Asturiis: in place pe uficialitât des lenghis propriis

Cundut de ploie e dal frêt, centenârs di personis a àn manifestât sabide ai 6 di Avrîl pes stradis di Xixón / Gijón par domandâ la uficialitât dal asturian e ancje dal galizian fevelât te aree plui ocidentâl des Asturiis. La iniziative e je stade inmaneade de Xunta pola Defensa de la Llingua Asturiana e e à cjatât la poie dal sindacât maioritari (CCOO), di une part significative dai partîts politics (Podemos, Izquierda Unida e, in forme parziâl, PSOE) e des realtâts associativis asturianis. I manifestants a àn domandât che lis lenghis propriis a vegnin ricognossudis come uficiâls, intune cul castilian, intal Statût di autonomie des Asturiis e che i vegni po daûr une leç di normalizazion linguistiche che e fissi lis azions che a coventin par garantî la avualiance linguistiche.

Font: Exunta, 05-06/04/19

Corsiche: scuintri a muse dure tra Macron e il guvier de isule

Il percors dal cussì clamât “grant dibatiment” volût dal president francês, Emmanuel Macron, par provâ a rispuindi ae crisi politiche e sociâl che si à manifestade cu la proteste dai “gilets jaunes” (gjilês zâi) si à sierât ai 4 di Avrîl in Corsiche. Cheste ultime tape e je stade però la plui tribulade. Dopo che Macron al à refudât l’invît de Assemblee de Corsiche a confrontâsi cul guvier e cui conseîrs de isule, il president dal esecutîf cors Gilles Simeoni e chel dal Parlament locâl Jean-Guy Talamoni – espression de coalizion nazionalitarie Pè à Corsica – a àn inmaneât la operazion “Isula Morta”, une sorte di siopar gjenerâl di meti in at intant des oris di presince dal president francês su la isule.

Irlande: dome il 0,7% de programazion de RTÉ par gaelic

Dal rapuart anuâl dal comissari pe lenghe gaeliche (An Coimisinéar Teanga) al ven fûr che la television publiche irlandese RTÉ no rispiete la leç su lis comunicazions radiotelevisivis dal 2009 par chel che si riferìs ae programazion par gaelic. Cun di fat, des passe 18 mil oris di emission anuâl chês par irlandês a son a pene 123, o sei il 0,7% dal totâl. A front di cheste situazion, la organizazion pe lenghe Conradh na Gaeilge e domande di svilupâ daurman un plan pe programazion par gaelic e di meti sù un canâl specific in lenghe irlandese dedicât a fruts e fantats. La direzion di RTÉ i à tignût a marcâ che, se la programazion televisive par gaelic e je scjarse, lis previsions de leç a son stadis invezit rispietadis ad in plen par chel che al inten i spazis des gnovis e chei radiofonics.

Font: Irish Independent, 04/04/19; CnaG, 04/04/19

Gales: militante pai dirits linguistics e riscje la preson

Eiris Llywelyn, militante galese pai dirits linguistics di 68 agns, e riscje la preson dopo vêsi refudade di paiâ il cjanul pe radiotelevision publiche e po la multe par no vêlu paiât. Il so câs al è il prin a rivâ denant di un tribunâl ma a son pôc mancul di un centenâr i militants che, compagn di jê, a partecipin ae campagne inviade de organizazion Cymdeithas yr Iaith Gymraeg par trasferî aes istituzions dal Gales la competence e lis risorsis pe gjestion de radiotelevision publiche galese cumò intes mans dal Parlament e dal guvier britanic. In dì di vuê si à un canâl televisîf e un radiofonic che a trasmetin ad in plen in lenghe galese ma, dopo dai ultins intervents decidûts a Londre, il lôr avignî al è malsigûr. La radiotelevision publiche galese e varès di jessi il spieli de identitât nazionâl dal Gales e des sôs comunitâts locâls e chest nol è pussibil – a disin i organizadôrs de campagne – se lis decisions a son cjapadis a Londre.

Font: The Guardian, 03/04/19

Paîs Basc: acuardi par promovi l’euskara in Ipar EH

Ai 3 di Avrîl il guvier de Comunitât Autonome Basche, tal stât spagnûl, e l’Ufici public de lenghe basche (Euskararen Erakunde Publikoa) che al opere in Ipar Euskal Herria, o sei il Paîs Basc setentrionâl sot aministrazion francese, a àn sotscrit un gnûf acuardi par promovi in maniere unitarie l’euskara. Pal 2019 la intese e previôt un impegn finanziari di un milion e 930 mil euros, 400 mil metûts de Comunitât Autonome Basche. I fonts a laran su cuatri liniis di finanziament, ven a dî aes istituzions dal Paîs Basc setentrionâl impegnadis intal insegnament dal e par basc, aes organizazions che i stan daûr ae educazion par adults, aes associazions che a promovin l’euskara tes ativitâts culturâls e ricreativis, e ai mieçs di comunicazion che a doprin la lenghe basche.

