Bosgne Erzegovine: scjarse tutele pes lenghis minorizadis

Intal so tierç rapuart di valutazion su la Bosgne Erzegovine, il comitât di esperts dal Consei de Europe al bat su la mancjance di coordenament tra i diviers nivei di autoritât come element primari che al pidimente la metude in vore de Cjarte europeane des lenghis regjonâls o minoritariis. Il comitât al domande di incressi i sfuarçs par garantî la presince des lenghis minorizadis tai mieçs di comunicazion, te istruzion, te aministrazion publiche, tes proceduris judiziariis e te vite cuotidiane ancje cul garantî risorsis e percors di formazion suficients. Par chel che al rivuarde chest stât de aree balcaniche, lis tutelis previodudis de Cjarte a interessin 15 lenghis: albanês, cec, ladino, ongjarês, polac, romani, rumen, ruten, slovac, sloven, talian, todesc, turc, ucrain e yiddish.  

Font: Council of Europe, 15/06/22

Bosgne: invît a discuti la separazion pacjifiche de federazion

Lis vôs suntun document confidenziâl presentât al Consei European che al previôt la implosion de Bosgne e la revision dai confins tra i stâts de ex Jugoslavie, a àn tornât a alçâ la tension framieç des trê comunitâts principâls che a formin cheste realtât, o sei bosgnacs, cravuats e serps. I rapresentants dai partîts di riferiment de Republika Srpska si son dâts adun par frontâ la cuistion e ae fin si son cjatâts in cunvigne tal domandâ in maniere formâl di discuti dal avignî dal paîs cui delegâts des formazions politichis de Federazion bosgnache cravuate. Su la taule a metin la propueste di une tratative che e permeti une separazion pacjifiche de Bosgne. Une strade che però no plâs ae cuintripart, cul rapresentant dal principâl partît bosgnac che al à fintremai declarât ae stampe di no podê escludi la pussibilitât di un gnûf conflit armât. Che a sedin o no jessudis pensadis par sviâ la atenzion di altris problemis, cemût che a stimin diviers osservadôrs internazionâi, chel istès a palesin une situazion di tension che invezit di cuietâsi e somee scjaldâsi cul passâ dal timp.

Font: Balkan Insight, 20/04/21

Bosgne / Cossovo: tensions etnichis e minorancis discriminadis

Intal ultin rapuart de organizazion Human Rights Watch dedicât ae Europe centrâl e sudorientâl si segnale cemût che a son diviers i stâts là che i dirits umans, chei des minorancis, la libertât di stampe e il rispiet des garanziis ufiertis de leç a son sot menace. Par chel che al rivuarde i dirits des comunitâts minorizadis si segnale, in particolâr, la situazion dal Cossovo dulà che, dongje des tensions simpri vivis tra la maiorance albanese e lis comunitâts serbis, si segnalin lis discriminazions patidis massime des minorancis rom, ashkalis e egjizianis. Par chel che al rivuarde la Bosgne, se la atenzion si centre simpri di plui su lis cundizions disperadis di miârs di dispatriâts che a domandin asîl, Human Rights Watch e ricuarde ancje che tal paîs balcanic a son inmò fuartis lis divisions etnichis tra bosgnacs, cravuats e serps e lis discriminazions intai confronts des minorancis internis.

