Abkhazie: pe prime volte i abkhazis a son maiorance

Pe prime volte di un secul incà lis personis che si declarin di nazionalitât abkhaze a son maiorance assolude in Abkhazie, regjon che si è autoproclamade indipendente de Gjeorgjie sul finî dal 2008. La gnove e ven fûr dai dâts dal censiment uficiâl che si à tignût ta cheste republiche vie pal 2011 e che a son a pene stâts rindûts publics. Cun di fat, dai passe 240 mil abitants dal paîs, chei che si declarin abkhazis a son il 50,7% dal totâl. Daûr dai censiments uficiâi, bisugne tornâ al 1897 par cjatâ la ultime volte che i membris di cheste comunitât nazionâl a jerin maiorance intal lôr teritori. Po dopo, la rivade massive di gjeorgjians, rus e armens ju veve puartâts sot dal 50% de popolazion totâl. Daûr dal censiment dal 2011 lis minorancis plui gruessis a son chê armene, cul 17,4% dal totâl, e chê russe cul 9,2% de popolazion.

Font: Mòn Divers, 30/12/11

Ossezie: Gjeorgjie ricognossude responsabile de vuere dal 2008

Une comission indipendente metude in pîts de Union Europeane e à ricognossût il president gjeorgjian Mikhail Saakashvili tant che responsabil di vê inviât la vuere sclopade intal Avost dal 2008 cun chê di ocupâ la Ossezie meridionâl. Il president de Gjeorgjie, invezit, al veve simpri dineât lis sôs responsabilitâts acusant la Russie di vê agredît il so paîs. La comission, dut câs, e à ancje criticât la Russie par vê ricognossût la indipendence proclamade subite dopo dal atac gjeorgjian, sei de Ossezie meridionâl che de Abkhazie.

Font: Món Divers, 01/10/09

Ossezie e Abkhazie: la Russie e domande un tratât di no agression

Il president rus, Dimitri Medvedev, intune letare mandade al president francês, Nicolas Sarkozy, al à sburtât su la dibisugne di un tratât di no agression tra Gjeorgjie, Abkhazie e Ossezie meridionâl. Dome ta cheste maniere, al spieghe il cjâf di stât rus, si pues evitâ che si vedin altris episodis di violence e che e sedi garantide la sigurece des popolazions civîls di chei teritoris. Cun di plui, inte letare, si invide ancje i membris de Union Europeane a blocâ la vendite di armis ae Gjeorgjie. L’intervent dal president rus al rive juste a un an di distance dal conflit discjadenât des trupis gjeorgjianis e che, daspò dal intervent rus, al veve puartât ae proclamazion unilaterâl de indipendence de Abkhazie e de Ossezie meridionâl. Pocjis zornadis indaûr, la tension si veve tornade a alçâ par vie di diviers scuintris a fûc causâts di milizians gjeorgjians.

Font: RIA Novosti, 06-08/08/09

Abkhazie e Ossezie: la Europe e domande ae Russie di zirucâ

La assemblee dal Consei de Europe e à votât une risoluzion che e domande ae Russie di ritirâ il so ricognossiment ae indipendence de Abkhazie e de Ossezie meridionâl e di rispietâ la integritât teritoriâl dal stât gjeorgjian. Lis autoritâts russis, dut câs, a àn daurman rispuindût di no vê nissune intenzion di fâ ziruc. La Russie, in plui di ricognossi lis dôs republichis caucasichis, e à za sotscrit cun lôr dai acuardis di difese. Propit inte suaze de colaborazion militâr tra chescj paîs, si podarès viodi in curt in Abkhazie la nassite di une base navâl pe flote russe dal mâr Neri.

