Grecie: nissun pas indaûr inte opression des minorancis

Il comitât dai ministris dal Consei de Europe e il partît Amicizie, Avualiance e Pâs (DEB – Dostluk Esitlik Baris Partisi) – espression politiche de minorance di lenghe turche che e vîf in Grecie – a àn riclamât la cort di cassazion greghe al so dovê di rispietâ lis sentencis de cort europeane dai dirits umans (ECHR) che a àn condanât lis autoritâts elenichis par vê violât l’articul 11 de convenzion dai dirits umans, o sei chel che al garantìs la libertât di associazion. Tra il 2007 e il 2008 la Grecie e je stade condanade trê voltis par vê sierade une associazion e par no vê autorizade la regjistrazion di altris dôs par vie che a promovevin la tutele des minorancis linguistichis. Lis istituzions greghis, di fat, no ricognossin la esistence di nissune minorance linguistiche dentri dai confins statâi: une posizion che, par altri, e favorìs il disvilup di ategjaments agressîfs sei dentri che fûr des istituzions cuintri di ogni ativitât o rivendicazion de bande des minorancis stessis. Dopo cuasi cuindis agns, lis decisions de cort europeane a restin ancjemò letare muarte. Su la cuistion e je intervignude ancje la Aleance Libare Europeane (EFA) che e à riclamât la UE ai siei dovês, dal moment che cu la sô inazion e facilite i compuartaments antidemocratics dai stâts membris.

Font: EFA, 18/06/21

Grecie: menacis cuintri dal partît de minorance turche

Il partît Amicizie, Avualiance e Pâs (DEB – Dostluk Esitlik Baris Partisi) – espression politiche de minorance di lenghe turche che e vîf inte Tracie greghe – e la sô presidente Cigdem Asafoglu si cjatin al centri di une campagne di odi cetant penze dopo che a àn manifestât il lôr cruzi pal fat che, intant de sô visite in Tracie, la presidente greghe Katerina Sakellaropoulou si à refudât di incuintrâ i rapresentants de comunitât turcofone. Cundut che a mancjin censiments uficiâi, si stime che la popolazion di lenghe turche che e vîf in Tracie, la regjon nordorientâl de Grecie a confin cu la Turchie, e sedi su lis 150 mil personis. Lis istituzions greghis no ricognossin però la esistence di nissune minorance linguistiche dentri dai confins statâi. Un tant al favorìs il disvilup di un ategjament agressîf cuintri di ogni rivendicazion de bande des minorancis stessis. Ta chest câs, il DEB e la sô presidente si son cjatâts subissâts di violencis verbâls e fintremai di menacis di muart ancje cul contribût di cetancj mieçs di comunicazion grêcs che a àn stiçât e favorît la campagne di odi. I rapresentants dal partît a àn ricevût la solidarietât de Aleance Libare Europeane (EFA) une vore preocupade pe clime che si vîf in cheste part de Europe.

Font: Millet News, 11/06/20

Grecie: azion par sburtâ l’ûs dal turc tai nîts de Tracie

Cundut che a mancjin censiments uficiâi, si stime che la popolazion di lenghe turche che e vîf in Tracie, la regjon nordorientâl de Grecie a confin cu la Turchie, e sedi su lis 150 mil personis. Lis istituzions greghis no ricognossin la esistence di nissune minorance linguistiche dentri dai confins statâi ma, par vie di acuardis internazionâi, a garantissin une cualchi tutele a cheste comunitât no tant pe sô diversitât linguistiche ma par chê religjose (o sei parcè che e je musulmane). Intal 2017 la Grecie e à inviât l’oblic pes fameis di iscrivi i frutins in nîts sot control public là che la lenghe di insegnament e je il grêc. Lis domandin de minorance turcofone par cjapâ dentri ancje la lenghe dal teritori a son coladis intal vueit. Cumò però il ministeri pe educazion al à fat savê che cun chest an che al ven si volarès compagnâ il grêc cul inglês. Lis organizazions de minorance a àn duncje profitât di cheste vierzidure sul plan dal insegnament plurilengâl par tornâ a domandâ che si previodin des oris par turc intai nîts des localitâts de Tracie là che si à une presince significative de minorance.

