamente lis discriminazions patidis e la violazion continuative dai dirits di cheste comunitât. La EFA e à ancje domandât ae Comission europeane di intervignî su lis istituzions de Bulgarie par che a rispietin i dirits des minorancis.
Font: EFA, 16/03/20

Paîs Catalans: l’OPLC al à decidût il plan di azions pal 2020

Ai 11 di Març si è dade adun la assemblee gjenerâl dal ufici public de lenghe catalane (OPLC) che al è nassût l’an passât par planificâ e meti in vore la politiche linguistiche te Catalogne dal Nord sot aministrazion francese. I sîs membris fondadôrs di cheste agjenzie a son il guvier francês, la regjon aministrative Ocitanie Pireneus – Mediterani, il dipartiment dai Pireneus Orientâi, il comun di Perpinyà / Perpignan, il sindacât intercomunâl pe promozion des lenghis ocitane e catalane (SIOCCAT) e la universitât “Perpignan Via Domitia”. La assemblee e à fat bon il plan di azions pal 2020, si è indotade di un belanç anuâl di 367 mil euros, e e à metût sù trê comission di lavôr tematichis che si ocuparan di aprendiment e trasmission, di ûs e difusion, e di comunicazion e cognossince.
Font: La Semaine du Rousillon, 14/03/20

Ucraine: trê modei scolastics diviers pes lenghis minorizadis

Il president ucrain Volodimir Zelenskij al à ratificât la leç di riforme dal sisteme educatîf fate buine dal Parlament che e previôt trê modei linguistics diferents pes diviersis minorancis che a vivin intal paîs. Il prin al è pensât pes comunitâts che no àn un stât daûr e che a son dislidrisadis dal lôr teritori origjinari, tant che i tatars de Crimee, e al previôt l’insegnament inte lôr lenghe native compagnât di un studi aprofondît dal ucrain. Il secont model al è invezit indreçât aes minorancis nazionâls che a fevelin une des lenghis de UE, tant che rumens e ongjarês (che, par numar, a rapresentin la seconde e la tierce minorance dal paîs), e al previôt un slargjament progressîf de presince de lenghe statâl che e partìs di cualchi ore tes primariis par rivâ almancul al 60% tes superiôrs. Il tierç model al vâl par chês altris minorancis (a partî di chê russofone) e dopo di une presince plui marcade de lenghe proprie tes primariis al previôt che tes secondariis l’ucrain al sedi doprât almancul pal 80% des oris di insegnament.
Font: Ukrainian News, 13/03/20

Paîs Basc: cun Aditu trascrizions automatichis par euskara

L’istitût sientific basc Elhuyar al à creât la plateforme informatiche Aditu (capî) che e permet la trascrizion automatiche di discors, conversazions e frasis par euskara e par castilian. Il ricognossiment dal fevelât al permet la trascrizion e la sottitulazion automatiche di audios e videos cun aplicazions pussibilis no dome tal setôr audiovisîf ma ancje tai mieçs di comunicazion, tai servizis ufierts des aministrazions publichis, tai mecanisims di assistence digjitâl e tal cjamp de acessibilitât pes personis cun disabilitâts. La plateforme, che par cumò e je disponibile a paiament, e ufrìs ancje une interface che, se al covente, e permet di comedâ a man lis trascrizions e i sottitui creâts di Aditu.
Font: EiTB, 12/03/20

Galizie: rapuart di A Mesa su la violazion dai dirits linguistics

Ai 12 di Març la organizazion galiziane A Mesa pola Normalización Lingüistica e à presentât il rapuart su lis segnalazions racueltis vie pal 2018 de Liña do Galego, il servizi creât par cjapâ sù lis denunciis su la violazion dai dirits linguistics. L’an passât lis segnalazions rivadis a son stadis 318, 15 in plui dal an prime. Il 45,28% des denunciis al diven dal compuartament des aministrazions publichis, cuasi un tierç a son riferidis al guvier de Comunitât autonome de Galizie. Chês altris segnalazions a tocjin pal 32,7% lis impresis gjestoris di servizis publics, pal 12,26% lis aziendis privadis e pal 9,75% i istitûts bancjaris. In ocasion de presentazion dal rapuart si à ancje riferît sui câs denunciâts intai agns stâts e che, propit in gracie de visibilitât dade aes segnalazions dai citadins, a son stâts comedâts daûr di ce che e previôt la normative. Intant de iniziative si à ancje ricuardât il rapuart definitîf presentât cualchi zornade prime dal relatôr speciâl de ONU su lis minorancis, Fernand de Varennes, là che si bat massime su la dibisugne di riviodi la cussì clamade leç sul plurilinguisim che e pidimente l’insegnament de lenghe proprie tes scuelis de Galizie.
Font: Galicia Confidencial, 12/03/20

ONU: in difese dal insegnament intes lenghis minorizadis

Intun rapuart presentât a Gjinevre ai 11 di Març, il consei dai dirits umans de ONU al riclame i stâts sui vantaçs che a divegnin dal insegnâ te lôr lenghe proprie ai fruts che a partegnin a comunitâts minorizadis. Sul lunc periodi l’insegnament inte lenghe de comunitât, dongje di chê statâl, al permet di miorâ i risultâts scolastics, di incressi i nivei di alfabetizazion e di fluence tes dôs lenghis, di sbassâ il numar dai zovins che a bandonin la scuele e di aumentâ la inclusion des fameis e de comunitât. Studiâ te lenghe proprie al jude ancje la autostime. Par cuintri, cuant che la lenghe de comunitât di partignince e ven lassade fûr dal insegnament, si costruìs un ambient che al favorìs la esclusion e la discriminazion. Une situazion, cheste ultime, che la ONU e calcole contrarie ai oblics leâts al rispiet ai dirits umans di fonde.
Font: EuropaPress, 12/03/20

Gales: ancje par galês i avîs in passe 170 stazions feroviariis

Dopo des segnalazions fatis indenant di diviersis realtâts impegnadis pai dirits linguistics, Transport for Wales (TfW) – la compagnie feroviarie cjapade in man plui di un an indaûr dal guvier dal Gales – e à fat savê che 171 des 222 stazions gjestidis de societât a son cumò indotadis di un sisteme di informazions audio ancje par galês. Al moment de acuisizion de compagnie, a pene un cuart des stazions a vevin un sisteme di comunicazion automatic in stât di doprâ in maniere corete ancje la lenghe proprie. Si à vût duncje di comprâ une tecnologjie adate che, dopo di jessi stade sperimentade sul finî dal an passât in cinc stazions e je stade cumò slargjade ancje te maiorance di chei altris scjâi gjestîts de compagnie. Dongje des informazions gjenerâls, il gnûf sisteme di avîs al permet di informâ in timp reâl i utents ancje sui cambiaments dal ultin moment.
Font: Railpro, 12/03/20

12/03/20

Cornualie: campagne par meti i cornics tal prossim censiment

Dick Cole, leader dal partît nazionalist cornic Mebyon Kernow, al à scrit al prin ministri, al ufici di gabinet e al ministeri dal interni dal guvier britanic par domandâ che tal censiment dal 2021 si previodi une vôs là che i citadins a puedin declarâsi di nazionalitât corniche, compagn di ce che al sucêt pai scozês, pai galês e pai irlandês dal Nord. Ta cheste maniere il guvier di Londre al darès un segnâl simbolic impuartant de sô volontât di rispietâ i impegns cjapâts cu la ratifiche de Convenzion cuadri pe protezion des minorancis nazionâls e di no fâ discriminazions cun chês altris comunitâts nazionâls che a formin il Ream Unît. Ai 4 di Març, fieste nazionâl de Cornualie, il prin ministri britanic al à dite un pâr di peraulis par cornic inte Cjamare dai Comuns ma – al dîs Cole – par mostrâ pardabon il rispiet par une comunitât a coventin ats concrets e invezit il guvier di Londre al à za mostrât di vê discriminât i cornics cuant che te gnove version dal passepuart al à cjapât dentri tescj par gaelic scozês, irlandês e galês ma no te lenghe proprie de Cornualie. Il rapresentant dal Mebyon Kernow al à invidât i citadins cornics a scrivi ancje lôr al guvier britanic par pretindi di vê ricognossude la lôr nazionalitât intal prossim censiment gjenerâl.
Font: Mebyon Kernow, 05/03/20

