Stât francês: cors e bretons al secont turni des legjislativis

Intal prin turni des elezions legjislativis intal stât francês che si è tignût ai 10 di Jugn a son pôcs i candidâts espression des nazionalitâts minorizadis che a àn rivât a vuadagnâsi l'acès al secont turni in program ai 17 dal mês. I risultâts miôr si ju à vûts in Corsiche là che i nazionaliscj moderâts di Femu a Corsica, Gilles Simeoni e Jean-Christophe Angelini, a son passâts al secont turni cun passe il 20% des preferencis; ta chês altris dôs circoscrizions de isule i candidâts di Femu a Corsica a àn cjapât tra il 9 e il 10% dai vôts. Si trate dal risultât miôr otignût dal autonomisim cors intes legjislativis. I candidâts indipendentiscj di Corsica Libera invezit a son lâts di un minim dal 3,3% a di un massim dal 8,04%.

Slovens: in curt une taule di lavôr pai problemis de minorance

Il ministeri talian pal interni al à sigurât che in curt al metarà sù une taule di lavôr continuative par frontâ lis cuistions leadis ae minorance slovene che e vîf inte regjon Friûl – Vignesie Julie. La conferme e je rivade dal sotsegretari Saverio Ruperto che ai 8 di Jugn si è cjatât cuntune rapresentance de minorance slovene. Inte taule a saran clamâts dongje rapresentants dal stât, de regjon, dai ents locâi, dal comitât paritetic e des organizazions rapresentativis de minorance. Tra lis primis cuistions di risolvi si à chê de scuele bilengâl di S. Pieri, che si cjate ancjemò intune situazion di precarietât logjistiche, e lis dificoltâts economichis de stampe par sloven, a tacâ dal cuotidian Primorski Dnevnik, là che il sotsegretari Ruperto al à confermât che al covente intervignî cuntun sfuarç plui grant.

Font: Il Piccolo, 09/06/12; Novi Matajur, 13/06/12

Paîs Basc: par Behatokia dirits linguistics inmò pidimentâts

La organizazion Hizkuntz Eskubideen Behatokia (Osservatori sui Dirits Linguistics) ai 7 di Jugn e à presentât a Iruñea / Pamplona il so rapuart sul stât dai dirits linguistics intal Paîs Basc vie pal 2011. Intal document si conferme la impussibilitât di cui che al fevele par euskara a vivi ad in plen doprant cheste lenghe. I problemis che a jerin za stâts segnalâts intai agns passâts a restin ancjemò alì – e à spiegât la diretore de organizazion, Garbiñe Petriati – e si à viodût che, fale cualchi piçul miorament ca e là, intal mont dal lavôr, intai traspuarts e intes relazions sociâls a van dilunc a esisti dai pidiments che a impedissin di doprâ la lenghe basche cun normalitât. La responsabilitât principâl par cheste situazion e je des aministrazions publichis che a son clamadis de leç a garantî i dirits linguistics. Tal câs dai guviers de Comunitât Autonome Basche e de Navare il 2011 al à fintremai viodût dai pas indaûr. Par chest – e à zontât la Petriati – al è impuartant che ducj i citadins a segnalin e a denunciin lis iregolaritâts e lis mancjancis di maniere di dâi plui fuarce e plui imprescj aes organizazions tant che Behatokia par intervignî.

Font: Gara, 08/06/12

Ucraine: prin pas pe couficialitât des lenghis minoritariis

Ai 5 di Jugn il Parlament de Ucraine al à fate buine in prime leture la leç che e garantìs un statût di couficialitât aes diviersis lenghis minoritariis dal paîs inta chês provinciis là che a son feveladis tant che prime lenghe almancul dal 10% de popolazion. Chest al puartarà al ricognossiment dal rus tant che seconde lenghe uficiâl in 13 provinciis, pe plui part logadis intal Sud e intal Est, e tes citâts principâls tant che Kiev e Odessa. Nol sarà però dome il rus a gjoldi di cheste leç, dal moment che l’ongjarês al deventarà lenghe couficiâl inte Transcarpazie (Zakarpats’ka / Kárpátalja) e il rumen inte provincie di Çernivtsi / Cernăuţi. La iniziative, sburtade dal Partît des Regjons che al sosten il president Viktor Janukovič, e viôt però cuintri ducj i principâi partîts de oposizion che a sigurin che a rivaran a fermâ la leç intant dal so secont passaç in Parlament. La tension sul proviodiment e je cussì alte che, cuant che si veve comunicât la sô presentazion in aule, i deputâts di maiorance e di oposizion si vevin cjapâts a pugns.

