Europe: pas indaûr dai dirits linguistics intal continent

Ai 7 di Setembar si à tignût a Bruxelles un confront par fâ il pont su la situazion des comunitâts minorizadis europeanis. La iniziative e je stade inmaneade dal intergrup pes minorancis tradizionâls, lis comunitâts nazionâls e lis lenghis cu la poie di diviers grups rapresentâts intal Parlament european. A vierzi la conference al è stât il delegât speciâl de ONU pes minorancis, Fernand De Varennes. Dopo vê marcât ancjemò une volte che i dirits nazionâi e massime chei linguistics a son in dut e par dut dai dirits umans e che a van duncje tutelâts ta cheste suaze, contrari di ce che ciertis istituzions e cierts grups politics a cirin di fâ crodi, De Varennes al à denunciât il fat che tai ultins agns in Europe i dirits des comunitâts minorizadis a son daûr a pierdi teren, massime par chel che al rivuarde la educazion. Il delegât ONU al à ancje condanât la boçadure de bande de Comission europeane des misuris di tutele e promozion che a fasevin part de iniziative popolâr Minority SafePack, cuistion cumò al esam de cort di justizie europeane. La UE – si à dite intant dal incuintri – e à di indotâsi di une suaze normative comune pe tutele des comunitâts minorizadis che ur garantissi il massim nivel di ricognossiment, che e impegni a lotâ cuintri di ogni discriminazion di stamp linguistic o nazionâl e che e previodi il control continuatîf dal rispiet dai dirits di chestis comunitâts.

Font: FUEN, 08/09/22

UE: lis propuestis di ELEN ae conference sul avignî de Europe

ELEN (European Language Equality Network), la Rêt Europeane pe Avualiance Linguistiche, e à fat indenant vot racomandazions pe conference sul avignî de Europe che si proponin di miorâ la cundizion des lenghis minorizadis dal continent. Lis propuestis, nassudis di un confront tra lis realtâts che a componin la Rêt, a son stadis presentadis ai 17 di Fevrâr intal Parlament european inte suaze di un incuintri cul Intergrup su lis minorancis linguistichis. L’intindiment al è chel di rispuindi al faliment des istituzions europeanis intal garantî i dirits dai citadins europeans che a fevelin lenghis minorizadis, certificât de boçadure de iniziative citadine batiade Minority SafePack. Trê des vot racomandazions a domandin di prontâ dai regolaments comunitaris su lis lenghis menaçadis, sui dirits di cui che al fevele lenghis minorizadis e par sigurâ la avualiance linguistiche digjitâl. Chês altris propuestis a integnin la istituzion di un comissari european pes lenghis, di previodi proceduris di infrazion pai stâts che a discriminin des minorancis linguistichis, di creâ dai canâi di finanziament di pueste pes lenghis minorizadis, di slargjâ l’articul 19 dal tratât di fonde de Union ancje ae discriminazion di nature linguistiche o pe partignince a di une minorance nazionâl, e di imbastî un plan di gjestion de diversitât linguistiche fondât sul Protocol di Donostia.

Font: ELEN, 18/02/22

Europe: dirits dai deputâts curdis, Turchie condanade de ECHR

Pal tribunâl european dai dirits umans (ECHR) la Turchie e à violât la libertât di espression dai parlamentârs dal Partît Democratic dai Popui (HDP), moviment di racuelte de comunitât curde, cuant che ur à gjavât la imunitât par podê procedi cuintri di lôr sul plan judiziari. Cundut che e jere stade sostignude tal 2016 cuntun at parlamentâr de coalizion di guvier e di une part de oposizion, pe cort europeane la decision di gjavâur la imunitât ai deputâts dal HDP e va cuintri de Costituzion turche. Fin dal principi i moviments pai dirits umans a vevin acusât il president turc Erdogan di vê imbastît cheste iniziative par cidinâ ducj i siei oposidôrs principâi. La eliminazion de imunitât e à permetût, par esempli, di tignî in preson par passe cinc agns i doi copresidents dal Partît Democratic dai Popui, Selahattin Demirtaş e Figen Yüksekdağ. Su la fonde de sentence dal tribunâl european dai dirits umans, si domande di liberâ i parlamentârs dal HDP ancjemò impresonâts e di sierâ dutis lis causis cuintri di lôr che a restin in pîts.

