Ucraine: leç su la cjarte stampade e colpìs lis minorancis

Dopo doi agns di transizion, ai 16 di Zenâr e je jentrade in vore in Ucraine la gnove leç su la stampe che e previôt che ducj i cuotidians e lis rivistis a difusion statâl, publicadis su cjarte o in rêt, a vedin di vê ancje une version cui stes contignûts e cu la stesse impagjinazion ancje par ucrain. La misure e je pensade par obleâ la stampe in lenghe russe a sierâ dal moment che nissun editôr al è in stât di sostignî une spese dal gjenar. La stesse misure e sarà metude in vore a partî dal Lui dal 2024 ancje pe stampe a difusion locâl. Chest al vûl dî che, in plui di colpî la comunitât di lenghe russe – che e rapresente cuasi un tierç de popolazion de Ucraine – si larà a meti in zenoglon ancje i mieçs di comunicazion di chês altris minorancis che a vivin dentri dai confins statâi tant che ongjarês, rumens e v.i. E je za in vore di cualchi an une leç che e impon cuotis di ucrain pes radios e pes televisions. In Lui e jentrarà invezit in vore la normative che e previôt che l’ucrain al sedi la uniche lenghe uficiâl ricognossude. Si trate di une serie di leçs che si proponin di dislidrisâ de sfere publiche la lenghe russe e, cun chê, ancje dutis lis lenghis des minorancis.

Font: RFE RL, 16/01/22

Russie: difese des minorancis russofonis cence de fuarce

La Federazion Russe, par bocje dal so ministri pai forescj Sergei Lavrov, e torne a denunciâ lis politichis discriminatoriis metudis in at cuintri des minorancis di lenghe russe, in particolâr intes republichis baltichis e in Ucraine. Pes autoritâts russis si cjatisi denant di violazions palesis des convenzions internazionâls su la tutele des minorancis linguistichis e nazionâls e, tal câs ucrain, fintremai di ats che a van cuintri de stesse Costituzion dal paîs. Lavrov al à dut câs sigurât che la difese des minorancis russis o russofonis e ven puartade indenant dome sul plan diplomatic, massime dentri dal Consei de Europe, de OSCE e de ONU, e cence l’ûs de fuarce. Un riferiment, chest ultin, che tancj a metin in discussion soredut cun riferiment al scuintri in at in Ucraine. Il ministri pai forescj rus al à ancje lamentât la muse dople di diviers stâts europeans che a domandin ae Russie di rispietâ i dirits des minorancis ma, tal stes timp, no si sintin in dovê di fâ chel stes.

Font: TASS, 06/09/21

Ucraine: la gnove leç linguistiche al esam de cort costituzionâl

La cort costituzionâl de Ucraine e je daûr a esaminâ la leç linguistiche fate buine l’an passât che e impon l’ûs dal ucrain inte plui part de vite publiche. La normative e previôt che i citadins a vedin di doprâ la lenghe statâl intes ativitâts politichis e aministrativis e cuant che a àn a ce fâ cun magjistrâts, operadôrs sanitaris, militârs, professôrs e personâl scolastic, funzionaris di bancjis e di societâts controladis dal stât. La leç e previôt po che almancul il 90% dai programs televisîfs al sedi par ucrain. Il proviodiment al è stât impugnât di un grup di rapresentants de comunitât russofone che si cjate a jessi la plui colpide des novitâts puartadis di cheste leç. Si à di fat di calcolâ che il 15,8% de popolazion de Ucraine al fevele dome par rus, il 12,3% al dopre cuasi simpri il rus e il 24,9% al dopre te stesse misure rus e ucrain. Intant dai lavôrs de cort un trop di politics e militants nazionaliscj al à inmaneât une proteste denant dal tribunâl par difindi la leç di chê che e ven calcolade une manovre de Russie par destabilizâ il paîs. Al è di dî che cuintri de leç a vevin cjapât posizion ancje i rapresentants di altris comunitâts minorizadis – tant che ongjarês e rumens –, i esperts dal Consei de Europe e l’alt comissariât de ONU pai dirits umans.

