Serbie: gnûf rapuart su la Cjarte europeane des lenghis

Il comitât dai ministris dal Consei de Europe al à dât fûr un gnûf rapuart sul rispiet de Cjarte europeane des lenghis regjonâls o minoritariis de bande de Serbie là che la liste des lenghis ricognossudis e cjape dentri: albanês, arumen (valac), bosgnac, bulgar, bunjevaç (che cualchidun al calcole dome une varietât serbe-cravuate), cec, cravuat, macedon, ongjarês, romanì, rumen, ruten, slovac, todesc e ucrain. La situazion miôr, par chel che al rivuarde l’ûs de lenghis minorizadis, si le cjate inte regjon de Voivodine. Cundut dai progrès segnalâts massime tai cjamps de educazion e dai mieçs di comunicazion, il comitât al invide a intervignî su diviers fronts. In particolâr si domande di favorî la presince des lenghis minoritariis inte justizie, tes aministrazions publichis e tal sisteme radiotelevisîf, e di infuartî la capacitât dai Conseis des minorancis nazionâls di promovi lis lenghis minorizadis inte societât. Par chel che al rivuarde la scuele, si invide a incressi la presince dal romanì e dal ucrain intal sisteme scolastic, ancje cul sbassâ i soiârs minims par meti sù classis cul insegnament des lenghis minorizadis, e a aumentâ l’insegnament di todesc e di cec.

Font: Council of Europe, 04/04/19

Voivodine: si slargjin i spazis di insegnament par cravuat

Il ministeri serp pe educazion al à confermât che cul prossim an scolastic si doplearà il numar des sezions cravuatis intes scuelis secondariis di Subotica, in Voivodine, la regjon de Serbie cul numar plui alt di minorancis. I students a podaran sielzi di frecuentâ lis classis par cravuat ancje tai istitûts tecnics e ta chei specialistics par infermîrs. La ativazion di gnovis sezions e di gnûfs programs disponibii par cravuat e je il risultât dal impegn cjapât chest Fevrâr dal president serp Aleksandar Vučić cui rapresentants de Aleance dai Cravuats de Voivodine. In dì di vuê, inte aree di Subotica, a son passe 400 i students che a frecuentin lis lezions par cravuat.

Font: Total Croatia News, 27/05/18

Voivodine: Serbie riclamade al rispiet de minorance ongjarese

La Serbie e à otignût la candidature par jentrâ inte UE intal Març dal 2012 e, cul Zenâr di chest an che al ven, a varessin di tacâ lis tratativis pe sô jentrade. Un dai pidiments principâi pe adesion al jere la cuistion dai rapuarts cul Cossovo che aromai e somearès avonde a bon. A metisi di stuart cumò e je però la Ongjarie, o almancul un grup di parlamentârs di chest paîs che, intant di une iniziative tignude ai 20 di Novembar intal Parlament di Strasburc, al à domandât che no si aceti la jentrade de Serbie fintremai che nol sarà garantît il plen rispiet dai dirits dai 250 mil membris de minorance ongjarese che a vivin in Voivodine e che no si ricognossarà une fuarte autonomie par cheste regjon. Daûr de operazion al è il partît di estreme diestre ongjarês Jobbik.

Font: Balkan Insight, 21/11/13

Voivodine: citadinance magjare par 50 mil ongjarês

50 mil membris de minorance ongjarese che e vîf in Voivodine a àn otignût la citadinance magjare intant di une iniziative che si è tignude ai 13 di Novembar cu la partecipazion dal ministri pai forescj de Ongjarie, Zsolt Nemeth. La adesion dai membris de minorance magjare di cheste provincie autonome de Serbie ae iniziative inviade dal guvier di Budapest e je stade tra lis plui altis tra chês des diviersis comunitâts di minorance ongjarese sparniçadis inte Europe dal Est. Chescj gnûfs citadins a podaran votâ pal Parlament ongjarês za tes elezions di chest an che al ven. In Voivodine si stime che la comunitât di lenghe ongjarese e sedi di sù par jù 250 mil personis.