Font: ABC, 05/06/12; Nationalia, 01/06/12

Paîs Catalans: a Bruxelles pal dirit ae autodeterminazion

Il deputât di ERC, Alfred Bosch, adun cui europarlamentârs Ramon Tremosa di CiU e Raul Romeva di ICV, al à presentât a Bruxelles i contignûts de propueste di leç sul dirit ae autodeterminazion che e sarà presentade tal zîr di cualchi setemane intal Parlament spagnûl. Se la iniziative e ves di lâ sù pai stecs – al à spiegât il rapresentant de Esquerra – almancul o varìn metût ae prove il nivel di democrazie dal stât spagnûl e o fasarìn po apel aes istituzions europeanis. Par Romeva la iniziative e va a rispuindi a di une domande sociâl simpri plui fuarte che e rive dai Paîs Catalans. Tremosa invezit si è dite sigûr che la UE no sierarà la puarte a di une Catalogne indipendente.

Font: VilaWeb, 05/06/12

Galizie: presentade la candidature pal domini .gal

La associazion PuntoGAL e à inviât la candidature par otignî il domini internet .gal al ICANN, l’organisim internazionâl che al guvierne lis direzions su la rêt. Par solit la rispueste e rive tal zîr di un an e duncje, se e ves di jessi positive, intun an e mieç o forsit doi il domini .gal al podarès jentrâ in vore. Pal ricognossiment al covente dimostrâ di vê la capacitât tecniche e economiche par gjestî il domini e di vê la poie de comunitât che si vûl rapresentâ in rêt. La associazion PuntoGAL e à daûr passe un centenâr di sogjets publics e privâts tra i plui impuartants de Galizie, e gjolt de poie dal guvier galizian e di plui di 12 mil internautis. L’obietîf al è chel di dâi un spazi autonom su la rêt a ducj chei che a doprin la lenghe galiziane o che a rapresentin la identitât e la culture de Galizie. Cul domini .gal si varà duncje une visibilitât clare de Galizie ancje dentri di internet. La gjestion dal domini de bande de associazion e permetarà po di mantignî in Galizie i bêçs paiâts pai dominis e di invistîju pe promozion de lenghe galiziane dentri des gnovis tecnologjiis. Par esempli di cuant che, cinc agns indaûr, al è stât ricognossût il domini .cat pai Paîs Catalans a son 55 mil i sîts che si son zovâts di chest identificadôr, cuntune ricjadude impuartante ancje sul plan economic.

Font: Galicia Hoxe, 05/06/12; Xunta de Galicia, 29/05/12

UE: ancje la EFA in difese de deputade curde Leyla Zana

Un grup di europarlamentârs leâts ae Aleance Libare Europeane (EFA) al à domandât ae referente de UE pe politiche foreste di intervignî su la Turchie par che a sedin tornâts ae ativiste curde Leyla Zana i siei dirits civîi e politics. Cundut che e gjolt de imunitât tant che deputade, Leyla Zana e je stade condanade a dîs agns di preson e disprivade dai siei dirits civîi e politics par vie di une schirie di discors fats in difese de comunitât curde e, plui in gjenerâl, cuintri de violazion dai dirits umans de bande des autoritâts turchis. I rapresentants de EFA a domandin ae UE di condanâ cheste sentence judicade une violazion dal dirit di espression e di domandâ al guvier turc di garantî a Leyla Zana ducj i dirits che i son stâts gjavâts.

Font: EFA, 04/06/12

Paîs Basc: i presonîrs politics a intervegnin su la fin dal conflit

Il teme dai presonîrs politics al à un pês une vore impuartant inte suaze dal conflit in at intal Paîs Basc. Ancje par chest e jere une vore di spiete pe conference clamade dongje a Gernika par presentâ lis conclusions dai dibatiment interni che tai ultins mês al à impegnât il Coletîf dai Presonîrs Politics Bascs (EPPK). Il document finâl al è stât comunicât cuntune regjistrazion audio dal moment che i siei autôrs a son sierâts intes presons spagnolis e francesis. Il Coletîf al concuarde cu la decision di ETA di meti fin ae lote armade e al poie la strategjie di unitât e di superament dal conflit inviade de çampe indipendentiste basche dilunc de strade segnade dal acuardi di Gernika e de declarazion di Aiete.

