Montenegro: guvier gnûf cence ministris des minorancis

Il gnûf guvier di coalizion nassût in Montenegro dopo des elezions dai 30 di Avost al sarà il prin, di agnorums incà, cence ministris espression des minorancis che a vivin intal paîs. Il prin ministri incjariât di formâ il guvier, Zdravko Krivokapič, al à fat savê che il gnûf esecutîf al sarà formât di dodis ministris “tecnics”. A sostignî il guvier e je une aleance formade dai trê principâi grups di oposizion che a àn rivât a meti in minorance il Partît Democratic dai Socialiscj (DPS) che di passe vincj agns al jere ae vuide dal paîs balcanic. Ancjemò ai 18 di Otubar la dirigjence dal Partît Bosgnac, che al à trê deputâts inte Assemblee montenegrine, al veve fat savê di no cjatâsi in cunvigne cu la posizion di une part des fuarcis de gnove maiorance, judicadis masse filoserbis. Cumò ancje i doi partîts di riferiment de minorance albanese, che a àn doi rapresentants in Parlament, a àn sierât la puarte a ogni partecipazion ae coalizion dal guvier. Ta chest câs, a no lâi jù, e sarès stade propit la composizion dal guvier là che si spietavin la presince di rapresentants des minorancis. Al jere dal 1998 incà che tal guvier dal Montenegro si veve almancul un ministri nomenât tra i membris dai moviments politics des minorancis. Daûr dal ultin censiment, dome il 45% de popolazion dal stât balcanic si ricognòs come montenegrin intant che un 29% si declare di nazionalitât serbe, passe il 8% bosgnache e un 5% albanese.

Font: Balkan Insight, 17/11/20

Montenegro: in cressi lis tensions etnichis dopo dal vôt

Lis elezions dai 30 di Avost in Montenegro a àn assegnât une lizere maiorance in Parlament ai trê principâi grups di oposizion, metint in minorance il Partît Democratic dai Socialiscj (DPS) dal president Milo Djukanović. Dopo dal vôt, massime te aree setentrionâl là che e vîf la plui part de minorance bosgnache musulmane, si àn vûts ats di vandalisim e agressions cuintri di personis o proprietâts di cheste comunitât. Djukanović al à acusât la oposizion, che e cjape dentri ancje i partîts filoserps, di jessi daûr di chestis violencis par vie des sôs ideis nazionalistis estremis. I dirigjents dai moviments di oposizion a àn invidât i lôr eletôrs a meti fin aes celebrazions in place pe vitorie eletorâl in maniere di evitâ lis provocazions e i incidents che il Partît Democratic dai Socialiscj al varès vantaç di vê. Lis istituzions religjosis de comunitât bosgnache, par esempli, a àn za domandât aes autoritâts montenegrinis di intervignî par difindi la minorance musulmane. Daûr dal ultin censiment, dome il 45% de popolazion si ricognòs come montenegrin intant che si à un 29% che si declare di nazionalitât serbe, passe il 8% bosgnache e un 5% albanese.

Font: Balkan Insight, 02/09/20

Cossovo: minorancis penalizadis des gnovis regulis eletorâls

La comission eletorâl centrâl dal Cossovo e à dât fûr une circolâr là che si previôt che tes prossimis elezions parlamentârs in program ai 6 di Otubar a podedin votâ dome i citadins che a presentin un document identificatîf emetût des autoritâts cossovanis. La decision e à jevât lis protestis une vore duris dai rapresentants politics e istituzionâi des comunitâts serbis e montenegrinis dal Cossovo che le judichin contrarie ae stesse suaze normative statâl. Se e fos metude in vore, cheste circolâr e impedirès di votâ a cetancj membris des dôs minorancis che, cundut che a son iscrits intes listis eletorâls, a doprin cjartis di identitât dadis fûr des autoritâts serbis. Pal cjâf dal ufici pal Cossovo dal guvier serp, Marko Djurić, se no interven la comunitât internazionâl par comedâ la situazion lis prossimis elezions cossovanis a pierdaran ogni legjitimitât. I citadins a son clamâts a votâ in maniere anticipade pal gnûf Parlament dopo des dimissions dal prin ministri Ramush Hardinaj, sot acuse par crimins di vuere.

