20/10/20

Paîs Catalans: si invie il percors de leç su la funzion publiche

Il progjet di leç su la funzion publiche al à tacât il so percors intal Parlament dal Paîs Valenzian. Si trate di une leç che e varès vût di jessi fate buine ancjemò te legjislature stade ma che po si veve blocade par vie des diferencis tra i doi partîts principâi dal guvier (PSPV e Compromís). Ae fin si à cjatât un compromès che al previôt che i nivei di cognossince de lenghe proprie a sedin definîts cuntun regolament che al sarà metût jù dal assessorât su la justizie e lis aministrazion publichis (vuidât de socialiste Gabriela Bravo) e controlât po de direzion gjenerâl de politiche linguistiche. Lis oposizions di diestre a àn contestât il test par vie che a calcolin che al oblearà ducj i funzionaris publics a cognossi il catalan (te sô varietât valenziane). No le viodin cussì lis organizazions impegnadis pal catalan che invezit a lamentin il fat che si riscje che in cetantis posizions no si domandarà une cognossince suficiente de lenghe proprie. Acció Cultural del País Valenciá, Escola Valenciana e altris sogjets a critichin ancje che, cul rimandâ il riferiment ai nivei di competence linguistiche a di un regolament seguitîf, si slungjin ancjemò di plui i timps di une leç che e je za in ritart di agns. In dì di vuê si stime che il 93% dai funzionaris publics al capissi il valenzian, ma dome il 57% al sedi in stât di fevelâlu almancul un pôc.

Font: VilaWeb, 16/10/20

Cossovo / Serbie: si slontane la nassite de Zajednica

Ai 13 di Otubar il prin ministri cossovan Avdullah Hoti al à sierât la puarte ae istituzion in timps curts de Zajednica, o sei la Associazion dai Comuns Serps dal Cossovo. Par Hoti no je nissune pussibilitât che cheste istituzion e cjapi vite fintremai che no si rivarà a di un ricognossiment uficiâl dal Cossovo de bande de Serbie, ipotesi cheste che e je ben lontane dal concretizâsi. In plui di incressi inmò di plui la tension cu lis autoritâts di Belgrât, la posizion dal prin ministri cossovan e à sustât ancje lis istituzions europeanis che a son daûr a cirî une mediazion tra lis parts. Peter Stano, puartevôs de UE pe politiche foreste, al à ricuardât cemût che il Cossovo ancjemò tal 2013 al veve cjapât un prin impegn pe costituzion de Associazion, ratificât a maiorance dal so stes Parlament. Po a Bruxelles, tal 2015, al veve concuardât i detais di cheste istituzion che e varès di vê competence su educazion, disvilup economic, salût e planificazion teritoriâl e finanziaments direts dal guvier serp.

Font: Balkan Insight, 14/10/20

Asturiis: tal 2021 la RTPA e varà dome l’0,85% di asturian

La organizazion Xunta pola Defensa de la Llingua Asturiana (XDLA) e à stimât che vie pal 2021 su la RTPA – la Radio Television dal Principât des Asturiis – la percentuâl di emission di programs par asturian (e tal galizian fevelât inte part plui ocidentâl dal paîs) e sarà a pene dal 0,85%, come a dî sù par jù 75 oris. Un tant su la fonde dai progjets che la emitente publiche e à selezionât cul bant straordenari finanziât dal guvier asturian cun 138 mil euros. La Xunta e lamente il fat che no si cognossin i criteris di selezion di chescj progjets (che a son a pene un cuint di chei presentâts) e che no son dadis informazions su la lôr valence par chel che al rivuarde la politiche linguistiche e su la fasse orarie che a laran in onde. La critiche principâl de organizazion si riferìs però al fat che la RTPA e ricêf za 23 milions di euros ad an pes sôs ativitâts che, daûr dal Statût di autonomie e de leç, a varessin di contribuî ae normalizazion linguistiche e che invezit a finanziin une programazion dute par castilian.