Paîs Basc: cun Naiz: si slargje la informazion multimediâl

Intal Paîs Basc ancje la evoluzion dal mont de informazion e je leade aes diviersis fasis dal conflit in at. Il cuotidian Gara al jere nassût intal 1999 come rispueste popolâr ae fin di Egin, sierât par ordin de magjistrature spagnole come part de strategjie repressive che e veve chê di meti fûr leç ducj i sogjets leâts ae çampe indipendentiste basche. Il prin di Jugn al è stât presentât al public Naiz: un progjet informatîf multimediâl metût in pîts de societât editore EKHE, la stesse di Gara. I obietîfs di chest gnûf sogjet a son plui di un, cemût che si à spiegât intant de sô presentazion intal Ensanche di Bilbo / Bilbao. Un di chescj al è propit chel di rispuindi cuntun imprest gnûf aes sperancis e aes prospetivis che si son vierzudis pal Paîs Basc dopo de decision di ETA di meti fin ae lote armade.

Cossovo: scuintri a fûc tra serps e militârs NATO

Il prin di Jugn inte aree a maiorance serbe dal Cossovo, dongje de citât di Mitrovica, si à tocjât un gnûf pic di tension cul feriment intun scuintri a fûc di un soldât de KFOR (trupis NATO in Cossovo) e di trê membris de comunitât serbe. Al è zaromai di mês che i serps a àn tirât sù baricadis dilunc des stradis par impedî l’acès aes fuarcis di polizie e aes vuardis di confin cossovanis. I serps di cheste regjon no ricognossin la indipendence dal Cossovo e nancje lis sôs autoritâts, a maiorance albanese, e no acetin che la frontiere cu la Serbie e vegni sierade e controlade di lôr. Il scuintri a fûc al è nassût propit intant che membris de KFOR a cirivin di tirâ vie lis baricadis de strade jenfri Mitrovica e Zvecan. I incidents a àn puartât ancje a di une riunion di urgjence des massimis autoritâts serbis, a tacâ dal gnûf president Tomislav Nikolić, par decidi cemût rispuindi a cheste situazion di crisi che e menace di deventâ simpri plui grivie. Il guvier cossovan invezit al à acusât propit lis autoritâts serbis di jessi daûr di chest aument de tension.

Font: Balkan Insight, 01-05/06/12

Corsiche: la violence e pese inmò su la vite de isule

La violence e va dilunc a pesâ e a condizionâ la politiche e la vite dai cors. Ai 30 di Mai un membri dal moviment Corsica Libera, Pierre Casanova, al è stât ferît intun atentât che, cun dute probabilitât, al veve par obietîf Henri Palazzo che di pôc al è stât nomenât intal diretîf dal partît indipendentist cors e che al jere stât bielzà vitime di diviersis menacis. Intune conference stampe tignude cualchi dì dopo dal atac, i rapresentants di Corsica Libera a àn fat savê che no cambiaran la lôr linie ancje se a son cussients che e menace diviers interès politics, economics e mafiôs. Tes stessis zornadis si à fat sintî ancje il Front di Liberazion Nazionâl Cors (FLNC) che al à rivendicât une schirie di atentâts fats intal ultin mês cuintri di residencis e secondis cjasis che a son viodudis tant che une robarie di tiere e une menace speculative pal avignî de isule. Il FLNC al à ancje invidât la Assemblee corse a inviâ des misuris fuartis che a oblein il stât francês a frontâ la cuistion nazionâl corse.

Font: Alta Frequenza, 01 e 03/06/12

Ream Unît: bandieris scozesis e galesis permetudis intant des Olimpiadis

Il comitât organizadôr des Olimpiadis che si davuelzaran dai 27 di Lui ai 12 di Avost intal Ream Unît al à decidût che la bandiere scozese e chê galese a podaran svintulâ sul Hampden Park di Glaschu / Glasgow e sul Millennium Stadium di Caerdydd / Cardiff. Cun di fat, se il cûr des Olimpiadis al sarà la citât di Londre, cierts apontaments, tant che lis partidis di balon, si davuelzaran ancje in altris lûcs tant che la capitâl galese e la citât principâl de Scozie. Sul imprin e jere stade proibide la esposizion uficiâl des dôs bandieris nazionâls, ma po, dopo des protestis des istituzions locâls e in gracie dal parê positîf dal Comitât Olimpic Internazionâl, la proibizion e je stade gjavade.

Font: BBC, 01/06/12

Slovachie: proteste pal tibiament dai ongjarês

Ancjemò tal Astât dal 2006 une fantate de minorance ongjarese che e vîf in Slovachie e je stade pacade di doi estremiscj di diestre propit par vie de sô partignince etniche. Pôc plui tart però e je stade acusade di false testemoneance de bande de magjistrature slovache. Il câs al è rivât denant de Cort europeane pai dirits umans che intal Novembar dal 2011 al à dât reson ae zovine e domandât lis scusis dal guvier slovac. Lis scusis des autoritâts slovachis a son rivadis, ma chel istès la inchieste par false testemoneance e va indenant. Par chest il segretariât di stât pes comunitâts ongjarês intal forest al è intervignût su la cuistion domandant la fin di chê che e ven stimade une persecuzion cuintri di une vitime e al à invidât la magjistrature slovache a ocupâsi invezit dai siei agressôrs.