Galizie: prime serie televisive par galizian su HBO España

Il mont dal audiovisîf galizian al è daûr a vivi une stagjon pardabon impuartante. Par chel che al rivuarde il cine, il 2019 al jere stât l’an dal film par galizian “O que arde” dal regjist Óliver Laxe, vincidôr di une des sezions dal festival di Canas / Cannes. Sul plan des produzions televisivis, invezit, “O sabor das Margaridas” no jere stade dome la prime serie televisive zirade par galizian lade in onde su Netflix, ma ancje une des plui viodudis intal Ream Unît tra chês no par inglês. Il 2020 si vierç invezit cul ricognossiment otignût de serie thriller in sîs pontadis “Agua Seca”. Cun di fat, cheste produzion televisive zirade tra Vigo e Lisbone e je la prime serie par galizian (e par portughês) a jessi cjapade dentri tal catalic di HBO España là che si podarà viodile in lenghe origjinâl cui sottitui par castilian o par inglês, o pûr dopleade par castilian.
Font: Serializados, 04/03/20

Paîs Basc: in Navare l’euskara al è un merit pal personâl public

La valorizazion de cognossince de lenghe basche come merit par lavorâ intes aministrazions publichis des areis no bascofonis de Navare e je legjitime ma e à di lâ daûr di criteris di proporzionalitât e di jessi funzionâl ae incarghe che si larà a davuelzi. Al è chest l’indreçament che al rive dal consei de Navare che al jere stât interogât in proposit dal guvier de Comunitât autonome che al è daûr a riviodi la normative dopo che une sentence dal tribunâl superiôr di justizie de Navare e veve boçât il regolament cui criteris linguistics pe selezion dal personâl des aministrazions publichis locâls fat bon inte legjislature stade. Il consei de Navare al ricuarde ancje che no si pues dineâ di ricognossi come merit la cognossince dal euskara cuant che chest criteri al è za in vore par lenghis tant che il francês o l’inglês che no son propriis de Navare.
Font: EiTB, 04/03/20

Paîs Catalans: iniziativis par promovi la lenghe tes tecnologjiis

Te suaze des azions par promovi la lenghe proprie, la direzion gjenerâl pe politiche linguistiche dal guvier catalan e à ativât une linie di contribûts par promovi l’ûs de lenghe catalane intal setôr tecnologjic, massime chel indreçât ai zovins. La misure e previôt jutoris finanziaris pes impresis che a disvilupin prodots digjitâi ancje par catalan, soredut aplicazions e video zûcs. Daûr dai ultins dâts statistics al ven fûr che il 73,3% dai citadins de Catalogne al dopre il catalan intai messaçs cun sisteme mobil, il 72,8% lu fâs intes rêts sociâls, il 45,7% al à il celulâr configurât par catalan e il 46,4% il sisteme operatîf dal ordenadôr. Si vûl duncje sburtâ lis impresis a rispuindi a chest interès fuart de bande de int. Ta chestis setemanis il guvier de Catalogne al à ancje presentât il progjet par un motôr vocâl par catalan cun modui vierts di ricognossiment vocâl (ASR), di interpretazion dal lengaç naturâl (NLU), di gjestion dal dialic (DM), di gjenerazion des rispuestis (NGL) e di vôs sintetiche (TTS). Chescj imprescj a saran metûts a disposizion des aministrazions publichis, des organizazions e ancje des societâts privadis che a vuelin proponi tra i lôr servizis ancje chei vocâi par catalan.
Font: Generalitat de Catalunya, 04/03/20

Bretagne: pas indaûr inte segnaletiche bilengâl dal Morbihan

Inte gnove segnaletiche bilengâl metude fûr su lis stradis di An Oriant / Lorient de aministrazion comunâl e di chê dipartimentâl dal Mor Bihan / Morbihan, in plui di jessi sot di chei par francês, i nons par breton a son scrits cun caratars plui piçui, par corsîf e in cierts câs fintremai tra parentesis. Al è po evident che la version bretone no je stade nancje revisionade dal moment che in plui di cualchi câs e propon erôrs ancje elementârs. A denunciâ la situazion e je la organizazion pai dirits linguistics Ai’ta! che e à segnalât cemût che la azion des dôs aministrazions e va in direzion contrarie di chê di altris ents locâi bretons e fintremai di chê statâl. I militants de organizazion a domandin duncje aes autoritâts locâls di meti in cjamp une politiche che e rispieti la lenghe proprie e a àn za inviât une serie di mobilitazions par denunciâ cheste situazion discriminatorie.
Font: Agence Bretagne Presse, 01/03/20

Gales: e va indenant a cressi la voie di autoguvier

Rivât ae sô setime edizion, il sondaç anuâl che al ven fat par misurâ la voie di autoguvier dai galês e il lôr rapuart cu lis istituzions locâls al mostre che e cres framieç de int la voie di indipendence. Cun di fat, rispiet ae prime edizion dal 2014, i galês che si declarin a pro de plene indipendence a son passâts dal 5 al 11%, cuntun salt indenant dal 4% rispiet al an passât. Chei che invezit a domandin il trasferiment di plui competencis ae Assemblee nazionâl galese a son passâts dal 37 al 43%. In totâl, duncje, chei che a domandin plui autoguvier pal Gales a son passâts dal 42 al 54%. Chei sodisfats pe situazion a son calâts dal 28 al 25%. Chei che invezit a volaressin abolî la Assemblee o gjavâi competencis a son colâts dal 26 al 16%.
Font: Nation Cymru, 01/03/20

Paîs Basc: gnove mobilitazion in Navare pal euskara a scuele

A jerin uns 5 mil lis personis che sabide ai 29 di Fevrâr a àn partecipât ae manifestazion che si à tignude pes stradis di Iruñea / Pamplona par rivendicâ il dirit a studiâ par euskara in ogni grât de scuele publiche e in dute la Navare, e par fâi cuintri ai atacs ae lenghe basche puartâts indenant di diviersis aministrazions locâls di diestre. L’esempli plui penç al rive propit de capitâl de Navare, là che l’esecutîf vuidât dal sindic Enrique Maya al à decidût che cul prossim an scolastic si larà a taiâ plui de metât des classis in lenghe basche pai fruts di 0 a 3 agns. Un altri câs al è chel di Mendigorria là che, cundut de domande des fameis, lis istituzions locâls si refudin di inviâ un percors scolastic a imersion par basc. La mobilitazion e je stade clamade dongje di un grup di gjenitôrs penalizâts di chestis decisions politichis e e à cjatât la adesion di cetantis realtâts associativis e culturâls, di diviers sindacâts (ELA, LAB, ESK e STEILAS) e partîts (EH Bildu, Geroa Bai, Podemos). I manifestants a àn batût sul fat che i spiete al guvier de Navare di garantî i dirits linguistics di ducj i citadins de comunitât e di sigurâ une avualiance di oportunitâts par ducj.
Font: EiTB, 29/02/20

Paîs Catalans: passe cent mil a Perpignan par Puigdemont

Si scugne lâ indaûr di plui di un secul par cjatâ te Catalogne dal Nord une manifestazion cussì partecipade come chê dai 29 di Fevrâr stâts. Cun di fat, tra lis 110 mil (dât de polizie francese) e lis 200 mil personis (pai organizadôrs) si son dadis adun a Perpinyà / Perpignan par dâi il bon acet al president catalan in esili, Carles Puigdemont, e ai ex membris dal so guvier Clara Ponsatí e Toni Comín che, pe prime volte di cuant che la justizie spagnole e à dât fûr cuintri di lôr dai mandâts di arest par vie dal lôr rûl intal procès di autodeterminazion, in gracie de imunitât che a àn come europarlamentârs a àn podût tornâ in Catalogne, ancje se dome te sô part sot aministrazion francese. La iniziative e je stade inmaneade dal Consell per la República – struture rapresentative des istituzions catalanis in esili – cul jutori di organizazions di aree indipendentiste tant che Òmnium Cultural e ANC.

