08/10/21

Galizie: contribûts dineâts di Madrid par vê doprât il galizian

A Mesa pola Normalización Lingüística e à fat savê che e denunciarà al Consei de Europe il guvier spagnûl par vê violât in plui di une ocasion i dirits ricognossûts cu la Cjarte europeane des lenghis regjonâls o minoritariis. L’episodi plui resint si riferìs al dinei di un contribût al comun di Cambados de bande dal ministeri de transizion ecologjiche par vie che la documentazion e jere stade prontade par galizian. L’ûs de lenghe proprie tai rapuarts cul guvier centrâl al è garantît ancje de Cjarte europeane e, fint in chel, nol veve vût fastidis cun chei altris ministeris. Pe organizazion galiziane il compuartament dal ministeri de transizion ecologjiche, in plui di pandi dispresi pe lenghe proprie de Galizie, al rapresente un tentatîf di ricat intai confronts di ducj chei ents che a pensin di esercitâ il lôr dirit di doprâ il galizian. A Mesa e domande ancje al esecutîf de Galizie (Xunta) di cjapâ une posizion fuarte cuintri dal compuartament dal ministeri.

Font: Nòs Diario, 30/09/21

Gales: progjet par rilançâ il galês a Newport

In dì di vuê inte aree urbane di Casnewydd / Newport, dome il 25% de popolazion al è in stât di doprâ cuntune buine paronance il galês. Pe aministrazion comunâl citadine però, ancje a nivel locâl, si à di lavorâ par slargjâ l’ûs de lenghe proprie e contribuî al obietîf gjenerâl di rivâ a un milion di fevelants dentri dal 2050. Par chest e à imbastît un plan di politiche linguistiche decenâl che si propon di incressi la cuantitât e la cualitât intal ûs dal galês. Lis liniis di azion principâls a son trê e a tocjin la educazion, la visibilitât publiche de lenghe e il so pês dentri dal mont dal lavôr. Il stampon dal plan al è cumò al centri di une consultazion publiche inviade ai 27 di Setembar e che si sierarà ai 22 di Novembar. La aministrazion locâl e à intant za tacât a movisi sul plan de istruzion cuntune incressite dai puescj cul galês come lenghe di insegnament. Juste chest mês si à screât une altre scuele che e puarte a cuatri il totâl des primariis a imersion. La prime – e par cumò uniche – secondarie e je stade invezit inviade tal 2017.

Font: Nation Cymru, 27/09/21

Cossovo: tensions e violencis al confin cu la Serbie

A butâ gnove benzine sul fûc des tensions tra lis istituzions cossovanis e la minorance serbe, che e vîf massime te aree setentrionâl de regjon balcaniche, si à la decision dal guvier di Pristina di introdusi l’oblic pai veicui cun targhe serbe di gjavâle cuant che a passin il confin par sostituîle cuntune cossovane. Il proviodiment al va a colpî cuasi dome i membris de minorance serbe che a son la grande maiorance di chei che a àn mieçs imatricolâts in Serbie e che a passin dispès il confin. Par protestâ cuintri di chel che a calcolin un abûs, par diviers dîs a dilunc, disinis di membris de comunitât serbe a àn ocupât e blocât il passaç di confin di Brnjak / Bernjak. Il guvier cossovan al à mandât sul puest i reparts speciâi de polizie statâl. La situazion e à causât diviers incidents. I media locâi a àn segnalât il feriment di trê oms de comunitât serbe che a saressin stâts pacâts de polizie: episodi che cheste ultime e à dineât (ricognossint però che trê personis a son finidis in ospedâl ma cence spiegâ il parcè).

Font: Balkan Insight, 24/09/21

Paîs Catalans: azion a Maiorche pai dirits linguistics te sanitât

Ativiscj de organizazion Plataforma per la Llengua a àn metût in at une azion di proteste coordenade che e à interessât cinc centris sanitaris publics de isule di Maiorche. Plui tal detai, a àn picjât sù pes parêts dai ambulatoris manifescj là che a denuncin la discriminazion de lenghe catalane e lis agressions linguistichis metudis in at cuintri di cui che le fevele. I centris sanitaris tocjâts de iniziative a son chei stes là che diviers citadins a vevin denunciât di jessi stâts vitimis di discriminazion linguistiche par vê doprât il catalan. Il dirit di relazionâsi ancje te lenghe proprie cul personâl sanitari, in plui di jessi un element di fonde par gjoldi di une assistence mediche di cualitât, al è ricognossût par leç ma, chel istès, nol ven simpri garantît.