Font: Balkan Insight, 13/01/21

Bosgne: la part serbe e torne a sburtâ pe separâsi

Cundut dai invîts ae cautele e al rispiet de legjislazion statâl rivâts dal president de Republiche serbe, Aleksandar Vučić, il membri serp de presidence unitarie bosgnache, Milorad Dodik, al à manifestât la intenzion di imbastî une consultazion par decidi l’avignî de Republika Srpska, o sei la part serbe de Bosgne. No je la prime volte che si fâs indenant la volontât di davuelzi un referendum su la autodeterminazion ma fin cumò i tentatîfs di lâ ta cheste direzion par viis legâls a son stâts blocâts des autoritâts centrâls. La boçadure de bande de cort costituzionâl di une leç de Republika Srpska su la proprietât dai terens agricui e à tornât però a scjaldâ i spirts, ancje parcè che la presince te cort di judiçs forescj e ven considerade come une menace continuade ae autonomie dai serps. Par altri la cuistion dai judiçs forescj – espression dai stâts intervignûts intai conflits balcanics (USA, Grande Bretagne, Gjermanie, France e Italie) – e ven cumò contestade ancje de part cravuate de federazion. Dodik al à dite che no si vûl destabilizâ la regjon ma che i serps de Bosgne no i stan plui a subî lis decisions cjapadis di altris e a àn di podê decidi di bessôi il lôr avignî.

Font: Balkan Insight, 15/02/20

Serbie: lis iniziativis dai bosgnacs a preocupin il guvier

Il Consei Nazionâl Bosgnac, organisim di rapresentance de minorance bosgnache in Serbie, al à comunicât la intenzion di celebrâ in grant i cent agns de declarazion di Sjenica. Il document, sotscrit intal Avost dal 1917, al domandave che il Sanzac, regjon a maiorance musulmane a cjaval tra Serbie e Montenegro, al fos anetût ae Bosgne. La gnove e je stade comentade in maniere negative di diviers rapresentants dal guvier di Belgrât preocupâts par vie che a viodin la iniziative tant che un tentatîf di saborâ la separazion di cheste regjon de Serbie. Il suspiet al nas ancje dal fat che, cuasi tal stes moment, membris de minorance bosgnache a àn inviât une petizion par che il Sanzac al deventi une regjon transfrontaliere, sul model des euroregjons in vore te Union Europeane.

Font: Balkan Insight, 04/07/17

Sanzac: progjet par imbastî une euroregjon

A son plui di 4 mil lis personis che a àn sotscrit une petizion che e sarà inviade ai guviers de Serbie e dal Montenegro cun chê di meti sù intal Sanzac une regjon transfrontaliere, sul model des euroregjons in vore te Union Europeane. L’intindiment principâl, a disin i promotôrs, al è chel di promovi il svilup economic dal teritori par mieç dai finanziaments previodûts par chest gjenar di istituzions. Il Sanzac al è une regjon storiche abitade in maiorance di bosgnacs musulmans e che cumò si cjate dividude jenfri Serbie e Montenegro. La propueste di une euroregjon e cjate però avonde fredis lis comunitâts serbis, montenegrinis e rom che a vivin alì e e lasse avonde malcuiets i guviers dai doi stâts dal moment che la iniziative e gjolt de poie de Turchie, interessade a incressi la sô influence su la regjon cul sostignî lis comunitâts musulmanis che a vivin alì.

Font: Balkan Insight, 26/06/17

Bosgne: elezions, nazionaliscj plui fuarts te Republika Srpska

Intes elezions aministrativis che si son tignudis ai 2 di Otubar in Bosgne, il vincidôr principâl al è stât Milorad Dodik, il president de Republika Srpska, o sei la part serbe de federazion. I candidâts dal so partît, la Aleance dai Sociâl Democratics Indipendents (SNSD), a àn vinçût in passe 30 comuns, 11 in plui de volte stade. Ta cheste maniere Dodik, che tai ultins timps nol à platât la sô intenzion di slontanâ la Republika Srpska dal rest de federazion, al infuartìs ancjemò di plui la sô posizion. Il Partît Democratic Serp (SDS), il so aversari principâl, al è restât invezit dome cun 8 sindics, nancje un tierç di chei che al veve te legjislature stade. Tal rest de federazion i bosgnacs dal Partît de Azion Democratiche (SDA) a àn otignût 33 comuns (12 in mancul), la Union Democratiche Cravuate (HDZBiH) 16 e il Partît Sociâl Democratic (SDP) 8. Lis elezions a son stadis segnadis de tension massime a Srebrenica, là che intal 1995 lis miliziis serbis a vevin sassinât passe 7 mil personis. In dì di vuê il comun al è cjapât dentri te Republika Srpska, ma pes aministrativis a puedin votâ ancje i bosgnacs che cumò a vivin inaltrò. Chest i veve permetût di vê simpri un sindic bosgnac, ma cu lis ultimis elezions il plui votât al è stât il candidât serp e la mancjance de conferme dal risultât par zornadis a dilunc, no à zovât a cuietâ la situazion.