Scozie: indot di 2,3 milions pal festival de culture gaeliche Mòd

Daûr dal rapuart davuelt di une societât specializade, la edizion 2019 di Am Mòd Nàiseanta Rìoghail / The Royal National Mòd – il plui impuartant festival scozês dedicât ae lenghe e ae culture gaeliche – che si à tignude dai 11 ai 19 di Otubar a Glaschu / Glasgow e à disvilupât un impat di 3 milions e 200 mil sterlinis pe economie locâl e e à puartât in citât 12 mil personis tra apassionâts e turiscj rivâts ancje dal forest. Am Mòd e je la vitrine plui impuartante pe lenghe, pe leterature e pe musiche gaeliche de Scozie. I siei passe dusinte events a permetin però di cognossi ancje chei altris aspiets de culture gaeliche, a partî dai bai par rivâ ai sports tradizionâi. I dâts a mostrin duncje la incressite de impuartance, ancje economiche, di cheste manifestazion itinerante inmaneade di An Comunn Gàidhealach e poiade de agjenzie pe lenghe gaeliche Bòrd na Gàidhlig. La edizion di chest an si davuelzarà te citât Inbhir Nis / Inverness.
Font: Bòrd na Gàidhlig, 27/02/20

Aragon: al è daûr a rivâ il prin tradutôr automatic dal aragonês

Ai 27 di Fevrâr e je stade presentade la prime version di “TraduZe”, il prin tradutôr automatic dal aragonês che al è cumò inte fase de sperimentazion. Si trate di une iniziative che si insuaze tun progjet european fat adun cun bascs e ocitans che si propon di disvilupâ tecnologjiis informatichis intes lenghis propriis dai trê teritoris interessâts. Simpri par chel che al rivuarde l’aragonês, si à prontât il prototip di sintesi vocâl che al sarà disponibil dentri de fin di Març e il tierç inzornament dal “Aragonario”, il dizionari di aragonês in rêt che al è rivât a passâ lis 23 mil jentradis. Il numar dai utents di chest imprest informatic al è cressût in maniere significative e, in dì di vuê, al conte une medie di un miâr di consultazions par dì.
Font: El Periodico de Aragón, 27/02/20

28/02/20

Paîs Catalans: in vore par un progjet gnûf di liberazion nazionâl

Ai 29 di Fevrâr il president catalan in esili, Carles Puigdemont, e i ex membris dal guvier Clara Ponsatí e Toni Comín a tornaran in Catalogne, ma ta chê dal Nord sot aministrazion francese. I trê a parteciparan a di une iniziative inmaneade dal Consell per la República a Perpinyà / Perpignan là che, in gracie de imunitât che a àn come europarlamentârs, a puedin vignî cence jessi arestâts cemût che invezit al sucedarès se a vessin di passâ la frontiere cul stât spagnûl. I organizadôrs a stimin une partecipazion di almancul 80 mil personis, come a dî la plui grande manifestazion di place mai viodude a Perpignan. Za une setemane prime in citât e tai paîs dongje no si cjatave plui un puest par durmî e i biliets dai trens e dai bus in servizi tra Catalogne dal Sud e dal Nord a jerin cuasi esaurîts, intant che organizazions tant che l’ANC e l’Òmnium Cultural a vevin jemplât di bessolis uns cuatricent corieris.

Paîs Basc: mobilitazion intal Nord pai dirits dai presonîrs

I grups Artesans pe pâs e Bake Bidea a son daûr a inmaneâ pai 8 di Avrîl une trentine di manifestazions e di presidis ator pal Paîs Basc setentrionâl. La mobilitazion e je stade presentade intant di une conference stampe che si à tignude ai 21 di Fevrâr a Baiona / Bayonne. I rapresentants dai doi moviments civics a àn motivât cheste decision cul fat che a trê agns de conclusion dal procès di disarmament di ETA la politiche judiziarie e carcerarie dal stât francês cuintri dai militants di cheste organizazion e je restade sù par jù la stesse di cuant che ETA e jere ancjemò in ativitât. Cun di fat, ancje tal stât francês, a son diviers i etarras presonîrs che no gjoldin dai sconts di pene o dai dirits che a vegnin sigurâts ai criminâi comuns. Baste pensâ che cuatri di lôr – Unai Parot, Jon Kepa Parot, Jakes Esnal e Xistor Haranburu – a rivaran cui prins di Avrîl a vê passât in preson plui di 31 agns di file. Cun chestis politichis, a spieghin i organizadôrs de iniziative, nol è pussibil saltâ fûr ad in plen dal conflit e creâ une clime di pâs.
Font: Mediabask, 21/02/20

Paîs Basc: mobilitazion in Navare cuintri de euskarafobie

«Parcè che l’euskara al è un dirit, e vonde!» Al è il sproc sielzût pe manifestazion che si davuelzarà tal dopodimisdì di sabide ai 29 di Fevrâr pes stradis di Iruñea / Pamplona. La iniziative e je stade clamade adun par fâi cuintri ai atacs simpri plui frecuents ae lenghe basche puartâts indenant in Navare des aministrazions di diestre. L’esempli plui penç al rive propit de capitâl de Navare, là che la gnove maiorance vuidade dal sindic Enrique Maya e à decidût che cul an scolastic 2020-2021 si larà a taiâ plui de metât des classis in lenghe basche pai fruts di 0 a 3 agns. L’esecutîf comunâl al è stât protagonist ancje di altris azions cuintri de presince e dal ûs public dal euskara, intant che spetacui par fruts e cors scolastics in lenghe basche a son stâts fermâts o pidimentâts ancje in altris localitâts de Navare. La manifestazion e vûl duncje mostrâ la poie popolâr pe lenghe e denunciâ chescj episodis di euskarafobie.
Font: Naiz:, 21/02/20

Paîs Catalans: no di Madrid a clamâ “catalan” il “valenzian”

La organizazion Acció Cultural del País Valencià (ACPV) e à proponût al guvier spagnûl e ai partîts che lu poin in forme direte o che, cu la lôr astension, i permetin di stâ in pîts (PSOE, Unidas Podemos, ERC, Junts per Catalunya, Compromís, BNG, EAJ-PNV e EH Bildu) di ricognossi la unitarietât de lenghe catalane cul doprâ chest tiermin al puest di “lenghe valenziane” cemût che invezit al sucêt inta cheste Comunitât autonome. Ancje se i linguiscj e la cort costituzionâl spagnole a àn bielzà certificât che si trate di chê stesse lenghe, il statût di autonomie de Comunitât e la plui part des leçs locâls e statâls a doprin la forme “lenghe valenziane” causant problemis no di pôc sei sul plan pratic che te percezion de int. Lis autoritâts di Madrid a àn però decidût di lassâ lis robis cemût che a son. De bande sô, il guvier valenzian – formât di une aleance tra PSOE, Unidas Podemos e Compromís – al à manifestât la volontât di lâ indenant cul tiermin doprât dal statût di autonomie.
Font: El Priodic, 18/02/20

Asturiis: program par alfabetizâ par asturians i adults

La direzion gjenerâl pe politiche linguistiche dal guvier des Asturiis e inviarà cors di alfabetizazion e di formazion par adults par permetiur di frontâ cun sucès i esams di certificazion linguistiche. Juste l’an passât l’esecutîf al à fat bon il decret che al fisse i nivei di competence tal ûs dal asturian daûr dai criteris dal cuadri comun european di riferiment pes lenghis e ta chest mês di Mai si tignaran i prins esams di certificazion. In plui che par asturian, i cors a permetaran di miorâ ancje lis competencis linguistichis par galizian, lenghe che si fevele te part plui ocidentâl de comunitât autonome.
Font: La Vanguardia, 18/02/20