Font: Diario de Mallorca, 24/09/21

Paîs Basc: la Audiencia Nacional e siere doi media bascs

A son zaromai dîs agns che ETA e à bandonât in maniere definitive la lote armade e pûr, chel istès, cierts aparâts dal stât spagnûl a van indenant cu la repression cemût che a fasevin cuant che a podevin justificâ lis lôr azions come part de “lote cuintri dal terorisim”. La Audiencia Nacional spagnole – la cort che e puarte indenant il lavôr dal tribunâl speciâl di ete franchiste – e à decretât di sierâ daurman la riviste “Kalera Info” e il sît “Kalera Kalera” che il moviment de çampe indipendentiste Sortu al dediche ai militants bascs impresonâts, aes bataiis legâls che ju interessin e, plui in gjenerâl, ae politiche carcerarie. La decision e je motivade cuntune ipotesi di reât di “esaltazion dal terorisim”, doprade plui voltis propit par atacâ lis iniziativis di solidarietât e informazion dedicadis ai presonîrs politics. Par Sortu la decision dal tribunâl spagnûl no rapresente dome une agression cuintri des ativitâts di un partît politic legâl e cuintri dal dirit di informazion ma ancje un atac al lavôr par costruî une clime di convivence dopo des feridis lassadis dal conflit che al à colpît a dilunc il Paîs Basc. No je la prime volte che la magjistrature spagnole e siere dai mieçs di comunicazion bascs: i câs plui cognossûts a son chei che a àn tocjât i cuotidians “Egunkaria” e “Egin”.

Font: Naiz:, 22/09/21

Stât spagnûl: si cîr di slargjâ l’ûs des lenghis propriis in Senât

Il PSOE al à dât la sô poie al esam inte comission pal regolament dal Senât spagnûl di une propueste par mendâ il regolament in maniere di podê doprâ in ducj i lavôrs de aule e des comissions ancje il basc, il catalan e il galizian. Une pussibilitât che, in dì di vuê, e je permetude dome par dibati lis mozions in assemblee plenarie. Il vôt dai socialiscj al jere decisîf par permeti ae propueste di jessi esaminade. La iniziative e veve za la poie di ducj i partîts espression des nazionalitâts minorizadis e di chei de çampe plurâl. Cuintri de propueste a àn cjapât posizion invezit ducj i partîts di diestre – PP, Ciudadanos e Vox – che a contindin che tes istituzions dal stât si à di fevelâ dome par castilian e no in lenghis che a declarin di “no capî”.

Font: El Diario, 22/09/21

Gales: sburt al galês de bande dal grup HSBC

Une des bataiis in vore za di cualchi an in Gales e je chê di vê garantît il rispiet dai dirits linguistics ancje de bande dai grups privâts che a ufrissin servizis di interès public. Ta cheste suaze a jentrin ancje i istitûts di credit che, in plui di cualchi câs, a son stâts al centri di scuintris dûrs cu lis organizazions pe lenghe. Cumò il colòs bancjari HSBC al à fat savê che al ponte a impleâ il galês come prime lenghe in dute la segnaletiche e la cartelonistiche interne e tai materiâi informatîfs a disposizion intes filiâls che al à in Gales. Cheste gnove linie aziendâl e sarà compagnade di percors di formazion a disposizion dai lavoradôrs par che a imparin la lenghe o a miorin il lôr nivel di cognossince de stesse. La direzion dal grup bancjari e à fat savê che a son za une cincuantine i dipendents che a àn profitât di cheste pussibilitât. Propit su lis competencis linguistichis dal personâl si ponte par garantî ai clients che a vuelin doprâ il galês la pussibilitât di fâlu.

Font: Nation Cymru, 22/09/21

Ocitanie: formât il prin Consei Consultîf dal Aranês

Il Consei gjenerâl de Val di Aran – organisim rapresentatîf di cheste valade pirenaiche di lenghe ocitane cjapade dentri te Comunitât autonome de Catalogne – al à metût sù e presentât in maniere uficiâl il Consei Consultîf dal Aranês (Conselh Consultatiu der Aranés). Si trate di un orghin incjariât di studiâ la situazion sociolinguistiche de Val di Aran e di proponi ai organisims politics aranês lis azions che al stime plui utilis par valorizâ e par promovi la varietât ocitane fevelade ta chest teritori. Il Consei al è formât di sîs specialiscj esperts in diviers cjamps leâts al ûs de lenghe e aes politichis linguistichis.

