Ai
26 di Otubar passe 50 mil personis a àn partecipât denant dal palaç
di justizie di Iruñea / Pamplona a di une gnove manifestazion di
solidarietât cui vot zovins di Altsasu / Alsasua condanâts dai
judiçs de Audiencia Nacional
a penis fin a 13 agns di preson par une barufe di bar cun doi agjents
de Guardia Civil
in libare jessude. La vicende e jere stade strassomeade e piturade di
une rilevance politiche che e veve puartât la acuse a tratâle come
un câs di terorisim. Dopo di un procès plui che discutibil, la
Audiencia Nacional
e veve fat colâ la acuse di terorisim ma e veve condanât i zovins
di Altsasu / Alsasua al massim de pene par chês altris acusis
(agression a public uficiâl, lesions, disordins publics e menacis
ingravadis dal odi cuintri des fuarcis di polizie) condanant doi di
lôr a 13 agns di preson, doi a 12 agns, trê a 9 agns e la uniche
fantate sot acuse a 2 agns.
Di resint la vicende e je rivade al esam
dal tribunâl suprem spagnûl che al à confermât in buine sostance
l’implant acusatori e al à sbassât un tic lis condanis plui
penzis. La manifestazion dai 26 di Otubar, clamade adun dal
coordenament Altsasukoak Aske
daûr dal sproc «cheste no je justizie», e voleve manifestâ la
smare par cheste gnove decision. Ae iniziative a àn aderît ancje i
rapresentants dai partîts politics EH
Bildu, Geroa
Bai e Podemos,
dai sindacâts nazionalitaris ELA e LAB e di cetantis realtâts
associativis de Navare. Tai ultins agns la vicende di Altsasu /
Alsasua, intune cu lis sentencis suntun pâr di câs di violencis
sessuâls di grup (une propit in Navare e chê altre in Catalogne) e
cu lis condanis dai dirigjents indipendentiscj catalans, a son
deventadis la dimostrazion plui clare dal ûs politic,
disproporzionât e reazionari de justizie intal ream di Spagne.
Font:
EiTB,
26/10/19
Nessun commento:
Posta un commento