Gales: indenant cu la campagne pe devoluzion pe tv publiche

Il guvier britanic al è daûr a viodi se trasformâ la BBC intun servizi a paiament, gjavant cussì il cjanul che cumò i citadins a pain pe radiotelevision publiche. La manovre e preocupe no pôc la Cymdeithas yr Iaith Gymraeg, la organizazion pe lenghe galese, che zaromai di agns e puarte indenant une campagne par otignî la devoluzion al guvier galês des competencis e des risorsis pal setôr radiotelevisîf. Cun di fat, in dì di vuê, la television publiche in lenghe galese e ven finanziade pe plui part propit cui fonts che a divegnin dal cjanul. Pe Cymdeithas i conservadôrs che a son al guvier a Londre no puedin decidi sul avignî de radiotelevision publiche in Gales, là che a rapresentin dome une minorance. La organizazion e à duncje tornât a bati cun inmò plui fuarce su la devoluzion di cheste competence. La sô no je une bataie solitarie dal moment che, daûr di un sondaç fat che nol è tant, il 65% de popolazion galese al poie la devoluzion.
Font: Cymdeithas, 17/02/20

Bosgne: la part serbe e torne a sburtâ pe separâsi

Cundut dai invîts ae cautele e al rispiet de legjislazion statâl rivâts dal president de Republiche serbe, Aleksandar Vučić, il membri serp de presidence unitarie bosgnache, Milorad Dodik, al à manifestât la intenzion di imbastî une consultazion par decidi l’avignî de Republika Srpska, o sei la part serbe de Bosgne. No je la prime volte che si fâs indenant la volontât di davuelzi un referendum su la autodeterminazion ma fin cumò i tentatîfs di lâ ta cheste direzion par viis legâls a son stâts blocâts des autoritâts centrâls. La boçadure de bande de cort costituzionâl di une leç de Republika Srpska su la proprietât dai terens agricui e à tornât però a scjaldâ i spirts, ancje parcè che la presince te cort di judiçs forescj e ven considerade come une menace continuade ae autonomie dai serps. Par altri la cuistion dai judiçs forescj – espression dai stâts intervignûts intai conflits balcanics (USA, Grande Bretagne, Gjermanie, France e Italie) – e ven cumò contestade ancje de part cravuate de federazion. Dodik al à dite che no si vûl destabilizâ la regjon ma che i serps de Bosgne no i stan plui a subî lis decisions cjapadis di altris e a àn di podê decidi di bessôi il lôr avignî.
Font: Balkan Insight, 15/02/20

Stât francês: prin sì ae propueste di leç su lis lenghis

Ai 13 di Fevrâr la Assemblee francese e à fate buine in prime leture la propueste di leç presentade dal deputât breton Paul Molac che e interven cun misuris di tutele des lenghis minorizadis feveladis dentri dal stât francês. Il proviodiment al è passât cundut dal parê contrari manifestât dal ministri pe educazion Jean-Michel Blanquer par cont dal guvier, ma al à vudis taiadis lis misuris plui impuartantis, massime par chel che al rivuarde l’insegnament. Tra lis novitâts si àn garanziis sul ûs de segnaletiche bilengâl e dai segns diacritics doprâts des lenghis minorizadis intai ats publics. Cun di plui si va a intervignî su la cussì clamade leç Toubon dal 1994 che e veve chê di difindi la lenghe francese de invasivitât dal inglês ma che po e je stade doprade soredut cuintri des lenghis propriis. Il test al varà cumò di passâ pal vôt dal Senât che, za in altris ocasions, al à boçât proviodiments a pro des lenghis minorizadis che a vevin passât il tamês de Assemblee francese.
Font: Jornalet, 15/02/20; R&PS, 20/02/20

Paîs Catalans: criteri linguistic pai funzionaris valenzians

Il guvier de Comunitât Autonome Valenziane al à fat bon il progjet di riforme de normative su la funzion publiche che, pe prime volte, al previôt che cui che al vûl lavorâ te aministrazion publiche locâl al vedi une cognossince certificade dal valenzian, o sei la varietât catalane fevelade tal paîs. Fin cumò la Comunitât Valenziane e jere la uniche tra chês cuntune lenghe couficiâl che no lu previodeve. Al sarà un regolament a fissâ i nivei di competence linguistiche che a saran domandâts a seconde dal puest ocupât. Il regolament al sarà disvilupât di une comission di esperts intant che il disen di leç al passarà pal esam dal Parlament.
Font: La Vanguardia, 14/02/20

Irlande: iniziative pe segnaletiche bilengâl a Belfast

E je cumò al esam dal consei comunâl di Béal Feirste / Belfast une iniziative fate indenant dal Sinn Féin – il partît republican irlandês – che si propon di semplificâ la procedure par dâ aes stradis de citât un non bilengâl. In dì di vuê il regolament comunâl su la toponomastiche stradâl al previôt che la domande par inviâ il procès e sedi firmade di almancul un tierç dai residents inte vie là che, dongje dal non par inglês, si vûl zontâ ancje chel par irlandês. Dopo di chest prin passaç, i residents a son invidâts a dî la lôr par mieç di cuatri pussibilitâts, ven a stâi no rispuindi, dî che no i interesse, declarâsi contraris o pûr dî di sì. Par vê la segnaletiche bilengâl al covente che doi tierçs dai residents cun dirit di vôt a sedin dacuardi e chest al vûl dî che ducj chei che no votin, che a disin di no o che no i interesse a son calcolâts di contraris. La iniziative dal Sinn Féin e propon invezit che par decidi di meti il non des stradis in forme bilengâl al basti il vôt a pro dal cincuante par cent plui un di chei che a votin.
Font: Irish News, 14/02/20

Letonie: progjet par limitâ il rus par television

Il president de Letonie, Egil Levits, al à fat indenant une propueste che e ponte a mendâ la normative sui mieçs di comunicazion. Il cambiament principâl al sarès chel di imponi un 80% minim di programazion intes lenghis uficiâls de Union Europeane. Levits al spieghe che l’intindiment al è di ufrî ai citadins une television plui pluraliste, cun programs di cualitât e che e infuartissi il sens di partignince dal paîs baltic ae dimension culturâl europeane. La prime consecuence dal proviodiment e sarès però chê di ridusi a no plui dal 20% la programazion par rus, o sei la lenghe de plui grande minorance de Letonie e la lenghe foreste plui fevelade tal paîs.
Font: Unian.info, 11/02/20

13/02/20

Ocitanie: prins pas par incressi la tv par ocitan

I àn coventât agns di mobilitazions ma cumò il Collectiu Occitan al à rivât a puartâ la presince cuotidiane dal ocitan inte television publiche ae atenzion dal Parlament francês, là che la comission culture e je daûr a studiâ une propueste di leç in proposit. Ta cheste suaze la deputade Aurore Bergé, che e à la incarghe di meti jù la relazion parlamentâr su la propueste, si è cjatade ai 5 di Fevrâr cuntune delegazion dal Collectiu Occitan. A sostignî cheste bataie a son ancje 618 comuns che a àn votât une mozion là che si domande la presince cuotidiane dal ocitan par television. In dì di vuê, la television publiche francese e ufrìs dome 17 oris par ocitan ad an, come a dî pôc plui di une ore al mês.
Font: Jornalet, 07/02/20