Font: Politics.hu, 13/11/13

Voivodine: nazionaliscj serps in place cuintri dal guvier locâl

Ai 12 di Avrîl uns 30 mil personis si son dadis dongje a Novi Sad / Újvidék par protestâ cuintri dal guvier de provincie autonome de Voivodine, acusât di separatisim intai confronts de Serbie. In place a jerin ducj i partîts de aree nazionaliste serbe a partî dai socialiscj e dai conservadôrs dal Partît Progressist Serp (Srpska Napredna Stranka) che a guviernin cumò a Belgrât, ma in Voivodine si cjatin ae oposizion. I manifestants a àn domandât che al sedi ritirât il document di protezion dai dirits costituzionâi e legjislatîfs de Voivodine che il guvier de provincie al à mandât al esecutîf serp acusantlu di violâ i dirits e lis competencis des istituzions provinciâls. Tra lis domandis fatis indenant intant de manifestazion a jerin po lis dimissions dal president dal esecutîf provinciâl, Bojan Pajtič, e elezions anticipadis. I rapresentants dal guvier provinciâl però a àn refudât ogni acuse di separatisim e a àn replicât che lis personis che a manifestavin a Novi Sad a jerin in buine part rivadis de Serbie e no vevin duncje nissun dirit di meti il bec intes cuistions politichis de Voivodine.

Font: Balkan Insight, 13/04/13

Ongjarie: atacs ongjarês de Voivodine, acusis a AI

Ai 6 di Març la organizazion Fidelitas, braç zovanîl dal partît Fidesz al guvier cumò in Ongjarie, al à tignût une manifestazion di proteste a Budapest denant de sede ongjarese di Amnesty International. Daûr di cheste iniziative al è il fat che intai rapuarts de organizazion internazionâl su la Serbie si fevele di pas indenant inte tutele dai dirits umans inte provincie de Voivodine e no si condanin invezit lis intimidazions e lis violencis di stamp etnic cuintri di membris de minorance ongjarese. I rapresentants di Fidelitas a acusin Amnesty International di intervignî a pro di cualchi minorance, ma no di dutis. La diretore de sezion ongjarese di Amnesty International, Orsolya Jeney, e à sigurât che la organizazion e condane la discriminazion di cualsisei minorance e che e calcole ogni at motivât dal odi etnic un crimin une vore seri.

Font: Politics.hu, 07/03/13

Voivodine: tensions sul avignî de provincie

E cres la tension sul avignî de Voivodine, la provincie autonome de Serbie là che si à il numar plui alt di minorancis a tacâ dai sù par jù 250 mil ongjarês. A scjaldâ la situazion a vevin contribuît za diviers episodis. Intal Zenâr dal an passât la gnove aministrazion de capitâl Novi Sad / Újvidék, passade intes mans dai conservadôrs dal Partît Progressist Serp (Srpska Napredna Stranka), e veve tacât a doprâ pai nons des stradis e dai sîts istituzionâi dome l’alfabet cirilic e no chel latin che al ven invezit doprât dai ongjarês e de plui part di chês altris comunitâts di minorance de Voivodine. Po, intal mês di Lui, une sentence de Cort Costituzionâl e veve limitât o eliminât une schirie di proviodiments cjapâts de provincie, a tacâ de pussibilitât di vê un ufici di rapresentance autonom a Bruxelles fin al titul di capitâl atribuît ae citât di Novi Sad. Cumò il scuintri al somee centrâsi suntune sorte di vuere di manifescj tra i nazionaliscj serps di Treća Srbija che a volaressin la abolizion de autonomie de provincie e il Partît de Voivodine (Vojvođanska Partija) che al domande invezit une modifiche de costituzion serpe par che la Voivodine e deventi une republiche dentri di une Serbie trasformade in federazion. Dut câs, no mancjin nancje lis segnalazions di violencis di stamp etnic, massime tra i zovins.

Font: Balkan Insight, 29/01/13

Europe centrâl: mobilitazion des minorancis ongjaresis

Lis problematichis che a tocjin lis comunitâts ongjaresis presintis in diviers stâts europeans a son stadis al centri di un incuintri tra il comissari pes minorancis nazionâls de OSCE, Knut Vollebaek, e la segretarie di stât vicjarie ongjarese, Zsuzsanna Repas. Par chel che al rivuarde la Romanie, une des cuistions plui cjaldis e reste chê dal ûs dal ongjarês inte facoltât di medisine de universitât di Marosvásárhely / Târgu Mureş. Pe Serbie, invezit, la atenzion si è centrade su la riduzion dal nivel di autonomie de Voivodine e dal Consei Nazionâl dai Ongjarês di cheste provincie. In Ucraine si cjale massime ae metude in vore de gnove leç su lis lenghis. I emendaments su la leç sui dirits des minorancis e su chê pe citadinance, intune cul declassament de universitât di Komárom / Komárno, a son invezit i temis che a preocupin di plui pe comunitât ongjarese de Slovachie.

