Europe: pas di Madrid pal ûs des lenghis couficiâls a Bruxelles

Il guvier spagnûl al à fat indenant une domande formâl al Parlament european par che si ricognossi la pussibilitât di doprâ il basc, il catalan e il galizian intant des riunions plenariis de istituzion. L’esecutîf di Madrid si è impegnât a cuvierzi dutis lis spesis che cheste iniziative e compuartarès e si à declarât disponibil a discuti daurman i detais pratics par che la domande si concretizi. Chest pas al jere tra chei concuardâts inte taule di dialic jenfri il guvier spagnûl e chel catalan.

Font: VilaWeb, 16/09/22

UE: presentade une propueste di leç pes nazions cence stât

Un grup di europarlamentârs che a rapresentin moviments politics indipendentiscj a àn presentât une iniziative par che la UE e imbastissi une leç par judâ a risolvi i conflits nazionâi in at dentri dai diviers stâts che le componin. Il cussì clamât Mecanisim Democratic European di Clarece al vûl jessi un imprest istituzionâl par garantî la libare espression dai citadins sul status politic des lôr comunitâts dentri di une suaze legâl e infuartî la dimension democratiche de Union. Dongje dal dirit des comunitâts cence stât di podê decidi cul vôt il lôr avignî, si proponin percors di conciliazion par favorî i negoziâts tra lis parts. La iniziative e cjape di model la legjislazion canadese che e à permetût di votâ dôs voltis su la indipendence dal Quebec. La propueste e sarà fate indenant inte suaze de conference sul avignî de Europe che e fâs di fonde par studiâ lis prossimis riformis e i gnûfs tratâts comunitaris. Pai proponents, la rispueste des istituzions europeanis aes cuistions indipendentistis e à di jessi dade cu la ufierte di plui e no di mancul democrazie, e cul impegn a sburtâ il dialic cuant che i stâts centrâi si refudin di frontâ sul plan politic chestis tematichis.

Font: Naiz:, 19/10/21

Irlande: e monte la rabie tal Nord pal bloc de leç sul gaelic

I acuardis di pâs pe Irlande dal Nord dal 1998 (Good Friday Agreement) a previodevin ancje misuris concretis par promovi e par tutelâ l’irlandês. Il perfezionament di chei acuardis intal 2006 (Saint Andrews Agreement) al impegnave il guvier britanic e chel nordirlandês par fâ buine une leç organiche pal gaelic irlandês. Intal 2016 dut câs, denant di une inazion durade agns a dilunc, si veve inviât un moviment popolâr trasversâl une vore atîf e partecipât che al domandave il rispiet dai dirits linguistics e la aprovazion di une normative specifiche. Tal Zenâr dal 2020 la fuarce de mobilitazion e veve puartât i partîts nordirlandês a sotscrivi un pat di legjislature (New Decade, New Approach) che al previodeve une leç pal irlandês e altris misuris pe tutele e pe protezion dal patrimoni linguistic e culturâl de Irlande dal Nord dentri di cent dîs.

Macedonie: scuintri cu la Bulgarie su lenghe e minorance

Ai 8 di Dicembar, intant de riunion dai ministris pal forest dai stâts de Union Europeane, no si à rivade a cjatâ la unanimitât sul inviament des tratativis pe jentrade te Union de Macedonie dal Nord. A blocâ dut e je stade ancjemò une volte la Bulgarie che e cîr di profitâ de situazion par risolvi un pocjis di problematichis viertis cul stât vicin. In particolâr, il guvier di Sofia nol vûl che tal acuardi par inviâ il procès di adesion si feveli di lenghe macedone dal moment che le calcole juste un dialet dal bulgar. Cun di plui, lis autoritâts bulgaris a vuelin che chês di Skopje a rinunziin in maniere esplicite al rispiet dai dirits linguistics e al ricognossiment de minorance macedone che e vîf dentri dai confins de Bulgarie.