Paîs Basc: in cressi l'euskara tra i zovins de Navare

Daûr dai risultâts de ultime inchieste sociâl e su lis cundizions di vite, il 84,6% de popolazion de Navare dai 15 agns insù al à di prime lenghe il castilian, il 5,9% il basc, il 3,4% dutis e dôs, e il 6,1% une altre lenghe. Se si cjale invezit ae lenghe doprade par solit in cjase il dât dal castilian al va sù al 89,7% e chel dal euskara al cale al 4,2%. La situazion e je avonde stabile rispiet a cualchi an indaûr ancje se si à une lizere incressite des personis che a àn di prime lenghe tant il basc che il castilian. Al è però di dî che la cognossince dal euskara e cres cul sbassâsi de etât. Di fat, a front di un 22,5% di zovins che a declarin di capî ben il basc, la percentuâl si sbasse al 13,7% inte fasse di etât dai 30 ai 44 agns, al 10,5% tra i 45 e i 59 agns, e al 8,6% tra chei cun 60 agns e passe.
Font: Naiz:, 06/02/20

Stât francês: nons propris ancje tes lenghis minorizadis

Il president dal Parlament francês, Richard Ferrand, al à comunicât che i regjistris civîi a acetaran ancje i nons scrits cun grafemis che no partegnin ae lenghe francese ma che a son doprâts intes lenghis minorizadis feveladis dentri dai confins statâi. Dopo che tal 2014 sul boletin uficiâl statâl e jere stade publicade une circolâr che e permeteve di doprâ dome i segns diacritics doprâts dal francês si vevin moltiplicâts i câs di gjenitôrs bascs, bretons, catalans, ocitans o di altris comunitâts minorizadis che no vevin podût fâ scrivi in maniere corete tai regjistris anagrafics i nons che a vevin sielzût pai lôr fîs. Il câs che al veve fat plui scjas si lu veve vût intal 2017 in Bretagne, ma un gjenitôr de Catalogne Nord al veve fintremai puartade la cuistion al esam de cort di justizie europeane.
Font: Jornalet, 06/02/20

Asturiis / Aragon: prins esams di certificazion linguistiche

Il guvier des Asturiis al à convocât pal mês di Mai i prins esams di certificazion di lenghe asturiane. Lis provis a saran viertis a di un massim di 500 personis. Chês che a passaran i esams a podaran doprâ i certificâts come titul di merit intai concors fats des aministrazions locâls. L’esecutîf des Asturiis al à fat bon intal Jugn dal an passât il decret che al fisse i nivei di competence tal ûs dal asturian daûr dai criteris fissâts dal cuadri comun european di riferiment pes lenghis, e plui tal specific pai nivei di base A1 e A2, par chei mezans B1 e B2, e pal C1. Dopo dal prin esam, che al interesse il nivel B2, il guvier si è impegnât a davuelzi almancul une session di esams ad an par ogni nivel. L’asturian al jere restât l’ultin tra lis lenghis minorizadis dopradis intal ream di Spagne a no vê une certificazion, cun di fat lis primis provis pal aragonês si son davueltis prime de fin dal 2019 cu la partecipazion di 473 personis. Ta chel câs i esams a interessavin trê nivei: l’A2 (là che al è passât il 79,07% dai candidâts), il B1 (che al à vût il 49,09% di promòs) e il B2 (cul 71,94% di candidâts che a àn otignude la certificazion).
Font: El Comercio, 04/02/20; La Voz de Asturias, 06/02/20

Gales: a pro de indipendence un galês su cuatri

Dopo des elezions politichis britanichis di Dicembar la poie ae indipendence dal Gales e je cressude dal cinc par cent. Daûr dai scandais periodics davuelts de agjenzie YouGov, sul principi di Dicembar dal 2019 i galês che si declaravin a pro de indipendence a jerin il 22%, cumò a son passâts al 27%. E je ancjemò cetant int di convinci, al à comentât il puartevôs dal coordenament pe indipendence YesCymru Siôn Jobbins, ma un 27% di eletôrs indipendentiscj al rapresente une fonde salde dulà podê lavorâ. Par coinvolzi e mobilitâ la popolazion a pro di un Gales indipendent a son za stadis programadis trê manifestazions di place in Avrîl, Jugn e Setembar. In Scozie invezit, pe prime volte, la opzion indipendentiste e à tocjât il 52%.
Font: Nation Cymru, 03/02/20

Paîs Catalans: catalan prime lenghe proprie de Andorra

Il 46% de popolazion che e vîf in Andorra al calcole il catalan di lenghe proprie, a front di uns 42% che si identifiche cul castilian e di un passe 10% cul portughês. I dâts a saltin fûr de ultime inchieste publicade dal servizi di politiche linguistiche dal piçul stât pirenaic. La ricercje e mostre ancje che la identificazion cul catalan e je plui alte rispiet ae presince dal catalan come lenghe materne e che la trasmission linguistiche intergjenerazionâl e je positive pal catalan. Lis percentuâls altis di castilian e portughês a son leadis a di une fuarte imigrazion rivade tai agns stâts de penisule iberiche.
Font: Generalitat de Catalunya, 03/02/20

Paîs Basc: tai penç de educazion infantîl par basc a Iruñea

Il sindic di Iruñea/Pamplona Enrique Maya – espression de gnove maiorance di diestre che e guvierne la capitâl di Navare – al à confermât che cul an scolastic 2020-2021 si inviarà un program che al larà a smiezâ la ufierte di classis in lenghe basche pai fruts di 0 a 3 agns. Par agns la presince dal euskara tes scuelis citadinis e jere stade margjinalizade ma tal 2015, cuntune coalizion nazionalitarie al guvier, i puescj cul model a imersion par basc a jerin cressûts dal 11 al 28% e lis scuelis che lu ufrivin a jerin passadis di 2 a 4. Par Maya però la ufierte par euskara e je masse e cussì, tal zîr di trê agns, lis scuelis cul basc veicolâr a tornaran e jessi dome dôs e di chestis une e sarà a miezis cul model par castilian. Par protestâ cuintri di cheste iniziative il prin di Fevrâr si è tignude une manifestazion moltitudinarie che e à jemplât la place e lis stradis dulintor dal palaç comunâl. A contestâ cun fuarce la decision dal guvier citadin a son ancje i partîts nazionalitaris (EH Bildu e Geroa Bai) che a domandin che prime di ogni modifiche dal sisteme in vore si ledi a viodi cuale che e je la domande linguistiche reâl de bande des fameis.
Font: EiTB, 01/02/20

Galizie: prime servizi di assistence virtuâl par galizian

La universitât di Vigo e je la prime istituzion publiche a meti a disposizion une aplicazion di assistence e di servizi pai utents basade suntune inteligjence artificiâl par galizian. No si trate dome di un sisteme di ricercje di informazions, ma di un imprest in stât di superâ ambiguitâts semantichis, di analizâ sul plan gramaticâl lis frasis e di capî il contest de conversazion. La aplicazion e je cussì in stât di imbastî une sorte di conversazion cul utent, i ufrìs informazions in detai sui procès di iscrizion e sui contats cu la direzion universitarie, e e je buine di rispuindi a domandis gjenerâls e a chês plui frecuentis. Si trate di un imprest indreçât soredut ai students, ma che al è util ancje pal personâl docent e par chel aministratîf.
Font: Universidade de Vigo, 31/01/20

Paîs Catalans: lenghe catalane discriminade dal Stât e de UE

La organizazion Plataforma per la Llengua e à publicât il so rapuart trimestrâl su lis discriminazions linguistichis inte legjislazion spagnole e ta chê europeane. Tai ultins trê mês dal 2019 si àn vudis 15 normis statâls e 13 comunitariis che a discriminin cui che al fevele par catalan. A nivel european la esclusion dal catalan e diven in primis dai dinei dal stât spagnûl di ricognossilu come lenghe uficiâl a nivel statâl. Par cheste reson, par esempli, no si puedin presentâ petizions par catalan al Parlament o al tribunâl european. Se si cjale ai dâts complessîfs dal 2019, lis normis discriminatoriis a son stadis in dut 134. Tal 2018 a jerin stadis 139.
Font: PFPLL, 31/01/20