Font: Daily Sabah, 08/05/20

Bulgarie: minorance turche rapresentade tal gnûf Parlament

Al sarà Boyko Borissov il gnûf prin ministri de Bulgarie, ae vuide di une coalizion formade dal partît di centri diestre GERB (Citadins pal Svilup European de Bulgarie) e de aleance ultranazionaliste dai Patriots Unîts (formade di Front Nazionâl pe Salvece de Bulgarie, VMRO e ATAKA). I doi moviments a puedin contâ su 122 dai 240 deputâts jessûts des elezions dai 26 di Març, là che GERB al à otignût il 33,4% dai vôts e i Patriots Unîts il 9,3%. La fuarce principâl di oposizion e je invezit rapresentade dal Partît Socialist che al à cjapât il 27,9% des preferencis, dopleant i consens rispiet al 2014. Intal Parlament a son po rapresentâts ancje il partît Volya dal imprenditôr Veselin Mareshki e il Moviment pai Dirits e pe Libertât che al rapresente il partît principâl de minorance turche dal paîs. Nol à passât invezit il soiâr par jentrâ te Assemblee chel altri partît leât ae comunitât turche, DOST, di plui bandis acusât di jessi il braç operatîf dal president turc Erdogan in Bulgarie.

Font: Balkan Insight, 04/04/17

Grecie: in place pai dirits de minorance turche

Passe 2.500 personis a àn partecipât a Gümülcine / Komotini, in Grecie, a di une manifestazion inmaneade par domandâ il rispiet dai dirits linguistics, culturâi e politics de minorance turche de Tracie. In dì di vuê, lis autoritâts greghis a van dilunc a dineâ la esistence di minorancis linguistichis e nazionâls dentri dai confins dal stât e a previodin ciertis misuris di tutele dome ae minorance musulmane che e vîf in Tracie e che e cjape dentri però turcs, pomaks e macedons. La iniziative e à jevât no pocjis tensions e la polizie si è scuintrade cuntun grup di militants neofassiscj di Albe Dorade che al voleve impedî cu la fuarce la manifestazion.

Font: EFA, 24/07/16

Bulgarie: tensions framieç de minorance turche

Ai 19 di Mai la comunitât turche de Bulgarie e celebre la resistence cuintri de assimilazion metude in at massime tra la fin dai agns ’80 e i prins ’90 dal secul stât. Chest an però si àn vudis tensions avonde fuartis inte suaze de manifestazion di place in program par chest inovâl inte citât a maiorance turche di Cebel / Džebel. La iniziative e jere stade clamade dongje dal Moviment pai dirits e pes libertâts, il partît di riferiment de comunitât turche de Bulgarie, e sul imprin e jere stade proibide dal sindic de citât, Lyutvi Mestan, che, dopo di jessi stât butât fûr sul finî dal 2015 di cheste organizazion, al à fondât il moviment politic Dost. La proibizion e je stade po gjavade di une sentence dal tribunâl regjonâl, ma e à puartât in place i membris di dutis e dôs lis organizazions che si son scuintrâts, par fortune, dome a peraulis. Dut câs la tension e reste alte viodût che i dirigjents dal Moviment pai dirits e pes libertâts a van dilunc a acusâ Mestan e il so grup politic di jessi la cuinte colone de Turchie in Bulgarie, preocupantsi plui di sburtâ i interès dal stât dongje che no chei de minorance turche de Bulgarie.

Font: Balkan Insight, 20/05/16

Cipri: domande ae UE par tignî ancje il turc di uficiâl

Il president di Cipri Nicos Anastasiades al à domandât in maniere uficiâl aes istituzions europeanis di cjapâ dentri ancje il turc tra lis lenghis uficiâls de Union. Il 20% de popolazion de isule al à il turc tant che prime lenghe e la Costituzion de Republiche cipriote le calcole di couficiâl cul grêc. Par Anastasiades propit cheste couficialitât e zuiarès a pro dal ricognossiment, in plui di jessi un at di buine volontât intal percors par cirî une unificazion de isule. Tal 1974, di fat, la Turchie e veve ocupât une part di Cipri inviant une separazion de isule e une crisi diplomatiche che e reste ancjemò vierte. Cipri al è jentrât inte UE intal 2014 ma dome pe part a maiorance greghe, là che la lenghe turche e je dal dut minoritarie.

Font: Shanghai Daily, 01/03/16

Tracie/Grecie: atac ae sede dal partît turc DEB

Un trop di discognossûts, leâts cun dute probabilitât al estremisim nazionalist grêc, al à vandalizât a Gümülcine/Komotini la sede dal partît DEB che al difint lis rivendicazions de minorance turche che e vîf inte regjon greghe de Tracie. L’atac al rive juste cualchi zornade dopo che il partît al veve comunicât che al varès tacât a tirâ sù firmis par protestâ cuintri de violazion dai dirits de minorance turche in Grecie. Il stât grêc nol ricognòs la esistence di nissune minorance nazionâl o linguistiche dentri dai siei confins, ma dome di une minorance di religjon musulmane. I turcs de Grecie a gjoldin duncje di cualchi tutele linguistiche minime dome in gracie de lôr partignince ae comunitât musulmane ricognossude. La cort europeane di Strasburc e à za condanât plui voltis la Grecie par vê proibît di regjistrâsi a organizazions dome pal fat di doprâ tal lôr non i adietîfs “turc”, “macedon” o riferiments a altris comunitâts minorizadis. Cheste clime chauviniste e à favorît ancje diviers episodis di violence e di discriminazion cuintri dai ativiscj des comunitâts minorizadis.