Font: Nationalia, 29/01/09

Cossovo e Abkhazie: tal 2009 altris ricognossiments

Sei il guvier cossovâr, sei chel de Abkhazie a sperin che il 2009 al puarti altris stâts a ricognossi la lôr indipendence. Il ministri pai afârs forescj dal Cossovo, Skënder Hyseni, al à dite di spietâsi un grum di ricognossiments dilunc vie dal an. Che un tant al puedi sucedi, al ven ricognossût ancje dal ministri serp pai forescj, Vuk Jeremic, che al à declarât che a saressin almancul uns cincuante i stâts che a son daûr a subî pressions fuartis par ricognossi la indipendence dal Cossovo. In dì di vuê, il paîs balcanic al è za stât ricognossût di 53 stâts, tra chescj cuasi ducj chei de Union Europeane fûr che Cipri, Grecie, Romanie, Slovachie e Spagne. Situazion plui grivie, invezit, pe Abkhazie che, a vuê, e je stade ricognossude dome de Russie e dal Nicaragua. Il guvier de republiche caucasiche, dut câs, al à fat savê che la Belarùs e varès di jessi il tierç stât a ricognossi la sô indipendence. Dut câs, tra i guviers che a podaressin cjapâ cheste strade a son ancje chei jordan, libanês, libic e sirian.

Font: Món Divers, 09/01/09

Pontade 18 08 (02/09/08) - 7

Ossezie e Abkhazie: la Russie e ricognòs la lôr indipendence

Ai 26 di Avost, la zornade daspò che lis dôs ramis dal Parlament rus a vevin votât par che il guvier al ricognossès la indipendence de Ossezie meridionâl e de Abkhazie, il president de Federazion Russe, Dimitri Medvedev, al à comunicât di vê ricognossût in maniere uficiâl la indipendence des dôs regjons dal stât gjeorgjan. Cun di fat, al à spiegât il president rus, daspò dal tentatîf decidût dal president gjeorgjan Mikhail Saakashvili ai prins di Avost di recuperâ cu la fuarce i teritoris de Ossezie meridionâl, ogni ipotesi di convivence pacifiche di cheste regjon e de Abkhazie dentri de Gjeorgjie e je lade sù pai stecs. Medvedev al à ancje fat riferiment ai referendums che si son tignûts ta chescj teritoris par rivendicâ la lôr indipendence. Il president rus al à po invidât chei altris stâts a ricognossi ancje lôr la indipendence des dôs republichis caucasichis. Fin cumò, dut câs, la decision russe no à cjatât nissune poie. Lis protestis plui duris a son rivadis, in plui de Gjeorgjie là che Saakashvili al à acusât la Russie di vê anetût i doi teritoris, dai Stâts Unîts e de Union Europeane, ancje se no si à cjatât un front comun su cemût rispuindi ae decision russe.
Al è dificil di dî ce consecuencis che cheste decision e varà sei pe aree caucasiche, sei in altris teritoris là che si àn fuartis tindincis indipendentistis. A tacâ de stesse Federazion Russe là che i ponts plui cjalts a son la Cecenie e la Ingussezie. Par intant Ossezie meridionâl e Abkhazie a jentrin te liste di chei stâts che a puedin svantâ dome un ricognossiment parziâl tant che Taiwan, il Sahara Ocidentâl, il Cossovo (che fin cumò al è stâts ricognossûts di uns 45 membris de ONU) e la Republiche turche di Cipri setentrionâl (ricognossude dome de Turchie).
Font: Món Divers, 26/08/08; Nationalia, 26/08/08