Paîs Catalans: riforme des competencis linguistichis tes Baleârs

Il guvier des Baleârs al à decidût di meti sù un grup di lavôr par mendâ la normative che e regole lis competencis linguistichis di cui che al insegne par catalan intes scuelis des isulis. La taule di vore e je formade di rapresentants dal guvier, des istituzions scolastichis e dai sindacâts di categorie. Tra i siei compits si varà chel di superâ lis anomaliis che a son intal sisteme di abilitazion dai insegnants cumò in vore e di rivâ a di un sisteme di competencis linguistichis pal insegnament compatibil cun chel in vore in Catalogne e cun chel che si è daûr a imbastî tal Paîs Valenzian.
Font: La Vanguardia, 29/01/20

Scozie: prime scuele par gaelic intal Ayrshire dal Nord

Chest Astât a Cill Fhinnein / Kilwinning si inviarà la prime scuele a imersion par gaelic dal Ayrshire dal Nord. Un tant al è il risultât dal lavôr inviât intal 2017 di un grup di gjenitôrs che in forme volontarie a vevin metût sù un nît cul gaelic veicolâr. L’an passât il lavôr di sensibilizazion fat ta chescj agns al à permetût di domandâ al Consei provinciâl di inviâ une scuele primarie a imersion e di otignî une rispueste positive. Cumò a son partidis lis iscrizions e cul mês di Avost la scuele e tacarà la sô ativitât. Tal zîr di un an, ator pe Scozie, il sisteme educatîf a imersion par gaelic al è aumentât dal 8% e lis prospetivis a son chês di lâ indenant a cressi.
Font: Bòrd na Gàidhlig, 27/01/20

30/01/20

Paîs Basc: fameis in difese des scuelis par basc di Iruñea

Un grup di gjenitôrs di Iruñea/Pamplona cu la poie dai sindacâts nazionalitaris LAB, ELA e STEILAS al à inmaneât pal prin di Fevrâr une manifestazion denant dal palaç comunâl par rivendicâ il dirit dai fruts a studiâ par euskara. Cul mês di Març si inviaran lis iscrizions intes scuelutis comunâls e cetantis fameis a son preocupadis che la gnove maiorance che e guvierne la citât e puedi taiâ i puescj disponibii cul basc veicolâr. Par agns la presince dal euskara tes scuelis di Iruñea/Pamplona e je stade margjinâl ma tal 2015, cu la coalizion nazionalitarie progressiste al guvier, il model a imersion par euskara al jere passât dal 11 al 28% intes scuelutis par fruts di 0 a 3 agns. Cumò però il gnûf sindic, espression de diestre spagnoliste, al à declarât che tes scuelis citadinis il basc al è masse. Viodûts i proviodiments za cjapâts de gnove aministrazion par margjinalizâ l’euskara sul plan de comunicazion istituzionâl e des iniziativis culturâls, in tancj a son preocupâts che il prossim pas al sedi propit chel di une riduzion de ufierte scolastiche in lenghe basche.
Font: Noticias de Navarra, 24/01/20

Scozie: gaelic prime lenghe a scuele tes isulis ocidentâls

I fruts che chest Astât a tacaran lis scuelis primariis intes isulis ocidentâls de Scozie a varan in automatic il gaelic come lenghe veicolâr, almancul che i gjenitôrs no domandin il contrari. Il sisteme educatîf a imersion par gaelic (GME) al jere za disponibil intai centris scolastics di cheste part de Scozie ma fin cumò a vevin di jessi lis fameis a domandâlu. Si trate duncje di un cambiament che al à un valôr simbolic impuartant dal moment che al met il gaelic come lenghe ambientâl di riferiment. La decision e je stade cjapade dal Consei des isulis ocidentâls (Comhairle nan Eilean Siar) ancje par vie che cheste e je la aree de Scozie là che il gaelic al è plui fevelât (52% de popolazion). Ancje lis fameis che a vegnin di fûr, al à spiegât il diretôr scolastic dal distret, a domandin che si ur insegni il gaelic ai lôr fîs sei par integrâsi miôr, sei pai beneficis che a divegnin dal insegnament bilengâl. Dome tal ultin an, ator pe Scozie, il sisteme educatîf a imersion par gaelic al è cressût dal 8%.
Font: The Scotsman, 23/01/20; BBC, 23/01/20

Paîs Basc: ricors di Vox e PP sul ûs dal euskara tai Comuns

Il partît de estreme diestre spagnole Vox (che nol à nancje un elet intal Parlament de Comunitât Autonome Basche) al à presentât un ricors denant dal tribunâl superiôr dal Paîs Basc cuintri dal decret dal guvier de Comunitât Autonome Basche che al regole l’ûs dal euskara e dal castilian intai Comuns. Il PP (che al à 9 deputâts su 75 intal Parlament de CAB) al à comunicât che a ‘nt presentarà un altri. Il proviodiment al dîs che lis aministrazions comunâls a puedin decidi cemût organizâ l’ûs des dôs lenghis intes relazions internis e esternis daûr de specifiche realtât sociolinguistiche dal teritori, simpri però tal rispiet dal dirit dai citadins di indreçâsi ae aministrazion locâl in dutis lis dôs lenghis. L’obietîf dal decret al è chel di judâ il basc a deventâ lenghe di lavôr e di comunicazion cui citadins almancul al pâr dal castilian. Pal PNV (Partît Nazionalist Basc) i ricors dai partîts de diestre spagnoliste a van cuintri di un percors linguistic condividût disvilupât cun cetancj agns di lavôr. Par EH Bildu (çampe indipendentiste) chest atac diret al euskara si insuaze tal tentatîf di centralizazion statâl in at. Cuintri di cui che al dopre la lenghe come une arme politiche e à cjapât posizion ancje la sezion basche di Podemos.
Font: EiTB, 22/01/20

Asturiis: indenant cu la normalizazion linguistiche a Xixón

La aministrazion comunâl di Xixón/Gijón – la citât plui gruesse des Asturiis – e à metût jù il gnûf plan di normalizazion linguistiche che al fisse lis politichis par valorizâ e par promovi l’asturian intai agns 2020-2023. Il document al previôt 89 misuris specifichis, cuasi la metât indreçadis propit ae aministrazion municipâl. Par esempli si previôt che ogni dipartiment comunâl al vedi un referent che si confronti cul ufici di normalizazion linguistiche, che ducj i gnûfs programs informatics a sedin indotâts di une interface par asturian, che si vedin percentuâls garantidis pe presince de lenghe proprie te publicitât istituzionâl e che in ducj i uficis a sedin cartei che a informin sui dirits linguistics dai citadins. Il plan al previôt ancje misuris par promovi la lenghe framieç dai zovins sei cun ativitâts là che l’asturian al sedi veicolâr, sei cun premis pes associazions che si impegnin di plui te normalizazion linguistiche. Altris azions si riferissin a vantaçs economics pes realtâts socioculturâls e sportivis che a doprin l’asturian tes lôr iniziativis.
Font: El Comercio, 22/01/20

Bretagne: sucès de app par imparâ il breton zuiant

In nancje trê setemanis a son za 5 mil lis personis che a àn discjariât e che a doprin la aplicazion «Kwizh Brezhoneg» pensade par tacâ a imparâ il breton in maniere divertente. La app, disponibile za par sistemis Android e in curt ancje su iOS, e cjape dentri 2.600 peraulis che a permetin di familiarizâ cun cheste lenghe celtiche e e je organizade su dîs nivei di dificoltât. Il prossim pas al è chel di zontâ ancje une version orâl des peraulis cjapadis dentri de aplicazion.
Font: Le Parisien, 22/01/20