Font: EFA, 08/12/15

Macedonie: no des ONG al censiment prime des elezions

Passe cuarante ONG de Macedonie, a partî de sezion locâl dal Comitât Helsinki pai dirits umans, a àn cjapât une posizion unitarie cuintri dal plan presentât dal prin ministri Nikola Gruevski par tignî un censiment etnic prime des elezions anticipadis che si tignaran intal Avrîl dal 2016. Subissât dai scandui, Gruevski al à vût di acetâ che si torni a votâ in curt e che si riformi la leç e lis listis eletorâls par evitâ gnûfs suspiets di imbrois. Ta cheste clime di tension politiche un censiment etnic al riscje di butâ benzine sul fûc massime se si calcole che i risultâts dal censiment dal 2011 a vevin vût di jessi anulâts par vie des acusis incrosadis di vê alterât i dâts, cui partîts de minorance albanese che a vevin acusât la maiorance di vê calât il numar dai membris di cheste comunitât e i partîts macedons che a acusavin i albanês di vê falsificât a lôr vantaç i dâts cjapâts sù intai comuns là che a vevin la maiorance. Ancje i membris de comission eletorâl che e veve lavorât su chel censiment a visin dai pericui che une gnove consultazion fate di presse e podarès puartâ e a invidin a concuardâ cu lis istituzions europeanis la planificazion e il davuelziment dal prossim censiment. Par intant, duncje, i ultins dâts ricognossûts a restin chei dal 2002 cuant che il 64% de popolazion al risultave slâf macedon, il 25% albanês e il rest al jere formât di rom, turcs, serps e altris minorancis.

Font: Balkan Insight, 05/08/15

Grecie: i problemis dai turcs de Tracie presentâts ae EFA

Sul finî di Lui un delegât de Aleance Libare Europeane (EFA) si è cjatât cuntune rapresentance des organizazions culturâls e educativis de minorance turche de Tracie. E je stade la ocasion par fâ il pont su la situazion grivie che cheste comunitât si cjate a vivi in Grecie. Tra lis bataiis principâls si à chê identitarie, dal moment che la minorance no pues nancje doprâ il tiermin “turc” par identificâsi, e chê scolastiche là che a di une ufierte linguistiche e culturâl une vore puare si zontin cumò ancje altris pidiments: al è il câs de leç su la educazion fate buine in Dicembar che e impedìs l’insegnament a cui che si è formât intal forest colpint cun fuarce propit cui che al parten ae comunitât turche.

Font: EFA, 27/07/15

Grecie: presentât il prin film par turc de Tracie

La Grecie no ricognòs la esistence di minorancis nazionâls e linguistichis intal so teritori. Dut câs, par vie di un tratât internazionâl, e à vût di ricognossi la esistence di une minorance religjose, chê musulmane, dulà che daûr si plate in realtât la presince di une minorance turche o turcofone che e vîf di secui inte regjon de Tracie ocidentâl. Par chest e cjape une dimension ancjemò plui impuartante la presentazion dal prin luncmetraç par turc zirât ta cheste regjon cun atôrs che pe plui part a partegnin ae minorance turche. La opare no je stade facile di puartâ insom, massime par vie dai fonts limitâts. Il film, di fat, nol à gjoldût di nissun jutori public, ma al è stât autofinanziât.

Font: Independent Balkan News Agency, 28/10/14

Bulgarie: elets cuatri eurodeputâts de minorance turche

In Bulgarie, compagn che intal 2009, al è stât il partît di centri diestre dai Citadins pal Svilup European de Bulgarie (GERB) a otignî il risultât miôr cun plui dal 30% des preferencis e sîs elets. Al tierç puest, dopo dai socialiscj, si è plaçât il Moviment pai Dirits e pe Libertât (DPS), che al è il partît di riferiment de minorance turche. Il DPS al à cjapât il 17,1% dai vôts e al à rivât a otignî cuatri eurodeputâts, un in plui di chei vûts intes elezions stadis.