Font: Balkan Insight, 03-05/10/16

Bosgne: supervisôrs internazionâi dividûts sul referendum serp

Il referendum che lis autoritâts de Republika Srpska, o sei la entitât aministrative de Bosgne a maiorance serbe, a vuelin tignî ai 25 di Setembar al divît ancje i stâts membris dal comitât internazionâl che al controle il rispiet dai acuardis di pâs. Cundut dai riclams dal guvier federâl e de plui part dai supervisôrs internazionâi, l’esecutîf de entitât serbe al vûl che i citadins di cheste part de Bosgne a disin la lôr su la decision di celebrâ tant che fieste nazionâi i 9 di Zenâr, o sei la date che tal 1992 e jere stade proclamade la Republika Srpska. La leç che e fissave cheste date e je stade però boçade de cort costituzionâl tant che discriminatorie e lis autoritâts federâls de Bosgne a calcolin duncje ancje il referendum un at fûr de leç. Il comitât internazionâl sui acuardis di pâs al varès vût di intervignî, ma si cjate dividût sul ce fâ cu la Federazion Russe che e poie i serps e diviers stâts ocidentâi che no vuelin il referendum. Altris invezit a varessin miôr lassâ fûr il comitât de cuistion dal moment che nol à il podê di fâ rispietâ lis sôs decisions: e je duncje la pôre che, che si disi di sì o di no, si larà a pierdi di credibilitât e a incressi di plui lis tensions dentri de federazion bosgnache.

Font: Balkan Insight, 23/08/16

Bosgne: condane par discriminazion de Cort pai dirits umans

Il tribunâl european pai dirits umans al à condanât par discriminazion lis istituzions de Bosgne. Daûr de Costituzion, la presidence statâl e à di jessi formade di un membri par ognidune des trê comunitâts che a formin la federazion, ven a dî bosgnacs, cravuats e serps. Pe comission eletorâl centrâl però, par candidâsi pe presidence, si à ancje di rivâ di chê aree de federazion dulà che la proprie comunitât e je maioritarie. Par chest la comission e à boçât par dôs voltis la candidature di Ilijaz Pilav che, cundut che come bosgnac al varès podût rapresentâ cheste componente dentri de presidence, al jere a stâ te Republika Srpska, o sei la part de federazion a maiorance serbe. La cort europeane e à judicât invezit discriminatorie cheste decision des autoritâts de Bosgne. No je la prime volte che lis istituzions dal paîs balcanic a vegnin condanadis par discriminazion. Lis voltis stadis il tribunâl european pai dirits umans lis veve condanadis par no vê permetût di candidâsi pe presidence e nancje pal parlament federâl, citadins bosgnacs di divignince rom o ebraiche o che si vevin refudât di declarâsi membris des trê comunitâts fondativis de federazion.