Gales: stiçade al guvier par invertî il câl dal galês

La organizazion pai dirits linguistics Cymdeithas yr Iaith Gymraeg e à riclamât il guvier dal Gales a fâ di plui e di miôr pe lenghe. Cun di fat, di là de volontât manifestade dal esecutîf di rivâ a un milion di galês che a fevelin la lenghe proprie dentri dal 2050, la realtât e je che il numar di chei che le fevelin al cale. Daûr dal ufici di statistiche, intal Setembar dal 2019 in Gales a jerin 874 mil e 600 lis personis in stât di fevelâ par galês, 14 mil e 600 in mancul dal an prime. La Cymdeithas e condane in particolâr il tai des risorsis previodudis dal esecutîf galês pes politichis linguistichis e lis azions che a favorissin il slontanament dai zovins des areis là che la lenghe e je plui fuarte. La organizazion e invide po a meti in at une riforme scolastiche che e ufrissi il galês veicolâr in dutis lis scuelis dal paîs.
Font: Nation Cymru, 22/01/20

Galizie: iniziativis par sburtâ il galizian intal cumierç

La organizazion A Mesa pola Normalización Lingüística e je daûr a slargjâ il progjet Abertos ao Galego che si propon di infuartî l’ûs de lenghe proprie intal mont imprenditoriâl. Lis passe 600 ativitâts economichis che a àn za aderît ae campagne a saran identificabilis in gracie di un distintîf di meti fûr par mostrâ che alì si fevele par galizian ma soredut in gracie di une aplicazion di pueste che e segnale dutis impresis là che il galizian al è di cjase. Une gnove campagne e ponte a fâ cognossi ae int e aes impresis chest progjet, di une bande spiegant lis resons par impleâ la lenghe proprie tal cumierç e di chê altre par che i consumadôrs a puedin fâ la diference sielzint i lûcs là che il galizian al ven doprât e valorizât.
Font: Praza Pública, 22/01/20

Irlande: in cressi i nons des viis par gaelic a Belfast

E va dilunc a cressi la presince dal gaelic irlandês intes tabelis cui nons des viis di Béal Feirste / Belfast. Il regolament citadin su la toponomastiche al previôt che prime dal vôt dal consei comunâl, la propueste e vedi di vê il vie libare di plui de metât dai residents des viis interessadis e che la traduzion e sedi supervisionade di un espert de universitât. Ai 14 di Zenâr il comitât des comunitâts e dai citadins dal Comun al à dât il so vie libare ae denominazion bilengâl par altris trê viis de part ocidentâl de citât, là che plui dal 65% dai residents al à dite di sì ai nons par irlandês.
Font: Belfast Live, 22/01/20

Galizie: gjornâl digjitâl sportîf al feminin e par galizian

Cul 2020 a son partîts diviers progjets impuartantis pe presince dal galizian intai mieçs di comunicazion. Dopo dal lanç in edicule dal cuotidian dut par galizian, Nós Diario, tai prins dîs dal an gnûf al è nassût ancje As Nosas. Si trate di un gnûf periodic digjitâl par galizian che al fevele di sport di une prospetive feminine. La riviste si ocupe di cetantis dissiplinis sportivis e e fevele di gnovis che a rivuardin acjadiments e personaçs sportîfs galizians, ma ancje di nivel statâl e internazionâl. Cundut che al fronte chescj temis cuntun voli feminin, As Nosas al è indreçât a dute la societât galiziane.
Font: Cultura Galega, 16/01/20

Aragon: test par aragonês sul boletin uficiâl di Huesca

Il boletin uficiâl de provincie di Uesca/Huesca al à publicât il test par aragonês dal regolament dai premis dal festival internazionâl dal documentari etnografic dal Sobrarbe. Si trate di un dai prins esemplis dal ûs di cheste lenghe tes publicazions uficiâls des istituzions aragonesis. Al è un at simbolic che al rapresente però un pas indenant impuartant intal procès di normalizazion de lenghe proprie dal Aragon che ta chescj ultins agns, rivade aromai cuasi sul pont di disparî, e je al centri di diviers iniziativis di riscuvierte e di promozion.
Font: El Periódico de Aragón, 15/01/20

Irlande: pas indenant pal ricognossiment dal gaelic tal Nord

Intal acuardi (New Decade, New Approach) che al met lis fondis par tornâ a meti sù il guvier condividût in Irlande dal Nord al è ancje l’impegn par une leç che e ricognossi in maniere uficiâl il status dal gaelic irlandês ancje ta cheste part de isule. Tal document si fevele po de nassite di un comissari pe lenghe gaeliche, di un comissari pe varietât di scots fevelade tal Ulster e di un ufici de identitât e de espression culturâl che al promovi il pluralisim culturâl e il rispiet pe diversitât. Si previôt ancje che il regolament dal Parlament nordirlandês al vegni emendât par permeti l’ûs dal gaelic intai lavôrs de aule. Sei la organizazion pai dirits linguistics Conradh na Gaeilge che il grup di ativiscj pe lenghe An Dream Dearg a àn fevelât di un pas indenant storic pal irlandês, ma a àn ancje sclarît che si è ancjemò lontans di ce che a previodevin i acuardis di pâs pe Irlande dal Nord e di ce che al coventarès pardabon ae lenghe. Al mancje, juste par fâ un esempli, ogni riferiment al ûs dal gaelic inte tabelonistiche e te segnaletiche stradâl.
Font: Irish Times, 10/01/20; BBC, 23/01/20

18/01/20

Paîs Basc: disinis di miârs in place pai presonîrs

Tal dopodimisdì dai 11 di Zenâr uns 80 mil personis a àn partecipât in contemporanie aes manifestazions inmaneadis a Bilbo / Bilbao e Baiona / Bayonne par domandâ la fin dal regjim di ecezionalitât in at cuintri dai presonîrs bascs intal stât spagnûl e, in part, ancje ta chel francês. Di fat, cundut de fin dal procès di disarmament di ETA tal 2017 e de sô dissoluzion definitive vie pal 2018, la cundizion dai presonîrs bascs e reste inmò une vore grivie.

Scozie: in 100 mil in place a Glasgow pe indipendence

Sabide ai 11 di Zenâr disinis di miârs di personis – lis stimis a fevelin di 100 mil di lôr – a àn sfilât pes stradis di Glaschu / Glasgow par domandâ un secont referendum pe indipendence de Scozie. La iniziative e je stade inmaneade de associazion All Under One Banner che di uns cinc agns incà e je daûr a coordenâ lis iniziativis popolârs pe indipendence. Sul imprin la manifestazion e previodeve ancje une adunance massive cun intervents di personaçs publics pro indipendence ma il brut timp che al à fiscât chê part de Scozie al à conseât di confermâ dome la marcje. Chê dai 11 di Zenâr e je dome la prime di vot manifestazions di place programadis de plateforme indipendentiste pal 2020. All Under One Banner e ponte a sburtâ lis istituzions scozesis a procedi su la strade de autodeterminazion. Sul finî dal an passât la prime ministre scozese Nicola Sturgeon – espression de formazion indipendentiste SNP – e veve za domandât al esecutîf britanic vuidât di Boris Johnson di trasferî al Parlament scozês lis competencis par imbastî un secont referendum su la indipendence ma di Londre al è rivât un no avonde sec. Lis autoritâts scozesis si cjatin duncje cence masse alternativis, almancul di no cjapâ une strade unilaterâl come chê che e veve tentât intal 2017 la Catalogne.
Font: BBC, 11/01/20