Font: Balkan Insight, 12/09/19

Montenegro: a van indenant lis tensions tra minorancis

E reste alte la tension in Montenegro tra lis diviersis minorancis e tra chestis e il stât centrâl. Daûr dal ultin censiment, dome il 45% de popolazion si ricognòs come montenegrin intant che si à un 29% che si declare di nazionalitât serbe e un 5% albanese. I contrascj tra lis comunitâts che a vivin ta cheste regjon no mancjin duncje di tocjâ ancje chest paîs balcanic. Dopo des critichis jevadis cuintri de decision des autoritâts statâls di sanzionâ i organizadôrs di doi events par vie di un ûs judicât strumentâl des bandieris albanesis e serbis, cumò a alçâ la temperadure e je stade la scree te aree di Tuzi – teritori a maiorance albanese tacât de capitâl Podgorica – di un monument a Dede Gjon Luli, nazionalist e combatent albanês vivût a cjaval tra i secui XIX e XX. Rapresentants dal Front Democratic, moviment di oposizion vicin ae comunitât serbe, a àn let chest episodi come une provocazion dal moment che – a disin – Dede Gjon Luli al rivendicave pe Albanie, ancje cu lis armis, la fasse meridionâl dal Montenegro là che e vîf la minorance albanese. I membris de oposizion a acusin il guvier centrâl di lassâ man libare ae comunitât albanese par vie che e poie l’esecutîf in cjarie.

Font: Balkan Insight, 26/08/19

Montenegro: scuintri sul ûs des bandieris des minorancis

Lis autoritâts statâls montenegrinis a àn fat savê che a sanzionaran i organizadôrs di dôs manifestazions là che si varessin davueltis azions contrariis ae leç. Intun câs, a finî sot acuse, a son stadis lis cjançons patriotichis e lis bandieris serbis dopradis intant di un conciert inmaneât par tirâ sù fonts pe ricostruzion di sîts religjôs de glesie ortodosse serbe in Cossovo. Il secont câs al è invezit leât al ûs di bandieris de Albanie intune manifestazion tradizionâl che si davuelzeve te aree di Tuzi, teritori a maiorance albanese che si cjate tacât de capitâl Podgorica. Daûr dal ultin censiment, il 29% de popolazion dal Montenegro si declare di nazionalitât serbe e il 5% albanese. La leç e permet l’ûs des bandieris di chestis comunitâts, ma dome associât cun chê montenegrine. Cun di plui, pes autoritâts dal paîs balcanic, lis manifestazions culturâls no puedin jessi dopradis par alimentâ il nazionalisim. Lis sanzions menaçadis dal guvier a àn però jevât critichis duris e acusis di violazion dai dirits nazionâi sei de aleance eletorâl de minorance albanese (che par altri e poie l’esecutîf montenegrin), sei dal ministri pai forescj de Serbie.

Font: Balkan Insight, 19/08/19

Albanie: plui dirits pai albanês di Macedonie e Montenegro

Inte riunion di guvier dai 10 di Mai l’esecutîf vuidât dal prin ministri Edi Rama al à decidût di slargjâ ancje ai citadins macedons e montenegrins di nazionalitât albanese i stes dirits di acès al lavôr dai citadins albanês. La misure e vâl dome par chei puescj di vore là che no si domande in maniere esplicite la citadinance albanese e e à un valôr plui simbolic che pratic. La stesse decision e jere stade cjapade ancjemò intal 2014 pai cossovans di lenghe albanese e pe minorance albanese che e vîf in Serbie. Il messaç che si vûl dâ al è chel di une Albanie vierte, ancje sul plan dal lavôr, a ducj i albanês, di là dal stât là che a son citadins. Par chel che al rivuarde la Macedonie dal Nord i albanês a rapresentin un cuart de popolazion totâl, intant che in Montenegro a son uns cinc par cent dal totâl.

