26/05/09

Stât spagnûl: sì dal tribunâl costituzionâl ae liste Iniciativa Internacionalista

Internazionalitari 05 2008


Pe prime volte di cuant che, intal 2002, si veve tacât cul meti fûr leç i moviments de çampe indipendentiste basche, il Tribunâl costituzionâl spagnûl al à decidût di no lâ daûr de linie di ilegalizazion sburtade dal guvier di Madrid. Sot atac, cheste volte, e jere finide “Iniciativa Internacionalista – La Solidaridad entre los Pueblos” (II-SP) che si veve metude adun pes elezions europeanis. La liste, vuidade dal dramaturc Alfonso Sastre e de avocate Doris Benegas, e promôf une politiche di solidarietât e di justizie sociâl e e difint il dirit di autodeterminazion dai popui che a vivin intal stât spagnûl. Iniciativa Internacionalista e jere stade metude sot atac dai partîts spagnoliscj cu la poie di diviers mieçs di comunicazion, cu la acuse di jessi leade ai moviments de çampe indipendentiste basche za metûts fûr leç. Il guvier spagnûl, par mieç de avocadure di stât, al veve decidût di impedî ae liste di partecipâ aes elezions e al veve otignût il parê positîf dal Tribunâl suprem, ancje se za li si vevin mostradis divisions tra i judiçs su la decision di cjapâ. Vie pe gnot dai 21 di Mai il Tribunâl costituzionâl al à, invezit, decidût di autorizâ Iniciativa Internacionalista a cori pes elezions europeanis. Pal massim orghin judiziari spagnûl, di fat, no son provis concretis che a lein la liste cui partîts za metûts fûr leç. Un dât chest che, par altri, al vignive fûr ancje di rapuarts informatîfs prontâts dai servizis spagnûi e des fuarcis di polizie. La decision dal Tribunâl costituzionâl e rapresente un colp dûr massime pal ministri pal interni spagnûl, Alfredo Pérez Rubalcaba, che si veve spindût a fuart par che si impedìs a Iniciativa Internacionalista di partecipâ aes elezions. Sodisfats, invezit, i rapresentants de liste nazionalitarie che a àn ricognossût al Tribunâl il mert di “vêur tornât il dirit clâr e sacrisant” di podê presentâsi pe corse eletorâl pal Parlament european.

Font: Gara, 16-22/05/09; II-SP, 15/05/09; El País, 16/05/09; Galiza Hoxe, 16/05/09


Sardegne: mozion indipendentiste in Consei regjonâl

Internazionalitari 05 2008


Une mozion su la indipendence de Sardegne, fate indenant dal PSdAz (Partît Sart di Azion) e sotscrite di cinc conseîrs, e je stade presentade ai 20 di Mai in Consei regjonâl. Intal test si invide la Zonte che e vuide la Regjon a inviâ lis tratativis cul stât talian par rivâ ae plene indipendence de isule. Intal document si lei che su la Sardegne a àn di decidi dome i sarts e no il stât talian che al ven acusât di vê fiscât il patrimoni economic, ambientâl e culturâl de isule. Cun di plui, pai autôrs de mozion, il stât talian al sarès il responsabil principâl dal sisteme di regulis che al è daûr a meti la Sardegne tes mans di pocjis impresis, e de pression fiscâl che e pese sui citadins de isule che si viodin menaçâts ancje intai servizis di fonde (stât sociâl, scuele e v.i.).

Font: Sardegna e Libertà PSdAz, 21/05/09


Sahara ocidentâl: une television pe Republiche Saharawi

Internazionalitari 05 2008


Ai 20 di Mai a son tacadis lis emissions de television de Republiche Arabe Saharawi Democratiche. Si trate di une iniziative che e ponte a superâ il mûr (ancje fisic) che al divît la popolazion dal Sahara Ocidentâl sot ocupazion marochine e chê che e vîf in profugance tai cjamps logâts intal desert alzerin. La television e trasmet propit di chest teritori e e ven finanziade massime cui contribûts che a rivin de rêt di solidarietât cui saharawi in vore intal stât spagnûl. Ogni dì si varan cuatri oris di trasmissions vie tiere e dôs oris vie satelit.

