Finlande: blocât in Russie il canâl informatîf plurilengâl YLE

Roskomnadzor, la agjenzie russe che e controle i servizis radiotelevisîfs e di stampe, e à blocât a partî dai 2 di Jugn la pussibilitât pai citadins rus di acedi ai servizis informatîfs in rêt ufierts de emitente finlandese YLE. Si trate dal cuint mieç di comunicazion de aree scandinave censurât intai ultins agns des autoritâts di Mosche. Il prin al jere stât il gjornâl in linie The Barents Observer, bandît ancjemò tal Fevrâr dal 2019. Ducj i canâi informatîfs blocâts a àn une element in comun, ven a dî il fat di vê spazis informatîfs ancje par rus. YLE, in plui che par finlandês e par rus, e ufrìs servizis ancje par inglês e par sami. La emitente e je simpri stade atente ancje ai dirits des minorancis ufrint informazions no dome pes comunitâts di lenghe finlandese che a vivin intai stâts dongje, ma ancje pe minorance russofone interne e pes comunitâts sami che a vivin in Finlande, Svezie, Norvegje e Federazion Russe.

Font: The Barents Observer, 03/06/22

Sápmi: comunitât dividude su la vuere in Ucraine

La Tiere dai Sami (Sápmi) e je dividude tra cuatri stâts: Norvegje, Svezie, Finlande e Federazion Russe. La agression inviade di cheste ultime ae Ucraine, in plui di alçâ la tension ancje ta cheste part de Europe, e à jevât divisions dentri de stesse comunitât sami. Subite dopo sclopât il conflit, l’ativist Andrei Danilov – che al rapresentave la popolazion sami de Federazion Russe dentri de comission culture dal Consei Sami – al à manifestât la sô contrarietât ae vuere cuntune azion fûr de ambassade russe di Oslo e al à inviât il percors par domandâ asîl politic ae Norvegje, une iniziative poiade dai rapresentants dai Sami norvegjês. Danilov al à declarât che, di là dai confins, i Sami a son un popul sôl e duncje, ancje se nol podarà tornâ a cjase, al larà dilunc a batisi pai dirits de sô int intune altre part de sô patrie. La sô posizion e je condividude ancje di diviers rapresentants di altris popolazions nativis cjapadis dentri te Federazion Russe che ta chescj agns a àn vût di bandonâ la lôr tiere par vie de repression dal guvier. Divierse invezit la posizion dal president dai Consei des minorancis nativis de provincie di Murmansk e dal rapresentant de associazion dai Sami de penisule di Kola che a àn aderît aes iniziativis par sostignî la politiche dal Cremlin. Raipon – la associazion dai popui natîfs dal Nord de Federazion Russe – e à condanât cun fuarce lis declarazions dai esiliâts declarant che no rapresentin plui i lôr popui.

Font: The Barents Observer, 04/04/22

Russie: difese des minorancis russofonis cence de fuarce

La Federazion Russe, par bocje dal so ministri pai forescj Sergei Lavrov, e torne a denunciâ lis politichis discriminatoriis metudis in at cuintri des minorancis di lenghe russe, in particolâr intes republichis baltichis e in Ucraine. Pes autoritâts russis si cjatisi denant di violazions palesis des convenzions internazionâls su la tutele des minorancis linguistichis e nazionâls e, tal câs ucrain, fintremai di ats che a van cuintri de stesse Costituzion dal paîs. Lavrov al à dut câs sigurât che la difese des minorancis russis o russofonis e ven puartade indenant dome sul plan diplomatic, massime dentri dal Consei de Europe, de OSCE e de ONU, e cence l’ûs de fuarce. Un riferiment, chest ultin, che tancj a metin in discussion soredut cun riferiment al scuintri in at in Ucraine. Il ministri pai forescj rus al à ancje lamentât la muse dople di diviers stâts europeans che a domandin ae Russie di rispietâ i dirits des minorancis ma, tal stes timp, no si sintin in dovê di fâ chel stes.