Font: Balkan Insight, 09/06/16

Bosgne: a tornin a cressi lis tensions cui serps

Al torne a cressi il scuintri dentri de Bosgne tra lis autoritâts federâls e la Republika Srpska, o sei la entitât aministrative a maiorance serbe. Dut al partìs de decision des autoritâts serpis di celebrâ tant che fieste nazionâi i 9 di Zenâr, o sei la date che intal 1992 e jere stade proclamade la Republika Srpska. La normative che lu previôt e je stade però boçade de cort costituzionâl che le à considerade discriminante par chês altris comunitâts de federazion e i à dât sîs mês aes autoritâts serbis par mendâ la leç. Dut câs la decision e à crevât in doi la cort cui trê judiç internazionâi e i doi bosgnacs che a àn votât cuintri de leç e i doi judiçs serps e i doi cravuats che a àn votât a pro. A front di cheste situazion i dirigjents dai principâi partîts de Republika Srpska si son dâts adun ai 29 di Novembar e, di une bande, a àn concuardât di domandâ ae Assemblee federâl di clamâ dongje un referendum popolâr su la fieste e, di chê altre bande, i àn dât 120 dîs di timp par riviodi la composizion de cort costituzionâl eliminant i judiçs internazionâi. Chest gnûf scuintri al va a incressi la tension che za di timp e je tra lis diviersis parts de federazion e e va a blocâ ogni tentatîf di riforme istituzionâl.

Font: Balkan Insight, 30/11/15

Bosgne: tension diplomatiche sul referendum te part serbe

E torne a alçâsi la tension in Bosgne dopo che la Assemblee de Republika Srpska, la part serbe de federazion, e à fate buine a maiorance la propueste di tignî in Setembar un referendum sul sisteme judiziari statâl metût sot acuse massime par chel che al rivuarde i câs leâts al conflit che al à insanganât cheste part dai Balcans vincj agns indaûr. La consultazion e va a tocjâ aspiets regolâts dai acuardis di pâs di Dayton e duncje, in plui di fâ saltâ sù lis autoritâts federâls che le viodin tant che un pericul pe convivence des diviersis comunitâts bosgnachis, e à alarmât ancje chês internazionâls che le calcolin une violazion dai acuardis e une menace pe integritât statâl. La decision di tignî il referendum e torne duncje a piâ lis tensions etnichis, za fuartis pes vicendis leadis al inovâl dal maçalizi di Srebrenica. Al è però ancje cui che al segnale che il sisteme judiziari al varès pardabon bisugne di jessi riformât, e cui che il president de Republika Srpska Milorad Dodik al ponte cun cheste manovre dome a distrai la opinion publiche dai problemis economichis che a podaressin saltâ fûr propit ca di un pâr di mês.

Font: Balkan Insight, 16/07/15

Bosgne: zûcs politics cu la partignince etniche

Il sisteme eletorâl in Bosgne al previôt che i puescj a sedin dividûts tra i elets daûr di cuotis etnichis che a previodin cuatri categoriis, ven a dî bosgnacs, cravuats, serps e altris. Intes ultimis elezions si à però viodût che la partignince etniche e pues deventâ un element secondari denant dal obietîf di jessi elets. Par esempli te entitât serbe de federazion (Republika Serpska) si à vût un elet che si veve presentât tant che “altri” cuant che tes elezions locâls di doi agns prime si veve declarât “bosgnac” e un altri che prime si veve presentât tant che “bosgnac” e cumò si à notât come “cravuat”. Un tant al è stât pussibil par vie che par ciertis categoriis no jerin avonde candidâts. La comission eletorâl e à però fat savê che no si pues confermâ la elezion di cui che intai ultins agns al à declarât partignincis etnichis diviersis.

Font: Balkan Insight, 15/12/14

Bosgne: la cort federâl e boce la division etniche tes scuelis

In Bosgne a son passe cincuante istitûts scolastics là che fruts des comunitâts bosgnache e cravuate a van inte stesse scuele, ma a studiin in classis separadis e daûr di curricola diferents. Sul prin tacâ di Novembar la cort federâl dal paîs balcanic e à dât fûr une sentence che e condane chest sisteme tant che discriminatori. La gnove e à cjatât il bon acet sei dal guvier federâl che des organizazions pai dirits umans che cumò a domandin di inviâ un percors che al puarti a di un program scolastic multiculturâl che al permeti di svicinâ lis dôs comunitâts. La competence però no je tes mans dal guvier federâl, ma des autoritâts regjonâls che fin cumò no si son mostradis masse cjaldis su la cuistion.