Font: Galiza Hoxe, 20/05/09


Galizie: manifestazion “storiche” in difese de leç sul galizian

Internazionalitari 05 2008


Ai 17 di Mai a jerin in 50 mil, daûr des cifris dai organizadôrs, a sfilâ pes stradis di Sant Jacum di Galizie (Santiago de Compostela) in difese de leç su la politiche linguistiche che il gnûf president dal guvier galizian, Alberto Núñez Feijoo, al à in progjet di cambiâ. La iniziative, promovude de organizazion “A Mesa pola Normalización Lingüística”, e je la plui gruesse che si à vude in Galizie in difese dai dirits linguistics. Intal so discors denant de int, il president di A Mesa, Carlos Callón, al à dite che bisugne fâi capî al guvier che al à il dovê di difindi e di promovi la lenghe proprie dal paîs, daûr di ce che al previôt il Statût di autonomie. Cumò i tocje a Núñez Feijoo di fâ la sô mosse – al à zontât Callón – e nô lu tignarìn di voli cun atenzion e se nol mudarà ande o tornarìn in place inmò cun plui fuarce. A condanâ la politiche che la gnove aministrazion di diestre e vûl meti in at pe lenghe, massime inte scuele, a son stâts ancje i rapresentants dal Partît Socialist e dal BNG (Bloc Nazionâl Galizian) che a àn acusât la Zonte regjonâl di volê meti in vore un “apartheid linguistic”. Núñez Feijoo al à declarât che al larà indenant cu la sô politiche cence abadâ a di une manifestazion che al definìs “politiche”. Dut câs, fintremai la Reâl Academie Galiziane, par solit une vore moderade, e à criticât in maniere clare i intindiments de aministrazion regjonâl in materie di politiche linguistiche.

Font: Galiza Hoxe, 17-19/05/09; Món Divers, 14/05/09


Aragon: mobilitazion par une leç pal aragonês e pal catalan

Internazionalitari 05 2008


Ai 17 di Mai si è davuelte a Saragossa / Zaragoza une manifestazion par domandâ chel il guvier dal Aragon al fasi buine une leç di politiche linguistiche che e garantissi i dirits di cui che al fevele par aragonês e par catalan. Cun di fat, al è za di timp che la aministrazion regjonâl, vuidade dai socialiscj, e à prometût di intervignî in proposit, ma fin cumò la promesse no je stade mantignude. La iniziative e je stade inmaneade dal coordenament “Aragó Trilingüe” che al à puartât in place un miâr di personis. Il catalan al è fevelât di cualchi miâr di personis inte cussì clamade Franja de Ponent, dut câs, la situazion plui grivie e je chê dal aragonês che al va dilunc a pierdi teren ancje intes valadis pirenaichis.

Font: Món Divers, 17/05/09


Sami: at di riparazion domandât ae Svezie

Internazionalitari 05 2008


Il Parlament sami al à domandât al guvier svedês di tornâ lis dodis crepis che a jerin stadis puartadis vie intal 1915 di tombis sami. Lis crepis, che cumò si cjatin tal museu statâl di storie di Stocolm, a jerin stadis gjavadis fûr des tombis par davuelzi des craniometriis, cul intindiment di dimostrâ la “inferioritât raziâl” des popolazions sami. Par Parlament sami, la lôr restituzion e sarès un at di riparazion pes politichis raziâls metudis in vore ta chei agns cuintri des popolazions nativis de Laponie.

Font: Eurolang, 15/05/09


Svezie: pal Consei de Europe al covente fat di plui pes minorancis

Internazionalitari 05 2008


Il Comitât dai ministris dal Consei de Europe al à publicât il so tierç rapuart su la situazion des lenghis minoritariis intal stât svedês, daûr di ce che e previôt la Cjarte europeane pes lenghis regjonâls o minoritariis. Intal test si riclame lis autoritâts svedesis a intervignî cun decision par difindi e promovi massime il sami meridionâl, che si cjate intune situazion di grues pericul. Par chel che al rivuarde la educazion e i rapuarts cu lis aministrazions publichis, invezit, si domandin intervents plui fuarts par garantî i dirits linguistics dai citadins che a fevelin sami, finlandês, meänkieli (la varietât finlandese fevelade te valade de Torne), romanì e yiddish. Pes primis trê lenghis, in particolâr, si domande di garantî une ufierte educative bilengâl che e rivi fintremai i studis universitaris.