Font: Balkan Insight, 01/02/22

Europe: prin at legjislatîf par irlandês tal EuroParlament

L’eurodeputât Seán Kelly al à fat indenant un emendament par irlandês sul stampon de opinion su la protezion dal multilateralisim imbastît dal comitât parlamentâr sul cumierç internazionâl. Si trate dal prin intervent legjislatîf di un organisim dal Parlament european scrit par gaelic. Un tant al è stât pussibil in gracie dal plen ricognossiment dal irlandês tant che lenghe di lavôr de Union Europeane. Prime il gaelic si podeve doprâlu dome par intervents orâi tes sessions plenariis de aule ma, cul status gnûf, al pues jessi doprât ancje tes comissions parlamentârs e tai lavôrs legjislatîfs.

Font: CnaG, 27/01/22

Europe: apel pal ricognossiment e la difese dal romani

In ocasion dai 5 di Novembar – Zornade mondiâl de lenghe romani – la presidente dal comitât di esperts su lis tematichis dai Rom e dai Cjaminants dal Consei de Europe (ADI-ROM), Tatjana Anđelić, e à indreçât un apel pal ricognossiment, la tutele e la promozion di cheste lenghe. I Rom, cui lôr 12 milions, no son dome la minorance linguistiche plui gruesse dal nestri continent ma ancje chê plui discriminade. La lôr lenghe, cu lis sôs diviersis varietâts, e je fevelade in cetancj stâts europeans e e rapresente une part integrante dal patrimoni culturâl continentâl. Tra lis finalitâts dal Consei de Europe si à la lote cuintri de discriminazion e la promozion di une societât inclusive che e rispieti la diversitât linguistiche e culturâl. A coventin duncje misuris concretis par che almancul lis gnovis gjenerazions rom a puedin cjapâ cussience e imparâ la lôr lenghe proprie. Par chest fin, il Consei de Europe al à ancje disvilupât un curriculum di riferiment pal romani a disposizion sei des istituzions scolastichis che di chês politichis europeanis.

Font: Council of Europe, 05/11/21

Portugal: firmade la Cjarte europeane pes lenghis

Ai 7 di Setembar, a Strasburc, il rapresentant portughês intal Consei de Europe al à firmât la Cjarte europeane pes lenghis regjonâls o minoritariis. Al centri de iniziative al è il mirandês, une varietât asturiane-leonese fevelade tai comuns di Miranda do Douro, Mogadouro e Vimioso che e rapresente la uniche lenghe minoritarie dal Portugal che le à ricognossude par leç intal 1999. La aministrazion comunâl di Miranda do Douro e la Associazion di Lenghe e Culture Mirandese (Associaçon de la Lhéngua i Cultura Mirandesa) a àn za prontât un stampon cu lis azions previodudis par garantî il rispiet di 35 principis de Cjarte europeane. Il document, une volte fat bon ancje dal guvier portughês, al sarà presentât al Consei de Europe e, su la fonde di chel, si procedarà a ratificâ la Cjarte. In dì di vuê il document al è stât ratificât – e al è duncje in vore – di 25 stâts, intant che altris 9 lu àn dome firmât.