Font: Balkan Insight, 14/05/19

Montenegro: a Tuzi sucès de aleance albanese

L’an passât, ae fin di une lungje bataie, la aree di Tuzi e je tornade a deventâ un comun autonom dopo che tal 1957 e jere stade cjapade dentri intal comun di Podgorica, la capitâl dal Montenegro. A sburtâ pal resuriment dal comun e jere stade massime la minorance albanese che ta cheste aree e je maioritarie. E propit une aleance di listis albanesis e à vinçût lis primis elezions aministrativis dal gnûf comun che si son tignudis ai 3 di Març. La aleance albanese e à elet 16 dai 32 conseîrs comunâi intant che il Partît Democratic dai Socialiscj e i siei aleâts – cje a son maioritaris in Montenegro – si son fermâts a 15 elets. La aleance eletorâl albanese e varès di rivâ a guviernâ il comun di Tuzi in gracie de poie dal conseîr elet inte liste di oposizion Montenegro Democratic. La cuistion e jere cussì sintude che une vore di membris di de comunitât albanese che a lavorin ator pe Europe e fintremai tai Stâts Unîts a son tornâts di pueste par votâ pe coalizion di listis albanesis.

Font: Balkan Insight, 04/03/19

Montenegro: ricognossiment internazionâl pal montenegrin

Ae fin di un percors durât nûf agns, lis autoritâts dal Montenegro a àn otignût un codiç ISO pal montenegrin (CRN). Chest ricognossiment i da un valôr di uficialitât internazionâl a cheste lenghe che, fin cumò, e vignive calcolade une varietât dal serp. La costituzion di chest paîs balcanic za tal 2007 i assegnave al montenegrin il status di lenghe uficiâl, status che si veve po slargjât intal 2011 a dut il sisteme scolastic public cundut che, propit intal censiment di chel an, il 44% de popolazion al declarave di fevelâ par serp a front di un 36% che al indicave il montenegrin come lenghe proprie. Cun chest gnûf passaç, il montenegrin si infuartìs ancje sul plan internazionâl, intant che i partîts di oposizion e diviersis organizazions a denunciin un aument des discriminazions cuintri di cui che al dopre la lenghe serbe.

Font: Balkan Insight, 12/12/17

Serbie: lis iniziativis dai bosgnacs a preocupin il guvier

Il Consei Nazionâl Bosgnac, organisim di rapresentance de minorance bosgnache in Serbie, al à comunicât la intenzion di celebrâ in grant i cent agns de declarazion di Sjenica. Il document, sotscrit intal Avost dal 1917, al domandave che il Sanzac, regjon a maiorance musulmane a cjaval tra Serbie e Montenegro, al fos anetût ae Bosgne. La gnove e je stade comentade in maniere negative di diviers rapresentants dal guvier di Belgrât preocupâts par vie che a viodin la iniziative tant che un tentatîf di saborâ la separazion di cheste regjon de Serbie. Il suspiet al nas ancje dal fat che, cuasi tal stes moment, membris de minorance bosgnache a àn inviât une petizion par che il Sanzac al deventi une regjon transfrontaliere, sul model des euroregjons in vore te Union Europeane.

Font: Balkan Insight, 04/07/17

Sanzac: progjet par imbastî une euroregjon

A son plui di 4 mil lis personis che a àn sotscrit une petizion che e sarà inviade ai guviers de Serbie e dal Montenegro cun chê di meti sù intal Sanzac une regjon transfrontaliere, sul model des euroregjons in vore te Union Europeane. L’intindiment principâl, a disin i promotôrs, al è chel di promovi il svilup economic dal teritori par mieç dai finanziaments previodûts par chest gjenar di istituzions. Il Sanzac al è une regjon storiche abitade in maiorance di bosgnacs musulmans e che cumò si cjate dividude jenfri Serbie e Montenegro. La propueste di une euroregjon e cjate però avonde fredis lis comunitâts serbis, montenegrinis e rom che a vivin alì e e lasse avonde malcuiets i guviers dai doi stâts dal moment che la iniziative e gjolt de poie de Turchie, interessade a incressi la sô influence su la regjon cul sostignî lis comunitâts musulmanis che a vivin alì.