Pontade 17 08 (19/08/08) - 4

Ossezie e Abkhazie: daspò dai scuintris si infuartìs la voie di indipendence

Ai 16 di Avost, la zornade daspò che al jere za stât fat dal president gjeorgjan Mikhail Saakashvili, ancje il president rus Dimitri Medvedev al à sotscrit il plan in sîs ponts fat indenant de Union Europeane par meti fin al conflit armât che si veve impiât cualchi zornade prime daspò di un aument progressîf de tension jenfri Gjeorgjie e Russie su la Ossezie meridionâl. Il document al previôt l’impegn des parts in cause a no doprâ la fuarce e a meti fin a ducj i combatiments, cul ritîr dal esercit gjeorgjan intes casermis e di chel rus su lis posizions tignudis prime dal sclop de vuere, e a permeti che i jutoris umanitaris a rivin tes zonis fiscadis dal conflit. Cun di plui, il plan al dîs che si varà di vierzi un dibatiment internazionâl sul status de Ossezie meridionâl e de Abkhazie. Cundut a chel, la situazion e reste malsigure e a son segnaladis inmò azions armadis ca e là.
Su lis resons che a son daûr di chest gnûf sclop dal conflit lis versions a son diviersis. Cun di fat, i gjeorgjans a fevelin di agression russe, intant che i rus a disin di vê rispuindût ai atacs des trupis gjeorgjanis cuintri de Ossezie meridionâl. Al centri di dut a saressin, di fat, la Ossezie meridionâl e la Abkhazie: dôs regjons storichis là che a vivin popolazions diviersis di chês gjeorgjanis par lenghe, culture, e v.i. che za dai agns ’90 dal secul stât si son autoproclamadis republichis indipendentis. Une indipendence di fat che no ven ricognossude ni de Gjeorgjie che e rivendiche la plene sovranitât su chescj teritoris, ni di chei altris stâts dal mont, ma che e gjolt de protezion militâr de Russie. Cu la implosion de Union Sovietiche e de proclamazion de indipendence de Gjeorgjie, la Ossezie si è cjatade taiade in doi, cu la part setentrionâl ricognossude tant che republiche inte suaze de Russie e chê meridionâl sot de Gjeorgjie. Une situazion che no je mai stade acetade dai ossêts meridionâi e nancje dai abkhazis che a rivendichin la plene indipendence dai lôr teritoris. Tal câs de Ossezie meridionâl, che intal Novembar dal 2006 e à ancje tignût un referendum là che il 95% dai votants al à dite di sì ae indipendence, une altre alternative judicade pussibile e je chê de riunificazion cu la part setentrionâl de regjon inte suaze de Russie.
Daûr di cheste situazion – che si pues insuazâ inte lote pe autodeterminazion puartade indenant, cun formis une vore diviersis tra di lôr, di cetantis nazionalitâts minorizadis ancje inte Europe ocidentâl – si platin però ancje interès di nature economiche e strategjiche di bande di altris stâts che a doprin la difese dai dirits di chestis comunitâts dome tant che scuse. Tal câs specific, la Russie di une bande e judiche la politiche – ancje militâr – filoamericane de Gjeorgjie une provocazion e di chê altre e je preocupade pes consecuencis economics che le colpiressin cui oleodots che si vûl fâ passâ tal teritori gjeorgjan. I Stâts Unîts, invezit, a puartin indenant za di agns une politiche simpri plui fuarte di inclusion des ex republichis sovietichis inte aree di influence dal Pat Atlantic e di svilup di percors energjetics che a tain fûr la Russie (ma ancje Cine e Iran) sei sul front caucasic, sei su chel de Asie centrâl (là che, duncje, a cuistin une impuartance di fonde Afghanistan e Pakistan). Al è just di ricuardâ che chê stesse Russie che vuê e volarès presentâsi tant che la protetore des nazionalitâts tibiadis (Ossezie meridionâl e Abkhazie) e je la stesse che e je responsabile di une vere politiche di gjenocidi in Cecenie, de “vuere sporcje” (come che le definìs la organizazion internazionâl Human Rights Watch) in Ingussezie, e di violencis cuintri altris comunitâts minorizadis tant che i Mari. I Stâts Unîts, che par bocje dal lôr president a àn declarât che Abkhazie e Ossezie meridionâl a son gjeorgjanis e no puedin vê la indipendence, a son i stes che invezit a àn fat di dut par rivâ ae indipendence dal Cossovo e a son tra i prins a vêle ricognossude.
Propit la vicende dal Cossovo e veve tornât a impiâ lis sperancis di indipendence par ossêts meridionâi e abkhazis. Di fat, la pussibilitât di vignî a pats cu la Gjeorgjie e ven judicade impussibile: il president de Republiche abkhaze, Sergei Bagapsh, al spieghe che “la Gjeorgjie e je indipendente a pene di 18 agns, ma e à za fat siet vueris cuintri de Abkhazie”. Une posizion, la sô, condividude ancje dal president de Ossezie meridionâl, Eduard Kokoity, che al spere che cumò, come che al previôt il plan european, si puedi rivâ a di un acuardi internazionâl sul avignî des dôs Republichis autoproclamadis. Ancje se, al zonte Bagapsh, intant di chest ultin conflit si à viodût a clâr che la ONU no je une garanzie cuintri des agressions militârs gjeorgjanis.
Font: Gara, 16/08/08; Vilaweb, 16/08/08; Nationalia, 14/08/08; La Repubblica, 13-16/08/08