Font: Publico, 08/09/21; COE, 08/09/21

Europe: solidarietât al HDP di çampe e nazionalitaris

Il Grup Unificât de Çampe Europeane (GUE UEL) e chel dai Verts – Aleance Libare Europeane (Greens - EFA) a àn domandât cun fuarce aes istituzions comunitariis di intervignî par condizionâ ogni rapuart cu la Turchie al rispiet dai oblics internazionâi sul plan dai dirits civîi e di chei umans, e a àn manifestât la lôr solidarietât al Partît Democratic dai Popui (HDP), moviment che al racuei une part significative dai vôts de comunitât curde e dai progressiscj turcs. Une posizion similâr e je rivade ancje dal grup de Aleance Progressiste dai Socialiscj e dai Democratics dal Parlament European. Ai 26 di Avrîl, di fat, si à viert a Ankara un procès penâl cuintri di 108 curdis che tal 2014 a vevin manifestât in solidarietât cui lôr conazionâi impegnâts a difindi la citât di Kobanê dal assedi dal Stât Islamic.

Stât spagnûl: il CoE al vûl lis lenghis couficiâls te justizie

Il comitât di esperts dal Consei de Europe (CoE) che al viôt dal rispiet de Cjarte europeane des lenghis regjonâls o minoritariis al à domandât aes istituzions spagnolis di mendâ la leç organiche sul podê judiziari in maniere che, se lu domande une des parts in cause, si puedin doprâ tai procediments judiziaris lis lenghis ricognossudis come couficiâls. Il riferiment al è duncje al catalan in Catalogne, Paîs Valenzian e Baleârs, al basc inte Comunitât Autonome Basche e in Navare, e al galizian in Galizie. Vuê come vuê, ancje par vie che si va dilunc a no domandâi a magjistrâts e funzionaris dai tribunâi la cognossince di chestis lenghis, dispès i procediments a son fats dome par castilian o, al plui, cul ûs di interpretis se une des parts e reste ferme tal so dirit a doprâ la lenghe proprie. Il comitât al à ancje invidât il guvier di Madrid a garantî l’ûs des lenghis couficiâls intai uficis statâi che si cjatin intes Comunitâts cun lenghe proprie.

Font: EiTB, 01/04/21

Cornualie: pal CoE la politiche linguistiche e va devolude

Su la fonde dai controi fats intal Ream Unît su lis azions metudis in cjamp pe protezion de minorancis nazionâls, il Consei de Europe (CoE) al à invidât il guvier britanic a devolvi al Consei de Cornualie lis competencis su lis politichis linguistichis a pro dal cornic e a assegnâi lis risorsis che a coventin par chest fin. Il guvier di Londre al à ricognossût i cornics come minorance nazionâl intal 2014 cul impegn a garantîur lis misuris previodudis de Convenzion europeane pe protezion des minorancis nazionâls. Intai fats però, l’esecutîf britanic al à fat pôc e, ancje chel, cun discontinuitât. Baste pensâ che, se pe anualitât 2019-2020 al veve assegnât al Consei de Cornualie 150 mil sterlinis par promovi e sostignî la lenghe corniche, par chê 2020-2021 nol à previodût nancje un franc. Il Consei de Europe al à batût sul fat che la continuitât di finanziament e je fondamentâl pes politichis linguistichis e al à judicât che il sogjet che al à di planificâlis al à di jessi in Cornualie e no a Londre.

Font: Cornish Stuff, 31/03/21

Europe: apel de EFA cuintri de ilegalizazion dal HDP

Dopo agns di repression che a àn puartât centenârs di siei rapresentants a jessi arestâts e impresonâts, cumò la procure di stât turche e à imbastît une cause par meti fûr leç il Partît Democratic dal Popul (HDP), moviment che al racuei une part significative dai vôts de comunitât curde e dai progressiscj turcs. La acuse e je simpri la stesse doprade par impresonâ i siei dirigjents e i siei militants, o sei chê di jessi leâts al Partît dai Lavoradôrs dal Kurdistan (PKK) di agns in armis cuintri de opression de popolazion curde. Denant di cheste situazion la Aleance Libare Europeane (EFA) – organizazion politiche internazionâl che e met adun cetancj partîts nazionalitaris dal continent – e à indreçât un apel aes autoritâts de UE par che a doprin ducj i lôr podês e la lôr influence par sigurâ la difese dai dirits politics e associatîfs in Turchie, stât a dilunc candidât a jentrâ te Union e membri dal Consei de Europe. Ancje il grup di amicizie curde dal Parlament european al è intervignût par condanâ il tentatîf di ilegalizâ il HDP e par invidâ lis istituzions comunitariis a dâsi une mote. Cheste azion – a disin – no je dome antidemocratiche e ilegâl ma e rapresente il pas finâl in direzion di une ditature.