Font: Eurolang, 15/05/09


Gales: partît il gnûf servizi informatîf in rêt

Internazionalitari 05 2008


Ai 15 di Mai al è partît su Internet il gnûf servizi informatîf par galês “Golwg 360. Daûr de iniziative a son la riviste Golwg, che e jes su cjarte bielzà dal 1988, e il guvier galês che, par chest servizi, al à metût a disposizion 200 mil euros par trê agns. Dut câs, la sielte de aministrazion galese e à lassât malapaiâts ducj chei che si vevin impegnâts intal progjet par meti in pîts il prin cuotidian par galês: “Y Byd”. Daspò vê tirât sù uns 500 mil euros cuntune sotscrizion popolâr a speravin che il guvier al metès ancje lui mieç milion di euros par inviâ il gjornâl, ma cussì nol è stât e il progjet dal cuotidian si à sfantât.

Font: Golwg360, 15/05/09; Eurolang, 11/05/09


Gales: indreçaments gnûfs pal galês a scuele

Internazionalitari 05 2008


Il guvier galês al à fat cognossi i siei ultins indreçaments pal ûs de lenghe galese inte scuele. Tra i obietîfs che si ponte a otignî si à l’aument de ufierte formative par galês, massime pai fruts plui piçui e inte fasse di etât che e va tra i 14 e i 19 agns. Cun di plui, si previôt di aumentâ la presince di personâl cualificât pal insegnament dal e par galês intes scuelis dal paîs. Il document al sarà cumò al esam di dutis lis parts interessadis (istitûts scolastics, aministrazions locâls, sindacâts dai insegnants, e v.i.) che a son clamadis a dî la lôr in proposit. La organizazion di riferiment pe difese dai dirits linguistics, la Cymdeithas yr Iaith Gymraeg, e à cjapât in maniere positive la elaborazion da document, ma e à lamentât il fat che il guvier nol ten ancjemò la lenghe galese di element di fonde dal sisteme educatîf dal Gales.

Font: Cymdeithas, 13/05/09; BBC, 13/05/09


UE: pas indenant di basc, catalan e galizian par elezions e justizie

Internazionalitari 05 2008


Pe prime volte, il Parlament european al à preparât i siei materiâi informatîfs pes elezions (cartulinis, placâts, e v.i.) ancje par basc, catalan e galizian. Lis trê lenghis a vegnin za dopradis di cualchi an inte corispondence jenfri i citadins e lis istituzions comunitariis, ma si è daûr a lavorâ par che si puedi fevelâlis ancje intant dai dibatiments parlamentârs. Cun di plui, ancje la Cort di justizie europeane e à fat savê che, di cumò indenant, i citadins bascs, catalans e galizians a podaran comunicâ cui siei uficis ancje te lôr lenghe proprie.

Font: Eurolang, 12/05/09


Sardegne: campagne dai indipendentiscj di iRS pes europeanis

Internazionalitari 05 2008


No son pocjis lis nazions cence stât de Europe che, par vie de sisteme eletorâl decidût a nivel statâl, a riscjin di no vê nissun rapresentant elet intal Parlament european. Al è il câs de Sardegne là che, par vie de circoscrizion eletorâl unitarie cu la Sicilie, no si à mai rivâts a mandâ a Strasburc un eurodeputât sart. Malte e Cipri, invezit, che a son isulis plui piçulis de Sardegne, ma che a son indipendentis, a àn 5 e 6 eurodeputâts parom. Par chest, invezit di votâ par cualchidun che nol sarà mai elet o di no lâ a votâ, il partît indipendentist iRS al à inmaneât une campagne par invidâ i citadins sarts a meti dentri te schede un sfueut che al denuncie cheste situazion.

Font: iRS, 06/04/09