Font: RFE RL, 09/07/20

Ucraine: unitât aministrative de minorance bulgare a risi

Cuntune declarazion votade ae unanimitât, il Parlament de Bulgarie al à palesât il so discontent pe riforme aministrative progjetade de Ucraine e al à domandât al guvier di Sofia di inviâ un confront istituzionâl su la cuistion cun chel di Kiev. Il progjet des autoritâts ucrainis, di fat, al previôt di dividi in cinc tocs la provincie di Bolgrad / Bolhrad – là che e vîf la plui part de minorance bulgare dal paîs – menaçant cussì la unitât teritoriâl di cheste comunitât. L’intervent de Assemblee bulgare al à jevât però la proteste uficiâl dal esecutîf ucrain che al rivendiche il so impegn intal rispietâ i dirits e lis libertâts di dutis lis minorancis nazionâls. Fondade di un grup di bulgars intal 1821, Bolgrad e je deventade il pont di riferiment pe diaspore bulgare in Ucraine. In dì di vuê si stime che te sô provincie a vivin tra i 200 e i 300 mil bulgars che a rapresentin plui dal 60% de popolazion.

Font: Balkan Insight, 21/05/20

Ucraine: trê modei scolastics diviers pes lenghis minorizadis

Il president ucrain Volodimir Zelenskij al à ratificât la leç di riforme dal sisteme educatîf fate buine dal Parlament che e previôt trê modei linguistics diferents pes diviersis minorancis che a vivin intal paîs. Il prin al è pensât pes comunitâts che no àn un stât daûr e che a son dislidrisadis dal lôr teritori origjinari, tant che i tatars de Crimee, e al previôt l’insegnament inte lôr lenghe native compagnât di un studi aprofondît dal ucrain. Il secont model al è invezit indreçât aes minorancis nazionâls che a fevelin une des lenghis de UE, tant che rumens e ongjarês (che, par numar, a rapresentin la seconde e la tierce minorance dal paîs), e al previôt un slargjament progressîf de presince de lenghe statâl che e partìs di cualchi ore tes primariis par rivâ almancul al 60% tes superiôrs. Il tierç model al vâl par chês altris minorancis (a partî di chê russofone) e dopo di une presince plui marcade de lenghe proprie tes primariis al previôt che tes secondariis l’ucrain al sedi doprât almancul pal 80% des oris di insegnament.

Font: Ukrainian News, 13/03/20

Crimee: intes scuelis al torne l’insegnament dal ucrain

Lis autoritâts russis a àn fat savê che cu la partence dal gnûf an scolastic intes scuelis di Sevastopol – la citât principâl de Crimee – si varà la pussibilitât di studiâ ancje l’ucrain. Inte penisule, che e je stade anetude de Federazion Russe tal 2014, la plui part de popolazion e je di lenghe russe ma si à une minorance impuartante che e à di prime lenghe l’ucrain. Dome a Sevastopol si stime che almancul il 13% dai passe 440 mil abitants al sedi ucrain. L’insegnament de lenghe al è però opzionâl e al à duncje di jessi domandât dai gjenitôrs cuant che a van a iscrivi i fîs a scuele. Intes scuelis de Crimee e jere za la pussibilitât di studiâ il tatar, lenghe de comunitât native de penisule ma che in dì di vuê e rapresente dome une minorance de popolazion locâl. E je daûr a jessi stazade ancje la introduzion, simpri in forme facoltative, dal insegnament dal armen e dal azer.

Font: RT, 17/09/19

Ucraine: dirits linguistics al centri dal incuintri OSCE - Russie

La situazion des personis che a àn il rus come prime lenghe in Ucraine e tai paîs baltics e je stade al centri de riunion jenfri il ministri pai forescj rus, Sergej Lavrov, e l’alt comissari de OSCE pes minorancis nazionâls, Lamberto Zannier. Il membri dal esecutîf rus al à pontât il dêt massime su la gnove leç linguistiche jentrade in vore in Ucraine che, plui che svilupâ l’ucrain, e somee pensade par limitâ i dirits des minorancis linguistichis, a partî di chê russe. Al à po ricuardât il probleme di ducj chei rus che, cundut che a vivevin alì za di prime de indipendence, no àn ancjemò otignût la citadinance di Estonie e Letonie, là che si cjatin duncje intune situazion di discriminazion palese. Il rapresentant rus intal consei de OSCE al à po segnalât cemût che diviers professôrs di Charkov / Charkiv, citât ucraine cuntune gruesse popolazion russofone, a sedin stâts sanzionâts pal fat di vê doprât il rus a scuele.