Font: EFA, 18/03/21

Irlande: sentence a pro dal gaelic te cort di justizie europeane

Il tribunâl di justizie european (ECJ) al à dât reson a di un citadin irlandês che al pretindeve il rispiet de normative che e previôt che lis etichetis e i sfueis informatîfs dai prodots veterinaris vendûts inte Republiche di Irlande a sedin intes dôs lenghis uficiâls, duncje no dome par inglês ma ancje par gaelic. Il procediment judiziari si veve inviât ancjemò tal 2016 denant de cort supreme irlandese. Un gnûf regolament comunitari che al jentrarà in vore cul Zenâr di chest an che al ven al podarès cambiâ la situazion lassant che al sedi il guvier statâl a decidi se doprâ une lenghe o chê altre. Par intant però, ancje in gracie di cheste sentence, al reste l’oblic dal bilinguisim e lis organizazions pe lenghe irlandese a sburtin su lis istituzions di Dublin par che a mantegnin dutis e dôs lis lenghis ancje dopo che al jentrarà in vore il gnûf regolament european.

Font: RTE, 18/03/21

Europe: lis propuestis de ELEN ae Comission Europeane

Intant di un incuintri cu la direzion gjenerâl pe educazion e pe culture de Comission Europeane, i rapresentants de ELEN (European Language Equality Network), la Rêt Europeane pe Avualiance Linguistiche, a àn domandât che l’organisim di guvier de UE al meti in cjamp une rie di azions par garantî i dirits des comunitâts minorizadis. Dongje di ativâ un canâl di comunicazion continuatîf e diret jenfri Comission e ELEN, i delegâts de Rêt a àn domandât di meti sù un font european pes lenghis in pericul, di disegnâ une strategjie di suaze pes lenghis minorizadis, e di creâ un osservatori e un difensôr des lenghis. ELEN e à po domandât ae Comission che e fasi bon un mecanisim par garantî che i stâts membris a rispietin i dirits previodûts de Cjarte des lenghis regjonâls o minoritariis, che e promovi la avualiance linguistiche e che e combati i atacs e lis manifestazions di odi cuintri dai membris des comunitâts minorizadis.

Font: Galicia Confidencial, 02/02/21

Irlande: prime volte dal gaelic tal tribunâl di justizie european

Il tribunâl di justizie de Union Europeane al à celebrât pe prime volte une udience in gaelic irlandês. Al centri dal procediment judiziari si veve il rispiet de normative che e previôt che tai prodots veterinaris vendûts inte Republiche di Irlande lis etichetis e i sfueis informatîfs a sedin intes dôs lenghis uficiâls, o sei no dome par inglês ma ancje par gaelic. Cheste udience e rapresente un pas indenant intal procès di uficializazion de lenghe irlandese intes istituzions de Union Europeane, un procès che al varès di rivâ insom dentri dal 2022 cuant che il gaelic al deventarà ad in plen une des lenghis di lavôr de Union.

Font: EuroNews, 14/01/21

Europe: la Comission Europeane no poie Minority SafePack

Ai 14 di Zenâr la Comission Europeane e à decidût che no cjaparà nissune iniziative par meti in vore lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union che a jerin stadis fatis indenant cu la iniziative citadine batiade Minority SafePack. Daûr de iniziative e jere la FUEN (Union Federâl des Nazionalitâts Europeanis) che, cu la poie di diviersis realtâts espression des comunitâts minorizadis, e veve savût tirâ sù passe un milion e 120 mil firmis certificadis, cjatant po il supuart di diviers orghins legjislatîfs tant che il Parlament federâl todesc, la Cjamare alte neerlandese, il Parlament de Ongjarie e diviersis Assembleis teritoriâls, dal Brandeburc ae Frisie, de Sassonie al Tirôl dal Sud. A sostignî la iniziative cuntune risoluzion che e veve cjatât la poie di plui di trê cuarts dai siei membris al jere stât intal Dicembar passât ancje il Parlament European.