Font: elections2014.eu

Bulgarie: dome la minorance turche e jentre in Parlament

Lis elezions politichis che si son tignudis ai 12 di Mai in Bulgarie a àn dât la maiorance relative (31% des preferencis) al partît di centri diestre GERB vuidât dal ex prin ministri Boiko Borisov, che si è plaçât denant dai socialiscj par plui o mancul il 4% dai vôts. Dome altris doi partîts a àn rivât a passâ il soiâr dal 4% che al permet di jessi rapresentâts in Parlament, o sei il Moviment pai Dirits e pes Libertâts (10,7% dai vôts) che al rapresente la minorance turche de Bulgarie, e i ultranazionaliscj di Ataka (7,4% dai vôts). I risultâts no permetin nissune maiorance di guvier stabile. Une des ipotesis su la taule e je chê di un guvier di minorance formât dai socialiscj e dal Moviment pai Dirits e pes Libertâts.

Font: Balkan Insight, 12/05/13; BBC, 13/05/13

Macedonie: blocs etnics cence precedents pes aministrativis

Intes elezions aministrativis che si son tignudis in Macedonie ai 24 di Març, inte plui part dai comuns la vitorie e je lade al Partît Democratic pe Unitât Nazionâl Macedone (VMRO DPMNE), che al à cumò in man il guvier dal stât, intant che i socialdemocratics si son imponûts in mancul di une disine di aministrazions locâls. Inte aree là che i albanês a son la maiorance, la plui part dai comuns e je lade ae Union Democratiche pe Integrazion (DUI), partît de comunitât albanese aleât dal Partît Democratic pe Unitât Nazionâl Macedone, intant che il Partît Democratic dai Albanês (DPA), cumò ae oposizion a nivel statâl, si è imponût dome intune aministrazion locâl.

Macedonie: turc tierce lenghe uficiâl a Gostivar

Cul 2010 il turc al deventarà la tierce lenghe uficiâl dal comun di Gostivar, in Macedonie. Cun di fat, la aministrazion comunâl e à fate buine la domande rivade di un partît espression de comunitât turche che e rapresente il 10% dai 80 mil abitants de citât. Daûr de leç macedone, ogni comun al pues decidi in autonomie lis lenghis che, sul so teritori, a gjoldin di un status di uficialitât. Chest al vûl dî, tra lis altris robis, che la aministrazion locâl e à di fâ ducj i documents e i avîs uficiâi intes lenghis ricognossudis tant che uficiâls. A Gostivar a jerin bielzà uficiâls il macedon e l’albanês.
Font: Món Divers, 17/07/09

Bulgarie: i risultâts dai rapresentants des minorancis intes politichis

Intes elezions politichis bulgaris, la vitorie e je lade al partît di centri diestre “Citadins pal svilup european de Bulgarie” (GERB) che al à cjapât sù par jù il 40% des preferencis e che al à otignût dome 5 deputâts in mancul di chei che i varessin permetût di vê la maiorance assolude. La coalizion socialiste, che e cjape dentri ancje la “Union Civiche Roma” (partît che al rapresente la comunitât rom bulgare), si è fermade al 17% dai consens. Al è cressût, invezit, il “Moviment pai Dirits e pes Libertâts” (DPS) che al è leât ae minorance turche che e vîf intal paîs e che e rapresente il 9,4% de popolazion. Cun di fat, il DPS al à otignût 38 deputâts, 4 in plui di chei che al veve intal 2005. Dut câs, a front de sconfite de aleance socialiste, nol podarà ripeti la coalizion di guvier che la legjislature stade al veve metût sù cui socialiscj. A cressi e je stade ancje la formazion di estreme diestre Ataka che e fâs cuintri cun fuarce ae minorance turche e che, tra lis altris robis, e domande di scancelâ lis trasmission par turc che a van in onde su la radiotelevision publiche BNT.

Font: Nationalia, 07/07/09

Bulgarie: il vôt pes europeanis

In Bulgarie il partît di centri diestre Citadins pal Svilup European de Bulgarie (GERB) al à otignût il risultât miôr cul 24,36% des preferencis e 5 rapresentants elets a Strasburc. Al secont puest a son rivâts i liberâi de Coalizion pe Bulgarie (BSP) che a àn vût il 18,5% dai vôts e 4 eurodeputâts. Inte Coalizion a son dentri ancje rapresentants des comunitâts rom bulgaris. Il Moviment pai Dirits e pe Libertât (DPS), che al ven calcolât di partît di riferiment de comunitât turche dal paîs, si è plaçât al tierç puest cul 14,14% des preferencis e al à vût elets a Strasburc 3 dai siei rapresentants.

Font: elections2009-results.eu, 07-08/06/09