Font: TASS, 19-23/07/19

Ucraine: fate buine in Parlament la gnove leç linguistiche

Il Parlament de Ucraine al à fate buine une leç che e impon l’ûs dal ucrain inte plui part de vite publiche. La normative, passade cun 278 vôts a pro e 38 contraris, e previôt che i citadins a vedin di doprâ la lenghe statâl intes ativitâts politichis e aministrativis e cuant che a àn a ce fâ cun funzionaris de aministrazion publiche, magjistrâts, miedis e operadôrs sanitaris, militârs, professôrs e personâl scolastic, funzionaris e dipendents di bancjis e di societâts controladis dal stât. Cualchi ecezion e je previodude pes cerimoniis religjosis e par cualchi servizi sanitari. La leç e previôt po che almancul il 90% dai programs televisîfs al sedi par ucrain; percentuâl che si sbasse al 50% tal câs di mieçs di comunicazion su cjarte e gnovis publicazions. Dut chest intun stât là che il 15,8% de popolazion al fevele dome par rus, il 12,3% al dopre cuasi simpri il rus e il 24,9% al dopre lis dôs lenghis inte stesse misure. Pes autoritâts russis la aprovazion de leç e contribuìs a infuartî la crevadure te societât. L’alt comissariât de ONU pai dirits umans al stime che diviers elements de normative a ledin cuintri dai standards internazionâi sui dirits umans. Il gnûf president ucrain, Volodimir Zelenskij, che al à il rus come lenghe native, al à dite che al tamesarà ben il test par viodi che no sedin elements di incostituzionalitât.

Font: The Guardian, 25/04/19

Ucraine: plui spazi al bulgar intes scuelis

La ministre ucraine pe istruzion e à sotscrit une declarazion che e impegne il guvier di Kiev a incressi i dirits de minorance bulgare te scuele. Plui in detai, si larà a mendâ la leç su la educazion jentrade in vore tal 2017 che e incrès in maniere progressive la presince dal ucrain ancje tes scuelis des minorancis nazionâls ricognossudis. L’obietîf al è di garantî ai fruts che a partegnin ae minorance bulgare di imparâ la lôr lenghe e di vêle tant che lenghe di insegnament. Ucraine e Bulgarie si son impegnadis ancje a lavorâ suntun protocol di cooperazion gnûf su la educazion che al cjapi dentri i prossims cuatri agns scolastics.

Font: Unian, 26/04/18

Ucraine: leç su lis lenghis contestade ancje de Ongjarie

Dopo des tensions cu la Romanie, cumò e je la Ongjarie a tignî cjalt il scuintri diplomatic cu la Ucraine su la leç des lenghis fate buine in Setembar dal Parlament ucrain. La gnove normative e previôt che l’insegnament intes scuelis secondariis a imersion des comunitâts minorizadis si davuelzi pe plui part par ucrain cul ûs des lenghis locâls limitât dome a cualchi materie. Pes autoritâts ucrainis la leç e rispiete i criteris in vore in Europe pe tutele des minorancis linguistichis e par chest e à domandât une opinion legâl al Consei de Europe. No le pense cussì il guvier di Budapest che al domande aes istituzions comunitariis di riclamâ la Ucraine al rispiet dal acuardi di associazion sotscrit cu la Union Europeane. Si stime che in Ucraine e in particolâr te regjon de Transcarpazie a vivin uns 140-150 mil ongjarês. Lis dôs comunitâts minorizadis plui gruessis a son chê russe, che e conte sui 8 milions di personis, e chê rumene cun sù par jù 400 mil personis. Critichis pe leç su lis lenghis a jerin rivadis ancje de Federazion Russe, de Polonie e de Moldova.

Font: BBC, 10/10/17

Ucraine: gnove leç su lis lenghis, tensions cu la Romanie

Il president de Romanie, Klaus Iohannis, al à cancelât une visite in program par chest Otubar in Ucraine tant che at formâl di proteste cuintri de gnove leç su lis lenghis fate buine ai 5 di Setembar dal Parlament ucrain. Iohannis al à dade la gnove in maniere direte al president Petro Poroshenko in ocasion de presince dai doi a New York pe assemblee gjenerâl de ONU. Une volte ratificade dal president, al à zontât Iohannis, la gnove leç e larès a limitâ cetant l’acès des minorancis ae educazion inte lôr lenghe proprie. In Ucraine la comunitât di lenghe rumene e je stimade su lis 400 mil personis, pe plui part centradis in Bucovine. Protestis cuintri de gnove leç a son rivadis tes zornadis stadis ancje dai guviers de Federazion Russe, de Ongjarie e de Moldova. La comunitât plui grande e je propite chê di lenghe russe che e conte sui 8 milions di personis (il 17% de popolazion), intant che i ongjarês a son sui 140 mil.