Ream Unît / Gjermanie: a cressin lis tutelis pes minorancis

La Gjermanie e il Ream Unît a àn slargjât lis misuris di tutele garantidis aes comunitâts minorizadis su la fonde de Cjarte europeane des lenghis regjonâls o minoritariis. Al jere dal 2008 incà che nissun dai stâts firmataris al incresseve lis azions di protezion concuardadis intal moment de ratifiche. Ai 6 di Zenâr lis istituzions todescjis a àn informât il Consei de Europe di vê aumentât lis misuris di tutele previodudis sul plan de aministrazion publiche, de toponomastiche e de culture pes popolazions di lenghe danese, frisone e basse todescje che a vivin intal Schleswig-Holstein. E rimonte invezit ai 23 di Dicembar la comunicazion dal guvier britanic là che si fâs savê di vê disvilupât 37 misuris specifichis par promovi la lenghe gaeliche fevelade te isule di Man (manx). A finanziâ e coordenâ chestis azions al sarà il guvier locâl. Tra lis misuris previodudis si à la incressite de presince de lenghe proprie tes scuelis de infanzie, la pussibilitât di comunicâ in forme scrite par manx cu lis istituzions locâls e la promozion de lenghe tai mieçs di comunicazion, inte vite sociâl e economiche de isule, e te cooperazion internazionâl cun Irlande e Scozie là che si fevelin altris lenghis de famee gaeliche.

Font: Council Of Europe, 13/01/21

Europe: il Parlament al da la sô poie al Minority SafePack

Cun 524 vôts a pro, 103 astignûts e 67 contraris, il Parlament European al à manifestât cuntune risoluzion la sô poie al Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane. Intal document si domande ae Comission Europeane di cjapâ lis misuris che a coventin par dâi sostance ae iniziative massime par chel che al rivuarde educazion, servizis publics e culture. Il Parlament al à ancje palesât la sô preocupazion pe incressite dai crimins e dai discors di odi cuintri des personis che a partegnin a comunitâts di minorance. La Comission Europeane e à sîs mês par comunicâ ce azions positivis che e pense di meti in cjamp par rispuindi ae iniziative o ben par motivâ lis resons che le puartin a no fâ nuie.

Font: European Parliament, 17/12/20

Europe: un cuart dai eurodeputâts pe autodeterminazion

Il Parlament european al à votât un emendament sul dirit ae autodeterminazion dai popui che al varès vût di integrâ il document sui dirits fondamentâi de Union Europeane. Cundut de boçadure, e je la prime volte che un cuart dai eurodeputâts al manifeste un consens clâr sul teme. Lis fameis politichis principâls – popolârs, conservadôrs, sociâl democratics e liberâi – a àn votât in maniere massive cuintri dal emendament. La oposizion plui fuarte si le à vude dentri dal Partît Popolâr European là che, su 185 membris, 180 a àn votât cuintri. La poie plui fuarte e je rivade dal grup de Aleance Libare Europeane – Verts cun 68 vôts a pro su 69, de çampe anticapitaliste (GUE/NGL) cun 26 a pro, 12 astignûts e un contrari, e dal grup dai no iscrits, cun 23 vôts a favôr su 27. Une adesion impuartante si le à vude ancje tal grup Identitât e Democrazie cun 31 a pro su 75.

