Paîs Catalans: in vierzidure il prin istitût imersîf a Perpignan

La rêt Bressola, che e ufrìs l’insegnament a imersion par catalan intal stât francês, e à cjolt un edifici a Perpinyà / Perpignan par inviâ un centri scolastic in stât di dâi acet a tresinte arlêfs. Par partî a mancjin ancjemò lis autorizazions aministrativis, ma la iniziative e gjolt za de poie de regjon Ocitanie, dal consei dipartimentâl dai Pireneus Orientâi e dal guvier catalan. La gnove struture e permetarès di dâi continuitât ae sisteme scolastic par catalan cu la zonte de educazion secondarie. In dì di vuê, i centris che a fasin part de rêt Bressola e de associazion Arrels a ufrissin l’insegnament imersîf par catalan a 1.300 fruts.

Font: VilaWeb, 02/09/21

Paîs Catalans: la OCB cuintri des discriminazions te sanitât

La Obra Cultural Balear e à domandât al guvier des isulis di meti in vore un plan urgjent par garantî che te sanitât publiche no sedin discriminadis lis personis che a fevelin par catalan. A sburtâ la iniziative al è il numar grues di denunciis fatis indenant di citadins vitimis di discriminazion linguistiche par vê doprât il catalan. La organizazion e domande di garantî che tes struturis sanitariis publichis des Baleârs dut il personâl a contat cul public al vedi la juste competence par relazionâsi cui pazients ancje par catalan. Al è ce che za e previodarès la leç – a disin i rapresentants de Obra Cultural Balear – ma soredut al è un principi di fonde par gjoldi di une assistence mediche di cualitât. La organizazion e domande ancje di investigâ ducj i câs denunciâts e sclarî ce che nol à funzionât intal sisteme.

Font: Diario de Mallorca, 01/09/21

 

Bretagne: viert il secont liceu de rêt a imersion Diwan

Cui 2 di Setembar al à scomençât la sô ativitât il liceu Diwan di Gwened / Vannes. Si trate dal prin istitût secondari di secont grât a imersion dal Morbihan e il secont de Bretagne, dopo di chel di Karaez / Carhaix. La scuele, screade dopo vot mês di lavôrs finanziâts de aministrazion regjonâl, i da acet a 200 students, 27 liceâi e 173 students des secondariis di prin grât (collège). La vierzidure e permet di rispuindi, almancul in part, ae incressite de domande di istruzion in lenghe bretone che si à vude tai ultins agns.

Font: Le Telegramme, 01/09/21

Stât francês: rûl atîf di RPS tes elezions dal 2022

La aleance Régions et Peuples Solidaires, che e met adun i principâi moviments autonomiscj e nazionalitaris dal stât francês, e à fat savê che e parteciparà in maniere ative aes elezions presidenziâls e legjislativis dal 2022. Cundut che la plateforme programatiche e sarà definide chest Autun, a son za stadis anticipadis un pocjis des liniis di azions principâls. Par esempli si puartarà al centri des presidenziâls il teme de revision costituzionâl par mendâ chês parts che a inibissin il rispiet de diversitât linguistiche. Cun di plui si vûl riviodi i confins des regjons aministrativis che, cussì cemût che a son in dì di vuê, no garantissin la integritât teritoriâl di Alsazie, Bretagne, Catalogne Nord, Ocitanie, Paîs Basc setentrionâl e Savoie. Un altri pont su la taule al è chel dal dialic politic jenfri guvier centrâl e istituzions corsis par assegnâ ae isule un vêr statût di autonomie.

Font: Fédération RPS, 01/09/21