Font: Asturies.com, 14/10/20

Irlande: in cressi lis risorsis pe lenghe e pal Gaeltacht

Ai 13 di Otubar il guvier irlandês al à fat savê che intal belanç pal 2021 lis risorsis pe lenghe irlandese e pal Gaeltacht, o sei lis areis là che l’irlandês al è ancjemò doprât in maniere significative, a saran cressudis di passe 17 milions di euros. La plui part di chescj fonts, o sei 14 milions e mieç, a laran a Udarás na Gaeltachta, la agjenzie di stât responsabile pal svilup economic des areis gaelichis. La gnove e je stade cjapade cun sodisfazion de organizazion Conradh na Gaeilge che za di agns e jere impegnade a sburtâ un plan di invistiments pe lenghe irlandese che e veve metût jù in cunvigne cuntune novantine di altris realtâts associativis.

Font: CnaG, 13/10/20

Arpitanie: in linie il tradutôr francês - francoprovençâl

Al è in linie il gnûf tradutôr automatic francês – francoprovençâl. Si trate di un progjet coordenât dal linguist Hèctor Alòs. Cualchi aspiet tecnic nol è ancjemò definitîf ma, chel istès, si à sielzût di metilu daurman a disposizion dai utents. Il tradutôr si cjate su Apertium, une plateforme cun codiç viert doprade za di diviersis comunitâts minorizadis tant che asturians, bretons, ocitans, sami e tatars, par meti a disposizion imprescj linguistics.

Font: Jornalet, 12/10/20

Stât francês: disinis di mobilitazions pes lenghis propriis

Coordenadis dal coletîf Pour Que Vivent Nos Langues, sabide ai 10 di Otubar, si son davueltis passe cincuante iniziativis ator pal stât francês par rivendicâ il ricognossiment uficiâl des lenghis minorizadis e, in particolâr, par che al vegni garantît il lôr insegnament a ducj chei che lu domandin. Chest al vûl dî, par esempli, incressi i spazis che chestis lenghis a àn dentri dal sisteme educatîf public e scancelâ i efiets negatîfs che la riforme scolastiche volude dal ministri Jean-Michel Blanquer e à sul lôr insegnament. Plui de metât des mobilitazions si son davueltis ator pe Ocitanie, di Bordèu / Bordeaux a Niça / Nice, di Lemòtges / Limoges a Pau, di Marselha / Marseille a Tolosa / Toulouse. Manifestazions e presidis si son tignûts ancje in Alsazie, Bretagne, Catalogne dal Nord, Corsiche, Flandris, Paîs Basc setentrionâl e Savoie. La iniziative plui partecipade e je stade la cjadene umane che e à scjavaçât il centri di Baiona / Bayonne, là che si è dât adun un miâr di personis. Intal Paîs Basc sot aministrazion francese la cuistion e je une vore cjalde dal moment che, za di timp, al è in at un scuintri a muse dure tra la comunitât locâl e lis autoritâts centrâls francesis sul insegnament imersîf.

Font: Jornalet, 10-12/10/20; Mediabask, 10/10/20; Corse Net Infos, 10/10/20

Galizie: la Xunta e promôf la lenghe tes universitâts forestis

In dì di vuê il galizian al è materie di studi in 36 universitâts, 27 di chestis fûr dal stât spagnûl. Il guvier de Comunitât autonome de Galizie (Xunta) al à decidût di invistî passe 200 mil euros par infuartî la presince de lenghe proprie in cinc di chescj sîts e, plui tal detai, te universitât do Minho in Portugal, ta chê di Heidelberg in Gjermanie, te Autonome di Barcelone, te Complutense di Madrid e ta chê di Salamanca. Chestis risorsis a permetaran di incressi lis oris di insegnament de lenghe e de leterature galiziane ma ancje di inmaneâ cors, conferencis e congrès su chest teme.