Font: Balkan Insight, 26/06/17

Montenegro: minorancis decisivis pal gnûf guvier

La clâf pe formazion dal gnûf guvier dal Montenegro e passe pai deputâts espression des minorancis nazionâls. Cun di fat, lis elezions che si son tignudis ai 16 di Otubar a àn infuartît la posizion dal prin ministri in scjadince Milo Djukanović cence dâi però la pussibilitât di guviernâ di bessôl. Il so Partît Democratic dai Socialiscj (DPS) al à otignût 36 elets, cinc in plui de volte stade, a front di un Parlament formât di 81 deputâts. I siei aleâts Sociâi Democratics (SD) i puartin altris doi parlamentârs. A fâi cuintri a son lis cuatri fuarcis principâls de oposizion, ven a dî il Front Democratic (DF, cun 18 elets), la coalizion Ključ (o sei “clâf”, cun 9 elets), il moviment Montenegro Democratic (DCG, cun 8 elets) e il Partît Sociâl Democratic (SDP, cun 4 elets) che a metin adun un totâl di 39 deputâts. Chescj partîts a contestin la regolaritât des elezions, segnadis di cetantis denunciis di brois e di coruzion dai eletôrs. Par decidi se sostignî un gnûf guvier Djukanović o formâ cu lis oposizions un esecutîf di transizion par preparâ il teren par elezions regolârs, a son cussì fondamentâi i 4 deputâts des minorancis, o sei i 2 dal Partît Bosgnac (BS) e chei elets tes filis de coalizion albanese (AO) e de Iniziative Civiche Cravuate (HGI).

Font: Balkan Insight, 17-18/10/16

Montenegro: alfabet cirilic discriminât tes scuelis

Di cumò indenant in Montenegro dutis lis comunicazions scritis dentri dal sisteme scolastic e chês indreçadis ai students e ai lôr gjenitôrs a saran scritis cul alfabet latin. Dome tal câs di une domande esplicite de bande des fameis o dai insegnants si doprarà l’alfabet cirilic, ma no son pôcs i câs di gjenitôrs e professôrs che a son stâts “invidâts” a lassâ pierdi par evitâ consecuencis negativis. Pes realtâts associativis e politichis de minorance serbe si trate di une situazion di discriminazion palese che e va cuintri de avualiance dai doi alfabets previodude de Costituzion. La gnove diretive su lis comunicazions scolastichis e va a saborâ lis tensions partidis ancjemò tal 2007 cuant che su la Costituzion si veve fevelât di lenghe montenegrine e lenghe serbe, in pratiche la stesse lenghe ma la prime scrite cun alfabet latin e la seconde in cirilic. La progressive limitazion de presince dal cirilic e à rindût la minorance serbe simpri plui malcuiete, ma e à ancje jevât fantasimis storichis framieç di une part dai montenegrins. Di fat il cirilic al è stât gjavât des scuelis dome dôs voltis: intal 1916 intant de ocupazion austriache e intal 1941 intant de ocupazion taliane.

Font: Balkan Insight, 30/09/16

Montenegro: aleance eletorâl pai partîts de minorance albanese

Pe prime volte i trê partîts principâi de minorance albanese dal Montenegro a coraran adun intes elezions politichis cun chê di incressi la lôr presince tal Parlament e di vê plui fuarce te bataie par difindi i dirits nazionâi de lôr comunitât. Forca, Union dai Albanês e il Partît de Alternative Albanese a àn sotscrit une aleance che si propon di difindi e di promovi la lenghe e i simbui identitaris de lôr comunitât, di incressi la presince dal albanês intes scuelis e di favorî il decentrament e il svilup socioeconomic de minorance. Daûr dal censiment dal 2011, in Montenegro a vivin passe 30 mil albanês, pôc mancul dal 5% de popolazion totâl. Tes ultimis elezions i partîts di riferiment de minorance a vevin cjapât uns 12.500 vôts e elet doi deputâts. Cun cheste aleance a pontin duncje a otignî almancul trê parlamentârs e a pesâ di plui tai ecuilibris politics statâi. La coalizion eletorâl montenegrine e ven cumò proponude di esempli ancje par altris realtâts là che la rapresentance politiche albanese e je dividude tant che la Macedonie e la Serbie.