Font: Balkan Insight, 08/12/20

Paîs Catalans: lenghe catalane discriminade dal Stât e de UE

La organizazion Plataforma per la Llengua e à publicât il so rapuart trimestrâl su lis discriminazions linguistichis inte legjislazion spagnole e ta chê europeane. Tai ultins trê mês dal 2019 si àn vudis 15 normis statâls e 13 comunitariis che a discriminin cui che al fevele par catalan. A nivel european la esclusion dal catalan e diven in primis dai dinei dal stât spagnûl di ricognossilu come lenghe uficiâl a nivel statâl. Par cheste reson, par esempli, no si puedin presentâ petizions par catalan al Parlament o al tribunâl european. Se si cjale ai dâts complessîfs dal 2019, lis normis discriminatoriis a son stadis in dut 134. Tal 2018 a jerin stadis 139.

Font: PFPLL, 31/01/20

Europe: in miârs a Strasburc pai eurodeputâts catalans

Almancul 8 mil personis a àn manifestât ai 2 di Lui a Strasburc, fûr dal Parlament european, par protestâ cuintri de impussibilitât di Carles Puigdemont, Oriol Junqueras e Toni Comín di partecipâ ae riunion di scree de gnove legjislature. I trê dirigjents indipendentiscj catalans a son stâts elets ma no àn podût cjapâ sù la incarghe di eurodeputâts. La zonte eletorâl centrâl spagnole e à pretindût, pe prime volte, che par vê acès al puest di parlamentâr european si ves prime di increditâsi a Madrid. Puigdemont e Comín, che si cjatin in esili in Belgjiche, no àn podût fâlu par vie che se a vessin di jentrâ tal stât spagnûl a saressin arestâts. Tal câs di Junqueras, che si cjate invezit in preson preventive, al è stât il tribunâl suprem spagnûl a impedii di increditâsi. Al è di dî che lis decisions des autoritâts spagnolis a àn cjatât la plene complicitât des istituzions di Bruxelles che a àn permetût cussì che passe doi milions di citadins europeans si cjatin cence dai rapresentants che a àn sielzût in maniere democratiche. Dome cualchi europarlamentâr al à solidarizât in maniere esplicite cui manifestants e, plui tal specific, i bascs di EH Bildu e PNV, i scozês dal SNP, i nazionaliscj flamants, i ecologjiscj Bové e Onesta, la portughese Matias dal Bloc di Çampe e l’irlandês Matt Carthy dal Sinn Féin che, su chest teme, si à scuintrât in aule cul president dal Parlament, Antonio Tajani.

Font: Naiz:, 02/07/19

Spagne: procès ai leaders indipendentiscj, finidis lis udiencis

Ai 12 di Jugn si à sierade, denant dal tribunâl suprem di Madrid, la prime part dal procès cuintri dai leaders indipendentiscj catalans che e je lade indenant par cuatri mês, cun 52 udiencis e 422 testemonis. Il confront tra acusis e difesis no à però mudât la situazion dal moment che lis domandis di condane (o di assoluzion) a son restadis lis stessis fatis indenant sul principi. In particolâr il public ministeri al domande 25 agns di preson par Oriol Junqueras, 17 agns par Jordi Sànchez, Jordi Cuixart e Carme Forcadell, 16 agns par Raül Romeva, Jordi Turull, Josep Rull, Joaquim Forn e Dolors Bassa, e 7 agns par Meritxell Borràs e Santi Vila.

UE: e cres la rapresentance de EFA tal Parlament european

A son diviers i candidâts di moviments rapresentatîfs des comunitâts minorizadis che a son stâts elets intal Parlament european in ocasion des votazions che si son tignudis intai diviers stâts membris de UE tra i 23 e i 26 di Mai. La vicende che dal sigûr e à fat plui scjas e je stade la elezion di trê dai rapresentants plui significatîfs dal indipendentisim catalan, o sei Oriol Junqueras, che si cjate di plui di un an in regjim di preson preventive, Carles Puigdemont e Toni Comín, che si cjatin in esili inte Belgjiche. Il prin al è stât elet cuntune liste che e meteve adun la çampe nazionalitarie basche, catalane e galiziane e che e à puartât ancje ae elezion di Diana Riba (simpri di ERC) e di Pernardo Barrena (EH Bildu). Puigdemont e Comín si presentavin invezit cu la liste Lliures per Europa. Intal stât spagnûl a son stâts elets al Parlament european ancje Izaskun Bilbao dal PNV e Ernest Urtasun di ICV.