Font: EiTB, 03/04/19

Irlande: laboratoris radiofonics par gaelic pai students

Ai 2 di Avrîl si à inviât il modul educatîf poiât de aministrazion comunâl di Dublin che al permetarà a passe 750 students des scuelis primariis e secondariis de citât di partecipâ a laboratoris radiofonics in lenghe irlandese. Il progjet al darà la oportunitât di doprâ il gaelic in maniere divertente e, tal stes timp, di svilupâ capacitâts comunicativis specifichis e di cjapâ sù tecnichis di emission radiofoniche. I laboratoris a saran curâts de emitente Raidió Rí-Rá, la radio in lenghe irlandese pai zovins.

Font: CnaG, 02/04/19

Irlande: plui materiis par gaelic tes scuelis dal Gaeltacht

Il ministri pe educazion de Republiche de Irlande, Joe McHugh, al à lançât une iniziative che e permet di slargjâ l’ûs curicolâr dal gaelic intes scuelis secondariis dal Gaeltacht, o sei lis areis là che l’irlandês al è ancjemò fevelât in maniere significative. Il progjet al ufrìs ai students dai istitûts là che no si àn professôrs in stât di insegnâ fisiche par gaelic la pussibilitât di seguî in direte e in maniere interative lis lezions di cheste materie fatis par irlandês intune altre scuele. Un tant al è pussibil in gracie di un sisteme di ordenadôrs cun microfons e videocjamaris e dal coordenament dal program des lezions tra i doi istitûts interessâts. La iniziative e je partide cul insegnament de fisiche, ma e varès di slargjâsi avonde in curt ancje a siencis, tecnologjie, inzegnarie e matematiche.

Font: RTÉ, 01/04/19

Galizie: su Netflix distribuide une serie televisive par galizian

Cui 29 di Març Netflix, plateforme che e ufrìs produzions audiovisivis a paiament e che tal stât spagnûl e à plui di doi milions di utents, e à metût a disposizion ancje une serie televisive in lenghe galiziane. Si trate des sîs pontadis di «O sabor das Margaridas», une serie investigative ambientade in Galizie. Zirade par galizian, la serie e je stade dopleade par castilian. Sul imprin si pensave che fûr de Galizie e sarès stade distribuide dome la version dopleade, ma la direzion de plateforme e à decidût di ufrî a ducj la pussibilitât di seguîle ancje in lenghe origjinâl.

Font: Codigo Cero, 29/03/19

Paîs Catalans: sì di Parîs al ufici public pal catalan a Perpignan

Dopo di un an e mieç di tire e mole il guvier francês al à confermât la sô partecipazion ae istituzion di un ufici public pe lenghe catalane su model di chei za inviâts pal breton, pal ocitan e pal basc. Il progjet al gjoldeve za de poie de regjon aministrative de Ocitanie, dal dipartiment dai Pireneus Orientâi, dal comun e de universitât di Perpinyà / Perpignan, ma al mancjave inmò il vie libare dal ministeri francês pe educazion e pe culture. L’esecutîf di Parîs al à fat savê che pe nassite de struture al darà un contribût di cent mil euros. A chest pont l’ufici, che al à za a disposizion i spazis ufierts de universitât di Perpinyà / Perpignan, al varès di rivâ a partî cul mês di Jugn.

Font: L’Indèpendant, 29/03/19

Galizie: Parlament a pro dal galizian te aministrazion publiche

Ai 26 di Març il Parlament galizian al à fate buine une mozion presentade dal partît socialist (PSdeG) là che si impegne il guvier a mantignî la certificazion di cognossince de lenghe galiziane tant che element obligatori par podê lavorâ inte aministrazion autonome. Il test al è passât cu la poie di ducj i grups parlamentârs. Inte mozion si invide ancje l’esecutîf galizian a controlâ che, ae fin dal percors educatîf, i students a vedin pardabon une competence linguistiche scrite e orâl par galizian come chê che a àn par castilian.

Font: La Voz de Galicia, 26/03/19

Paîs Catalans: propueste de ACPV pe avualiance linguistiche

La organizazion Acció Cultural del País Valencià (ACPV) e à presentât la propueste par une gnove leç linguistiche che e ledi a cjapâ il puest di chê cumò in vore, judicade masse debule e no adate ae situazion sociolinguistiche dal Paîs Valenzian. Il test proponût al à chê di vualivâ i dirits di cui che al fevele par catalan (te sô varietât valenziane) e chei di cui che al fevele par castilian e di fâlu in maniere concrete e no dome su la cjarte. Par lâ ta cheste direzion, a disin i promotôrs, la leç e à di intervignî su ducj i cjamps de societât, previodi obietîfs clârs e misuris specifichis par rivâi e, là che al covente, ancje oblics. Par esempli al covente che, par podê lavorâ te aministrazion publiche valenziane, si vedi une competence certificade in dutis dôs lis lenghis dal teritori. Il test presentât al cjate za la condivision de plui part dai sogjets che a operin a pro dal catalan ma cumò si varà di lavorâ par cjatâ la poie politiche par fâlu deventâ leç.

Font: València Extra, 26/03/19