Font: RadioFreeEurope - RadioLiberty, 22/09/17

Ucraine: gnovis cuotis linguistichis pes televisions

Il Parlament de Ucraine al fate buine une leç par regolâ la presince des lenghis intes stazions televisivis dal paîs. Il test al previôt che ducj i canâi che a àn une difusion di nivel statâl a vedin almancul i trê cuarts des lôr emissions par ucrain. Pes televisions di dimension locâl si domande invezit un minim dal 60% dai spazis inte lenghe di stât che a deventin il 75% tal câs dai telegjornâi. Chestis cuotis no varessin di rapresentâ un pidiment pe plui part des lenghis minorizadis feveladis in Ucraine, fale che pal rus che, in plui di jessi maioritari in diviersis regjons, al è une lenghe une vore doprade ancje intal setôr radiotelevisîf.

Font: Broad Band TV News, 25/05/17

Ucraine: gnûf centri pe comunitât ongjarese de Transcarpazie

A front dai tentatîfs in at in Ucraine par limitâ i dirits des comunitâts minorizadis, il guvier ongjarês al incrès la poie aes iniziativis a pro de minorance magjare che e vîf te regjon de Transcarpazie. Dopo des risorsis metudis par sostignî i istitûts scolastics de minorance, cumò l’esecutîf di Budapest al à cofinanziât cun cuasi 100 mil euros la costruzion di un centri pe comunitât ongjarese logât te citadine di Csap / Chop. La struture, screade ta chestis setemanis, e je gjestide de Union Culturâl dai Ongjarês de Transcarpazie (KMKSZ).

Font: Politics.hu, 13/02/17

Ucraine: dirits linguistics des minorancis sot atac

Intun incuintri che si è tignût ai 24 di Novembar alì dal Parlament european, une delegazion formade di rapresentants de FUEN (Union Federâl des Nazionalitâts Europeanis) e de Union Culturâl dai Ongjarês de Transcarpazie (KMKSZ) e à denunciât i tentatîfs in at in Ucraine par limitâ i dirits des comunitâts minorizadis. Par esempli e je in discussion une mende ae leç su la educazion che e limite il dirit dai membris di une comunitât minorizade ricognossude a vê une istruzion te lôr lenghe proprie cul permeti l’insegnament te lôr lenghe dome tes areis là che la presince di cheste comunitât e je plui fuarte e dome te scuele de infanzie e tes superiôrs. Cun di plui si vûl limitâ chest dirit dome a chês lenghis che a son uficiâls dentri de Union Europeane. Une altre iniziative, cheste volte judiziarie, e ponte invezit a gjavâ il dirit di doprâ la lenghe proprie cu lis aministrazions publichis ancje tes areis là che la comunitât minorizade e rapresente almancul il 10% de popolazion totâl. Si trate, a disin i delegâts de FUEN e de minorance ongjarese, di une situazion une vore pericolose par vie che e je daûr a stiçâ gnovis tensions etnichis intun stât che za si cjate a vivi la pierdite de Crimee e il conflit intes regjons sudorientâls russofonis.

Font: FUEN, 25/11/16

Crimee: scuintri tra Russie e Ucraine sui dirits dai tatars

Il ministri ucrain pe justizie, Pavlo Petrenko, al à anticipât la intenzion di presentâ une denuncie cuintri de Russie denant dal Tribunâl european pai dirits umans pe metude al bant de organizazion Mejlis, che e rapresente la comunitât tatare de Crimee. Ta cheste penisule, che tal 2014 e je stade anetude de Federazion Russe, a vivin sù par jù 260 mil tatars, o sei il 13% de popolazion totâl. Sul finî dal mês di Avrîl la Cort supreme de Crimee e à decidût di meti fûr leç Mejlis par vie che le calcole une organizazion estremiste. Diviers dai dirigjents di cheste organizazion a jerin scjampâts in Ucraine dopo de anession de Crimee e a van dilunc a acusâ lis autoritâts russis di violâ i dirits de comunitât tatare.