Serbie: une disine i deputâts des minorancis intal Parlament di Belgrât

Intes elezions parlamentârs che si son davueltis in Serbie ai 6 di Mai adun cul prin turni des presidenziâls, il partît che al à cjapât plui vôts (74) al è stât chel che al poiave la candidature di Tomislav Nikolić ae presidence. Par chel che al rivuarde lis diviersis minorancis nazionâls presintis intal paîs, il risultât miôr al è stât chel de Aleance dai Ongjarês de Voivodine (VMSZ) che e à otignût cinc deputâts intal parlament di Belgrât. Il Partît di azion democratiche dal Sandžak (SdaS), che al nas dal grim de minorance bosgnache, al è elet doi dai siei rapresentants. Un sôl deputât invezit pe coalizion “Sve zajedno” (Ducj adun), che e met dongje piçui moviments bosgnacs, cravuats, ongjarês e slovacs, e un pe Coalizion dai Albanês de Valade di Preševo (KSlP / KAPd). Partîts rapresentatîfs di comunitâts minoritariis a jerin però rapresentâts ancje in cualchidune des coalizions principâls. Al è il câs de Aleance Democratiche dai Cravuats in Voivodine (DSHV), che e poiave la candidature a president di Boris Tadić e che e à otignût un deputât, e dal Partît Democratic Bosgnac dal Sandžak (BdsS), che al à aderît ae coalizion che e sostignive Čedomir Jovanović e che al à elet un parlamentâr.

Font: Serbian Government, 10/05/12; RIK, 07/05/12

Serbie – Romanie: contrascj su la tutele dai valacs

Inte ultime riunion dal Consei dai ministris dai forescj de Union Europeane, il rapresentant rumen, Cristian Diaconescu, al à sburtât l’organisim a domandâ ae Serbie di incressi i nivei di tutele des minorancis linguistichis e nazionâls che a vivin dentri dai siei confins. La domande e à un ciert pês, massime se si calcole che cumò la Serbie e je impegnade intal procès par jentrâ inte UE. L’intervent rumen al jere indreçât massime a garantî i dirits de comunitât valache, ma al à jevât no pocjis polemichis propit framieç di cheste comunitât. I valacs (tiermin plui doprât intes lenghis slavis) o arumens (come che par solit a àn miôr clamâsi chestis stessis comunitâts) a son popolazions di lenghe neolatine che a vivin in diviersis regjons de penisule balcaniche. I rumens ju calcolin tant che lôr minorancis intal forest, ma la plui part dai valacs si viôt come une comunitât par so cont. La Serbie e ricognòs la presince di une minorance rumene, formade di sù par jù 35 mil personis e concentrade in Vojvodine, ma ancje di une comunitât valache di uns 40 mil di lôr che a vivin pe plui part te Serbie orientâl. I rapresentants di cheste ultime comunitât a àn protestât pal intervent rumen, par vie che no si ricognossin cun chest paîs e no vuelin che ur vegni imponude la lenghe rumene.

Font: Balkan Insight, 29/02/12

Serbie: elets i conseis des minorancis

Ai 6 di Jugn si son davueltis in Serbie lis elezions pai Conseis nazionâi che a àn il compit di svilupâ lis politichis linguistichis e culturâls des lôr comunitâts di riferiment in setôrs impuartants tant che educazion e mieçs di comunicazion. Il vôt al à interessât 16 des 19 comunitâts nazionâls ricognossudis dal stât serp, dal moment che chês altris trê – cravuats, macedons e slovens – a doprin sistemis eletîfs diferents. Lis elezions a son stadis controladis di osservatôrs internazionâi che lis àn judicadis regolârs. Chel istès no son mancjâts i ponts critics. Cun di fat, i rapresentants de Aleance dai Ongjarês de Vojvodine – si ben che a son stâts i plui votâts – a àn acusât il principâl partît serp di vê cirût di condizionâ il vôt. Framieç de minorance albanese, invezit, a son dome doi i partîts che a àn decidût di no boicotâ il vôt: cundut achel la partecipazion tra i albanês e je stade tor dal 55%.

Font: BalkanInsight, 07-10/06/10

Vojvodine: vie libare definitîf al Statût gnûf

Ai 14 di Dicembar la assemblee de Vojvodine e à fat bon il so gnûf Statût di autonomie, daspò che, dôs setemanis prime, il test al veve vût il vie libare dal Parlament serp. Par che il Statût al jentri in vore, duncje, e mancje dome la publicazion su la gazete uficiâl. La gnove cjarte statutarie e ricognòs plui competencis aes istituzions de Vojvodine, ancje se mancul di chês che a domandavin i partîts regjonaliscj e i rapresentants de comunitât ongjarese, che e rapresente la minorance principâl de regjon.