Europe: mostre sul catalan autorizade in fin dal Parlament

Il Parlament european al è tornât su lis sôs decisions e al à autorizât la esposizion intai siei spazis de mostre metude adun de Plataforma per la Llengua su la lenghe catalane che sul imprin al veve decidût di censurâ. Dopo de denuncie publiche fate indenant de organizazion stesse e de evidence che la vicende e à vût su diviers mieçs di comunicazion, lis istituzions dal Parlament european a àn decidût di autorizâ la mostre. La scree uficiâl si le à vude ai 4 di Març ancje cu la partecipazion dal ex president catalan Carles Puigdemont che si cjate cumò in esili inte Belgjiche. Il president de Plataforma, Òscar Escuder, al à ricuardât che al è dificil calcolâ di minoritarie une lenghe come il catalan doprade di sù par jù 10 milions di personis (la diesime cuarte plui fevelade de Europe) ma che, viodude la situazion che si cjate a vivi tai cuatri stâts là che e je presinte, e reste fûr di dubi une lenghe minorizade.

Font: Plataforma per la Llengua, 04/03/19

Europe: il Parlament al proibìs une mostre sul catalan

Il Parlament european al à scancelât une esposizion dedicade ae lenghe catalane che e varès vût di jessi screade ai 4 di Març intai spazis de istituzion. A denunciâlu e je la organizazion Plataforma per la Llengua che e veve curât la mostre cun chê di fâ cognossi plui in detai ai parlamentârs e ai ospits de Assemblee la situazion de diesime cuarte lenghe plui fevelade de Europe. I responsabii dal Parlament a àn motivât la decision cu la volontât di no interferî cu lis elezions anticipadis che si tignaran in curt intal stât spagnûl. Une version che e lasse maraveâts sei par vie dal teme che pal lûc de esposizion. Che daûr al sedi alc altri lu spieghe a clâr il president de Plataforma, Òscar Escudero, che al conte cemût che ta chestis setemanis a vessin ricevût diviersis domandis indreçadis a censurâ parts de esposizion. Al ven di domandâsi po cemût mai che il Parlament european al vedi scancelât cheste mostre su la lenghe catalane, ma no une conference dal segretari gjenerâl dal partît de estreme diestre spagnole Vox – part ative des elezions – che si tignarà ai 6 di Març. Juste cualchi zornade prime, par indicazion dal stes president dal Parlament – il talian Antonio Tajani –, e jere stade proibide la conference clamade dongje di un eurodeputât flamant che e previodeve la partecipazion dal president dal guvier catalan Quim Torra e dal ex president Carles Puigdemont.

Font: Plataforma per la Llengua, 18/02/19

Cossovo/Serbie: alte tension ancje tal incuintri di Bruxelles

Nancje la mediazion europeane e je stade buine fin cumò di cuietâ lis tensions in vore jenfri Cossovo e Serbie. Cun di fat nol è durât nancje une ore l’incuintri tra il president serp Aleksandar Vučić e chel cossovan Hashim Thaci che si è tignût a Bruxelles ai 8 di Novembar. Il rapresentant serp al à bandonât la riunion e al à fat savê che no si varan altris incuintris fintremai che il Cossovo nol gjavarà i dazis dal 10% metûts su dutis lis marcjanziis che a rivin de Serbie e de Bosgne. Par Vučić lis tarifis a son une violazion palese dal acuardi sul libar cumierç inte aree centrieuropeane (CEFTA). A violâ i acuardis in vore al sarès po ancje il progjet di meti sù un esercit cossovan e di logânt une part intes areis a maiorance serbe. Chescj elements di scuintri si son zontâts aes tensions nassudis za chest Astât par vie dai ritarts inte aprovazion dal statût de Zajednica, la Associazion dai Comuns Serps dal Cossovo, e des declarazions rivadis des istituzions cossovanis suntun pussibil scambi di teritori tra i doi paîs par ridusi il numar de minorance serbe in Cossovo e di chê albanese in Serbie.