Font: Jornalet, 04/12/20

Ream Unît: Europe critiche sul rispiet dai dirits linguistics

L’ultin rapuart dal Consei de Europe sul rispiet de cjarte europeane des lenghis regjonâls o minoritariis de bande dal Ream Unît al palese no pôcs ponts critics. La situazion plui penze e je chê leade ae Irlande dal Nord là che zaromai di agns si spiete une leç organiche di tutele dal gaelic irlandês che, par altri, e jere part ancje dai acuardis di pâs dal Vinars Sant. Il document al segnale ancje la inazion dal esecutîf britanic in mert ae promozion dal cornic e al invide Londre a trasferî competencis e risorsis pe politiche linguistiche al guvier locâl. Par chel che al rivuarde il galês, i setôrs là che si invide a intervignî cun plui fuarce a son chei de sanitât, de assistence, de educazion privade e dal guvier locâl. In mert al gaelic scozês si invide invezit a intervignî massime su lis radios e lis televisions comerciâls. Tra lis notis positivis, invezit, si à lis politichis metudis in at des autoritâts locâls pe varietât gaeliche fevelade ti isule di Man.

Font: The Guardian, 08/09/20

Irlande: a coventin plui docents pes scuelis a imersion dal Nord

Sul prin tacâ di Lui al è stât presentât al consei dai ministris britanic il rapuart dal comitât di esperts dal Consei de Europe su la Cjarte europeane des lenghis regjonâls o minoritariis cun riferiment ae situazion de Irlande dal Nord. Il prin element marcât dal document al è che la politicizazion dal gaelic irlandês e va dilunc a pesâ sui ûs publics e su la promozion di cheste lenghe. Sul plan specific de educazion, a front di une incressite progressive dai fruts iscrits aes scuelis a imersion, e aumente ancje la dibisugne di insegnants e di struturis scolastichis. L’invît dai esperts al è duncje di cressi il numar di scuelis publichis a imersion e di infuartî il sisteme di formazion par preparâ professôrs in stât di insegnâ lis lôr materiis par irlandês. Une altre dibisugne sintude e je di aumentâ la programazion radiotelevisive par gaelic dentri de emitente publiche BBC.

Font: BBC, 04/07/20

Europe: scandai sul ûs des lenghis propriis te crisi Covid-19

Jenfri i 31 di Març e i 30 di Avrîl la FUEN (Union Federâl des Nazionalitâts Europeanis) e à domandât ai siei associâts di davuelzi un scandai sul ûs des lenghis minorizadis intes ativitâts informativis e educativis leadis ae crisi epidemiologjiche in at. Lis rispuestis rivadis a àn tocjât 29 comunitâts presintis in 18 stâts europeans. Il scandai al è duncje parziâl e al fotografe dome la situazion des comunitâts plui ativis ma, chel istès, al ufrìs elements di riflession interessants. Par chel che al rivuarde la informazion su la epidemie e sui siei efiets, intal 52% dai câs si le à vude ancje tes lenghis propriis. A dâle par solit a son stâts i mieçs di comunicazion e lis organizazions di riferiment des minorancis stessis e, in cualchi câs, i guviers regjonâi. Simpri tal 52% dai câs si à vude la difusion di informazions sanitariis intes lenghis minorizadis: su chest front si à vût un ativisim plui fuart de bande des istituzions locâls. Intal 55% dai câs esaminâts si à vude la pussibilitât di vê spazis educatîfs intes lenghis propriis ancje intant de sierade des scuelis. Intal 14% cheste pussibilitât e je stade presinte ma dome in forme limitade. Intal 21% dai câs i students no àn vût acès a nissun gjenar di educazion inte lôr lenghe proprie che si à di zontâi un 10% là che cheste pussibilitât no jere garantine nancje prime de emergjence sanitarie. Al è di dî però che, ancje là che il servizi al è stât garantît, dispès al è stât plui par merit dai insegnants o des scuelis che no des istituzions. La emergjence e à ancje marcât la scjarsetât di formazion, materiâi e imprescj par podê davuelzi in maniere corete l’insegnament a distance.

Font: FUEN, 11/05/20