Font: Món Divers, 15/12/09

Vojvodine: fat bon dal Parlament serp il Statût gnûf

Ai 30 di Novembar, il Parlament serp al à fat bon cuntun vôt trasversâl il gnûf Statût di autonomie de Vojvodine. Par jentrâ in vore, il test al varà cumò di jessi fat bon ancje de assemblee di cheste regjon e publicât po su la gazete uficiâl. Se no si varan sorpresis, duncje, il percors istituzionâl al varès di sierâsi tor de metât di Dicembar. Il Statût gnûf al ricognòs plui autonomie ae regjon ancje se no dute chê che a domandavin i partîts regjonaliscj e i rapresentants de comunitât ongjarese, che e rapresente la minorance principâl de Vojvodine. Pal president de Assemblee regjonâl, Sandor Egeresi, ancje lui membri de minorance ongjarese, cun chest Statût la Vojvodine e podarà difindi miôr la sô identitât, svilupâ miôr lis sôs capacitâts economichis e integrâsi miôr inte suaze europeane.

Font: Balkan Insight, 01/12/09; Món Divers, 01/12/09; B92, 30/11/09

Pontade 25 08 (09/12/08) - 1

Slovachie: nissun dirit coletîf pai ongjarês

“La Serbie e ricognòs i dirits coletîfs des minorancis, la Slovachie no lu fâs e no à nancje intenzion di ricognossi une cualsisei forme di autonomie par nissune minorance etniche.” Al à rispuindût cussì il ministri slovac pai forescj, Jan Kubis, intant de sô visite in Vojvodine cuant che i è stât domandât se il guvier slovac al jere disponibil a dâi une cierte autonomie ae comunitât ongjarese, che in Slovachie si calcole che e cjapi dentri il 10% de popolazion. In Vojvodine i ongjarês a son sù par jù il 15% de popolazion e a gjoldin di diviersis formis di autonomie sei politiche che culturâl. Kubis al à dite che la Slovachie no cjaparà mai cheste strade e che no darà seont aes politichis dal guvier ongjarês par incressi la autonomie des comunitâts storichis magjaris che a vivin intai stâts dulintor.
Font: Balkan Insight, 24/11/08; Nationalia, 24/11/08

Pontade 22 08 (28/10/08) - 1

Vojvodine: fat bon de assemblee locâl il gnûf statût

La Assemblee de Vojvodine e à fat bon il gnûf statût de regjon là che, cundut che si à une maiorance serbe, si cjatin diviersis comunitâts minoritariis, a tacâ di chê ongjarese. Il test al à vût il vôt a pro di 89 dai 120 deputâts dal Parlament locâl. Cuintri dal statût gnûf a àn votât dome i membris dai partîts nazionaliscj serps che lu acusin di là plui innà di ce che e permet la Costituzion. Il test cumò al à di frontâ l’esam dal Parlament serp, ma si calcole che al varès di jessi fat bon dentri de fin dal an. Tra lis novitâts dal statût si cjate la trasformazion in guvier dal atuâl consei esecutîf de regjon e la pussibilitât di vierzi un ufici di rapresentance a Bruxelles.
Font: B92, 15/10/08; Món Divers, 16/10/08

Pontade 19 08 (16/09/08) - 2

Vojvodine: il guvier regjonâl al lavore par incressi la autonomie

I partîts che a guviernin la Vojvodine daspò des elezions regjonâls dal Mai stât a son daûr a meti jù un Statût gnûf che al dedi plui autonomie a chest teritori che al fâs part dal stât serp. L’obietîf al è chel di recuperâ almancul une part dal nivel di autoguvier che la regjon e veve pierdût, intune cul Cossovo, intal 1990 sot dal guvier di Slobodan Milosevic. Tal 2002 il Parlament serp al veve tornât ae Vojvodine un friç di autonomie, ma cetante di mancul di chê che la regjon e gjoldeve ai timps di Tito. A sburtâ pe riforme a son il Partît Democratic dal prin ministri serp Boris Tadic, i autonomiscj de Leghe dai Socialdemocratics de Vojvodine, la Coalizion Ongjarese, il Partît Socialist de Serbie e i liberâi dal G17. Il president dal guvier regjonâl, Bojan Pajtic, i à tignût a sigurâ che il Statût che si è daûr a scrivi nol rapresente une menace pe integritât teritoriâl serbe. No le pense cussì il Partît Radicâl Serp che al è contrari ae riforme e che al dîs che cun chest Statût la Vojvodine si invie pe stesse strade che e à puartât, intal 2006, ae indipendence dal Montenegro. Inte regjon e vîf une gruesse comunitât ongjarese che e rapresente il 14,5% de popolazion totâl, dongje di minorancis slovachis, cravuatis, rom e rutenis.
Font: Món Divers, 31/08/08