Font: Balkan Insight, 08/11/18; RFE RL, 09/11/18

Europe: passe 1,2 milions di firmis par “Minority Safepack”

Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane, e je stade un sucès. Cun di fat, par che la Comission Europeane e cjapi in man une iniziative citadine e covente la poie di almancul un milion di personis ator pe Union e ai 3 di Avrîl, date che e finive la racuelte des firmis, chês cjapadis sù a son stadis passe un milion e 215 mil. I stâts là che il quorum di firmis che si vevisi proponûts di cjapâ sù par Minority Safepack al è stât superât a son undis: Ongjarie (là che lis firmis racueltis a son stadis plui di mieç milion!), Romanie, Slovachie, Bulgarie, Cravuazie, Slovenie, Lituanie, Letonie, Danimarcje, Spagne e Italie. Ta chest ultin stât l’obietîf al jere stât fissât a 55 mil firmis e a ‘nd è stadis tiradis sù plui di 60 mil, pe plui part in Sud Tirôl, Val di Aoste e Friûl. I stâts a àn cumò trê mês par convalidâ lis firmis e la Comission Europeane a ‘nd à altris trê par presentâsi denant dal Parlament par riferî su la iniziative. Dopo dal agrât a ducj i citadins e aes organizazions che a àn poiât la iniziative, il president de FUEN, Loránt Vincze, al à celebrât la nassite di chel che al à clamât un vêr moviment european pai dirits des comunitâts minorizadis.

Font: FUEN, 04-05/04/18

Paîs Catalans: Spagne batude sul front judiziari a Bruxelles

Intant che si svicine la date des elezions pal Parlament catalan e che la campagne eletorâl e je condizionade a fuart des misuris repressivis metudis in at dal guvier di Madrid cuintri des istituzions autonomis, la atenzion e reste pontade sui aspiets judiziaris de vicende. Dopo vê confermade la preson preventive cence cauzion par doi dai membris dal guvier catalan – Oriol Junqueras e Joaquim Forn – e pai presidents de ANC, Jordi Sànchez, e dal Òmnium Cultural, Jordi Cuixart, il judiç dal tribunâl suprem spagnûl che al à in man il procediment cuintri dal indipendentisim catalan, Pablo Llarena, al à decidût di ritirâ i ordins europeans di arest e di consegne cuintri dal president catalan Carles Puigdemont e di cuatri membris dal so esecutîf (Antoni Comin, Meritxell Serret, Lluís Puig e Clara Ponsatí) cumò in esili a Bruxelles. La decision e je stade cjapade par pôre che la magjistrature belgjiche, tal câs che e acetàs la estradizion, e limitàs i reâts che i cinc a podevin jessi clamâts a rispuindi. A Bruxelles duncje il câs al è za stât archiviât e lis misuris cautelârs cuintri dai cinc rapresentants catalans a son stadis ritiradis. Intant, par tignî impiade la atenzion de Europe su la Catalogne, ai 7 di Dicembar il distret european de capitâl de Belgjiche al à viodût a sfilâ pes sôs stradis disinis di miârs di catalans – 45 mil daûr des fonts di polizie – che a àn domandât ae Europe di dâsi une sveade e a àn stiçât lis istituzions comunitariis a no voltâsi di chê altre bande. Al è di dî che lis manifestazions no mancjin a Bruxelles, ma al è râr di viodint di cussì partecipadis, massime se si pense di dulà che a rivavin i partecipants.