Paîs Catalans: gjavât il status di eurodeputât a Junqueras

Cuatri dîs dopo di vê ricognossût il leader di ERC Oriol Junqueras come eurodeputât, il Parlament european i à gjavade chest status. La decision e je stade cjapade su la fonde dai ats de zonte eletorâl centrâl e dal tribunâl suprem spagnûl che a declarin la pierdite de imunitât parlamentâr gjoldude di Junqueras come eurodeputât par vie de sentence di condane par sedizion e malversazion decidude dal stes tribunâl suprem ai 14 di Otubar dal an passât: une condane che, no si pues dismenteâ, e jere stade dade fûr cuant che il dirigjent indipendentist catalan al gjoldeve za de imunitât e nol varès vût di jessi stratignût in preson cemût che al veve certificât ai 19 di Dicembar il Tribunâl di Justizie de Union Europeane (TJUE). Il Parlament european si à però adatât ae linie marcade des autoritâts judiziariis spagnolis, ancje se al à calcolât Junqueras decjadût de sô cundizion di deputât dome a partî dai 3 di Zenâr di chest an, o sei de date dal at de zonte eletorâl centrâl, lassant duncje in preson l’ex president vicjari dal esecutîf catalan ma ricognossintji il dirit a scuedi la paie di eurodeputât fin a chê date! Situazion diferente invezit par Carles Puigdemont e Toni Cumín che dopo de sentence de cort europeane a son stâts increditâts come eurodeputâts e no àn pierdude la imunitât par vie che, cul fat di jessi in esili, no son stâts processâts e condanâts di nissun tribunâl spagnûl. Sul lôr cjâf al pese ancjemò il mandât di arest european dât fûr dal judiç Pablo Llarena ma, cu la imunitât che i diven de lôr incarghe, nol sarà facil di metilu in vore.
Font: VilaWeb, 10/01/20; Naiz:, 10/01/20

Galizie: inviât il progjet par students Lingua rodada

Ai 9 di Zenâr l’organisim di politiche linguistiche dal guvier de Galizie al à presentât un program di promozion e di svilup de lenghe proprie indreçât ai students tra i 12 e i 17 agns che si davuelzarà jenfri Zenâr e Mai e che al à non Lingua rodada. I fantacins des scuelis che a aderissin ae iniziative a varan di presentâ des contis curtis par imagjins ziradis cui lôr celulârs. I autôrs dai trê progjets miôr a varan la pussibilitât di partecipâ a di un laboratori cuntun espert dal setôr audiovisîf che ju judarà a perfezionâ il lôr lavôr. Il vincidôr invezit al varà a disposizion un grup di operadôrs dal setôr che al produsarà une version professionâl de sô conte.
Font: Lingua.gal, 09/01/20

Paîs Catalans: ritrat in blanc e neri pe situazion de lenghe

Il Consei sociâl de lenghe catalane al è un organisim formât di rapresentants dal guvier, dal mont educatîf e academic, dai mieçs di comunicazion, dal setôr juridic, des organizazions sindacâls e di categorie de Catalogne. Un dai siei compits principâi al è di controlâ e di valutâ lis ativitâts e i risultâts de politiche linguistiche puartade indenant dal guvier catalan (Generalitat). Tes sôs ultimis informativis, il Consei al calcole positive la azion dal esecutîf dal moment che si môf par che la lenghe catalane e sedi simpri di plui un imprest di coesion sociâl. Si mostre invezit une vore critic cu lis politichis des autoritâts spagnolis che, ancje sul plan legjislatîf, a movin un atac ideologjic cuintri dal catalan cun risis massime pal model scolastic. Il Consei al segnale po che tra i cjamps là che la lenghe proprie e je ancjemò debule a son chei socioeconomic, de sanitât, de justizie, de aministrazion statâl e dal cine.
Font: Generalitat de Catalunya, 09/01/20

Lusazie: iniziativis par infuartî il serbian in radio e a scuele

A cressin lis emissions in lenghe serbiane su la radio MDR Sächsen. Cun Zenâr, di fat, lis oris cuotidianis inte lenghe proprie de Lusazie a passin di trê a cuatri e a cjapin dentri une des fassis orariis (chê che e va di 8 a 9 di buinore) plui scoltadis. La Domowina – organizazion di riferiment di cheste comunitât minorizade di lenghe slave che e vîf a cjaval tra i stâts dal Brandeburc e de Sassonie – e mostre la sô sodisfazion par chest risultât e e conferme il so impegn par rivâ ca di cualchi an a di une programazion dute par serbian par mieç dal sisteme DAB+.

Gales: feroviis galesis cence lenghe proprie

Lis anticipazions suntun rapuart metût jù dal comissari pe lenghe galese a metin in evidence la violazion di diviersis prescrizions previodudis de normative linguistiche de bande dai ministeris galês responsabii de gjestion de Transport for Wales (TfW), societât feroviarie che il guvier dal Gales al à comprât uns cuindis mês indaûr. Tra lis violazions plui gruessis si à il fat che i avîs sui trens e tes stazions a son fats dome par inglês, che sul sît de societât la procedure par comprâ i biliets e je dome par inglês, compagn de aplicazion a pene lançade par acedi ai servizis de compagnie. La organizazion pe lenghe Cymdeithas yr Iaith e à fevelât di figurate de bande dal guvier, che nol è nancje bon di rispietâ lis leçs che al à fat, e e à domandât di procedi daurman a comedâ la situazion. Par altri – a àn zontât – al jere di previodi che e sarès lade cussì dal moment che no si à vude nissune programazion linguistiche cuant che si à cjapade in man la societât e no si à nancje tignût cont des segnalazions fatis de organizazion stesse e di cetancj utents.
Font: Nation Cymru, 06/01/20

Estonie: nassude une plateforme unitarie pes lenghis nativis

Dîs organizazions impegnadis intal difindi e tal promovi lis lenghis minorizadis che a partegnin al patrimoni storic de regjon estone si son dadis adun tal Consei des lenghis nativis de Estonie. La iniziative e cjape dentri organizazions espression des comunitâts di lenghe võro, seto, mulgi e kihnu. L’obietîf di cheste gnove plateforme unitarie al è di difindi i dirits linguistics des popolazions che a fevelin chestis lenghis sei a nivel statâl che internazionâl, di slargjâ la cognossince des lenghis nativis dentri de Estonie, di colaborâ cul sisteme scolastic par promovi il lôr insegnament, di scambiâsi buinis pratichis e lavorâ adun su progjets linguistics. Daûr dal censiment dal 2011, in Estonie a son pôc mancul di 75 mil lis personis che a fevelin par võro, 12 mil e 500 par seto, pôc mancul di 10 mil par mulgi (che par diviers studiôs a son varietâts de stesse lenghe, o sei l’eston meridionâl) e a pene un miâr chês che doprin il kihnu (une varietât estone fevelade te isule omonime che e cjape dentri diviers elements linguistics svedês).
Font: Uralic.org, 04/01/20

Jersey: 1,5 milions su cuatri agns par insegnâ il jèrriais

Il plan di guvier fat bon de Assemblee de isule di Jèrri / Jersey, teritori che al gjolt di un statût autonom rispiet al Ream Unît, al previôt un milion e mieç di sterlinis par insegnâ il jèrriais, o sei la varietât francese normade fevelade su la isule. Il finanziament al interesse la dade 2020-2023 cuntun aument progressîf dai fonts che des 375 mil sterlinis dal prin an a passaran a 410 mil tal cuart. In dì di vuê la lenghe locâl e ven za insegnade in 13 scuelis primariis e in 6 secondariis, ma il numar di students interessâts al è une vore bas. I obietîfs indicâts intal document dal guvier a son stâts cjapâts sù ancje tal plan linguistic cuadrienâl disvilupât dal Servizi pal insegnament dal jèrriais e di altris sogjets atîfs inte promozion de lenghe proprie.
Font: Jersey Evening Post, 03/01/20

Galizie: in edicule il cuotidian dut par galizian Nós Diario

Dopo doi agns di preparazion, cui 2 di Zenâr al è jessût in edicule il prin numar dal cuotidian par galizian Nós Diario. Un tant al è stât pussibil massime in gracie de adesion di passe trê mil sotscritôrs che cui lôr contribûts a àn garantît la fonde finanziarie par inviâ il progjet. Il gnûf cuotidian, in plui di ufrî gnovis inzornadis 365 dîs ad an par mieç dal sît www.nosdiario.gal , al è disponibil dilunc vie de setemane in 2.400 ponts di vendite ator pe Galizie. La edizion su cjarte, la uniche in lenghe proprie, e conte 32 pagjinis par numar. Il gjornâl al è compagnât, ogni sabide de riviste setemanâl Sermos Galiza.