Font: La Región Internacional, 10/10/20

Paîs Catalans: mobilitazion par dirits, autoguvier e lenghe

Par vie de pandemie la manifestazion rivendicative dai 9 di Otubar – fieste nazionâl dal Paîs Valenzian – e à vût di jessi sostituide di une conference stampe là che i rapresentants des entitâts che a formin la Comissió 9 d’Octubre (Acció Cultural del País Valencià, Associació Civica Valenciana Tirant lo Blanc, Ca Revolta, Decidim, Escola Valenciana, Fundació Nexe, Plataforma per la Llengua, Societat Coral el Micalet, Bloc d’Estudiants Agermanats, A Contra Corrent, CCOO PV, Intersindical Valenciana, Compromís, ERPV, EUPV, Podem) a àn presentât un manifest là che si domandin dirits, autoguvier e lenghe. «O confermìn – si lei tal document – la nestre volontât di fâ sù il Paîs Valenzian tant che sogjet sovran e progjet par miorâ il benstâ dal nestri popul, e di difindisi dai grups e des organizazions fassistis che, an dopo an, nus atachin cun violence cun chê di dineâ i nestris dirits socioculturâi e il nestri dirit di decidi». Plui tal detai la comission e conteste la volontât centralizadore dal guvier spagnûl, e difint lis competencis dal guvier locâl e e domande un model fiscâl gnûf che al meti fin al sac des risorsis dal paîs. Al guvier valenzian, invezit, i si domande une leç di avualiance linguistiche, la plene reciprocitât des radios e des televisions che a emetin par catalan, e la fin de discriminazion de lenghe proprie intes comunicazions istituzionâls, aministrativis e sanitariis.

Font: VilaWeb, 09/10/20

Gales: agriculture centrâl pe difese dal galês

Il 43% des personis impegnadis in agriculture in Gales al fevele la lenghe proprie a front di une medie gjenerâl dal 19%. Par chest il comissari pal galês, Aled Roberts, al calcole centrâl la funzion dai agricultôrs pe vitalitât de lenghe e al sburte il guvier a imbastî une strategjie complessive che e sostegni chest setôr che, cu la jessude dal Ream Unît de Union Europeane, si ricjate vuarfin dai contribûts comunitaris. Pal comissari si à di svilupâ un mecanisim che al judi massime lis impresis agriculis plui piçulis a conduzion familiâr. No si trate dome di contribûts direts pes impresis, ma ancje di ufrî servizis che a permetin aes fameis contadinis di lâ indenant cu la lôr ativitât. Chest al vûl dî, par esempli, judâ i zovins a fermâsi, prime mantignint lis scuelis sul teritori e po cuntune politiche abitative che i permeti di cjatâ cjase tes areis rurâls simpri plui menaçadis des secondis cjasis.

Font: BBC, 07/10/20

Paîs Basc: un miâr di students in Navare pal Sarean Euskaraz

Euskarabidea – l’istitût pe lenghe basche de Navare – al à presentât la cuarte edizion dal progjet Sarean Euskaraz che si propon di sburtâ l’ûs dal euskara tal setôr des tecnologjiis informatichis e de comunicazion e di promovi la culture digjitâl par basc. Chest an ae iniziative a partecipin 925 students des secondariis e 10 centris educatîfs, ducj i doi numars in cressi rispiet aes edizions stadis. Par compagnâ chest progjet il guvier de Navare al à programât ancje un cicli di cors gratuits par euskara sul teme des tecnologjiis digjitâls che si tignaran dai 13 di Otubar ai 15 di Novembar in 23 localitâts diviersis.

Font: EiTB, 06/10/20

Asturiis: prins esams par otignî la certificazion linguistiche

Sul principi di Otubar si son tignudis lis primis provis scritis e orâls pe certificazion de lenghe asturiane di nivel intermedi (B2). Si tache cussì a meti in vore il decret dât fûr dal guvier des Asturiis intal Jugn dal an passât là che si fissin i diviers nivei di competence linguistiche e i criteris par davuelzi i esams. Lis provis a jerin a numar sierât e, dai passe votcent che si vevin fats indenant, a son stâts 407 i candidâts che a àn podût partecipâ. La definizion dai nivei di competence linguistiche e je fondamentâl par chei lavôrs là che si à di cognossi e doprâ la lenghe cuntune cierte paronance tant che insegnants, tradutôrs o funzionaris publics.

Font: La Nueva España, 02/10/20