Font: TASS, 06/09/21

Sapmi: identificazion nazionâl tribulade te Federazion Russe

Andrei Danilov, diretôr de fondazion pal patrimoni e il disvilup dai Sami, al à presentât un ricors denant dal tribunâl suprem de Federazion Russe par che al sclarissi e al semplifichi il percors par jessi ricognossûts come membris di une popolazion native tutelade de leç. Dut al è partît dopo che funzionaris de regjon di Murmansk i vevin improibît di vuidâ une batude di cjace tradizionâl par vie che, par gjoldi dai dirits ricognossûts ae minorance sami, al veve prime di dimostrâ di jessi un membri di cheste comunitât. Pai funzionaris, la sô identitât nazionâl sami no jere compatibile cul fat di vivi e di lavorâ in citât e, se al voleve che i fos ricognossude, al veve di provâlu denant di un tribunâl. Par Danilov invezit, che i membris di une minorance a vedin di provâ la lôr identitât in tribunâl par che ur sedin garantîts i dirits ricognossûts de leç federâl a chestis comunitâts, al è un at incostituzionâl. Di chi duncje la decision di puartâ la cuistion denant dal tribunâl suprem. Ancje cu la sperance che la sentence e ledi po a pro di dutis lis popolazions minorizadis de Federazion Russe.

Font: The Barents Observer, 16/11/20

Lituanie: bandidis lis emissions de television russe RT

La comission pai mieçs di comunicazion dal guvier lituan e à decidût di improibî sul teritori statâl lis emissions dal grup RT, rêt televisive controlade de Federazion Russe. La sô programazion e jere cjalade soredut de comunitât russe che e rapresente la minorance principâl dal paîs baltic. La motivazion uficiâl par metile al bant e diven di une segnalazion dai servizis lituans che le lein a di un oligarche rus iscrit te liste nere de Union Europeane. Intai fats, si le calcole un imprest centrâl pe propagande dal Cremlin in Europe, massime framieç de diaspore russe e des minorancis russofonis che a vivin in diviers stâts europeans.

Font: Euronews, 09/07/20

Federazion Russe: sierât grup pai dirits dai popui natîfs

Il tribunâl centrâl di Mosche al à decidût pe dissoluzion dal Centri pal Supuart dai Popui Natîfs dal Nord, une organizazion che dal 2001 si bat pai dirits des popolazions nativis des tieris setentrionâls e orientâls de Federazion Russe. Tal 2015 lis autoritâts russis a vevin metût il Centri te liste nere des organizazions calcoladis al servizi di potencis forestis: cundizion superade l’an passât dopo che il Centri al veve rinunciât a dutis lis donazions che i rivavin dal forest. Chest volte invezit, cu la decision dal tribunâl, il procès di dissoluzion nol è reversibil. La sentence e ven considerade part di une azion plui grande che e ponte a eliminâ o a cidinâ dutis lis realtâts che a contestin intune cualchi maniere i interès dal guvier centrâl. Ta chescj agns, il Centri al veve rapresentât un pidiment par dutis chês compagniis economichis che a vuelin disfrutâ sul plan minerari e energjetic lis tieris des popolazions nativis. La decision e je stade condanade cun fuarce dai rapresentants des comunitâts sami di Svezie, Norvegje e Finlande – che a son une vore leadis aes popolazions nativis dal Nord de Federazion Russe – ma ancje dal puartevôs pai afârs internazionâi de Union Europeane.

