Ocitanie: cun ÒCvod un servizi di video a domande par ocitan

Al à non ÒCvod il gnûf servizi di video a domande par ocitan inviât de associazion Conta’m. La plateforme e met a disposizion vie streaming films, disens animâts, seriis televisivis e documentaris par ocitan. Si trate sei di produzions origjinâls che di oparis dopleadis in lenghe proprie. In gracie de colaborazion cul Ufici Public de Lenghe Ocitane, i abonaments anuâi par acedi ai contignûts de plateforme a son scontâts di un tierç pes 270 scuelis publichis e privadis che a partegnin ae filiere bilengâl o là che si à une presince significative dal ocitan.

Font: France Bleu, 21/01/21

Paîs Catalans: CpNL e PuntCAT adun pal progjet "elteunegoci"

Ta chest 2021 il Consorci per a la Normalització Lingüística al à inviât une colaborazion cu la fondazion PuntCAT par disvilupâ la iniziative elteunegoci.cat che si propon di sburtâ lis buteghis e lis ativitâts economichis di prossimitât a creâ i lôr sîts internet par catalan e cul domini .cat. Il program al previôt un percors di formazion che al permeti a cui che al puarte indenant chestis ativitâts di meti adun e gjestî in autonomie un sît su WordPress compagnât di une direzion di pueste eletroniche specifiche. Ta cheste suaze, il consorzi al darà une man su la part testuâl sei cun moments di formazion ma ancje cuntune revision linguistiche dal sît, une volte pront, e cun servizis e imprescj utii par scrivi e controlâ la coretece dai tescj.

Font: Generalitat de Catalunya, 19/01/21

Bretagne: 150 elets par un referendum su la riunificazion

A son 150 i elets bretons – siet deputâts, sîs senatôrs e cetancj tra sindics, conseîrs regjonâi, dipartimentâi e comunâi – che a àn sotscrit une letare vierte indreçade al president de Republiche francese, Emmanuel Macron, par domandâi di autorizâ un referendum su la riunificazion de Loire Atlantiche cul rest de Bretagne. Chest dipartiment al è part dal teritori storic de Bretagne ma intant de seconde vuere mondiâl al è stât distacât di chei altris dipartiments bretons e unît ai Paîs de Loire; une situazion confermade po sei de riforme normative dal sisteme regjonâl dal 1982 che de riorganizazion teritoriâl di chescj ultins agns.

Ocitanie: la Gnove Aquitanie cuintri de “riforme” Blanquer

La Regjon aministrative de Gnove Aquitanie e à cjapât posizion cuintri de cussì clamade riforme Blanquer – o sei la modifiche dal sisteme organizatîf e curicolâr dai istitûts superiôrs volude dal ministri francês pe educazion Jean-Michel Blanquer – che tra i siei efiets e va a penalizâ lis lenghis minorizadis. Intun comunicât dât fûr par francês, ocitan e basc, la aministrazion teritoriâl e domande di mendâ la leç in maniere di eliminâ i elements che a van a discriminâ lis lenghis propriis. In gracie dai dâts su lis gnovis iscrizions, i efiets negatîfs de riforme a son cumò sot dai voi di ducj. Juste par fâ cualchi esempli, tal distret scolastic di Bordèu / Bordeaux i students di ocitan a son calâts dal 32%, ta chel di Lemòtges / Limoges dal 44%, intant che i students che a àn optât pal basc a son calâts fintremai dal 48%. Cheste situazion, cun di plui, e puarte a di une precarizazion inmò plui marcade dai insegnants di basc e di ocitan e e met in pericul il numar dai students universitaris che a studiaran chestis lenghis.

Font: Jornalet, 16/01/21

Irlande: prime volte dal gaelic tal tribunâl di justizie european

Il tribunâl di justizie de Union Europeane al à celebrât pe prime volte une udience in gaelic irlandês. Al centri dal procediment judiziari si veve il rispiet de normative che e previôt che tai prodots veterinaris vendûts inte Republiche di Irlande lis etichetis e i sfueis informatîfs a sedin intes dôs lenghis uficiâls, o sei no dome par inglês ma ancje par gaelic. Cheste udience e rapresente un pas indenant intal procès di uficializazion de lenghe irlandese intes istituzions de Union Europeane, un procès che al varès di rivâ insom dentri dal 2022 cuant che il gaelic al deventarà ad in plen une des lenghis di lavôr de Union.

Font: EuroNews, 14/01/21

Europe: la Comission Europeane no poie Minority SafePack

Ai 14 di Zenâr la Comission Europeane e à decidût che no cjaparà nissune iniziative par meti in vore lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union che a jerin stadis fatis indenant cu la iniziative citadine batiade Minority SafePack. Daûr de iniziative e jere la FUEN (Union Federâl des Nazionalitâts Europeanis) che, cu la poie di diviersis realtâts espression des comunitâts minorizadis, e veve savût tirâ sù passe un milion e 120 mil firmis certificadis, cjatant po il supuart di diviers orghins legjislatîfs tant che il Parlament federâl todesc, la Cjamare alte neerlandese, il Parlament de Ongjarie e diviersis Assembleis teritoriâls, dal Brandeburc ae Frisie, de Sassonie al Tirôl dal Sud. A sostignî la iniziative cuntune risoluzion che e veve cjatât la poie di plui di trê cuarts dai siei membris al jere stât intal Dicembar passât ancje il Parlament European.