Font: Naiz:, 04-14/12/17; VilaWeb, 07/12/17

Macedonie: rinviade la gnove leç linguistiche

In Macedonie si slungje il percors par fâ buine la gnove leç su lis lenghis previodude intal acuardi di guvier tra i Sociâi Democratics e i partîts de comunitât albanese che lu sostegnin. Dopo dal vie libare dât dal Parlament in prime leture, cumò il test al veve di jessi votât une seconde volte ma i emendaments presentâts de oposizion de diestre nazionaliste (VMRO DPMNE) a varessin sprolungjât i lavôrs parlamentârs e ritardât il vôt de riforme dal sisteme judiziari. Une prospetive che no i plaseve masse ae Comission Europeane che, par bocje dal so delegât Johannes Hahn in visite a Skopje ai 20 di Novembar, e à fat capî che la normative su lis lenghis no je une des prioritâts de UE. Il percors de leç al è stât duncje rinviât a dopo de aprovazion des normis sul sisteme judiziari. I albanês a rapresentin un cuart de popolazion de Macedonie: in dì di vuê la lenghe albanese e je duncje couficiâl in ducj i comuns là che cheste comunitât e rapresente almancul il 20% de popolazion. La gnove leç e larès a incressi il status de lenghe ancje là che i albanês no rivin a cheste percentuâl.

Font: Balkan Insight, 24/11/17

Ucraine: leç su lis lenghis contestade ancje de Ongjarie

Dopo des tensions cu la Romanie, cumò e je la Ongjarie a tignî cjalt il scuintri diplomatic cu la Ucraine su la leç des lenghis fate buine in Setembar dal Parlament ucrain. La gnove normative e previôt che l’insegnament intes scuelis secondariis a imersion des comunitâts minorizadis si davuelzi pe plui part par ucrain cul ûs des lenghis locâls limitât dome a cualchi materie. Pes autoritâts ucrainis la leç e rispiete i criteris in vore in Europe pe tutele des minorancis linguistichis e par chest e à domandât une opinion legâl al Consei de Europe. No le pense cussì il guvier di Budapest che al domande aes istituzions comunitariis di riclamâ la Ucraine al rispiet dal acuardi di associazion sotscrit cu la Union Europeane. Si stime che in Ucraine e in particolâr te regjon de Transcarpazie a vivin uns 140-150 mil ongjarês. Lis dôs comunitâts minorizadis plui gruessis a son chê russe, che e conte sui 8 milions di personis, e chê rumene cun sù par jù 400 mil personis. Critichis pe leç su lis lenghis a jerin rivadis ancje de Federazion Russe, de Polonie e de Moldova.

Font: BBC, 10/10/17

Paîs Catalans: Puigdemont al domande ae UE di intervignî

Ai 24 di Zenâr il president dal guvier catalan, Carles Puigdemont, al à tignût une conference tal Parlament european par spiegâ il procès di autodeterminazion de Catalogne. Cundut dai tentatîfs dal PP spagnûl par boicotâ l’apontament, a scoltâlu a jerin uns cuatricent tra europarlamentârs, gjornaliscj e membris dai grups di interès che a àn sede a Bruxelles. Il president de Generalitat al à riferît che al plui tart intal Setembar di chest an la Catalogne e inmanearà un referendum vincolant su la indipendence, se si rivarà a concuardâlu cu lis istituzions spagnolis miôr, ma se nol sarà pussibil si lu fasarà distès. Cun di fat, al à spiegât, in zûc no je tant la indipendence, ma la democrazie, baste pensâ che plui dal 80% dai catalans al domande il referendum di là di ce che a votaran. Puigdemont al à batût sul fat che si trate di un probleme european e che duncje la UE e à di jessi part de soluzion sei par coerence cui principis democratics che e declare, sei par pragmatisim.

Font: VilaWeb, 24-25/01/17; Naiz:, 24-25/01/17

UE: 180 puescj par operadôrs linguistics irlandês

Di chi al 2021 a saran 180 i puescj di vore a disposizion dentri des istituzions europeanis par tradutôrs, interpretis e personâl cuntune buine paronance de lenghe gaeliche irlandese. L’irlandês al è stât ricognossût dome intal 2007 tant che lenghe uficiâl e di lavôr de Union Europeane ma, viodude la situazion di minorizazion che al va dilunc a patî te stesse Irlande, une deroghe ae normative comunitarie e à blocât i efiets pratics di cheste decision. Tal Dicembar dal an passât il Consei de Europe al à fat bon un regolament che al fisse ca di cinc agns, intal 2021, la fin di cheste deroghe. Par rivâ prontis par chê scjadince lis istituzions europeanis a àn duncje di tacâ daurman a meti in vore in maniere progressive ducj chei servizis previodûts par une lenghe uficiâl. Cussì, za cul prin tacâ di Jugn, si à inviât il percors di assunzion par 62 tradutôrs. Po, a man a man, il personâl di lenghe gaeliche al cressarà fintremai lis 180 unitâts.