Font: Sputnik International, 15/07/16

Ucraine: acuardi cun Budapest par judâ la minorance ongjarese

Ai 9 di Jugn il guvier ongjarês al à sotscrit un acuardi di svilup economic cu la federazion des organizazions de minorance magjare che e vîf inte regjon de Transcarpazie, in Ucraine sudocidentâl. La intese, che si poie suntune disponibilitât economiche di 96 milions di euros, e je pensade par judâ lis ativitâts economichis gjestidis di membris de minorance ongjarese ancje par mieç di prestits vantazôs. L’intindiment principâl de iniziative al è di evitâ che i ongjarês de Transcarpazie a sbandonin la lôr tiere par resons economichis.

Font: Politics.hu, 10/06/16

Ucraine: acuardi che al jude la minorance rumene

Il prin ministri rumen Victor Ponta e chel ucrain Arseniy Yatsenyuk a àn sotscrit un acuardi che al rint plui sempliç il passaç di personis e di marcjanziis inte fasse confinarie dai doi paîs che e cjape dentri sù par jù doi milions di personis. La intese e à chê di dâ un sburt ai scambis comerciâi tra i doi paîs, ma ancje di infuartî la cognossince e i leams culturâi tra lis comunitâts che a vivin dongje dal confin. Ancje par chest la gnove e je stade comentade cun sodisfazion dai rapresentants de minorance rumene che e vîf in Ucraine e che e je presinte massime inte provincie di Çernivtsi / Cernăuţi.

Font: SETimes, 16/10/14

Ucraine: tensions e violencis tra filorus e governatîfs

Lis tratativis di Gjinevre tra Ucraine, Russie, UE e USA – che a previodevin di meti fin aes violencis e aes provocazions, di disarmâ lis miliziis e di inviâ un dialic par une riforme costituzionâl – no àn vût grancj risultâts sul teren, se e je vere che fintremai la tregue proclamade par Pasche no à rivât a tignî bot fint insom. I incidents e lis provocazions a son lâts indenant e une gnove ofensive dai reparts speciâi dal guvier di Kiev e di milizians de estreme diestre ucraine che e à causât diviers muarts e ferît e je stade fermade dome dopo de menace russe di un intervent come chel viodût cualchi an indaûr in Gjeorgjie. Il president e il prin ministri ad interim, Oleksandr Turčinov e Arseny Yatseniuk, a àn prometût che a poiaran une modifiche costituzionâi par dâi plui competencis ai conseis locâi e par infuartî i dirits linguistics des comunitâts russofonis. Il Partît des Regjons, che al poiave il guvier di prime e che al à la sô scune massime intes regjons dal Est, al stime chestis propuestis masse flapis e al domande une riforme costituzionâl che e siguri un decentrament fuart dai podês aes regjons e un status di couficialitât pe lenghe russe. A restin però realtâts come chês di Kharkiv, Donetsk, Gorlovka, Kramatorsk e Slaviansk là che a son lis miliziis folorussis a controlâ il teren e a rivendicâ consultazions come chês che a àn puartât la Crimee a jessi anetude de Federazion Russe.

Font: Ria Novosti, 24/04/14; Reuters, 18/04/14

Ucraine: rapuart su la situazion des minorancis nazionâls

I ultins acjadiments che a àn scjassât la Ucraine a àn sburtât il Comitât consultîf dal Consei de Europe che al viôt de metude in vore de Convenzion cuadri pe protezion des minorancis nazionâls a visitâ chest paîs e a cjatâsi cui rapresentants di tredis comunitâts di minorance, ven a dî afghans, armens, azeris, bulgars, ebreus, gagaus, gjeorgjians, karaims, kazachis, lezghins, moldâfs, ongjarês, polacs, rom, rumens, rus, tatars, tazics e uzbecs. Di chest viaç, che al è durât dai 21 ai 26 di Març, al è jessût un rapuart publicât ai 3 di Avrîl.

Ongjarie: i dirits dai ongjarês de Ucraine, prioritât par Budapest

Ai 26 di Març il prin ministri ongjarês Viktor Orbán si è cjatât a Budapest cul president vicjari de Federazion Culturâl Magjare de Transcarpatie, Laszlo Brenzovics, par jessi inzornât su la situazion de comunitât ongjarese che e vîf ta cheste regjon de Ucraine. Ducj i doi a àn concuardât su la dibisugne di favorî il procès di svicinament di chest paîs ae Union Europeane. Par Orbán però, la poie dal guvier di Budapest e sarà condizionade dal plen rispiet dai dirits des minorancis, a tacâ dai 150 mil ongjarês che a vivin in Transcarpatie.

Font: Politics.hu, 26/03/14