Font: Finugor, 31/05/12

Corsiche: Parenti Corsi in difese dal progjet pal cors a scuele

La associazion Parenti Corsi e à cjapât posizion in difese dal progjet de Coletivitât Teritoriâl de isule par infuartî la presince de lenghe corse inte scuele. Il progjet al previôt che par rivâ al diplome si vedi di dimostrâ une cierte cognossince scrite e orâl dal cors, ma ancje la cognossince de lenghe pal reclutament dai insegnants e il trasferiment dal personâl de scuele sot de Coletivitât Teritoriâl. Cuintri de iniziative si à fat sintî il sindacât de scuele che al dite che “la lenghe corse e à di jessi imprest di leam sociâl e no di discriminazion”. No le pense cussì la associazion Parenti Corsi che e viôt intal progjet un pas che al covente pal “svilup progressîf di une societât pardabon bilengâl”.

Font: Alta Frequenza, 31/05/12

Paîs Catalans: tes Baleârs dome il 7% al sielç il spagnûl prime lenghe a scuele

Intes isulis Baleârs no si fermin lis contestazions cuintri dal progjet dal guvier de comunitât autonome par mudâ la leç di funzion publiche. L’intindiment dal esecutîf vuidât dal PP al è chel di limitâ la leç di normalizazion linguistiche e cun chê ancje une schirie di misuris che a garantissin la presince paritarie de lenghe catalane inte scuele e intes aministrazions publichis. Ancje il sindacât STEI-I al domande al guvier di fâ ziruc e lu invide a tignî cont de domande reâl che e rive dai citadins des isulis. Cun di fat il sindacât al ricuarde che i gjenitôrs a puedin za sielzi la lenghe che a àn miôr pai lôr fruts e a pene il 7% di lôr al à sielzût il spagnûl come prime lenghe di insegnament pai lôr fîs, cuintri di un 78,3% che al à sielzût il catalan e di un 14,7% che al à aderît al progjet linguistic proponût dal istitût scolastic là che ju àn iscrits.

Font: Europa Press, 29/05/12

Paîs Catalans: e je Olot la citât cu la ufierte plui alte par catalan

Daûr dai ultins dâts uficiâi e je Olot la citât de Catalogne là che si à une ufierte plui alte di servizis par catalan. La inchieste e ten cont dal ûs dal catalan inte aministrazion publiche, intai mieçs di comunicazion, inte scuele, inte sanitât, inte economie, intal divertiment e inte vite sociâl. Olot, cun 80 ponts su cent, e je chê che e svante la situazion miôr. Disore dai 70 ponts però o cjatìn ancje citâts tant che Manresa, Girona e Tortosa, intant che Barcelone si cjate tra i 60 e i 70 ponts adun cun Tarragona, Sabadell e altris centris. La situazion piês, ancje se cuntun indiç che al passe i 50 ponts, si le à invezit a Santa Coloma de Gramenet. In ogni câs, i dâts a mostrin un miorament rispiet ae inchieste precedente. A nivel setoriâl la situazion miôr si riferìs a aministrazion publiche, scuele e sanitât, chê piês a mieçs di comunicazion, economie e divertiment.

Font: ABC, 29/05/12

Paîs Basc: la rêt Zineuskadi e infuartìs l’euskara intal cine

La rêt Zineuskadi, che e met adun cuindis salis cinematografichis de Comunitât Autonome basche, e à anticipât il contignût di cinc azions che a saran metudis in vore intai prossims mês par infuartî la circolazion di produzions europeanis di cualitât, lis visions in lenghe origjinâl e la cualitât des peliculis in lenghe basche. Un tant in gracie dal aument des risorsis a disposizion che, in nancje doi agns, a son passadis di 120 a 800 mil euros. Tra lis azions in program si à ancje il progjet Zinema Euskaraz che al à chê di proponi al public une selezion di peliculis che a promovin l’ûs de lenghe basche tant che veicul de comunicazion culturâl e de normalizazion de lenghe ancje tal timp libar. Ta cheste direzion e va ancje la propueste di ufrî titui internazionâi impuartants dopleâts par euskara.

Font: Deia, 28/05/12