Font: Balkan Insight, 20/09/16

Montenegro: puescj di vore publics, minorancis discriminadis

Daûr dai dâts dal ultin censiment, in Montenegro i montenegrins “etnics” a rapresentin il 45% de popolazion totâl ma inte aministrazion publiche a son il 74%. I serps, che a son il 28% de popolazion, a rapresentin dome l’11% dai dipendents publics. I albanês a ocupin il 2,5% dai puescj di vore de aministrazion publiche, ma a son il 5% de popolazion. Ancje lis comunitâts plui piçulis tant che bosgnacs, rom e cravuats a son sotrapresentâts intal public. Un cuadri che al à pôc a ce viodi cu la legjislazion montenegrine che e previôt che i membris des minorancis a sedin rapresentâts in maniere proporzionâl inte aministrazion publiche. A denunciâ cheste situazion al è un rapuart dal ministeri pai dirits umans e des minorancis che al à esaminât passe 140 organisims publics statâi e locâi. Za di timp partîts e organizazions des comunitâts serbe e albanese a segnalin che i puescj di vore intal public a son assegnâts discriminant lis minorancis e che, par dâur acès a chescj puescj di vore, a vegnin fatis pressions su serps e albanês par che si declarin montenegrins.

Font: Balkan Insight, 24/08/15

Cossovo: pas pal ricognossiment di montenegrins e cravuats

Prins pas in Cossovo pal ricognossiment di cravuats e montenegrins tant che minorancis separadis. Par completâ il percors si à di modificâ la Costituzion, par chest al covente prime il vie libare de cort costituzionâl e dopo chel dal Parlament. Sul plan normatîf chestis dôs comunitâts a son cjapadis dentri te minorance serbe, ma il president cossovan Atifete Jahjaga al à sigurât che ur sarà dât il status di minorancis costituzionâls e duncje cul dirit di jessi ancje rapresentadis intal Parlament. In dì di vuê lis comunitâts ricognossudis a àn vincj deputâts garantîts, dîs i spietin ae minorance serbe e dîs a son dividûts tra chês altris comunitâts. Tra i ponts di disgredeâ, tra l’altri, al è propit chel di viodi se la incressite des minorancis ricognossudis e puartarà a di un aument dai puescj garantîts o se a saran chês altris minorancis a vê di lassâur une part dai lôr puescj. A vuê al mancje ancje un cuadri esat dal pês che lis dôs comunitâts a àn sul plan numeric dal moment che l’ultin dât sigûr al rimonte al censiment dal 1991 cuant che i montenegrins a jerin sù par jù 20 mil e i cravuats 5 mil.

Font: Balkan Insight, 25/06/15

Montenegro: alarm pes cundizions dal cjamp par sfolâts rom

La Comission europeane cuintri dal razisim e de intolerance, un dai braçs dal Consei de Europe, al à riclamât il guvier dal Montenegro par che al sieri cence altris ritarts il cjamp di Konik, pôc fûr de capitâl Podgorica, là che a vivin uns 1500 dispatriâts rom scjampâts dal Cossovo là che a jerin vitimis di violence de bande di grups paramilitârs cossovans. I delegâts de Comission a son restâts scaturîts des cundizions di vite intal cjamp, là che la int e vîf in barachis di len e di bandon, dispès cence lûs, aghe e servizis. Ta chescj agns lis autoritâts dal Montenegro a àn inviât un percors par cjatâ une sistemazion divierse par sì e no un diesim de popolazion dal cjamp.

Font: Balkan Insight, 23/02/15

Montenegro: denuncie cuintri dai atacs di stampe ai albanês

Doi membris dal Parlament montenegrin e i dirigjents dai partîts de minorance albanese a àn denunciât il diretôr responsabil e doi gjornaliscj dal Informer par vê publicât articui che a sticin la violence cuintri di cheste comunitât che e rapresente il 5% de popolazion dal Montenegro. Un tant al jere sucedût dopo des violencis sclopadis intant de partide di balon jenfri Serbie e Albanie dai 15 di Otubar. I responsabii dai articui a àn po domandât scuse pal lengaç doprât cuintri dai albanês, ma pai rapresentants de minorance il nivel di asse pandût al jere cussì fuart che e covente une sentence judiziarie esemplâr che e impedissi di tornâ a vê episodis di cheste fate.