Font: Generalitat de Catalunya, 20/09/21

Stât spagnûl: leç sul audiovisîf, lenghis couficiâls penalizadis

Il guvier spagnûl al à in buine sostance escludût lis lenghis couficiâls – o sei basc, catalan e galizian – dal progjet par une leç gjenerâl su la comunicazion audiovisive che e varès di meti ordin intal marcjât des plateformis digjitâls che a ufrissin contignûts audiovisîfs tant che Netflix, Amazon Prime e HBO. Daûr des primis indiscrezions al ven fûr che il test al previôt che il 30% des oparis dal catalic ufiert di chestis plateformis a vedin di jessi di produzion europeane e che la metât di chestis ultimis (o sei il 15% dal totâl) a vedin di jessi produzions par castilian o in altris lenghis dal stât spagnûl. Cundut che si à un riferiment ancje aes lenghis couficiâls, la mancjance di mecanisims specifics di tutele e puartarès cun dute probabilitât a lassâ fûr chestis lenghis a vantaç dal castilian. Il stes al vâl ancje pe part de propueste di leç che e previôt che i servizis di comunicazion audiovisive cun jentradis di passe 50 milions di euros a vedin di invistî un 5% dai lôr vuadagns par oparis di produtôrs indipendents europeans e che almancul il 70% di cheste percentuâl e ledi a chei che a doprin il castilian o lis lenghis uficiâls des Comunitâts autonomis. Intal stampon de leç, duncje, il guvier spagnûl nol à recepît lis propuestis rivadis des Comunitâts autonomis cun lenghe proprie e nol à tignût cont nancje des mobilitazions che a van indenant a cressi par domandâ, in primis a Netflix, di garantî su la sô plateforme digjitâl e tal so catalic ancje basc, catalan e galizian.

Font: Naiz:, 20/09/21; Galicia Confidencial, 23/09/21

Asturiis: model galizian pe uficialitât de lenghe proprie

Intant de prime riunion dai grups parlamentârs su la riforme dal Statût di autonomie des Asturiis, il PSOE – partît che al vuide il guvier in cjarie – al à proponût di cjapâ di model il Statût de Galizie par meti jù la part riferide ae uficialitât de lenghe asturiane. Cuâi sono i passaçs riferîts al galizian che si cjatin inta chel document? Prin di dut si lu definìs lenghe proprie de Comunitât. Po si declare la sô uficialitât, intune cul castilian, e il dirit di ducj i citadins di cognossilu e di doprâlu. Si aferme ancje che nissun al pues jessi discriminât par vie de lenghe doprade e si impegne lis istituzions publichis a garantî l’ûs normâl e uficiâl des lenghis ricognossudis e a promovi la lenghe proprie. Chescj, duncje, i principis che si volarès meti dentri pal asturian inte riforme dal Statût. Dut câs, al à sclarît il president de Comunitât Adrián Barbón, il model galizian al sarà di esempli dome pe scriture dal Statût intant che pe metude in vore dai principis elencâts intal document lis Asturiis a sielzaran un sisteme diferent che si adati ae realtât sociâl e politiche de Comunitât. La uficialitât dal asturian e viôt cuintri sei il PP che Ciudadanos, intant che il partît de estreme diestre Vox no si à nancje presentât ae riunion su la riforme dal Statût.

Font: La Voz de Asturias, 19/09/21

Irlande: in cressi i fruts che a studiin par gaelic

Il numar di fruts che al frecuente lis primariis gaelichis al va dilunc a cressi te Republiche di Irlande. Un tant al diven sei dal aument de domande di scuelis cul irlandês come lenghe di insegnament de bande dai gjenitôrs, sei di un cambiament inte planificazion dai percors educatîfs de bande dal guvier. Se tal an scolastic 2018-2019 lis scuelis imersivis par gaelic a jerin 247, chest an a son za deventadis 260. Cul gnûf an scolastic, dome te aree di Dublin, lis scuelis gaelichis a son cressudis di cuatri unitâts. Daûr dai ultins dâts disponibii i fruts che a frecuentin cumò lis primariis imersivis par gaelic a son uns 45 mil, come a dî sù par jù il 8% dal totâl. Plui de metât di chescj istitûts si cjate fûr dal Gaeltacht, o sei lis areis là che l’irlandês al è inmò doprât in maniere significative, e al rapresente il model scolastic che al cres di plui.

Font: Irish Times, 02/09/21