Font: The Barents Observer, 09-12/11/19

Crimee: intes scuelis al torne l’insegnament dal ucrain

Lis autoritâts russis a àn fat savê che cu la partence dal gnûf an scolastic intes scuelis di Sevastopol – la citât principâl de Crimee – si varà la pussibilitât di studiâ ancje l’ucrain. Inte penisule, che e je stade anetude de Federazion Russe tal 2014, la plui part de popolazion e je di lenghe russe ma si à une minorance impuartante che e à di prime lenghe l’ucrain. Dome a Sevastopol si stime che almancul il 13% dai passe 440 mil abitants al sedi ucrain. L’insegnament de lenghe al è però opzionâl e al à duncje di jessi domandât dai gjenitôrs cuant che a van a iscrivi i fîs a scuele. Intes scuelis de Crimee e jere za la pussibilitât di studiâ il tatar, lenghe de comunitât native de penisule ma che in dì di vuê e rapresente dome une minorance de popolazion locâl. E je daûr a jessi stazade ancje la introduzion, simpri in forme facoltative, dal insegnament dal armen e dal azer.

Font: RT, 17/09/19

Udmurtie: militant muart par protestâ cuintri de repression

Ai 10 di Setembar, il professôr e ativist udmurt Albert Razin al è muart intal ospedâl di Izhevsk cualchi ore dopo che si veve dât fûc fûr dal palaç dal consei di stât de regjon autonome de Udmurtie, inte Federazion Russe. L’at estrem di proteste al è stât motivât cu la volontât di riclamâ la atenzion su lis politichis di snazionalizazion metudis in vore des autoritâts russis cuintri de comunitât udmurte e in particolâr cui atacs cuintri de lenghe di cheste popolazion ugrofiniche. Razin al jere stât un dai inteletuâi che plui si vevin spindûts cuintri de leç fate buine dal Parlament rus l’an passât che e puartave di curicolâr a opzionâl l’insegnament des lenghis propriis intes republichis e tes regjons autonomis cuntune popolazion native no russofone.

Font: TASS, 10/09/19; RFE/RL, 10/09/19

Ucraine: dirits linguistics al centri dal incuintri OSCE - Russie

La situazion des personis che a àn il rus come prime lenghe in Ucraine e tai paîs baltics e je stade al centri de riunion jenfri il ministri pai forescj rus, Sergej Lavrov, e l’alt comissari de OSCE pes minorancis nazionâls, Lamberto Zannier. Il membri dal esecutîf rus al à pontât il dêt massime su la gnove leç linguistiche jentrade in vore in Ucraine che, plui che svilupâ l’ucrain, e somee pensade par limitâ i dirits des minorancis linguistichis, a partî di chê russe. Al à po ricuardât il probleme di ducj chei rus che, cundut che a vivevin alì za di prime de indipendence, no àn ancjemò otignût la citadinance di Estonie e Letonie, là che si cjatin duncje intune situazion di discriminazion palese. Il rapresentant rus intal consei de OSCE al à po segnalât cemût che diviers professôrs di Charkov / Charkiv, citât ucraine cuntune gruesse popolazion russofone, a sedin stâts sanzionâts pal fat di vê doprât il rus a scuele.

Font: TASS, 19-23/07/19

Russie: lenghis propriis a risi di opzionalitât

Ai 25 di Lui la Duma – la cjamare dai deputâts russe – e à fate buine in tierce leture une leç che e va a riformâ l’ûs des lenghis di insegnament intes scuelis primariis de Federazion Russe. Il pont centrâl dal proviodiment al è che a saran i gjenitôrs a sielzi la lenghe doprade par insegnâ ai lôr fîs. Chest al vûl dî che tes Republichis e tes Comunitâts autonomis che, dongje dal rus, a àn une lenghe proprie uficiâl, la lenghe native no sarà plui obligatorie. Si trate di une misure che e met a risi l’ûs des lenghis propriis intal insegnament e lis indebolìs ancjemò di plui a front dal rus. Cuintri dal proviodiment a vevin cjapât posizion il president dal consei pai dirits umans e cetantis organizazions pe lenghe des comunitâts nazionâls minorizadis, massime te aree caucasiche, uraliche e siberiane. Al jere stât il president rus Vladimir Putin a prometi l’an passât che i rus che a vivin tes Republichis e tes Comunitâts autonomis no saressin plui stâts obleâts a studiâ lis lenghis nativis. Par che il test al deventi leç a mancjin dome il vie libare dal Consei federâl rus e la firme dal stes Putin.