Font: Business World, 10/06/16

Europe: GUE, EFA e ELEN adun par une diretive su lis lenghis

Inmaneât dai grups de Çampe Unitarie Europeane (GUE) e dai Verts – Aleance Libare Europeane (EFA) cu la colaborazion de Rêt Europeane pe Avualiance Linguistiche (ELEN), il prin di Jugn si è tignût intal Parlament european un ‘seminari che si proponeve di tirâ dongje fuarcis par svilupâ une diretive europeane su lis lenghis. Chê de diretive e je une strade che e permetarès di fat ancje di vierzi proceduris di infrazion cuintri di chei stâts che no le metin in vore o che a van a pidimentâ i dirits linguistics. Si trate di une cuistion che si insuaze ta chê plui gjenerâl dai dirits umans là che duncje, cemût che al à ricuardât il segretari de Rêt Davyth Hicks, “la discriminazion linguistiche e je une forme di razisim”. Al incuintri a àn partecipât ancje eurodeputâts dai Paîs Catalans, dal Paîs Basc, dal Gales, de Irlande e de comunitât ongjarese de Romanie. I indreçaments jessûts dal ‘seminari a saran cumò zirâts ancje al comitât pes libertâts civîls dal Parlament, al Consei de Europe, ae OSCE e ae ONU.

Font: Jornalet, 03/06/16

Europe: no dal Parlament ai tescj Erasmus par basc e catalan

Ai 12 di Avrîl il Parlament european al à boçât cun 515 vôts cuintri, 183 a pro e 5 astignûts un emendament che al impegnave la Comission Europeane e i stâts membris de Union a voltâ i documents dal program Erasmus ancje intes lenghis scolastichis veicolârs tant che il catalan e il basc. Il no al è rivât de grande maiorance dai membris dai Popolârs europeans, dai Liberâi, dai Conservadôrs e Riformiscj, e dai Eurosetics; plui dividût invezit il vôt framieç dal grup socialist; a sostignî in bloc l’emendament a son stâts invezit i grups de Çampe Unitarie Europeane e dai Verts. Framieç dai eurodeputâts elets intal stât spagnûl, a votâ cuintri a son stâts i rapresentants de diestre spagnoliste (PP e Ciudadanos) e a pro ducj chei altris (PSOE, Podemos, IU e rapresentants des nazionalitâts minorizadis).

Font: El País, 12/04/16

UE: atacs cuintri dal catalan al esam dal Parlament european

Il Comitât su lis libertâts civîls, la justizie e i afârs internis dal Parlament european al à frontât la situazion de lenghe catalane intal stât spagnûl. Al centri de discussion al jere l’ultin rapuart sul rispiet dai dirits linguistics metût adun de organizazion catalane Plataforma per la Llengua. Il rapuart al fâs il pont su lis violazions dai dirits linguistics e su lis discriminazions che cui che al fevele par catalan si cjate ancjemò a patî intal stât spagnûl che, in câs documentâts, a àn puartât fintremai a pierdi la custodie di un fi o a viodisi refudade la assistence ospedaliere. E je la prime volte che l’organisim comunitari al fronte une tematiche di cheste fate e a sburtâ par rivâ a chest risultât e je stade massime la Rêt Europeane pe Avualiance Linguistiche (ELEN) che e veve za puartât la cuistion denant de ONU. A partî dal câs catalan, l’europarlamentâr di ERC Josep Maria Terricabras al à domandât che il Parlament al fronti intune session a teme la situazion di dutis lis lenghis che in Europe si cjatin a vivi une situazion di minorizazion e discriminazion.

Font: Catalan News Agency, 17/03/16