Bosgne / Cossovo: tensions etnichis e minorancis discriminadis

Intal ultin rapuart de organizazion Human Rights Watch dedicât ae Europe centrâl e sudorientâl si segnale cemût che a son diviers i stâts là che i dirits umans, chei des minorancis, la libertât di stampe e il rispiet des garanziis ufiertis de leç a son sot menace. Par chel che al rivuarde i dirits des comunitâts minorizadis si segnale, in particolâr, la situazion dal Cossovo dulà che, dongje des tensions simpri vivis tra la maiorance albanese e lis comunitâts serbis, si segnalin lis discriminazions patidis massime des minorancis rom, ashkalis e egjizianis. Par chel che al rivuarde la Bosgne, se la atenzion si centre simpri di plui su lis cundizions disperadis di miârs di dispatriâts che a domandin asîl, Human Rights Watch e ricuarde ancje che tal paîs balcanic a son inmò fuartis lis divisions etnichis tra bosgnacs, cravuats e serps e lis discriminazions intai confronts des minorancis internis.

Font: Balkan Insight, 13/01/21

Ream Unît / Gjermanie: a cressin lis tutelis pes minorancis

La Gjermanie e il Ream Unît a àn slargjât lis misuris di tutele garantidis aes comunitâts minorizadis su la fonde de Cjarte europeane des lenghis regjonâls o minoritariis. Al jere dal 2008 incà che nissun dai stâts firmataris al incresseve lis azions di protezion concuardadis intal moment de ratifiche. Ai 6 di Zenâr lis istituzions todescjis a àn informât il Consei de Europe di vê aumentât lis misuris di tutele previodudis sul plan de aministrazion publiche, de toponomastiche e de culture pes popolazions di lenghe danese, frisone e basse todescje che a vivin intal Schleswig-Holstein. E rimonte invezit ai 23 di Dicembar la comunicazion dal guvier britanic là che si fâs savê di vê disvilupât 37 misuris specifichis par promovi la lenghe gaeliche fevelade te isule di Man (manx). A finanziâ e coordenâ chestis azions al sarà il guvier locâl. Tra lis misuris previodudis si à la incressite de presince de lenghe proprie tes scuelis de infanzie, la pussibilitât di comunicâ in forme scrite par manx cu lis istituzions locâls e la promozion de lenghe tai mieçs di comunicazion, inte vite sociâl e economiche de isule, e te cooperazion internazionâl cun Irlande e Scozie là che si fevelin altris lenghis de famee gaeliche.

Font: Council Of Europe, 13/01/21

Aragon: un altri acuardi par sburtâ l’ûs des lenghis propriis

Ancje tal imprin di chest 2021 il guvier dal Aragon al va indenant a firmâ acuardis di colaborazion cun realtâts associativis dal teritori par sostignî e sburtâ progjets a pro des lenghis propriis di cheste comunitât, ven a dî l’aragonês e il catalan. Plui tal specific, l’ultin pat sotscrit al è chel cul sindacât SOA STA (Sindicato Obrero Aragonés - Sendicato d’os Traballadors e Traballadoras d’Aragon), che al veve za tacât a movisi su chest front massime sul plan de formazion. La colaborazion e previôt: la partecipazion dal sindacât al program di socializazion linguistiche Agora x l’aragonés; la inclusion des lenghis propriis intes campagnis, intes ativitâts e tes publicazions sindacâls; e la organizazion o la poie a progjets di formazion linguistiche dai siei associâts e, plui in gjenerâl, dai lavoradôrs aragonês.

Font: El Economista, 13/01/21

Paîs Basc: tal 2021 si ponte a vê plui sanitât par euskara

Un dai obietîfs che il guvier de Comunitât Autonome Basche si propon di rivâi tal 2021 al è di fâ un salt indenant inte cressite dal euskara te sanitât publiche. Ancjemò tal 2013 si veve tacât a meti lis fondis par regjistrâ la preference linguistiche dai citadins cul obietîf di garantî a ducj un servizi sanitari te lenghe che a vevin miôr. Il procès di regjistrazion al è però di nature volontarie e duncje, cundut che al è in cressi, al va indenant plui a planc di ce che il guvier al sperave. Ae fin dal 2020 a jerin alc di plui di 285 mil i citadins che a vevin dât la lôr preference pe lenghe basche, o sei uns 13% de popolazion complessive.

Paîs Catalans: passe 1.600 audiovisîfs gnûfs par catalan

Vie pal 2020 la direzion gjenerâl di politiche linguistiche dal guvier catalan e à sostignût il dopleament o la sottitulazion di passe 1.600 contignûts audiovisîfs, un numar plui bas rispiet a chel dal 2019 ma in linie cun chel dai agns prime. Di une bande a son stadis finanziadis 33 impresis di distribuzion che a àn metût a disposizion des salis cinematografichis 93 peliculis gnovis par catalan, di chê altre bande si à favorît il dopleament o la sottitulazion di 176 cines e di 12 seriis televisivis (par un totâl di 121 pontadis) disponibii su plateformis in linie o su DVD e Blu-ray. In gracie de convenzion cun Catalunya Film Festivals a son stâts sottitulâts 323 luncmetraçs e 396 curtmetraçs proietâts intune trentine di festivals. Al è stât confermât ancje l’acuardi cu la Movistar+ che, dal 2014 incà, al à permetût di meti a disposizion la version par catalan 240 luncmetraçs e 300 pontadis di 33 seriis diviersis. La pandemie e à pidimentât massime il lavôr programât pes proiezions intes salis e tai festivals.

Font: Generalitat de Catalunya, 04/01/21