Font: RAPSI News, 25/07/18; RFE RL, 25/07/18

Tatarstan: militant sot acuse pal so impegn pe lenghe proprie

La Costituzion dal Tatarstan e ricognòs il tatar e il rus come lenghis uficiâls di cheste Republiche de Federazion Russe, ma inte realtât la lenghe proprie di chest teritori si cjate ben lontane dal gjoldi dai stes dirits dal rus. Un citadin di cheste Republiche, Almaz Imamov, al à provât a denunciâ par discriminazion la sezion locâl de agjenzie tributarie federâl e di un istitût bancjari par vie che no garantivin i lôr servizis ancje par tatar. Pe magjistrature però, cundut de uficialitât de lenghe, i sogjets di nivel statâl no son tignûts a garantî i lôr servizis in lenghis diviersis dal rus. Cun di plui, par vie de sô iniziative, Imamov si à fintremai ricjatât sot acuse par vie che cu la sô denuncie al varès “stiçât l’odi etnic”.

Font: RFE/RL, 23/04/18

Federazion Russe: protestis pe lenghe e pal ambient dai Komis

Ancje sul finî dal mês di Dicembar inte Republiche autonome dai Komis a son ladis indenant lis iniziativis di proteste par difindi l’insegnament de lenghe proprie e cuintri dal incuinament ambientâl. Il guvier locâl al à proibît di tignî un referendum che si proponeve di obleâ lis compagniis petrolifaris a sostituî dutis lis tubaduris cun plui di vincj agns che a causin la plui part dal incuinament che al colpìs cheste aree. Associazions ambientalistis e comunitâts locâls a cirin duncje di tignî impiade la atenzion su chest probleme. A cheste reson si à zontade po ancje la difese dal insegnament curicolâr dal komi, lenghe ugrofiniche proprie di cheste Republiche, che diviers rapresentants politics locâi a volaressin mudâ in opzionâl, massime dopo des declarazions fatis in Lui dal president Vladimir Putin su la prioritât dal insegnament dal rus ancje tes Republichis autonomis a dam des lenghis locâls. Cundut dai risis, disinis di personis a àn aderît aes protestis in diviersis localitâts de Republiche ancje cun slogans cuintri dal president rus.

Font: The Independent Barents Observer, 28/12/17

Moldova: scuintri sui programs radiotelevisîfs rus

Ai 7 di Dicembar il Parlament moldâf al à fat bon un codiç su lis emissions radiotelevisivis che al previôt che no si puedin mandâ in onde contignûts che a rivin di stâts che no àn ratificât la convenzion europeane su la television transfrontaliere. In buine sostance la norme si propon di eliminâ chê che il Partît Liberâl Democratic, cumò al guvier, al definìs “propagande russe”. In plui di minorancis significativis che a àn il rus come prime lenghe, la plui part de popolazion de Moldova e cognòs ancje il rus e duncje dutis lis emitentis principâls a trasmetin cetancj programs ta cheste lenghe, programs che pe plui part a rivin de Federazion Russe o che si poin su materiâi e fonts di chel paîs. Diviers organisims di control a segnalin cemût che cheste situazion e fasi passâ cence mediazion la linie dal Cremlin su cetancj temis sensibii. Il president de Moldova, il filorus Igor Dodon, al à fat savê daurman che nol firmarà la leç. No sarès però la prime volte che il so “no” al ven superât di un intervent de cort costituzionâl che lu suspint dal mandât il timp che al covente par ratificâ il proviodiment. Di là dai siei contignûts politics, la gnove leç e va però ancje a limitâ l’acès de popolazion di lenghe russe a programs radiotelevisîfs te lôr lenghe. Ancje par chest, il guvier de regjon autonome de Gagauzie al à dite che nol metarà in vore la gnove norme e nol imponarà nissune limitazion ae programazion par rus.