Font: Balkan Insight, 4/11/14

Bosgne: censiment acusât di dividi i bosgnacs

Cinc tra lis plui impuartantis istituzions de comunitât musulmane bosgnache a àn inviât une letare ae direzion de agjenzie statâl di statistiche là che si dîs che lis categoriis su la partignince nazionâl, religjose e linguistiche dai citadins, cemût che a son stadis metudis jù intal test dal prossim censiment, a riscjin di meti in pericul i atuâi ecuilibris internis de federazion e di creâ divisions framieç dai bosgnacs. Contrari di ce che al jere sucedût cul ultin censiment, chel dal 1993, si à decidût di doprâ il tiermin bosgnac al puest di musulman, cundut che a son ancjemò tancj i citadins di cheste comunitât che a àn miôr doprâ musulman ancje tant che riferiment etnic – nazionâl. Si riscje alore che tancj a fasin confusion e no si rivi a vê un cuadri esat de popolazion che no à ancjemò rivât a fâ i conts cui efiets des vueris dai agns ’90 che a àn fat 100 mil muarts e disinis di miârs di sfolâts e dispatriâts.

Font: Balkan Insight, 29/04/13

Bosgne: clârs e scûrs pe integrazion tra comunitâts

Ivo Komsic al è il gnûf sindic di Sarajevo, il prin dopo de fin de vuere a no fâ part de comunitât bosgnache. Komsic, rapresentant de Union Sociâl Democratiche e dean de facoltât di filosofie de universitât citadine, al è di fat un membri de comunitât cravuate. Si trate di un segnâl positîf pe integrazion des diviersis comunitâts che a formin la capitâl de Bosgne e, propit ta cheste logjiche, intal so prin discors di sindic al à dite che al lavorarà pe integrazion ancje dai cuartîrs orientâi di Sarajevo, che a fasin part de Republiche Srpska.

Dut câs, propit di cheste part de Bosgne, a rivin brutis gnovis sul front dai rapuarts cu la Federazion di Bosgne e Erzegovine. Cun di fat, la part serbe dal paîs e à decidût di indotâ i siei citadins di codiçs identificatîfs indipendents rispiet a chei de Federazion dopo che lis parts no vevin rivât a cjatâ une posizion condividude su la riforme de leç che e regole chest cantin. I codiçs identificatîfs a àn un valôr impuartant dal moment che a son la fonde par otignî i documents personâi plui impuartants tant che cjarte di identitât, passepuart, tessare sanitarie e cjarte par vuidâ.

Font: Balkan Insight, 28/03/13 e 03/04/13

Bosgne: vierzidure ai bosgnacs intal guvier de part serbe

Un segnâl di vierzidure intal rispiet des minorancis al rive de Republiche serbe, entitât autonome che e fâs part de Bosgne. Cun di fat la gnove prime ministre Željka Cvijanović, rapresentante de Aleance dai Socialdemocratics Indipendents (SNSD), e à ufiert un puest di ministri al Partît de Azion Democratiche (SDA) formât in maiorance di bosgnacs (musulmans). La ufierte e je rivade dopo di un confront cun chei altris partîts che a formin l’esecutîf, o sei il Partît Socialist (SP) e la Union Democratiche dal Popul (DNS).

Font: Balkan Insight, 05/03/13

Bosgne: la UE e domande di ricognossi i dirits des minorancis

La delegazion de UE che ta chestis zornadis e à visitât la Bosgne e à sburtât lis autoritâts locâls par che a modifichin la normative che e limite l’acès ai puescj principâi di guvier dome ai membris des trê comunitâts principâls, ven a dî bosgnacs (musulmans), cravuats e serps. Bielzà intal 2009 la Cort di Strasburc e veve dât fûr une sentence là che si domandave ae Bosgne di gjavâ chestis limitazions e di permeti ancje ai membris des minorancis etnichis e religjosis presintis intal paîs, tant che rom e ebreus, di vê acès ai nivei plui alts de aministrazion publiche e des istituzions de federazion. Nissun dai partîts principâi si mostre contrari a lâ ta cheste direzion, ma fin cumò no si à fat nuie. Se la situazion no cambiarà in curt, a àn però dite i delegâts europeans, si podarès decidi di intervignî fintremai cun sanzions, a tacâ dal no ricognossi i risultâts che a jessaran des prossimis elezions politichis.