Font: Balkan Insight, 7/11/14

Montenegro: si domande la tutele de lenghe serbe

Ai 19 di Otubar lis organizazions che a rapresentin lis comunitâts serbis in Montenegro a àn dât fûr un apel unitari aes autoritâts di Podgorica, di Belgrât e ancje de Republiche Srpska de Bosgne par domandâ che si impegnin a difindi la lenghe serbe e l’alfabet cirilic in Montenegro. Dopo de separazion de Serbie, la Costituzion dal 2007 e previôt che il montenegrin, o sei la varietât serbe-cravuate fevelade ta cheste aree, al sedi la uniche lenghe uficiâl dal paîs. Intal 2011 e je stade fate buine une leç su la educazion là che si fevele di “lenghe e leterature serbe-montenegrine, bosgnache e cravuate” che e somearès cjalâ plui a chestis varietâts che no al serp standard. Intal ultin censiment i citadins dal Montenegro che si declarin serps a son mancul dal 30%, ma chei che a àn il serp tant che lenghe proprie a son passe il 40%, ven a dî plui di chei che a disin di vê tant che prime lenghe il montenegrin. Cundut che no si sintin minorance, lis organizazions serbis a domandin che lis autoritâts dal Montenegro ur ricognossin almancul chei stes dirits che e gjolt la minorance albanese tant che une educazion inte lôr lenghe e une cuote proporzionâl di rapresentance intes aministrazions statâls.

Font: Balkan Insight, 20/10/14

Montenegro: i albanês in place par separâ Tuzi

Ai 6 di Avrîl a Tuzi, in Montenegro, si è tignude une manifestazion inmaneade dai partîts albanês di oposizion – il Forum Democratic pe Integrazion e la Aleance Democratiche – par rivendicâ il dirit di cheste citât a vê un comun par so cont. In dì di vuê Tuzi, cui siei 13 mil abitants che pe plui part a partegnin ae minorance albanese, al è dome un dai cuartîrs de capitâl Podgorica. Al è di agns che la comunitât albanese e domande un referendum par trasformâ Tuzi in comun, ma dutis lis promessis vudis fin cumò no àn ancjemò puartât a di un cualchi risultât. Intant de proteste, i rapresentants dai doi partîts a àn invidât ducj i albanês che a àn une incarghe istituzionâl a lassâle fintremai che Tuzi nol deventarà comun. La rivendicazion e je stade fate indenant di membris de diaspore albanese ancje intant de visite dal prin ministri montenegrin intai Stâts Unîts.

Font: Balkan Insight, 07/04/14

Cossovo: i montenegrins a domandin il ricognossiment uficiâl

Lis associazions che a rapresentin i 20 mil montenegrins dal Cossovo si son dadis adun par domandâ aes istituzions di chest paîs che ancje la lôr comunitât e gjoldi dal status di minorance ricognossude che, tra lis altris robis, al previôt une presince garantide intal Parlament cossovan. In dì di vuê, di fat, i montenegrins a vegnin cjapâts dentri te comunitât serbe daûr di criteris fissâts ancjemò intal 1999. Il Montenegro però al à ricognossût la indipendence dal Cossovo intal Otubar dal 2008 e intal zîr di un pâr di agns a son stadis inviadis relazions diplomatichis continuativis. Dut câs lis autoritâts dal Montenegro a àn fat savê che no nomenaran nissun ambassadôr fintremai che il Cossovo nol ricognossarà i montenegrins tant che minorance nazionâl. In spiete di une leç che ur garantissi chest status, il prin ministri cossovan Hashim Thaci al à za fat savê di jessi dacuardi pal ricognossiment.

Font: Balkan Insight, 07/03/14