Font: Balkan Insight, 08/12/17

Tatarstan: presidi par che si rignuvissi l’acuardi Mosche-Kazan

Ai 30 di Avost, intal inovâl de declarazion di sovranitât dal Tatarstan, la organizazion Centri Public Tatar (TIU) e à inmaneât un presidi te citât di Kazan par domandâ la avualiance intai rapuarts jenfri la Republiche autonome dal Tatarstan e la Federazion Russe. In particolâr si à domandât di rignuvî l’acuardi sotscrit ai 27 di Lui dal 2007 des autoritâts di Mosche e di Kazan su la condivision inte gjestion dal podê. L’acuardi, che al garantìs un nivel plui alt di autoguvier pal Tatarstan, al è scjadût za di cualchi setemane e al somee che lis autoritâts russis no vuelin rignuvîlu. Il Centri Public Tatar al è impegnât za di agns a difindi la identitât, la lenghe e la culture des comunitâts tataris. Il so president, Rafis Kasjapov, al è stât condanât a trê agns di preson intal 2015 par vê criticât lis autoritâts russis pe anession de Crimee, penisule là che e vîf une gruesse comunitât tatare.

Font: RadioFreeEurope - RadioLiberty, 30/08/17

Mari-El: atac di Putin al insegnament des lenghis nativis

Ai 20 di Lui, intant di une visite inte republiche autonome di Mari-El, il president rus Vladimir Putin al à criticât l’insegnament des lenghis nativis inte republichis che a formin la Federazion Russe. Cundut che il mari – lenghe che e parten ae famee finiche – al è lenghe uficiâl de republiche autonome adun cul rus, la sô presince no je paritarie ni tes istituzions e nancje te istruzion. Par chest tai ultins agns si à inviât diviersis iniziativis par incressi la presince dal mari intes scuelis. Cundut de situazion di minorizazion, Putin nol à mancjât di dâ la sô poie plene ae comunitât nazionâl russe di Mari El che, daûr des sôs peraulis, no varès di vê nissun oblic di imparâ une lenghe che no sedi chê russe.

Font: Radio Free Europe, 21/07/17

Sapmi: adunance a 100 agns de prime assemblee unitarie

Ai 6 di Fevrâr dal 1917 te citât di Trondheim, in Norvegje, si son dâts dongje in assemblee pe prime volte rapresentants rivâts di dutis lis tieris dal Sami (Sapmi) par inviâ adun la lote pal ricognossiment dai lôr dirits e de lôr identitât. Za di agns cheste date e je stade sielzude tant che Zornade nazionâl dai Sami. Chest an, a cent agns di chê assemblee storiche, delegâts sami rivâts di Norvegje, Svezie, Finlande e Russie a àn tornât a cjatâsi a Trondheim. Ae iniziative e à partecipât ancje la prime ministre norvegjese Erna Solberg che e à denunciât i dams causâts des politichis di snazionalizazion puartadis indenant cuintri dai Sami e e à dite che, cundut che si à fat tancj pas indenant, lis politichis di tutele e di promozion de lenghe, de culture e de economie tradizionâl dai Sami a van infuartidis. La fieste e cole juste tal moment che i Parlaments dai Sami de Norvegje, de Svezie e de Finlande a son daûr a ratificâ la gnove convenzion che e ponte a vualivâ la suaze normative e lis azions di rivendicazion dai Sami tai trê stâts.