Font: Balkan Insight, 11/02/13

Bosgne: discriminazions pussibilis cul censiment gnûf

Diviersis organizazions no governativis a àn domandât ae agjenzie bosgnache di statistiche di cambiâ il formulari dal censiment gjenerâl in program intal Avrîl dal 2013 dal moment che l’implant di ciertis domandis al sarès discriminatori. Ancje su la fonde des indicazions de conference europeane dai esperts di statistiche, lis organizazions a segnalin che ciertis domandis no permetin une plene libertât di rispueste cun consecuencis seriis sei pai citadins che pes stessis politichis de federazion. Par esempli cuant che si fevele di partignince etniche, la formulazion de domande e podarès puartâ la int a confusionâsi e, intun stât plurinazionâl tant che chel bosgnac, i dâts su la composizion etniche no son robe di pôc. Par chel che al rivuarde la lenghe si pues dâ dome une rispueste, ma i organisims internazionâi di statistiche a invidin a permeti simpri rispuestis multiplis su chest teme. Di chi duncje l’invît a cambiâ il formulari dal censiment in maniere di evitâ efiets discriminatoris o coercitîfs su la int.

Font: Balkan Insight, 26/06/12

Bosgne: la costituzion e discrimine lis minorancis

La Costituzion de Bosgne Erzegovine e discrimine lis minorancis che a vivin intal paîs e no i garantìs i stes dirits politics di chei altris citadins. A dîlu e je une sentence dal Tribunâl european pai dirits dal om che al à dât reson ae denuncie fate indenant di doi citadins bosgnacs, un di religjon ebraiche e chel altri di nazionalitât rom. La sentence dal Tribunâl di Strasburc e ricognòs che la Costituzion, nassude su la fonde dai acuardis di Dayton dal 1995, e veve l'obietîf principâl di garantî la stabilitât dopo agns di vuere civîl, ma al lamente che il guvier bosgnac, contrari di ce che si veve impegnât a fâ, nol à proviodût a comedâle cu lis normis cuintri de discrimazion fissadis de Union Europeane. La Costituzion, in dì di vuê, e ricognòs cierts dirits politics e rapresentatîfs dome a bosgnacs musulmans, cravuats e serps, ma no ai membris di comunitâts presintis di secui su chel teritori tant che rom e ebreus.

Font: Món Divers, 23/12/09

Balcans: discriminadis lis minorancis serbis

Daûr dal ultin rapuart publicât de ONG serbe “Napredni Klub” lis comunitâts serbis che a vivin fûr dal stât serp a vivin dispès in condizions di discriminazion. Cundut de organizazion federâl dal paîs, intal rapuart si declare che lis comunitâts serbis de Bosgne no gjoldin dai stes dirits dai cravuats e dai bosgnacs. In Montenegro, là che i serps a son un tierç de popolazion, il lôr status tant che minorance nazionâl nol è stât ancjemò regolât e no gjoldin di une rapresentance istituzionâl proporzionade. In Slovenie, invezit, no ur ven ricognossût il status di comunitât nazionâl autoctone. Simpri daûr dal rapuart, i serps che a vivin in Romanie e in Ongjarie a riscjin la assimilazion, intant che chei de Macedonie no varessin plene libertât di religjon. In Albanie, invezit, no si rive nancje a savê il numar dai serps che a vivin inta chel paîs. La ONG serbe e invide, duncje, il guvier di Belgrât di ocupâsi cun plui atenzion de situazion dai serps che a vivin fûr dai confins di stât.

Font: BalkanInsight, 05/08/09