Font: The Independent Barents Observer, 06-07/02/17

Crimee: Russie acusade di crimins politics sui tatars

E cres la preocupazion framieç des associazions pai dirits umans pe repression metude in vore des autoritâts russis cuintri dai militants tatars de Crimee. Dopo che la regjon e je stade separade de Ucraine par jessi glotude de Federazion Russe, chê tatare no je stade la uniche minorance tibiade, ma – a disin i rapresentants di Amnesty International – si cjate a jessi chê cul nivel plui alt di repression par vie che e je la plui compate tal manifestâ la sô oposizion al guvier rus. Cheste comunitât, che e rapresente il 13% de popolazion de penisule, e à podût tornâ in Crimee dome tal 1989 dopo che par ordin di Stalin e jere stade depuartade in Asie centrâl ae fin de seconde vuere mondiâl. La repression però si è tornade a fâ sintî cun fuarce ancje dopo de anession: buine part dai rapresentants principâi de comunitât si cjatin in esili in Ucraine, altris a son sot procès o fintremai sot osservazion psichiatriche, e si àn ancje segnalazions di militants fermâts de polizie e po disparîts. Cun di plui, i mieçs di comunicazion indipendents a son stâts sierâts, propit a partî de television tatare ATR.

Font: The Guardian, 12/12/16

Crimee: scuintri tra Russie e Ucraine sui dirits dai tatars

Il ministri ucrain pe justizie, Pavlo Petrenko, al à anticipât la intenzion di presentâ une denuncie cuintri de Russie denant dal Tribunâl european pai dirits umans pe metude al bant de organizazion Mejlis, che e rapresente la comunitât tatare de Crimee. Ta cheste penisule, che tal 2014 e je stade anetude de Federazion Russe, a vivin sù par jù 260 mil tatars, o sei il 13% de popolazion totâl. Sul finî dal mês di Avrîl la Cort supreme de Crimee e à decidût di meti fûr leç Mejlis par vie che le calcole une organizazion estremiste. Diviers dai dirigjents di cheste organizazion a jerin scjampâts in Ucraine dopo de anession de Crimee e a van dilunc a acusâ lis autoritâts russis di violâ i dirits de comunitât tatare.

Font: Sputnik International, 15/07/16

Carelie: ativist sot procès par vê fevelât di indipendence

Vladimir Zavarkin, conseîr intun comun de Carelie, al è sot procès cu la acuse di vê saborât il separatisim di chest teritori de Federazion Russe. Intant di un intervent public, dopo vê criticât il governadôr Alexander Khudilainen e lis autoritâts russis acusantlis di disfrutâ la Carelie cence dâ rispuestis aes dibisugnis dal teritori, Zavarkin al veve dite che se il guvier rus nol ves abadât aes domandis dai carelians al sarès stât il câs di inmaneâ un referendum su la separazion di chest teritori de Federazion Russe. Par acusis similârs nol è tant che lis autoritâts russis a àn condanât a trê agns di preson l’ativist tatar Rafis Kashapov.

Font: Finugor, 11/11/15

Sami: i dirits antîcs su tiere e aghe tal archivi UNESCO

La UNESCO e à decidût di cjapâ dentri intal so Archivi de memorie dal mont ancje i tratâts jenfri la Russie zariste e i sami Skolt là che si ricognossevin i dirits antîcs di cheste comunitât su la tiere e su la aghe e là che si ur garantive ancje libertât di pescje e di arlevament. Si trate di documents che a van dal 1601 al 1775, ma che a confermin dirits ricognossûts za di prime. La part plui antighe dai documents, di fat, e je lade pierdude intal 1859 intant de vuere jenfri Russie e Svezie. I tratâts a son cumò conservâts intal centri culturâl sami di Aanaar / Inari in Finlande. L’Archivi UNESCO al ten dentri i documents judicâts fondamentâi pe storie dal mont che, in dì di vuê, a son plui o mancul 340. Pe presidente dal Parlament sami de Finlande, Tiina Sanila-Aikio, la sielte de UNESCO e rapresente un ricognossiment dai dirits di cheste comunitât native e de sô capacitât di difindiju intai secui a dilunc.

Font: Barents Observer, 13/10/15